FAN̈ONTANIAN̈ANY TANORA
Nan̈ino ma Anao Mila Mandeha Mivory amy Tran̈o Fivorian̈a An̈y?
Indroe isaka herin̈iandra, misy fivorian̈a alamin̈iny Vavolombelon̈o Jehovah amy toeran̈a fivavahandro an̈y. Izio kaian̈a Tran̈o Fivorian̈a. Ino ma raha atao an̈y? Baka io akory hazahoanao hatsaran̈a amizio?
Ino ma raha atao amy Tran̈o Fivorian̈a?
Tran̈o Fivorian̈a io toeran̈a fianaran̈a Baiboly. Fivorian̈a atao an̈y io afaka han̈ampy anao:
hahay ny marin̈y momba Zan̈ahary.
hahay ino antony mahavy raha mandalo izioty io.
hanan̈a toetry tsara.
hahazo naman̈a tsara.
Asa mba hainao? Toeran̈a ivoriany Vavolombelon̈o Jehovah io kaian̈a Tran̈o Fivorian̈a Momba Fanjakan̈any Zan̈ahary, fotony Fanjakan̈any Zan̈ahary raha ten̈a koran̈iny an̈y.—Matio 6:9, 10; 24:14; Lioka 4:43.
Nan̈ino ma anao mila mandeha mivory?
Hevitry koran̈iny an̈y afaka han̈ampy anao. Misy toro lalan̈a Baiboly koran̈iny amy fivorian̈a aby io, ke iro io han̈ampy anao “hanan̈a fahendrena.” (Ohabolana 4:5) Dikanizen̈y, Baiboly afaka han̈ampy anao han̈ano fanapahankevitry tsara. Izio koa afaka han̈ampy anao hahita valiny fan̈ontanian̈a maro maventy momba fiain̈ana, karaha ataony:
Ty sasany amy titra kabaro atao amy fivorian̈a amy farany herin̈iandra:
Nan̈ino ma Atsika Mila Taridalan̈a Baiboly?
Aia Mety Hazahoanao Fan̈ampian̈a amy Fotoan̈a Sarotro?
Ino Raha Efa Ataony Fanjakan̈any Zan̈ahary Nintsika Izioty?
“Nisy tsaiky lekoly araiky taminaka zay navy nivory. Izy niaraka nipetraka taminay. Izy koa nan̈aboahanay boky. Gaga mare zen̈y izy hoizy naharen̈y valinteny amiany pan̈atriky. Amy leglizindro an̈y zen̈y koa hoizy tsisy boky ianaran̈a karaha ataontsika io.”—Brenda.
Asa mba hainao? Tsy man̈efa miditry amy Tran̈o Fivorian̈a, sady an̈y koa tsisy tanty rakitry.
Misy naman̈a mankahery. Baiboly mivolan̈a fa antony araiky mahavy Kristianin̈y mila miaraka mivory, baka “hifankahery.” (Hebreo 10:24, 25) Amy donia feno olo tia ten̈a ty, ten̈a mankahery izikoa anao minaman̈a aminolo tia Zan̈ahary ndreky tia olo.
“Zaho mahatsiaro kajo sady malahelo, izikoa fa tapitry andra araiky. Fa miova zen̈y lera zaho avy ampivorian̈a an̈y. Mahatsiaro ravoravo mare zaho miaraka aminolo an̈y. Lera zaho mody, zaho ravoravo sady von̈ono koa hiatriky ny amaray.”—Elisa.
Asa mba hainao? Erantany, efa misy fiangonan̈any Vavolombelon̈o Jehovah mandilatra 120 000. Iro mivory amy toeran̈a mandilatra 60 000. Mahaimaro fo olo man̈atriky fivorian̈a aby io. Ke isaka taon̈o, kadiriny 1 500 Tran̈o Fivorian̈a vaovao iasain̈y, amy zen̈y olo aby io mahazo toeran̈a hivorian̈a.a
a Izikoa anao tihitady tany misy Tran̈o Fivorian̈a, midira amy pazy “Fivorian̈any Vavolombelon̈o Jehovah”, baka io kitia aminy “Hitady Tany Marikitry Anao.”