Izio ma Ten̈a Kristianin̈y Lan̈iany Olo Mivolan̈a Kristianin̈y?

MISY firy ma Kristianin̈y erantany? Koran̈iny Bokiny Sarintany Momba Fivavahan̈a Kristianin̈y Erantany (angiley) fa tamy 2010 in̈y, efa tsy ela ho 2 300 tapitrisa zen̈y Kristianin̈y erantany. Avio efa mandilatra 41 000 fivavahan̈a misy iro, baka io iro fivavahan̈a aby io samy manan̈a fampianaran̈anany ndreky fitsipiky arehandro. Maro olo manjary diso fan̈antinan̈a ndreky mijaly jery, fotony efa maro loatra fivavahan̈a mivolan̈a iro Kristianin̈y. Ke misy olo tafieritreritry: ‘Izio ma Kristianin̈y aby lan̈iany olo mivolan̈a fa izy kristianin̈y?’

Hangala ohatra atsika, hamalian̈a fan̈ontanian̈a zen̈y. Ohatra misy olo nisakanany polisy, avio nan̈ontaniany polisy io raha mombamomba izy. Polisy io tsy hatoky izy, izikoa izy tsy man̈aboaka taratasinany. Ohatra, izy mila man̈aboaka kardantitenany. Ke izikoa olo araiky mivolan̈a fa izy mino Jesosy, tsy mahampy zen̈y. Mila aboakany fa izy ten̈a Kristianin̈y ankitin̈y.

Tafara heliny taon̈o 44 voanalohany nampiasan̈a volan̈a “Kristianin̈y” zen̈y. Karaha ty nikoran̈iny Lioka, panoratra Baiboly: “Ta Antiokia tan̈y voanalohany nikahian̈a pianatra aby io Kristianin̈y zen̈y, nohony fitondrasany Zan̈ahary.” (Asan’ny Apostoly 11:26) Hitantsika baka amy zen̈y fa olo kristianin̈y zen̈y pianatrany Kristy. Fa azovy fo ma iro io? Karaha ty nan̈azavany Diksionera Iraisampirenena Momba Testamenta Taloha io (angiley): ‘Pianatrany Jesosy lan̈iany olo mahafoe fiain̈ananany jiaby amy Jesosy firaka izy maty. Tsy man̈anten̈a hoahiny foeky izy.’ Ke olo ten̈a kristianin̈y zen̈y olo man̈araka tsarabe toromariky ndreky raha nampianariny Jesosy, ke tsy man̈anten̈a hoahiny izikoa fa man̈ano zen̈y.

Ke amy fivavahan̈a marobe samy mivolan̈a iro Kristianin̈y izioty io, mba misy amindrô io edy man̈ano raha karaha zen̈y? Ino raha nivolan̈iny Jesosy fa hahaizan̈a ten̈a Kristianin̈y? Atsika handiniky raha dimy nivolan̈iny Jesosy, avio zahavantsika asa nan̈araka zen̈y ankitin̈y iro Kristianin̈y tamy voanalohany tan̈y. Hizahavantsika koa azovy amindro mivolan̈a fa Kristianin̈y io izioty ten̈a man̈araka iro raha dimy aby io.

‘Aza Miala amy Volan̈anaka’

“Pianatranaka ankitin̈y anaro, izikoa tsy miala amy volan̈anaka. Anaro hahay ny marin̈y, ke ny marin̈y io hankafaka anaro.”​—JAONA 8:31, 32.

Ino ma dikanizen̈y? Fampianaran̈any Jesosy raha tiany havian̈a amy ‘volan̈any Jesosy’ iô. Ndray zen̈y, izio baka amy Zan̈ahary, fotony karaha ty nambarany: “Baba nan̈iraka zaho io fo mikomandy raha volan̈iko ndreky raha ambarako.” (Jaona 12:49) Karaha ty koa nambarany momba Babany io: “Volan̈anao zaraiky fo marin̈y.” Ary matetiky izy nan̈ambara volan̈a Zan̈ahary lera mampianatra. (Jaona 17:17; Matio 4:4, 7, 10) Ino ma raha ahaizan̈a ten̈a Kristianin̈y? Iro ‘tsy miala amy volan̈anany.’ Izikoa atao amy volan̈a hafa, iro man̈eky fa Volan̈a Zan̈ahary na Baiboly fo “marin̈y.” Zay raha voavolan̈a ao ndreky fitsipikinany fo inoandro ndreky arahindro.

