Tsy Maintsy Miditry amy Fivavahan̈a Araiky ma Anao vo Ankasitrahiny Zan̈ahary?

Valiny baka amy Baiboly

Ia, fotony tiany Zan̈ahary hiaraka hivory olo hivavaka aminany. Karaha ty koran̈iny Baiboly: “Tsara atsika mba mifampandiniky ke handrisiky amy fitiavan̈a ndreky asa tsara, ke aza manapatapaka fivorian̈a.”​—Hebreo 10:24, 25.

Hita baka amy volan̈any Jesosy ty fa pan̈aradia izy hiaraka hanompo Zan̈ahary: “Baka amy zen̈y ahaizanolo fa anaro pianatranaka ankitin̈y, izikoa anaro mifankatia.” (Jaona 13:35) Akory hataondro hifankatia izikoa iro tsy mifanerasera? Zen̈y mahavy iro halamin̈y baka hanjary fiangonan̈a, ke hiaraka mivory tsy tapaka hanompo Zan̈ahary. (1 Korintianina 16:19) Hanjary mira olo pirahalahy kibo araiky in̈y iro jiaby erantany, izikoa man̈ano zen̈y.​—1 Petera 2:17.

Izikoa ma olo araiky efa manan̈a fivavahan̈anany, efa mahampy edy ma zen̈y?

Baiboly mivolan̈a fa olo tokony hiaraka hivory hanompo Zan̈ahary. Fa izio tsy mivolan̈a fa olo araiky koa fa manan̈a fivavahan̈anany, efa mamparavoravo Zan̈ahary edy. Tsy maintsy arehany amy fiain̈ananany isanandra raha koran̈iny Baiboly io, zay izy vo ankasitrahany Zan̈ahary. Ohatra iziô, volan̈iny Baiboly: “Amy Zan̈ahary Babantsika, karaha ty fivavahan̈a madio sady tsisy loto: Mikarakara olo kamboty ndreky man̈angy maty vady amy fahorian̈andro, avio miaro ten̈a fo baka tsy havoa tasiny donia ty.”​—Jakoba 1:27.