Nan̈ino ma Pitariky Fivavahan̈a io Niala?

Nan̈ano karakory fian̈ananao taminy anao mbala hely?

Taminy 1943 zaho teraka, tan Italie. Tanàna hely tambanivolo tanànanay io. Fito mianadahy zahay kibo araiky. Pamboly ndreky pandrafitry asany papako. Zahay nitaizain̈y tamy fivavahan̈a Katoliky.

Nan̈ino ma anao tihan̈ano mompera?

Tiako mare naharen̈y feondro mompera aby io lera iro man̈ano lamesy. Tiako mare koa iro fombafomba natao ta legilizy tan̈y. Ke zen̈y nahavy zaho tapakevitry han̈ano mompera. Tamy zaho 13 taon̈o mampidiriny mamako nan̈ano kilasimandry natao ninolo tihan̈ano mompera.

Mba nianatra Baiboly ma anao tan̈y?

Tsy ten̈a nianatra. Nan̈amia zaho boky misy tantarampiain̈anany Jesosy papianatranay araiky tamy zaho 15 taon̈o. Nivakiko matetiky izio fotony nisy tantarany Jesoa ndreky fitorian̈a nataony. Nianatra taminy Iniversiteny Katoliky ta Roma tan̈y zaho, koa fa feno 18 taon̈o. Tambany fahifan̈any papa iro iniversite aby io. Zahay tan̈y nianatra teny griky ndreky latin, baka io koa tantara, filozofỳ, psikolozỳ baka io teolozỳ. Nan̈ano tsianjery toko sy andininy zahay tan̈y sady nitandren̈y famakian̈a Baiboly tamy toriteny isaka dimansy. Fa tsy ten̈a nianatra Baiboly zahay tan̈y.

Ino aby asanao lera anao nanjary direktera?

Niasa birô raha ten̈a nataoko tamy zen̈y. Nisy fotoan̈a zaho nampianatra hely momba Konsily Faharoeny Vatikan.

Ino nahavy anao tsy natoky leglizy eky?

Nisy raha telo nanahiran̈a jerinaka. Voanalohany, leglizy nan̈ano politiky. Faharoe, tsy voasazy foeky lan̈iany mompera na pivavaka katoliky ratsy fitondranten̈a. Baka io fahatelo, nampisalasala zaho fampianaran̈a sasany tamy fivavahan̈a katoliky. Ohatra, Zan̈ahary be fitiavan̈a zen̈y ke hampijaly olo mandrakizay amy motrobe? Zan̈ahary ma manery atsika tsy maintsy man̈ano toko saple baka io man̈ano vavaka tsianjery ampodipody injato aby?a

Ke ino raha nataonao?

Nitomoan̈y mare zaho salakady nivavaka tamy Zan̈ahary, baka ambarany zaho ny ten̈a marin̈y. Zaho baka io nividy Baiboly Katoliky tamy volan̈a Italien. Zaho amy zay nanomboko namaky izio. Tandraraiky, zaho koa fa baka nan̈ano lamesy ke nan̈anton̈o lambanaka in̈y, nisy lelahy aroe nan̈aton̈o zaho. Iro nivolan̈a fa iro Vavolombelon̈o Jehovah. Nikoran̈a raha momba Baiboly ndreky fomba ahaizan̈a fivavahan̈a marin̈y tan̈atiny lera araiky mandilatra zahay.

Ino raha ten̈a tianao tamindro?

Hitako fa ten̈a natoky raha ninoandro iro sady tsy sarotro tamindro foeky nitady andininteny ndreky Baiboly Katoliky nampiasain̈y. Tafaranizen̈y, nisy Vavolombelon̈o Jehovah araiky, Mario an̈arany, nitsidiky zaho. Ten̈a nanampaharetan̈a taminaka izy, avio navy fo izy na tsara andra na ratsy sady man̈aja lera oe! Miaraka piky nevera, izy efa nampan̈ena sonery tambaravaran̈a tao edy.

Akory ho mompera sasany sasany koa fa nahita olo mandeha mampianatra anao io?

Nitahomiko iro hianatra miaraka aminay tio fa iro tsisy nan̈ano. Fa ten̈a tiako fianaran̈a io. Ten̈a maro raha tsara nianarako. Ohatra iziô, nan̈ino mbala tsy adosony Zan̈ahary jaly ndreky raha ratsy hafa. Efa ela fan̈ontanian̈a io nanahiran̈a jerinaka.

Ke sefonaro tsy nisakana anao hianatra Baiboly?

Tamy 1975 zaho matetiky nandeha ta Roma han̈azava raha ninoako io. Nifen̈y zaho nandresy lahatra iro sefonay aby io, kanefa iro tsy nampiasa Baiboly foeky. Tamy 9 Zanvie 1976 zaho nanoratra ta Roma. Nivolan̈iko tao fa zaho tsy ho Katoliky eky. Aroe andra tafaranizen̈y zaho niala tamy tran̈ony mompera. Nandeha train zaho ke nandeha nan̈aton̈o fivorian̈any Vavolombelon̈o Jehovah. Io fivorian̈a voanalohany naton̈iko. Kaiky izio fivoriambe, ke fiangonan̈a maromaro nitambatra tao. Ten̈a hafa mare raha hitako tan̈y. Olo jiaby samby amy Baibolinany, baka io man̈araka tsara andininy koran̈iny pan̈ano kabaro aloha arỳ lera izy man̈azava.

Akory fo ho fianakavian̈anao?

Ankamarozandro neloko mare ke nan̈enjiky zaho mare. Tafara tatỳ zaho naharen̈y fa zandriko mianatra Baiboly amy Vavolombelon̈o Jehovah ta Lombardie, amy faritry Italie an̈y. Nandeha tan̈y zaho ke iro Vavolombelon̈o tan̈y nan̈ampy zaho hahita asa ndreky tran̈o. Taon̈o araiky tafaranizin̈y, zaho natao batisa ke nanjary Vavolombelon̈o Jehovah.

Ke anao tsy nanen̈iny?

Tsy nanen̈iny foeky zaho. Ela eky ny ela fa zaho ten̈a nahatsiaro narikitry Zan̈ahary. Ten̈a baka amy Baiboly tsarabe raha ianarako momba izy fa tsy baka amy filozofỳ na lovantsofin̈y. Iziô sain̈inaka vo ten̈a milamin̈y fotony marin̈y raha ampianariko olo.