Zen̈y ma raha nataondro Kristianin̈y voanalohany tan̈y? Apostoly Paoly an̈isany Kristianin̈y voanalohany. Ke raha ten̈a maventy tamy Paoly, karaha tamy Jesosy fo, Volan̈a Zan̈ahary. Zen̈y nahavy izy nivolan̈a: “Ilain̈y Soratra Masin̈y jiaby io, fotony baka amy fan̈ahy masin̈y Zan̈ahary.” (2 Timoty 3:16) Tamy leranizen̈y, nisy lelahy nampianatra amy fiangonan̈a. Ke iro koa fa nampianatra, iro tsy niala tamy ‘Volan̈a Zan̈ahary’ na ‘volan̈a azo antoko.’ (Titosy 1:7, 9) Nifen̈y mare koa iro Kristianin̈y tamy voanalohany tan̈y baka tsy hino filozofỳ ndreky toetsain̈iny donia ty, fotony tsy mifan̈araka amy fampianaran̈any Kristy raha zen̈y.​—Kolosianina 2:8.

Azovy man̈araka volan̈any Jesosy io amy zioty? Karaha ty nambarany Katesiziny Eglizy Katoliky (angiley): ‘Tsy voatery ho raha baka amy Soratra Masin̈y fo inoany Eglizy Katoliky, fa baka amy lovantsofin̈y masin̈y koa. Samby tokony hiken̈a ndreky hajain̈a aby, na iro lovantsofin̈y masin̈y zen̈y na Soratra Masin̈y.’ Karaha ty koa nambarany pastera araiky mipetraka a Kanada an̈y, amy gazetiboky Maclean’s: “Nan̈ino ma atsika tsy maintsy man̈araka volan̈any Jesosy ndreky Soratra Masin̈y, kanefa efa 2000 taon̈o lôso zay nisiandro io? Atsika amy zioty koa ane mba manan̈a hevitry tsara, kanefa nanjary tsisy dikany hevitry jiaby zen̈y fotony atsika tiren̈a han̈araka niny Jesosy ndreky raha ampianariny Baiboly.”

Karaha ty ndraiky raha nambarany Rakipahizan̈a Katoliky Vaovao (angiley) momba Vavolombelon̈o Jehovah: “Zay raha volan̈iny Baiboly fo inoandro io, avio fitsipiky voasoratra ao fo arehandro.” Malaza mampiasa Baiboly koa Vavolombelon̈o Jehovah. Nisy man̈angy Vavolombelon̈o Jehovah araiky iziô nitory tamy lelahy araiky ta Kanada. Izy mbala tsendriky nivolan̈a, lelahy nikoran̈any io efa nivolan̈a karaha ty: “Miaraka zaho mahita Baiboly ampelantan̈anao in̈y, efa haiko edy azovy anaro.”

“Tsy An̈isany Donia Ty”

‘Iro halany donia ty, fotony tsy an̈isany, karaha zaho koa tsy an̈isany donia ty.’​—JAONA 17:14.

Ino ma dikanizen̈y?: Kristianin̈y tsy miady ndreky tsy miditry amy politiky fotony iro tsy an̈isany donia ty, karaha nataony Jesosy. Karaha ty baka ho Jesosy: “Fanjakan̈anaka tsy an̈isany donia ty. Fanjakan̈anaka koa an̈isany donia ty, hotrizay efa niady edy iro pan̈aradia zaho aby io baka zaho tsy natolotro tamy Jiosy. Fa Fanjakan̈anaka tsy baka amy donia ty.” (Jaona 18:36) Jesosy koa nandrisiky iro pan̈aradia izy aby io tsy ho miran̈a fomba fihevitry aminolo amy donia ty ndreky tsy hanan̈a toetsain̈y ndreky fitondranten̈a tsy ikeny Baiboly.​—Matio 20:25-27.

