Zaho Tihofoaty​—Baiboly ma Afaka Man̈ampy Zaho Izikoa Zaho Mieritreritry Hamono Ten̈a?

Valiny baka amy Baiboly

Ia! Baiboly io baka amy “Zan̈ahary pankahery olo nambanin̈a.” (2 Korintianina 7:6) Baiboly io nata tsy bokiny fahasalaman̈a, izio nan̈ampy olo maro efa navy tseky hamono ten̈a. Mety han̈ampy anao koa iro torohevitry aby ao.

• Ino ma torohevitry tsara koran̈iny Baiboly?

• Baiboly ma mikoran̈a momba olo tihofoaty?

• Ino aby toko sy andininy han̈ampy anao han̈adoso eritreritry tihamono ten̈a?

• Izikoa misy kamaradinao mivolan̈a aminao fa izy tihofoaty, akory hataonao?

• Akory izikoa anao efa navy tihamono ten̈a taloha tan̈y?

Ino ma torohevitry tsara koran̈iny Baiboly?

• ● Volàn̈a aminolo raha an̈atiny fônao.

  Baiboly mivolan̈a: “Olo ten̈a naman̈a zen̈y tia amy fotoan̈a jiaby, sady ten̈a rahalahy von̈ono han̈ampy aminy andra sarotro.”​—Ohabolana 17:17.

  Ino ma dikanizen̈y? Mila naman̈a atsika hivolan̈antsika raha an̈atiny fôntsika, lera atsika kivy mare in̈y.

  Tsy ho tondranao problemonao, izikoa tsy ambaranao olo fa tananao ninao tompiny fo. Fa izikoa anao mazoto mikoran̈a aminolo raha an̈aty fônao ao, ho kirikiry hakivian̈anao sady ho hafa fahitanao problemonao io.

  

  An̈ohara baka ty: Mikoràn̈a aminolo anao niany ty, na izio fianakavian̈anao, na kamaradya araiky atokisanao. Mety koa izikoa soratinao amy taratasy raha jiaby an̈atiny fônao ao.

• ● Mandihana amy dokotera.

  Baiboly mivolan̈a: “Tsy olo salama mila dokotera fa olo marary.”​—Matio 9:12.

  Ino ma dikanizen̈y? Atsika koa marary, atsika tokony handeha dokotera.

  Izikoa olo araiky tihamono ten̈a zen̈y, mety misy raha tsy pare amy sain̈inany na amy fônany. Izio mira aretin̈y jiaby fo ke tsy tokony hampamen̈atra. Mety tahan̈a tsarabe izio.

  An̈ohara baka ty: Mandihana malaky mizaha dokotera mahay.

• ● Aza adin̈a fa anao tiany Zan̈ahary.

  Baiboly mivolan̈a: “Vola madiniky hely aroe fo andafosan̈a fody dimy, sa karakory? Fa tsisy hadin̈any Zan̈ahary iro io nata araiky.​—Lioka 12:6, 7.

  Ino ma dikanizen̈y? Ten̈a valera amy Zan̈ahary anao.

  Anao ndray mahatsiaro latsatokan̈a, Zan̈ahary mahay raha mahazo anao. Izy tia anao, nata anao mieritreritry fa tsisy varany velon̈o. Karaha ty koran̈iny Salamo 51:17: “Alahelo mare baka amy nen̈iny soron̈o ten̈a tiany Zan̈ahary. Tsy anao foeky tsy han̈isy fôtiny fô torotoro ndreky kivy Zan̈ahary e!” Tiany Zan̈ahary ho velon̈o anao, fotony anao tiany.

  An̈ohara baka ty: Diniha iro porofo amy Baiboly ao ahitanao fa Zan̈ahary ten̈a tia anao ankitin̈y. Ohatra, zahava amy toko faha-24 amy boky Manatòna an’i Jehovah.

• ● Mivavaha amy Zan̈ahary.

