Izio ma Vavolombelon̈o Jehovah Manan̈a Baibolindro Manokan̈a?

Vavolombelon̈o Jehovah mampiasa fandikanteny samihafa lera mianatra Baiboly. Ten̈a tianay fo Ny Soratra Masina​—Fandikan-tenin’ny Tontolo Vaovao, amy volan̈a efa nandikan̈a izio, fotony izio mampiasa an̈aran̈a Zan̈ahary sady mazava, baka io koa marin̈y tsara.

• Mampiasa an̈arany Zan̈ahary. Nisy pan̈amboatra Baiboly tsy nan̈amia voninahitry araiky nampanoratra Baiboly io foeky. Ohatra ziô, an̈aty fandikanteny Baiboly araiky, ahitan̈a an̈aran̈andro olo mandilatrany 70, nandray anjara tamy fan̈aboahan̈a izio. Kanefa, an̈arany Jehovah Zan̈ahary, araiky nampanoratra Baiboly io ndraiky tsy nampidirindro tamy Baiboly io!

  Nampody tan̈aty Fandikan-tenin’ny Tontolo Vaovao ndraiky an̈aran̈a Zan̈ahary io, amy pilasy mandeha andrivony ahitan̈a izio tamy voanalohany tan̈y. Tsy nisoratindro olo nandray anjara tamy fan̈aboahan̈a fandikanteny io tamy Baiboly io tao koa an̈aran̈andro.

• Marin̈y tsara. Tsy zay fandikanteny jiaby misy zay man̈ambara amy fomba marin̈y tsara raha koran̈iny Baiboly tamy voanalohany tan̈y. Ohatra ziô, karaha ty nandikan̈a Matio 7:13 amy fandikanteny araiky zay: “Midira amy varavaran̈a tery, fotony maventy varavaran̈a mandeha amy motrobe avio tsy sarotro mandeha amy lalan̈a zen̈y.” Kanefa, “fandripahan̈a” raha tiany Baiboly tamy voanalohany tan̈y koran̈iny, fa tsy “motrobe” zen̈y. Mety iro pandika teny aby io nampiditry volan̈a “motrobe” io tao, fotony donko iro nino fa handeha hampijalian̈a mandrakizay amy motrobe lan̈iany olo ratsy fan̈ahy. Tsy zen̈y foeky raha ampianariny Baiboly. Ke ten̈a marin̈y fomba nandikan̈a andininy io amy Fandikan-tenin’ny Tontolo Vaovao ao. Karaha ty koran̈iny ao: “Midira amy varavaran̈a tery. Maventy sady malalaka lalan̈a mandeha amy fandripahan̈a.”

• Mazava tsara. Fandikanteny tsara zen̈y tsy vitanizy mila marin̈y fo, fa tôkony hazava tsara, na izikoa atao amy volan̈a hafa, tôkony ho mora azonolo. Karaha ty ohatra dikany volan̈any apostoly Paoly, amy Romanina 12:11 ao izikoa adika arabakiteny: “Amy fan̈ahy mandevy.” Kanefa amy teny gasy, volan̈a zen̈y tsy ten̈a misy dikany. Zen̈y mahavy izio amy Fandikan-tenin’ny Tontolo Vaovao natao mora azo. Mivolan̈a izio fa Kristianin̈y zen̈y tokony ‘hirietiny fan̈ahy masin̈y.’

Tsy zen̈y fo fa mbala misy raha hafa koa mampiavaka Fandikan-tenin’ny Tontolo Vaovao io. Tsy basinizio ao ahitan̈a an̈aran̈a Zan̈ahary, mazava baka io marin̈y tsara, fa izio rasain̈a bojo koa. Afaka mahazo ndreky mamaky izio olo jiaby, na olo tsy mahavanga Baiboly. Ke efa antapitrisany olo afaka mamaky Baiboly amy fivolan̈anandro.