Fanjakan̈any Zan̈ahary ma An̈aty Fonao Ao?
Valiny baka amy Baiboly
Ehe, Fanjakan̈any Zan̈ahary io tsy an̈aty fony Kristianin̈y.a Baiboly man̈ambara mazava fa izio “Fanjakan̈any lan̈itry.” (Matio 4:17) Diniha akory han̈aboahany Baiboly fa ten̈a fitondrasan̈a efa miasa andan̈itry an̈y izio.
Amy Fanjakan̈any Zan̈ahary io misy pitondra, olo indesiny, lalàn̈a, ndreky fahifan̈a han̈atanteraka sitrapony Zan̈ahary andan̈itry an̈y ndreky ambony tany eto.—Matio 6:10; Apokalypsy 5:10.
Fitondrasan̈a na Fanjakan̈any Zan̈ahary io hanjaka amy ‘vahoaka ndreky firenena, ndreky olo samy amy fivolan̈any’ ambony tany eto. (Daniela 7:13, 14) Zan̈ahary man̈amia fahifan̈a iro hanjaka amizio, fa tsy olombelon̈o mifidy.—Salamo 2:4-6; Isaia 9:7.
Jesosy nivolan̈a taminy apostolinany tsy nivadiky taminany fa iro hiaraka aminany amy Fanjakan̈a andan̈itry an̈y, ke “hipetraka amy sezy fiandrianan̈a.”—Lioka 22:28, 30.
Fanjakan̈a io manan̈a fahavalo mbala haripany.—Salamo 2:1, 2, 8, 9; 110:1, 2; 1 Korintianina 15:25, 26.
Baiboly tsy mampianatra foeky fa Fanjakan̈any lan̈itry io an̈aty fontsika ao, dikanizen̈y tsy hanjaka baka an̈aty fontsika ao izio. Fa koran̈iny ao ndraiky fa “volan̈any Fanjakan̈a” io na “vaovao tsarany Fanjakan̈a” io mety hisy vokany amy fontsika sady tokony hisy vokany amintsika koa.—Matio 13:19; 24:14.
Ino dikany “Fanjakan̈any Zan̈ahary an̈atinaro” zen̈y?
Mampavery hevitry olo maro volan̈a amy Lioka 17:21 ao, amy fandikanteniny Baiboly sasany. Ohatra, karaha ty izio amy Fandikan-teny Protestanta: “Ny fanjakan’Andriamanitra dia ao anatinareo.” Mila mizaha raha nisy tamy fotoan̈anizen̈y atsika baka hazava amintsika dikanizio.
Fanjakan̈any Zan̈ahary tsy mety ho tan̈atiny fonolo tsy tia Jesosy ndreky pamono olo aby io
Jesosy tamy zen̈y nikoran̈a tamindro Fariseo, na pitariky fivavahan̈a tsy tia izy aby io ke nila hamono izy. (Matio 12:14; Lioka 17:20) Ke Jesosy ma nieritreritry fa Fanjakan̈any Zan̈ahary zen̈y man̈eva atao an̈atiny fonolo ratsy jery karaha zen̈y? Ho Jesosy tamindro: “An̈atinaro ao feno fihatsarambelatsihy ndreky fandikan̈a lalàn̈a.”—Matio 23:27, 28.
Misy koa fandikanteny man̈azava tsarabe fa dikany volan̈any Jesosy amy Lioka 17:21 io karaha ty: “Fanjakan̈any Zan̈ahary miaraka aminaro.” Avio karaha ty koa izio amy Fandikan-tenin’ny Tontolo Vaovao: “Fanjakan̈any Zan̈ahary an̈ivonaro iô.” Fotony baka Jesosy Panjaka nifidiny Zan̈ahary hanjaka amizio taminio, niaraka tamindro Fariseo aby io tiô. Izy nitsangana talohandro tiô.—Lioka 1:32, 33.
a Maro fivavahan̈a mampianatra fa Fanjakan̈any Zan̈ahary io raha an̈atinolo ao, an̈atiny fô zen̈y. Ohatra, misy Encyclopedie Katolika (angiley) zay mivolan̈a karaha ty: ‘Fanjakan̈any Zan̈ahary zen̈y, Zan̈ahary manjaka an̈atiny fontsika ao.’ Tsisy ny hafa amy zen̈y koa raha koran̈iny boky Jesoa Baka a Nazareta. Ao Papa Benedict XVI mivolan̈a fa “Fanjakan̈any Zan̈ahary io an̈atiny fonolo man̈araka volan̈anany.”