Karakory ma Sorany Jesosy?
Valiny baka amy Baiboly
Tsisy olo mahay karakory sorany Jesosy, fotony Baiboly tsy mikoran̈a momba zen̈y. Dikanizen̈y, tsy ten̈a raha maventy amintsika mahay zen̈y. Fa Baiboly man̈ampy atsika himenimeny karakory marin̈y izy.
Soranany: Jiosy reniny Jesosy, ke mety nira amy reniny soranany. (Hebreo 7:14) Dikanizen̈y, tsy niavaka mare soranany. Ohatra, tandraraiky izy koa fa baka ta Galilia handeha ta Jerosalema, tsy nisehoseho taminolo izy fa nisitriky, ke tsisy olo nahay izy. (Jaona 7:10, 11) Izy tsy olo niavaka mare tamy pianatranany narikitry izy. Ohatra, tsy hainolo Jesosy izikoa tsy Jodasy Iskariota nan̈ambara.—Matio 26:47-49.
Halavasany fan̈evanany: ‘Hen̈atra lelahy lava fan̈eva zen̈y ho Baiboly’, ke dikanizen̈y Jesosy tsy lava fan̈eva foeky.—1 Korintianina 11:14.
Sombotronany: Jesosy nisy sombotro. Narehany lalàn̈a jiosy natao niny manafolahy ty: “Aza adoso sisiny sombotronao.” (Levitikosy 19:27; Galatianina 4:4) Baiboly koa mikoran̈a momba sombotrony Jesosy, amy faminanian̈a momba jaly hahazo izy.—Isaia 50:6.
Vatan̈anany: Maro mare porofo fa Jesosy io olo fatatra mare. Ohatra, nahavita nandeha vity lavitry izy, tamy fanompoan̈a nataony. (Matio 9:35) Indroe aby izy nan̈adio tempoly. Narongany latabatranolo panakalo vola aby tamy zen̈y, avio nisy fotoan̈a niroasiny tamy karavasy iro biby fitarimin̈a jiaby nalafo tao. (Lioka 19:45, 46; Jaona 2:14, 15) Misy Rakipahizan̈a (angiley) naboakany McClintock ndreky Strong mivolan̈a fa ‘Jesosy io olo fatatra sady salama tsarabe, izikoa zahan̈a raha koran̈iny Filazantsara.’—Boky Faha-5, pazy 884.
Bikabikanany: Jesosy io olo tsara fan̈ahy ndreky nahinakinaka, ke azo antoko tsarabe fa hita tamy soranany raha zen̈y. (Matio 11:28, 29) Olo isankarazany tamy zen̈y nitady izy, fotony tihahazo fan̈ampian̈a ndreky fankahirezan̈a baka taminany. (Lioka 5:12, 13; 7:37, 38) Nata tsaiky madiniky tsy navozo Jesosy.—Matio 19:13-15; Marka 9:35-37.
Hevitry diso momba Jesosy
Hevitry diso: Olo sasany mivolan̈a fa razambeny Jesosy zen̈y afrikain. Mahavy iro mivolan̈a zen̈y, fotony zen̈y bokiny Apokalypsy mivolan̈a fa karaha volovolony ondrikondriky fan̈evanany, avio vitinany “karaha varahin̈y avoadio” zen̈y.—Apokalypsy 1:14, 15.
Ny marin̈y: “Famantaran̈a” raha hita amy bokiny Apokalypsy ao. (Apokalypsy 1:1) Fan̈oharan̈a fo fan̈azavan̈a momba fan̈evany Jesosy ndreky vitinany ao fa tsy arabakiteny. Tsy bikabikany Jesosy taminizy tambony tany teto raha tiany koran̈iny fa toetrinany tafaranizy natsangana tamy maty. Mivolan̈a Apokalypsy 1:14 fa ‘malandy jiaka karaha volovolony ondrikondriky fotsy in̈y fan̈evanany.’ Ino ma dikanizen̈y? Andininy io tsy tihivolan̈a fa karaha volovolony ondrikondriky fan̈evany Jesosy. Kolerany fan̈evanany nampitovisin̈y amy kolerany volovolony ondrikondriky. Nivolan̈iny io fa malandy jiaka fan̈evanany io fotony efa ela niain̈ana ke manan̈a fahendrena.—Apokalypsy 3:14.
Vitiny Jesosy karaha ‘varahin̈y avoadio mipilapilapilatra an̈atiny lafaoro.’ (Apokalypsy 1:15) Soranany ‘karaha masoandra mipilapilatra’ in̈y. (Apokalypsy 1:16) Tsisy hoditrinolo karaha zen̈y. Dikanizen̈y, izio fan̈oharan̈a fo, hivolan̈ana fa Jesosy koa fa nivilomin̈y, izy nanjary ‘midoko aminy hazavan̈a tsy daikiny maso.’—1 Timoty 6:16.
Hevitry diso: Jesosy io olo malemilemy.
Ny ten̈a marin̈y: Izikoa raha nataony Jesosy zahavan̈a, izy tsy olo malemilemy zen̈y. Izikoa fa navy baka tan̈y iro vahoaka nitondra raha fiadivan̈a handeha hanambotro Jesosy, tsy navozo Jesosy nivolan̈a: ‘Zaho Jesosy zen̈y.’ (Jaona 18:4-8) Avio, matoa asanany pandrafitry, dikanizen̈y izy olo fatatra ankitin̈y. Nata nisy fitaovan̈a taminany, tan̈anany raha ten̈a niasa.—Marka 6:3.
Nan̈ino fo Jesosy nangataka nitahitahin̈a taminizy nitondra hazofijalian̈anany? Avio nan̈ino ma izy naty voanalohany fa tsy iro niaraka nifantsihin̈y taminany? (Lioka 23:26; Jaona 19:31-33) Lonja mare Jesosy talohany namonoan̈a izy, fotony izy tsy nandry foeky alin̈y araiky. Niasaloha izy taminio sady nampijalindro Jiosy aby io. Kiakanizin̈y koa, iro Romanin̈y aby io nampijaly izy koa. (Matio 26:67, 68; Lioka 22:42-44; Jaona 19:1-3) Raha jiaby zen̈y nahavy Jesosy nalaky naty.
Hevitry diso: Jesosy io olo tsiary ndraiky nitokiky fa olo nanjonin̈y fo.
Ny marin̈y: Baiboly mivolan̈a fa Jehovah Babany Jesosy io “Zan̈ahary ravoravo.” Tsisy ny hafa amy niny Jehovah toetriny Jesosy. (1 Timoty 1:11; Jaona 14:9) Izy nampianatra olo raha tokony hatao baka ho ravoravo ndreky sambatra fo. (Matio 5:3-9; Lioka 11:28) Hita baka amy raha jiaby zen̈y fa Jesosy io ravoravo, sady raha zen̈y hita tamy soranany.