Tsy an̈isany donia ty ankitin̈y ma iro Kristianin̈y tamy voanalohany tan̈y? Karaha ty nivolan̈iny Jonathan Dymond, panoratra: ‘Iro Kristianin̈y tamy voanalohany tan̈y tsy nandeha niady na ino na ino vokany, na izy alain̈a baraka, na izy higadrain̈y, na izy hivonen̈a.’ Sitrany iro nampijalin̈y tozay izy han̈eky hiady. Iro mba niavaka koa fotony iro tsara fitondranten̈a. Petera nivolan̈a tamindro karaha ty: “Fotony anaro tsy miaraka milomoay amindro eky handeha aminy honahonany fitondranten̈a ratsy manjaka amy donia ty, iro lany hevitry ke tsy voly manihitihy anaro.” (1 Petera 4:4) Nivolan̈a koa Will Durant pahay tantara fa ‘iro Kristianin̈y aby io tia fivavahan̈a ndreky tsara fitondranten̈a ke nampaneloko iro panompo sampy tia man̈ano ambiansy loatra.’

Azovy fivavahan̈a tsy an̈isany donia ty aminy andra izioty? Maro fivavahan̈a mivolan̈a fa Kristianin̈y tokony mba miditry, izikoa fa misy ady. Ohatra, karaha ty nikoran̈iny Rakipahaizan̈a Katoliky Vaovao: “Ten̈a diso olo araiky izikoa tsy mandeha miady, fotony tsy ikeny eritreritrinany raha zen̈y.” Nisy tatitry momba zonolombelon̈o koa nataony fikambanan̈a. Nikoran̈iny tao koa fa nisy fandripahan̈a karazan̈anolo ta Rwanda tan̈y, taminy 1994. Fivavahan̈a jiaby niditry taminy ady, fa “Vavolombelon̈o Jehovah zaraiky fo tsy niditry tamizio.”

Karaha ty koa nivolan̈iny papianatra araiky, momba Famonoan̈a olo Tambabe nataony Nazỳ: “Aia koa ma tsisy fikambanan̈a foeky hasaky nan̈aboely vandy fataondro, na nanohitry famonoan̈a olo ratsy be karaha in̈y!” Ravoravo izy izikoa fa nitsidiky musée araiky. Tamizio tan̈y baka nahitany fa Vavolombelon̈o Jehovah tsy nilefitry tamy raha ninoandro foeky, nata iro nampijaliny Nazỳ.

Amy fivavahan̈a ino fo izioty misy olo mba tsara fitondranten̈a? Karaha ty nikoran̈iny gazety Katoliky Amerikanin̈y: “Ankamarozany tanora katolika tsy man̈araka fampianaran̈any legilizy, ke man̈ano tran̈o araiky kanefa tsy vita mariazy ndreky man̈ano firaisan̈a alohany mariazy.” Koran̈iny ao koa raha nivolan̈iny diakonin̈y araiky: “Mandilatra ny antsasany aminolo man̈ano mariazy, olo efa nan̈ano tran̈o araiky fo.” Mivolan̈a ndraiky Rakipahaizan̈a Britannica Vaovao (angiley) fa ‘fitsipikiny Baiboly momba fitondranten̈a raha ten̈a maventy amy Vavolombelon̈o Jehovah.’

‘Mifankatia’

“Anaro amiako didy vaovao: Anaro mifankatiava. Anaro mila mifankatia, karaha nitiavako anaro koa. Baka amy zen̈y ahaizanolo fa anaro pianatranaka ankitin̈y, izikoa anaro mifankatia.”​—JAONA 13:34, 35.