  Baiboly mivolan̈a: “Apitraha aminany koa raha jiaby mampiasaloha anaro, fotony izy mikarakara anaro.”​—1 Petera 5:7.

  Ino ma dikanizen̈y? Zan̈ahary mandrisiky anao tsy hihafahafa hikoran̈a aminany raha jiaby hitanao man̈avesatra sain̈inao.

  Zan̈ahary mahavita man̈amia anao fiadanantsain̈y ndreky angovo ilainao, baka anao mahavita miaritry raha mahazo anao. (Filipianina 4:6, 7, 13) Zen̈y fomba ampiasainy hanohan̈ana olo jiaby mivavaka, mangataka vonjy aminany.​—Salamo 55:22.

  

  An̈ohara baka ty: Mivavaha amy Zan̈ahary anao niany ty. Anao koa mivavaka, tonon̈a an̈aranany Jehovah, avio ambarà izy raha jiaby an̈aty fônao ao. (Salamo 83:18) Angataha izy han̈ampy anao hiaritry raha mahazo anao.

• ● Aleva onon̈o fampan̈antinan̈a tsara koran̈iny Baiboly momba ny amaray.

  Baiboly mivolan̈a: “Fan̈antinan̈a anan̈antsika zen̈y vatofantsikiny ain̈intsika. Izio salakady azo antoko ndreky miôrin̈y tsarabe.”​—Hebreo 6:19.

  Ino ma dikanizen̈y? Miovaova fihetsehamponao, karaha ataony sambo afikofikony tsiko lera andra ratsy in̈y, ke fan̈antinan̈a koran̈iny Baiboly io hampilamin̈y fônao.

  Tsy angano fampan̈antinan̈a koran̈iny Baiboly io fa miôrin̈y amy fampan̈antinan̈any Zan̈ahary han̈adoso fototrony problemo jiaby mampijaly atsika.​—Apokalypsy 21:4.

  An̈ohara baka ty: Ianara raha maro koran̈iny Baiboly momba fan̈antinan̈a io, ke vakia leson 5 amy bokikely Vaovao Tsara Baka amy Zan̈ahary!

• ● Man̈anaova raha mamparavoravo anao.

  Baiboly mivolan̈a: “Fô ravoravo io aody mampajanga.”​—Ohabolana 17:22.

  Ino ma dikanizen̈y? Hahaihilamin̈y sain̈intsika avio tsy ho kivy mare eky atsika, izikoa man̈ano raha mamparavoravo atsika.

  

  An̈ohara baka ty: Ataova raha mamparavoravo anao. Ohatra, mitandrin̈esa hira, mamakia raha mankahery, na mandihana mangala diandian̈a. Ho ravoravo koa anao izikoa man̈ano raha han̈ampian̈a olo hafa, na raha karaha farany madiniky izio.​—Asan’ny Apostoly 20:35.

• ● Karakarà fahasalaman̈anao.

  Baiboly mivolan̈a: ‘Ilain̈a mampiasa vatan̈a.’​—1 Timoty 4:8.

  Ino ma dikanizen̈y? Tsara izikoa atsika man̈etsiketsiky ain̈y, man̈ano ampy toromaso, avio mihina hanin̈y mahasalama.

  An̈ohara baka ty: Man̈anaova dia meky, nata an̈atiny 15 minity isanandra fo.

• ● Aza adin̈a fa miovaova fiain̈ana.

  Baiboly mivolan̈a: ‘Tsy hainaro han̈ano karakory fiain̈ananaro amaray.’​—Jakoba 4:14.

  Ino ma dikanizen̈y? Nata mare karakory problemo mahazo anao, na anao karaha efa lany hevitry, izio mety tsy hahadin̈y ela.

  Nata karaha tsisy aodiny raha mahazo anao izioty, mety hiova fo izio amaray. Mizahava hevitry hiatrefan̈a izio fo. (2 Korintianina 4:8) Problemo mahazo anao io mety mbala ho afaka, fa anao koa mamono ten̈a, tsisy raha mety hatao eky.

