Anao koa Tihangala Tahaka Jesosy, Mifen̈a Baka...

HAHAY HAHINAKINAKA

Jesosy lavorary ke tsy navoa izy ankamaraozany raha manahiran̈a mavoa olombelon̈o. Fa ndray zen̈y, izy nahinakinaka olo mare. Toetrinany zen̈y nahavy izy von̈ono han̈ano erakany vitany mba han̈ampian̈a olo. Zahava baka ohatra aby amy Toko 32, 37, 57, 99.

HO MORA HATON̈INY

Rango amy tsaiky firaka aminolo matoe tsisy nisalasala foeky nan̈aton̈o Jesosy. Izy baka tsy nan̈ambony ten̈a, avio izy tsy nalain̈y olo. Hitanolo aby io fa Jesosy ten̈a tia iro, ke iro nanjary tsy nihafahafa taminany. Ho hitanao raha zen̈y amy Toko 25, 27, 95.

HO TIA MIVAVAKA

Jesosy nivavaka tsy tapaka tamy Babany. Vavakanany nataony tamy fô jiaby. Ndraikindraiky izikoa izy efa hivavaka, izy nandeha tamy toeran̈a mitokan̈a na koa niaraka tamy panompony Zan̈ahary. Tsy isaka talohany nihina fo izy nivavaka, fa isaka teteky. Nivavaka izy izikoa fa nan̈ano mersy ndreky nidera Babany, avio lera izy nangataka taridalan̈a tamy Babany, talohany izy nan̈ano fanapahankevitry maventy. Zahava baka ohatra aby amy Toko 24, 34, 91, 122, 123.

TSY HO TIA TEN̈A

Ndraikindraiky Jesosy ndray efa tokony hangala kajo, izy mbala nitady raha mahatsara olo fo talohany ninany. Izy tsy tia ten̈a. Ke izy nan̈amia modely afaka harehantsika tsarabe. Areva modelinany zen̈y amy Toko 19, 41, 52.

HO TIA MAN̈AMBELA HADISOVAN̈A

Jesosy tsy vitany nampianatra olo fa ten̈a ilain̈y man̈ambela adisovan̈a, fa naboakany koa raha zen̈y lera izy niaraka tamy pianatranany ndreky olo hafa. Saintsain̈a baka ohatra aby amy Toko 26, 40, 64, 85, 131.

HAZOTO

Efa hay rango efa ela fa maro amindro Jiosy aby io tsy han̈eky Mesia, avio fahavalony Mesia fo handeha hamono izy. Ke Jesosy afaka tsy dia nifen̈y loatra nan̈ano raha ninolo. Fa tsy zen̈y nataony. Izy nifen̈y fo hazoto handrisiky olo han̈araka fivavahan̈a marin̈y. Izy farandraha nazoto mare. Izy nan̈ambela ohatra tsara harehany pan̈aradia izy, izikoa iro tsy tandrin̈esanolo na koa miatriky fanoheran̈a. Zahava amy Toko 16, 72, 103.

HANETRY TEN̈A

Amy raha maro, Jesosy mbala an̈abon̈abo lavitry tozay olombelon̈o tsy lavorary. Izy ohatra, mbala hendry ndreky mahay raha mandilatra atsika. Noho izy lavorary, azo antoko koa fa izy mbala natanjaka lavitry tozay olo man̈odidin̈y izy, ke nahavita raha tsy vitandro. Fa ndray zen̈y, izy nanetry ten̈a fo ke nanompo ny hafa. Hahita fianaran̈a momba zen̈y anao amy Toko 10, 62, 66, 94, 116.

HAHARIDRAHA

Ndraikindraiky apostoliny Jesosy aby io ndreky olo hafa tsy tafan̈araka raha nivolan̈iny ndreky tsy nan̈ano karaha izy. Fa Jesosy nifen̈y fo naharidraha tamindro. Nampodipodiny matetiky tamindro fianaran̈a mila haindro baka hahafahandro ho loso kamaradiny Jehovah. Diniha fomba nan̈aboahany Jesosy fa izy maharidraha amy Toko 74, 98, 118, 135.