Ino ma dikanizen̈y? Jesosy nan̈iraka pan̈aradia izy hifankatia, karaha nitiavany iro. Akory nan̈aboahany Jesosy fa tiany ankitin̈y iro? Izy tsy nan̈avakavaka, avio izy tsy nan̈ambany man̈angy, ndray karaha zen̈y fataonolo tamy fotoan̈anizen̈y. (Jaona 4:7-10) Izy koa tsy nampiadanten̈a, fa nahafoe fotoan̈a ndreky angovo han̈ampian̈a iro. (Marka 6:30-34) Von̈ono han̈ano soron̈o ain̈inany foeky Jesosy. Ino antony? Karaha ty nambarany: “Zaho piambin̈y ten̈a tsara. Piambin̈y ten̈a tsara zen̈y mahafoe ain̈inany han̈avotan̈a ondrikondriky.”​—Jaona 10:11.

Zen̈y ma raha nataondro Kristianin̈y voanalohany tan̈y? Iro nifampikaiky ‘rahalahy’ ndreky ‘ranabavy.’ (Filemona 1, 2) Avio niraisindro tsara koa lan̈iany olo nan̈iry ho an̈isany fiangonan̈a kristianin̈y, na aia na aia tany faviandro. An̈isany raha ninoandro, ‘mitovy fo Jiosy ndreky Griky. Araiky fo koa Tompondro jiaby.’ (Romanina 10:11, 12) Tamy Pantekoty taon̈o 33, iro pianatrany Jesosy ta Jerosalema ‘nivarotro tanindro ndreky raha nanan̈andro’, ke zay vola nazondro ‘nizaraindro’ tamindro Kristianin̈y vo vita batisa aby io. Ke nahavita nidoko ta Jerosalema tao fo iro Kristianin̈y vaovao aby io, sady ‘nifantoko tamy fampianaran̈any apostoly.’ (Asan’ny Apostoly 2:41-45) Karakory fahitanolo tamy zen̈y iro Kristianin̈y aby io? Karaha ty nambarany Tertullien, tsy ela ho 200 taon̈o tafarany nifatesandro apostoly aby io: ‘Ten̈a nifankatia iro Kristianin̈y aby io, avio iro von̈ono hofoaty han̈avotan̈a namandro foeky.’

Azovy man̈araka volan̈any Jesosy io amy zioty? Karaha ty nisoratin̈y Edward Gibbon, tamy boky araiky nisoratiny: “[Tan̈atiny taon̈o maro iro olo miaboko ho Kristianin̈y aby io] nampijaly Kristianin̈y namandro, lombolombony raha nataondro olo tsy pino aby io tamindro raha zen̈y.’ Hita baka tamy fandinihan̈a vo tsy ela natao ta Etazonỳ koa fa, marobe pivavaka man̈avakavaka olo, kanefa olo avakavahandro io amy zen̈y Kristianin̈y fo. Ny raha hita koa, iro ndray finoan̈a araiky, iro koa tsy tanàna araky, iro efa tsy mifandray edy. Iro tsy afaka mifan̈ampy sady tsy tihifan̈ampy foeky, lera misy raha manahiran̈a.

Azovy fo basy fivavahan̈a mba ten̈a mifankatia amy zioty? Diniha baka raha nataony Vavolombelon̈o Jehovah ty. Nisy siklony efatra nandalo ta Floride tan̈atiny fanjava aroe, tamy taon̈o 2004 in̈y. Nisy fan̈ampian̈a nizarain̈a, ke nan̈aramaso izio taleny Komity Pamonjy Olo Tatrany Antambo, ke hitandro fa hafa mare Vavolombelon̈o Jehovah. Ino antony? Fotony voalamin̈y tsarabe fan̈ampian̈a nataondro. Nivolan̈a tale io fa afaka man̈amia zay raha ilaindro Vavolombelon̈o Jehovah aby io iro izikoa misy raha ilaindro. Nisy Vavolombelon̈o Jehovah tatrany antambo karaha zen̈y koa tamy Repobliky Demokratikiny Congo, taminy 1997. Nisy Vavolombelon̈o Jehovah vitsivitsy an̈isany ekipy pan̈ampy olo tatrany antambo nandeha tan̈y, niaraka iro naharen̈y raha navoa namandro io. Iro nitondra fan̈ampian̈a baka tamy Vavolombelon̈o Jehovah tan Eropy. Kadiriny 2000 tapitrisa ariary valerany raha aby zen̈y. Iro koa nitondra aody, hanin̈y avio lamba nindro piaramanompo tamindro ndreky ninolo hafa.

