Akory Ataony Jesosy Mamonjy Atsika?

Valiny baka amy Baiboly

Jesosy namonjy olombelon̈o taminizy nan̈amia ain̈inany natao soron̈o in̈y. (Matio 20:28) Zen̈y mahavy Baiboly mivolan̈a fa Jesosy “Pamonjy donia ty.” (1 Jaona 4:14) Karaha ty koa volan̈iny ao: “Tsisy olo hafa hazahoan̈a famonjian̈a, fotony tsisy an̈aran̈a hafa ambaniny lan̈itry namian̈a olo hazahoan̈a famonjian̈a.”​—Asan’ny Apostoly 4:12.

Jesosy naty han̈avotan̈a “lan̈iany olo man̈aboaka finoan̈a izy.” (Hebreo 2:9; Jaona 3:16) Ke izy koa fa ‘nivilominy Zan̈ahary’, izy nimpody andan̈itry an̈y ndraiky koa. (Asan’ny Apostoly 3:15) Izy andan̈itry an̈y izioty io mahavita mamonjy tsarabe iro olo jiaby man̈aton̈o Zan̈ahary, aminy alalany Jesosy. Fotony nan̈ino? ‘Fotony izy velon̈o fo, ke hiangavy Jehovah han̈ampy iro.’​—Hebreo 7:25.

Nan̈ino ma atsika mila Jesosy hiangavy Jehovah han̈ampy atsika?

Atsika jiaby io tsisy tsy panota. (Romanina 3:23) Fahotan̈a io mampisaraka atsika amy Zan̈ahary, ke baka amizio mahavy atsika maty. (Romanina 6:23) Fa nakiry izy, Jesosy ‘avôkantsika’, ke izy han̈ampy lan̈iany olo man̈aboaka finoan̈a soron̈o nataony. (1 Jaona 2:1) Izy miangavy Jehovah han̈ampy iro, ndreky hitandren̈y vavakandro ndreky hamela helokondro. Izy baka efa nan̈amia ain̈inany hatao soron̈o han̈avotan̈a iro. (Matio 1:21; Romanina 8:34) Zan̈ahary man̈eky fangatahan̈a ataony Jesosy io, fotony izio mifan̈araka amy sitrapony Zan̈ahary. Izy nan̈iraka Jesosy nandeha tambony tany teto, fotony taminy alalany Jesosy namonjiany Zan̈ahary donia ty.​—Jaona 3:17.

Ke izikoa ma olo araiky fa mino Jesosy, efa voavonjy edy izy?

Tsy karaha zen̈y. Marin̈y ndraiky fa tokony hino Jesosy atsika, baka atsika ho voavonjy. (Asan’ny Apostoly 16:30, 31) Fa tsy ampy izikoa mino Jesosy karaha io fo. Karaha ty baka ho Baiboly: “Vatan̈a koa tsisy fahin̈ana maty, karaha zen̈y koa, finoan̈a koa tsy aboaka amy raha atao, maty koa.” (Jakoba 2:26) Ty raha tsy maintsy ataonao, izikoa anao mba tiho voavonjy:

• Mianara momba Jesosy ndreky Jehovah Babany.​—Jaona 17:3.

• Ampitombosa finoan̈anao iro.​—Jaona12:44; 14:1.

• Aboaha finoan̈anao, ke areha raha volan̈indro. (Lioka 6:46; 1 Jaona 2:17) Jesosy nampianatra fa tsy lan̈iany olo mivolan̈a aminany “tompoko” ho voavonjy fa lan̈iany olo ‘man̈ano sitrapony Babany andan̈itry an̈y fo.’​—Matio 7:21.

• Aboaha fo finoan̈anao nata anao mandalo raha sarotro. Mazava volan̈a Jesosy momba zen̈y: “Lan̈iany miaritry firaka amy farany fo ho voavonjy.”​—Matio 24:13.