Fizahan̈a Videony Fivoriambeny Vondroparitry

Ten̈a niavaka mare fivoriambeny vondroparitry tamy 2020 in̈y. Sambany taminin̈y fivoriambeny vondroparitry nianrezistren̈a avio nalefa aminy Internet! Fa ta Malawi ndreky Mozambiky, ankamarozandro rahalahy ndreky ranabavy tan̈y nahavita fivoriambeny vondroparitry fa tsy taminy Internet fo. Ke akory nataondro?

Komitiny Pandrindra ndreky Komitiny Fampianaran̈a amy Filankevipitantan̈ana nan̈eky handifasan̈a fivoriambe io tamy tele ndreky radio ta Malawi ndreky Mozambiky. Nan̈ino ma ten̈a nilain̈a raha zen̈y? Fotony maro Vavolombelon̈o Jehovah tsy manan̈a fahafahan̈a hampiasa Internet, fotony a Malawi an̈y ten̈a lafo data. Misy rahalahy araiky, William Chumbi, an̈isany Komitiny Sampan̈a a Malawi nan̈azava fa radio ndreky tele fo raha farany mora andrasan̈a hanin̈y arapan̈ahy amindro rahalahy ndreky ranabavy aby io. Karaha ty koa nikoran̈iny Luka, an̈isany Komitiny Sampan̈a a Malawi: “Zahay koa tsy nan̈araka fivoriambe in̈y tamy tele na radio, vitsy fo rahalahy ndreky ranabavy amy sampan̈a misy zahay nahavita fivoriambe in̈y.” Ta Mozambiky koa, vitsy fo olo nisy fitaovan̈a elektroniky ten̈a mety ampiasan̈a Internet.

Fikarakaran̈a Natao

Nohony COVID-19, efa nisy fivorian̈a fo nalefa tamy tele ndreky radio sasany.a Nan̈ano demandy iro rahalahy aby io nangataka hampitombosan̈a lera handifasan̈a programony fivoriambeny vondroparitry.

Ta Malawi, tojy problemo iro rahalahy aby io. Raha poisy baka, an̈atiny lera araiky fo ikendro handifasan̈a raha momba fivavahan̈a, tsao olo pitandren̈y radio io empaka. Fa iro rahalahy aby io nan̈azava fa asa ataontsika io man̈ampy fiarahamonin̈y. Ndray an̈atiny confinement ty, atsika mifen̈y fo mankahery olo amy vaovao tsara koran̈iny Baiboly, fotony izio man̈ampy vahoaka hilamin̈y ndreky hanan̈a tokantran̈o sambatra. Iro koa fa naharen̈y zen̈y, nan̈eky fo iro han̈amia lera lavalava iro rahalahy aby io.

Ta Malawi, fivoriambe io nalefa tamy tele araiky ndreky radio nasionaly, ke olo antapitrisany nitandren̈y ndreky nizaha izio. Ta Mozambiky, fivoriambe io nalefa tamy tele araiky ndreky radio 85.

Tamy tany aroe io, nisy 28 227 dolarab vola lany nandifasan̈a fivoriambe tamy tele, avio presky 20 000 dolara tamy radio. Tamindro radio madiniky aby io, farany mora 15 dolara nifain̈y fa radio nasionaly ndraiky 2 777 dolara.

Niasa mare iro rahalahintsika aby io nampiasa vola fan̈amezan̈a tamy fomba farany tsara. Karaha ta Malawi, iro niady varotro ke nahazo prix ambany, ziska 30 isanjato. Nazahoan̈a tombony 1 711 dolara raha zen̈y ta Mozambiky, ke sasany tamindro radio aby io nan̈amia prix ambany atsika, fotony atsika malaza olo man̈ano ny marin̈y ndreky tsy mikatramo amy fan̈ifan̈a vola.

Fankasitrahan̈a Baka Tamindro Rahalahy aby Io

Iro rahalahy aby io nankasitraka mare fivoriambe nalefa tamy radio ndreky tele io. Misy antipan̈ahy araiky zay baka a Malawi, Patrick an̈arany, nivolan̈a: “Ten̈a man̈ano mersy iro rahalahy an̈isany Filankevipitantan̈ana zaho nan̈ano programo spesialy io, tamy valan̈aretin̈y ty, fotony iro ten̈a mahinakinaka zahay.” Karaha zen̈y koa Isaac baka a Malawi nivolan̈a: “Zahay tsisy raha hafa hahafahanay han̈ano fivoriambe, safe zahay ten̈a mankasitraka programo spesialy baka amy fandaminan̈any Jehovah, tamy radio ndreky tele in̈y. Nanjary nahavita fivoriambeny vondroparitry zahay jiaby tran̈o araiky. Hitanay tamizin̈y fa ten̈a tia zahay ankitin̈y Jehovah.”

Misy pitory araiky ta Mozambiky sambany mba nan̈aton̈o fivoriambeny vondroparitry tamy 2020. Ho izy: “Fikarakaran̈a fivoriambe natao tamy tele in̈y nampatsiaro zaho fa Jehovah io Zan̈ahary farany mahery ankitin̈y. Valan̈aretin̈y io tsy mahasakana izy han̈amia atsika hanin̈y arapan̈ahy tantran̈obenay tao. Hitako koa fa ten̈a mifankatia olony Jehovah. Mahairesy lahatra fo zaho fa io ankitin̈y fivavahan̈a marin̈y.”

Misy antipan̈ahy araiky, Wyson an̈arany, nivolan̈a: “Zaho tihan̈ano mersy tamy fomba fikarakarany panompo atokisan̈a atsika an̈atiny valan̈aretin̈y ty. Fivoriambe nalefa amy radio ndreky tele io ten̈a nan̈ampy olo maro taminay, fotony zahay atỳ an̈isany tany sahiran̈a erantany kanefa nahazo programo in̈y ndreky nahazo hatsaran̈a baka tamizin̈y.”

Fa momba fivoriambe amy taon̈o 2021 ty ndraiky, Komitiny Pandrindra ndreky Komitiny Fampianaran̈a nivolan̈a fa mety halefa amy tele ndreky radio ndraiky koa fivoriambe amy ty amy tany sasany. Karakory hahavitantsika man̈efa raha jiaby zen̈y? Baka amy fan̈amezan̈a ataontsika aminy asa erantany, ke maro amintsika man̈ano izio amy donate.jw.org. Mersy anaro baka aminaro mazoto man̈amia.