“Mampianatra Olo An̈aran̈any Zan̈ahary”

“An̈aranao efa nampianariko iro, baka io mbala hampianariko iro koa.”​—JAONA 17:6, 26.

Ino ma dikanizen̈y? Tiany Jesosy ho hainolo an̈arany Zan̈ahary io, ke nampiasainy an̈aran̈a io, izy koa fa nitory taminolo. Isaka izy namaky Soratra Masin̈y koa, tsy maintsy nitonon̈iny fo an̈aran̈any Zan̈ahary io. (Lioka 4:16-21) Iro pianatranany aby io nampianariny hivavaka karaha ty aby: “Baba, irarian̈a an̈aranao ho masin̈y.”​—Lioka 11:2.

Nan̈ano karaha zen̈y ma iro Kristianin̈y tamy voanalohany tan̈y? Apostoly Petera nivolan̈a tamindro antipan̈ahy ta Jerosalema tan̈y fa Zan̈ahary nangala olo “hitondra an̈aran̈anany”, ke iro olo aby hampianatra olo an̈aran̈a io. (Asan’ny Apostoly 2:21; Romanina 10:13) Iro koa nampiasa an̈aran̈any Zan̈ahary io tamy boky nisoratindro. Ohatra, Tôsefta, fitambarany lalàn̈a jiosy vita kadiriny tamy taon̈o 300 tan̈y. Karaha ty koran̈inizio ao: ‘Niroandro panohitry aby io bokiny pitory Filazantsara ndreky bokiny minim [na Kristianin̈y jiosy], fotony nisy an̈aran̈any Zan̈ahary.’

Azovy man̈araka volan̈any Jesosy io amy zioty? Baiboly Dikan-teny Iombonana Eto Madagasikara mikoran̈a momba an̈aran̈any Zan̈ahary, amy lamariky amy pazy ambany, aminy Eksodosy 3:15. Karaha ty koran̈inizio ao: “Komansy tamy taonjato faha-4 talohany Kristy tan̈y iro Jiosy aby io nanjary zatra tsy nanon̈ono an̈aran̈a io eky (baka zen̈y izio tsy hitonontonon̈iny tsy aminy antony, zahava 20.7) Matetiky iro nivolan̈a TOMPO fo, na nisoloandro fomba fivolan̈ana hafa fo an̈aran̈a io, karaha ataony Ny Lanitra, ny Anarana, ny Voninahitra. Ke izikoa fa misy an̈aran̈a YHWHa amy volan̈a hebreo masôretiky, TOMPO fo nandikany DIEM izy ato.” Ohatra, vo tsy ela koa Vatikan nivolan̈a taminy eveka katoliky fa ‘an̈aran̈any Zan̈ahary Iaveh [na Jehovah] zen̈y tsy tokony hampiasain̈y ndreky tsy tokony hitonon̈iny foeky izikoa fa mihira ndreky mivavaka.

Ke azovy fo aminy andra izioty mba mampiasa ndreky mampianatra olo an̈aran̈any Zan̈ahary? Karaha ataony Sergey, izy nipetraka ta Kirghizistan tan̈y. Taminizy 15 taon̈o izy vo sambany nahay fa Jehovah io an̈aran̈any Zan̈ahary. An̈aran̈a io baka sendra ren̈iny tamy filma. Fa tan̈atiny folo taon̈o mandilatra talohanizen̈y, izy tsiary ndraiky naharen̈y an̈aran̈a io. Tafaranizin̈y iro nifindra ta Etazonỳ tan̈y. Nisy Vavolombelon̈o Jehovah tan̈y nitory taminany, ke naboakandro izy tamy Baiboly an̈aran̈any Zan̈ahary. Ten̈a ravoravo izy nahay fa kaiky misy olo mampiasa fo an̈aran̈a Jehovah io. An̈isany mahatiriky koa fomba nandikany diksionera Webster (angiley) Jehovah Zan̈ahary io: “Zan̈ahary farany an̈abo ikeny Vavolombelon̈o Jehovah ke io zaraiky fo Zan̈ahary ivavahandro.”

