Misy Raha Tsara Mandilatra Krismasy
ANTAPITRISANY Kristianin̈y mifidy tsy hankalaza Krismasy na Noely. Nanen̈iny ma iro nifidy zen̈y? Sa iro mahatsapa matiantoko? Mahatsapa karaha zen̈y koa ma zanakandro? Zahava baka raha nivolan̈iny Vavolombelon̈o Jehovah maro erantany, mikasiky zen̈y.
Eve
Mahatsiaro Jesosy Kristy: “Zaho nahalan̈a nandeha leglizy talohany zaho hanjary Vavolombelon̈o Jehovah. Isaka Noely na Paka fo zaho nandeha tan̈y. Fa nata tamy fotoan̈a zen̈y zaho tsy ten̈a nieritreritry momba Jesosy Kristy aby. Zaho avio efa tsy nan̈ano Noely eky, fa zaho nan̈aton̈o fivorian̈a kristianin̈y indroe isaka herin̈iandra ndreky nampianatra olo raha koran̈iny Baiboly momba Jesosy.”—EVE, AUSTRALIE.
Reuben
Mamparavoravo man̈amia: “Endrakendraka mare zaho izikoa fa misy olo man̈amia zaho kadô tsy ampoiziko. Farandraha tiako eky raha tsy ampoizin̈y karaha zen̈y! Tiako manoratra karty na man̈ano sary amian̈a olo. Ravoravo baka iro mahazo izin̈y, ke loso ravoravo koa zaho.”—REUBEN, IRLANDY AVARATRA.
Emily
Man̈ampy olo sahiran̈a: “Tianay mandoky hanin̈y amian̈a olo marary. Ndraikindraiky iro itondrasanay gatô, folera na kadô hely amy zen̈y iro ravoravo. Tianay mare raha zen̈y fotony afaka mamangy iro an̈y fo zahay isaka teteky.”—EMILY, AUSTRALIE.
Wendy
Fiarahan̈a amy fianakavian̈a: “Lera misy fivorian̈any fianakavian̈a in̈y hahaizany zanakanay aby io azovy zamandro, mamahely ndreky mamabendro ndreky zanakandro io, avio dadindro ndreky dadilahindro. Tsy mahatsiaro voateritery zahay fotony tsy amy ladaty araiky fo tsy maintsy hiarasanay. Loso haindry havanay aby io koa fa iro ten̈a tianay, matoa zahay mamangy iro.”—WENDY, NOSY CAÏMANS.
Sandra
Miadan̈a: “Lerany Noely, olo jiaby karaha samby maro raha atao ke mahalan̈a fo mba misy olo mieritreritry momba fiadan̈ana. Loso mahivankivan̈a zaho, izikoa fa nahay raha ampan̈antinainy Baiboly. Haiko fa aminy amaray an̈y, zanako aby io mbala ho sambatra.”—SANDRA, ESPAGNE.