  An̈ohara baka ty: Vakia iro tantaranolo amy Baiboly ao navy kivy ke tihamono ten̈a karaha ataonao, avio zahava ino raha nampiova iro. Mety tsy niritriretindro ho tsara foeky iro. Diniha baka ohatra sasany aby ty.

Baiboly ma mitantara momba olo efa navy tihofoaty?

Ia. Baiboly mitantara momba olo sasany efa navy nivolan̈a: ‘Sitrany zaho maty.’ Zan̈ahary tsy nasiaka iro, fa izy nan̈ampy iro. Karaha zen̈y koa hataony aminao.

Elia

• ● Azovy ma Elia zen̈y? Elia io paminan̈y nisy korazy mare. Fa tandraraiky izy kivy mare. Koran̈iny Jakoba 5:17 fa “Elia io olombelon̈o mira atsika fo.”

• ● Nan̈ino ma izy tihofoaty? Nahatsiaro latsatokana izy, ke navozo ndreky nahatsiaro karaha tsisy raha ilàn̈a izy. Izy nivolan̈a: ‘Jehovah, adosoa foeky fahin̈ananaka.’​—1 Mpanjaka 19:4.

• ● Ino raha nan̈ampy izy? Nikoran̈iny Elia tamy Jehovah raha jiaby tan̈aty fônany. Ke akory nataony Jehovah nankahery izy? Naboakany Jehovah izy fa Jehovah nahinakinaka izy, avio naboakany koa fa izy manan̈a angovo mare. Namiany toky koa Elia fa izy mbala valera amy Jehovah avio Elia namiany pan̈ampy ten̈a mahakarakara ndreky mahay.

• ▸ Vakia tantarany Elia: 1 Mpanjaka 19:2-18.

Joba

• ● Azovy ma Joba io? Joba io olo pan̈arivo nanompo Zan̈ahary sady tsy nivadiky tamy Zan̈ahary.

• ● Nan̈ino ma izy tihofoaty? Tiô fo naro raha nifanesisesy nahazo Joba. Ravan̈a fanan̈ananany jiaby. Zanany jiaby natiny tsiko ratsy. Izy koa narary mare. Farany izy ndraiky diso hevitry foeky ke nivolan̈a fa baka amy Zan̈ahary nahavy izy nijaly. Joba nivolan̈a: “Halako foeky fiain̈ananaka. Sitrany zaho maty.”​—Joba 7:16.

• ● Ino raha nan̈ampy izy? Joba nivavaka tamy Zan̈ahary, avio koa izy nikoran̈a taminolo. (Joba 10:1-3) Nisy kamaradiny nahinakinaka izy nankahery izy. Eliho an̈aran̈any kamaradinany io. Nanjary hafa fomba fahitany Joba problemo nahazo izy io baka tio. Fa an̈abony raha jiaby, Joba nan̈eky torohevitry baka tamy Jehovah ndreky nan̈eky nampiany.

• ▸ Vakia tantarany Joba: Joba 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosesy

• ● Azovy ma Mosesy zen̈y? Mosesy io pitariky iro Israely taloha tan̈y sady paminan̈y tsy nivadiky tamy Zan̈ahary.

• ● Nan̈ino ma izy tihofoaty? Naro mare andraikitriny Mosesy, avio olo nankaratsy izy, ke izy kivy mare. Nivolan̈a karaha ty tamy Zan̈ahary izy: ‘Sitrany vonia zaho izioty.’​—Nomery 11:11, 15.

• ● Ino raha nan̈ampy izy? Nivolan̈iny Mosesy tamy Zan̈ahary raha tsapany. Ke nahen̈iny Zan̈ahary andraikitriny Mosesy, ke izy baka tio nahatsiaro nahivankivan̈a amizay.

• ▸ Vakia tantarany Mosesy: Nomery 11:4-6, 10-17.