Misionera Alefa amy “amy Tany Farany Lavitry An̈y”

Jesosy nivolan̈a tamy pianatranany aby io: “Anaro hanjary vavolombelon̈onaka ... amy tany farany lavitry an̈y.” (Asan’ny Apostoly 1:8) Izioty, Vavolombelon̈o Jehovah mazoto man̈atanteraka iraka io. Fa karaha ataony amy tany maventy sasany ndreky tany maro olo, mbala maro aminolo an̈y tsiary maharen̈y vaovao tsara. Fa amy tany sasany ndraiky, vitsy fo pitory. (Matio 9:37, 38) Ino raha ataontsika baka hitorian̈a aminolo farany maro?

Baka hahavitan̈a man̈araka didiny Jesosy io, Sampandraharahany Fanompoan̈a amy Filankevipitantan̈any Vavolombelon̈o Jehovah manendry misionera alefa amy tany maro erantany. Misy 3 090 misionera erantany.a Maro olo nahazo fampiofan̈ana tamy sekoly arabaiboly, karaha ataony Sekolin’ny Mpitory Ilay Fanjakana. Iro misionera aby io von̈ono hiala tanànandro, hifindra amy tany hafa. Nohony iro misionera aby io matotro, efa maro raha nandalovan̈a, nahazo fampiofan̈ana, iro io tsy mivadiky man̈ampy amy fan̈ambaran̈a vaovao tsara amy tany maro, avio koa modely arehany pianatra mbala vaovao aby io.

Fan̈ampian̈a misionera baka iro hahavita han̈ampy olo

Amy birôny sampan̈a tsiaraikiaraiky misy Birôny Panompo Voatendry amy Saha, miaraka miasa amy Komitiny Sampan̈a, hahafahan̈a mikarakara raha ten̈a ilaindro misionera aby io, karaha ataony tran̈o ipitrahan̈a, fahasalaman̈a ndreky vola hely ividianandro raha ten̈a ilaindro. Tamy taompanompoan̈a 2020 in̈y, Vavolombelon̈o Jehovah nandany vola 27 million de dolara nikarakaran̈a iro misionera aby io. Nohony zen̈y, afaka mifantoko tsarabe amy fanompoan̈andro iro, baka io afaka mankahery fiangonan̈a misy iro koa.

Nan̈ino ma atsika mivolan̈a fa ten̈a man̈ampy aminy asa fitorian̈a iro misionera aby io? Karaha ty ho Frank Madsen, an̈isany Komitiny Sampan̈any Malawi: “Nohony fahazotoan̈andro ndreky fahaizan̈a anan̈andro, iro misionera aby io ten̈a nan̈ampy fiangonan̈a hiatriky raha sarotro tamy faritanindro, karaha ataony tanàna sarotro idiran̈a ndreky tany mampiasa volan̈a hafa. Ezaka mare ataondro mianatra volan̈a ndreky fombanolo amy tany anendrena iro koa ten̈a ohatra tsara aminolo hafa, ndreky mahavy iro tanora aby io tihan̈ano fanompoan̈a manontolo andra. Ten̈a mankasitraka Jehovah atsika nan̈amia iro misionera aby io.”

Misy rahalahy an̈isany Komitiny Sampan̈a amy tany araiky nivolan̈a karaha ty: “Ohatra amiandro misionera aby io ten̈a ahitan̈a fa miray sain̈y vahoakany Jehovah erantany. Ndray olo tsy manompo Jehovah mahita fa atsika io tsy voazarazarany kolontsain̈y, fa fampianaran̈any Baiboly azontsika io man̈ampy atsika hiray sain̈y mira olo kibo araiky.”

Akory ataondro misionera aby io man̈ampy pitory an̈ivony fiangonan̈a? Paulo baka a Timaoro Antin̈iana, ten̈a nankasitraka iro misionera tamy fiangonan̈a misy izy. Karaha ty ho izy: “Mafana mare aminay atỳ, kanefa iro misionera navy atỳ baka amy tany ten̈a manintsy. Raha zen̈y tsiary ndraiky nataondro tamban̈a tsy hitorian̈a. Iro avy fo isaka fivorian̈a alohany fanompoan̈a maraindrain̈y. Zaho koa matetiky mahita iro mandeha man̈ano fiveren̈ana mitsidiky aminy andra mafana be miarin̈y andra in̈y, ndreky arivariva koa. Ten̈a maro olo nampiandro hahay fahamarin̈ana, an̈isanizen̈y zaho. Baka amy fahazotoan̈andro ndreky iro nisy korazy, natokanandro hanompoan̈a Jehovah fiain̈anandro jiaby. Raha zen̈y nandrisiky olo jiaby amy fiangonan̈a hampitombo fanompoan̈a.”

Ketti, ranabavy pisava lalan̈a a Malawi, nitantara akory nan̈ampiany misionera fivadiany fianakavian̈anany: “Taminiro voatendry tamy fiangonan̈a misy zahay, zaho zaraiky fo Vavolombelon̈o Jehovah tamy fianakavian̈anaka. Nahazo fan̈ampian̈a tamindro misionera fivadiany io zaho, ke nindesindro nira fianakavian̈andro in̈y zahay. Ke ohatra tsara namezandro in̈y nahitandry zanako fa kaiky fanompoan̈a Jehovah io mampasambatra ndreky mahavy olo ho afapo amy fiain̈ana. Telo amindro zanako aby io izioty efa pisava lalan̈a, avio vadiko koa efa komansy mivory. Ten̈a man̈ano mersy zaho taminy ohatra tsarandro misionera aby io.”

Aia ahitan̈a vola ikarakaran̈a raha ilaindro misionera aby io? Baka amy fan̈amezan̈a atao erantany amy donate.jw.org. Ten̈a ankasitrahan̈a iro fan̈amezan̈a aby zen̈y.