[Lamariky amy pazy ambany]

‘Mitory Vaovao Tsarany Fanjakan̈any Zan̈ahary’

“Hambara amy tany jiaby misy olo antsendriky vaovao tsara mikasiky Fanjakan̈a ty, baka firenena jiaby ambony tany maharen̈y, zay vo avy ny farany.”​—MATIO 24:14.

Ino ma dikanizen̈y? Lioka, panoratra Filazantsara nivolan̈a fa “nitety tanambe ndreky ambanivolo Jesosy ke nitory ndreky nan̈ambara vaovao tsarany Fanjakan̈any Zan̈ahary.” (Lioka 8:1) Jesosy foeky koa nivolan̈a karaha ty: ‘Tsy maintsy mitory vaovao tsara zaho, fotony zen̈y raha nan̈irahan̈a zaho.’ (Lioka 4:43) Iro pianatranany aby io koa nirahiny nitety tanàna, hitory vaovao tsara. Izy nivolan̈a tamindro: ‘Anaro hanjary vavolombelon̈onaka amy tany farany lavitry an̈y.’​—Asan’ny Apostoly 1:8; Lioka 10:1.

Nitory vaovao tsara io ankitin̈y ma iro Kristianin̈y tamy voanalohany tan̈y? Karaha ty nivolan̈iny David Watson, pasitera anglikany: “Tsy mahalany fan̈ahy izikoa maro olo manjary tsy tia manompo Zan̈ahary, fotony tsy raha maventy amy legilizy aby io mitory ndreky mampianatra zen̈y.” Nivolan̈a momba Fivavahan̈a Arapilazantsara ndreky Advantisty, avio fivavahan̈a hafa koa José Luis Pérez Guadalupe, amy boky nisoratiny Nan̈ino ma Loso Mihen̈y iro Katolika aby Io? (espan̈ioly) Iro ho izy ‘tsy mitory isaka tran̈o zen̈y foeky, kanefa iro Vavolombelon̈o Jehovah aby io mbala mitory isaka tran̈o fo.’

Nisy manampahizan̈a araiky koa, Jonathan Turley an̈arany. Ten̈a marin̈y raha nivolan̈iny ty: “Olo araiky koa fa maharen̈y olo mivolan̈a Vavolombelon̈o Jehovah zen̈y, efa olo avy tampoko antran̈ondro an̈y mandeha mitory amindro edy raha avy an̈atiny jerindro. Iro tsy raha tihifanojy aminolo fo fa ten̈a raha maventy amindro koa fan̈anaovan̈a raha hankafatatra finoan̈andro.”

[Efajoro]

Akory hahaizanao ten̈a Kristianin̈y?

Izikoa iro raha dimy nikoran̈iny Jesosy in̈y zahavan̈a, azovy mba hitanao ten̈a Kristianin̈y? Nata maro mare fivavahan̈a mivolan̈a fa iro Kristianin̈y, tsarova volan̈any Jesosy ty: “Tsy zay olo mivolan̈a aminaka: ‘A Tompoko anao, a Tompoko anao’, hiditry amy fanjakan̈any lan̈itry, fa zay olo man̈ano sitrapony Babako andan̈itry an̈y fo.” (Matio 7:21) Ke tsara dinihinao azovy ma fivavahan̈a man̈ano sitrapony Zan̈ahary io, na fivavahan̈a ten̈a Kristianin̈y io. Avio tokony hiaraka amindro io koa anao, baka anao hahazo hatsaran̈a tsisy farany, lera Fanjakan̈any Zan̈ahary io mitondra tany ty. Fa izikoa tianao hahay raha maro momba Fanjakan̈any Zan̈ahary io ndreky raha handeha hataonizio, mikoràn̈a amy Vavolombelon̈o Jehovah.​—Lioka 4:43.