Baiboly ma mba Afaka Man̈ampy Olo Marary Lava?

Valiny baka amy Baiboly

Ia. Zan̈ahary mikarakara panomponany marary. Karaha ty volan̈iny Baiboly: “Jehovah hanohan̈a izy amy fandrian̈a arariany.” (Salamo 41:3) Izikoa anao marary lava, hevitry telo aby ty mety hankahery anao:

1. Mivavaha baka hahazo angovo hiaretan̈a. Amy zen̈y anao mety hahazo “fiadanan̈a Zan̈ahary, bebeny eritreritry jiaby”, sady izio koa han̈ampy anao hahavita hiaritry ndreky tsy hiasaloha be.—Filipianina 4:6, 7.

2. Mifen̈a baka hahita raha hamparavoravo fo. Baiboly mivolan̈a: “Fô ravoravo io mampajanga, fa hakivian̈a ndraiky mampamaiky taolan̈a.” (Ohabolana 17:22) Mba mahaiza mikidikidy, man̈ano raha mampitokiky, amy zen̈y anao tsy malahelo be loatra avio salama tsara.

3. Manàn̈a Fan̈antinan̈a. Izikoa anao manan̈a fan̈antinan̈a, ho ravoravo fo anao ndray iô aretin̈inao. (Romanina 12:12) Baiboly mivolan̈a fa aminy amaray an̈y efa tsisy eky olo hivolan̈a: “Zaho zen̈y marary e.” (Isaia 33:24) Amy zen̈y, hataony Zan̈ahary janga aby olo jiaby marary lava, ndray tsy vitany dokotera amizioty mampajanga iro. Ohatra, Baiboly mivolan̈a fa amy zen̈y olo hahaitanora ndraiky, fa tsy hahaihatoe eky, sady ho salama tsarabe. Karaha ty hoizy, amy Joba 33:25: “Irarian̈a nofotronany ho tsaratsarany taminizy mbala tanora; irarian̈a himpody aminany angovonany taminizy tanora.”

Aleva onon̈o: Zahay Vavolombelon̈o Jehovah man̈eky fa Zan̈ahary ten̈a man̈ampy. Izikoa zahay manan̈a aretin̈y, zahay mandeha man̈aton̈o dokotera. (Marka 2:17) Fa ndray zen̈y, zahay tsy mandrisiky olo han̈araka fitahan̈a manokan̈a, fa anjaranolo marary io fo manapakevitry momba zen̈y.