‘Efa Tsy An̈aty Jeriko Eky Han̈ova Donia Ty’

FIAIN̈ANANANY TALOHA:

Rango zaho mbala hely, zaho efa tia zavaboary edy. Marikitry Jyväskylä, tamy tanànanay ta Failandy Afovoany tan̈y, nisy atiala ndreky matsabory tsara oe. Matetiky, fianakavian̈anay nandeha nitsangatsangan̈a tan̈y. Zaho koa ten̈a tia biby. Tamy zaho mbala hely, tolon̈iko aby lan̈iany rabosy ndreky amboa hitako. Ke lera zaho be, zaho nalahelo mare nahita olo aby io mampijaly biby. Tafara tatỳ, zaho niditry tamy fikambanan̈a araiky miaro zony biby. Tao zaho fanojy olo tia biby, mira zaho koa.

Zahay nazoto nan̈ano raha hitakian̈a zony biby, baka io nitaon̈o olo handeha hilahatra amy lalabe, fotony ten̈a tsy ikenay fivarotan̈a hoditry biby ndreky fampiasan̈a biby amy laboratoara. Zahay koa nizara fan̈azavan̈a momba zen̈y. Ndray zahay aby namoron̈o fikambanan̈a vaovao piaro biby. Efa tafahoatra loatra raha nataonay, ke zahay matetiky nahita problemo tamy manampahifan̈a aby io. Efa matetiky zaho voasambotro ndreky nandeha tamy fitsaran̈a.

Nisy problemo hafa koa nampiasaloha zaho, fa tsy momba biby io fo. Tafara tatỳ, zaho niditry tamy fikambanan̈a maromaro, karaha ataony fikambanan̈a piaro zonolombelon̈o ndreky fikambanan̈a iraisampirenena miaro tontolo iain̈ana. Zaho ten̈a nazoto mare nanohan̈a raha nataondro io. Zaho koa niady ninolo masikiny ndreky tsy ampy hanin̈y, baka io ninolo hafa sahiran̈a koa.

Koa fa nandeha fotoan̈a, tsapako fa zaho tsy afaka man̈ova fiain̈ana ty. Marin̈y ndraiky fa iro fikambanan̈a aby io mahavaha problemo madiniky sasantsasany, fa iro problemo maventy ndraiky mahaimitombo fo. Izio karaha raha misy angovo ratsy in̈y mandrobaka donia ty, kanefa tsisy olo mijery. Zaho nahatsiaro tsy nahavita raha foeky.

BAIBOLY NAN̈OVA FIAIN̈ANANAKA:

Zaho nalahelo fotony tsapako fa zaho tsy nahavita raha foeky. Ke zaho nanomboko nieritreritry momba Zan̈ahary ndreky Baiboly. Zaho taloha efa navy nianatra Baiboly tamy Vavolombelon̈o Jehovah. Tiako mare iro, fotony iro tsara fan̈ahy ndreky ten̈a nijery zaho. Fa zaho tamy zen̈y fo mbala tsy von̈ono hiova. Fa ziô efa niova rano.

Nalaiko Baibolinaka baka io nivakiako izio. Ten̈a nankahery zaho izio. Zaho nahita andininy maromaro mampianatra atsika ho tsara fan̈ahy amy biby. Ohatra, aminy Ohabolana 12:10 mivolan̈a fa “olo marin̈y miaro ain̈iny biby tariminy.” Hitako tao koa fa kaiky tsy Zan̈ahary mahavy problemo jiaby ambony tany ty. Fa baka aminolo maro tsy man̈araka taridalan̈anany mahavy problemo aby io mahaimitombo fo. Ravoravo mare zaho nahay fa Jehovah io be fitiavan̈a ndreky maharidraha.—Salamo 103:8-14.

Tamy fotoan̈a zen̈y, zaho nahita taratasy fangatahan̈a boky Ino ma Raha Ten̈a Ampianariny Baiboly? Nifinoako izio baka io nalefako. Tsy ela, efa nisy olo fivadiany Vavolombelon̈o Jehovah navy taminaka tao, ke nan̈ontany tsao zaho tihianatra Baiboly. Zaho nan̈eky. Zaho koa nanomboko nandeha nivory tamy Tran̈o Fivorian̈a tan̈y. Ke ten̈a niditry tamy fonaka mare fahamarin̈ana tan̈aty Baiboly tao.

Nahavita niova zaho izikoa fa nianatra Baiboly. Zaho voly nifima ndreky voly nigiaka toaka. Nivoako pozinaka ndreky fomba fivolan̈ako. Zaho koa niezaka nan̈aja manampahifan̈a. (Romanina 13:1) Zaho efa tsy ratsy fitondranten̈a eky, kanefa izio taloha raha tsy lefitriko foeky.

Fa ny ten̈a sarotro taminaka, niala tamy fikambanan̈a piaro zonolombelon̈o ndreky biby. Tamy voanalohany, zaho nieritreritry fa zaho koa nan̈ano zen̈y, mira nivadiky tamindro fo. Kanefa hitako fa kaiky Fanjakan̈any Zan̈ahary zaraiky fo ten̈a afaka man̈ova fiain̈ana ty. Ke zaho nifen̈y nanohan̈a Fanjakan̈a io ndreky nan̈ampy olo hahay raha momba izio.—Matio 6:33.

HATSARAN̈A NAZOKO:

Tamy zaho mbala pitaky zo, zaho nieritreritry fa olo araiky, na izy tsara na izy ratsy. Ke zaho von̈ono fo hiady taminolo niritriretiko fa ratsy. Fa zaho izikoa fa nianatra Baiboly, zaho efa tsy nan̈ano karaha zen̈y eky. Nifen̈y zaho ho tia karazanolo jiaby. (Matio 5:44) Fomba hafa nan̈aboahako fitiavan̈a koa, zaho nizara vaovao tsara momba Fanjakan̈any Zan̈ahary io taminolo. Ravoravo zaho man̈ano asa io antsitrapô ndreky mahita fa izio mahavy olo ho tia fihavan̈ana ndreky hahatsiaro sambatra, avio mahavy iro hanan̈a ten̈a fan̈antinan̈a zen̈y.

Nambelako tampelantan̈any Jehovah raha jiaby, ke zaho nahatsiaro nilamintsain̈y oe. Zaho matoky fa izy tsy mety han̈ambela biby ndreky olombelon̈o niforon̈iny aby io hijaly mandrakizay, na koa han̈ambela tany tsarabe ty ho robaka. Tsy ho ela, izy hampiasa Fanjakan̈anany han̈arin̈y raha tsy mety jiaby. (Isaia 11:1-9) Ravoravo mare zaho koa fa nahay raha jiaby zen̈y. Ravoravo koa zaho man̈ampy olo hatoky zen̈y. Zaho zioty efa tsy mieritreritry han̈ova donia ty eky.