Baka Aia ma Azahoan’ny Vavolombelon̈on’i Jehovah Vola?

Baka amy fan̈amezan̈a an-tsitrapô amezan’ny Vavolombelon̈on’i Jehovah ankamaraozan’ny vola mampandeha asa ataonay eran-tany.a Amy tany fivorianay, misy boaty andatsahan̈a zay vola tindry. Ankoatran’izen̈y, misy fomba hafa mety an̈anaovan̈a fan̈amezan̈a hazavain̈a amy sitinay amy jw.org, amin’ny “Fan̈amezan̈a.” Lan̈iany olo han̈ano fan̈amezan̈a amin’izio ao afaka mifidy asa izy han̈ano fan̈amezan̈a niny asa eran-tany, sa niny fiangonan̈a amy toeran̈a iô, sa irô roe.

Vavolombelon̈on’i Jehovah tsy takian̈a ampahafolon-karian̈a. Irô tsy takian̈a hamaritry ôtrino amin’ny karamandrô tsy maintsy amiandrô. (2 Korintianina 9:7) Amy tany ivorianay an̈y tsisy tanty rakitry na koa vidim-pidiran̈a. Zahay koa tsy mitaky vola koa fa asain̈y mitariky fotoam-pivavahan̈a lera misy batisa, mariazy, na fandiven̈ana. Tsy man̈ano fitadiavam-bola koa zahay, ohatra mivarotro gatô na raha hafa, na man̈ano karazan̈a saoma azahoan̈a vola, na koa tombolà. Zahay tsy mitaky vola amin’olo. Aviô an̈aran̈an’olo nan̈ano fan̈amezan̈a tsy ton̈onin̈y na atao hitan’olo. (Matio 6:2-4) Amy sitinay ao tsisy pibilisite fitadiavam-bola. Tsisy raha karaha zen̈y koa an̈atin’ny boky ndreky gazetinay.

Isaka fanjava, ambara fiangonan̈an’ny Vavolombelon̈on’i Jehovah tsiaraikiaraiky tatitry mikasiky kaontin’ny fiangonan̈a, lera irô mivory. Arain̈a maso tsy tapaka kaontin’ny fiangonan̈a tsiaraikiaraiky misy ahitan̈a asa miasa tsara vola fan̈amezan̈a azondrô.​—2 Korintianina 8:20, 21.

Fomba an̈anaovan̈a fan̈amezan̈a

• Boaty andatsahan̈a fan̈amezan̈a: Mety alatsakanao ao vola na seky. Misy boaty io amy Tran̈o Fivorian̈a na Tran̈o Fan̈anaovan̈a Fivoriambe na koa amy tany hafa an̈anaovan̈a fivorianay.

• Fan̈amezan̈a amin’ny Internet: Amy tany maro, anao afaka miditry amy pazy “Hanao fanomezana ho an’ny Vavolombelon’i Jehovah.” Ao anao afaka mampiasa karty fan̈ifan̈a vola, mandefa vola baka amy kaontinao amy banky, na fomba hafa.b Misy Vavolombelon̈on’i Jehovah sasany efa ‘manokan̈a vola’ isaka fanjava, ke irô amy zay mampiasa fomba aby nikoran̈intsika tiô in̈y andifasan̈a vola io tsy tapaka.​—1 Korintianina 16:2.

  

• Fomba hafa: Misy karazan̈a fan̈amezan̈a sasany mila fioman̈ana tsialohaloha. Ndraikindraiky koa anao tsy maintsy mizaha lalàn̈a misy amy toeran̈a iô momba fan̈anaovan̈a fan̈amezan̈a. Fan̈anaovanao zen̈y mety hampihen̈y hetra ifainao. Maro olo nahazo hatsaran̈a karaha zen̈y izikoa fa nikaroko tsara antsendriky talohan’irô nan̈ano karazan̈a fan̈amezan̈a sasany. An̈isan’izen̈y fan̈amezan̈a atao amin’ny anten̈a mbala velon̈o, na fan̈amezan̈a efa voaoman̈a halefa lera anten̈a maty. Izikoa anao tihan̈ano fan̈amezan̈a karaha zen̈y, manorata na kahia birôn’ny sampan̈an’ny Vavolombelon̈on’i Jehovah amy tany misy anao:

  • kaonty amy banky

  • assurance ndreky retirety

  • tran̈o ndreky tany

  • didim-panan̈ana ndreky fanankinam-panan̈ana

Izikoa tianao ho hay ino aby fomba mety an̈anaovan̈a fan̈amezan̈a amy tany misy anao, zahava amy pazy “Hanao fanomezana ho an’ny Vavolombelon’i Jehovah.”