Raha Ampianariny Baiboly Tsy Mety Lany Daty

MINIMINIA HELY anao mandeha mitsidiky musée araiky feno tsangambato efa ela aby in̈y. Ankamarozandro io feno loadoaka, efa robaka sady efa miova kolera. Efa misy raha manky aby sasany. Misy araiky amindro io ndraiky mbala tsara mare. Mbala hita tsara soritry jiaby aminany. Ke ho anao amy gidy io: “Vaovao ma araiky ty?” “Ehe” hoizy, “izio ny ten̈a efa ela amindro jiaby, sady mbala tsisy raha namboarin̈y foeky taminany io.” Ke ho anao: “Izio ma nisy fomba niarovan̈a izio?” “Tsisy” hoizy. “Izio efa nandalovany mahaleny be ndreky sikilony, sady efa maro koa zen̈y olo nitady hamotiky izio.” Ke loso diniky anao: “Namboarin̈y taminino eky izio?”

Mira amy tsangambato miavaka io Baiboly. Amy boky jiaby, izio ny ten̈a efa kay. Maro boky efa ela kanefa izikoa fa nandeha fotoan̈a, mira “robaka” fo iro io, karaha tsangambato efa kay aby in̈y fo. Raha volan̈indro io momba siansy mifanohitry amy raha hay tafara tatỳ ndreky efa avoaporofo. Matetiky aby efa tsy pare foeky torohevitry hita amindro io momba fitahan̈a, fa mampiditry problemo. Efa tapany hely aminy asa soratra taloha maro fo koa tavela, fotony nisy tamindro io very na robaka mare.

Tsy mitovy amy zen̈y foeky Baiboly. Efa 3 500 taon̈o mahery zay nanomboko nanoratan̈a izio. Taon̈otaon̈o olo nifen̈y hamotiky izio. Tao fan̈oroan̈a ndreky fanakanan̈a avio fankaratsian̈a izio. Kanefa tsy niova foeky raha an̈atiny ao. Izio tsy boky efa lany daty, fotony fan̈azavan̈a an̈aty ao mbala mifan̈araka tsara amy raha hay tafara tatỳ. Zahava efajoro “Lany Daty sa Aloha Loatra?”

TORO LALAN̈A ILAINTSIKA

Anao mety hivolan̈a: ‘Mbala miasa amizioty edy fampianaran̈any Baiboly io?’ Aleva onon̈o baka ty: ‘Ino problemo farany maventy atrefinolo aminandra zioty? Ino amindro io ten̈a mampavozo?’ Mety ady, fandrobatan̈a tontolo iain̈ana, olo kafiry, na kolikoly raha direkty avy an̈aty jerinao. Atsika handiniky toro lalan̈a Baiboly aby ty, ke diniha: ‘Tsy mba ho tsaratsara edy ma fiain̈ana, izikoa arehanolo iro io?’

TIA FIHAVAN̈ANA

“Sambatra olo pampihavan̈a, fotony izy kahian̈a zanaka Zan̈ahary.” (Matio 5:9) “Izikoa raha mbala mety atao, ataova raha ihavan̈anaro aminolo jiaby.”—Romanina 12:18.

MAMINDRA FÔ NDREKY MAN̈AMBELA HADISOVAN̈A

“Sambatra olo mamindro fô, fotony izy hamindran̈a fô.” (Matio 5:7) “Mifandifera fo baka io mahaiza mifan̈ambela hadisovan̈a amy fô jiaby, ndray misy manan̈a antony tokony hitretrezan̈a momba olo sasany. Nifafany Jehovaha tsisy tavela hadisovan̈anaro, ke tokony ho von̈ono hifan̈ambela hadisovan̈a karaha zen̈y koa anaro.”—Kolosianina 3:13.

TSY MAN̈AVAKAVAKA

“Baka taminolo araiky niasany [Zan̈ahary] olo amy firenena jiaby baka iro hipetraka ambony tany jiaby.” (Asan’ny Apostoly 17:26) “Zan̈ahary tsy man̈avakavaka, fa amy firenena jiaby, lan̈iany olo mavozo izy ndreky man̈ano ny marin̈y fo ankasitrahiny.”—Asan’ny Apostoly 10:34, 35.

TSY MANDROBAKA TANY

“Nalainy Zan̈ahary Jehovah lelahy io, baka io napetrany tamy zaridain̈y Edena, hamboly ndreky hikarakara zaridain̈y io.” (Genesisy 2:15) Zan̈ahary ‘handripaka lan̈iany olo mandrobaka tany ty.’—Apokalypsy 11:18.

TSY MAN̈IRY RAHANOLO NDREKY TSY TIA FITONDRANTEN̈A RATSY

“Mitandrema amy raha jiaby mety hahavy anaro tsy ho afapo amy raha anan̈anaro. Ndray olo manandraha karakory, fanan̈ananany io tsy mahatana fahin̈ananany.” (Lioka 12:15) “Tsy tokony hiton̈onin̈y aminaro foeky koran̈a momba fijangajangan̈a ndreky raha jiaby mety ho fahalotoan̈a na fan̈irian̈a tsy mety afapo jiaby, fotony zen̈y tsy mendriky olo masin̈y.”—Efesianina 5:3.

MAN̈ANO NY MARIN̈Y NDREKY MAZOTO MIASA

“Zahay mba man̈iry han̈ano ny marin̈y amy raha jiaby.” (Hebreo 13:18) “Irarian̈a zay olo pangalatra tsy hangalatra eky, fa irarian̈a izy hiasa mare.”—Efesianina 4:28.

MAN̈AMPY OLO SAHIRAN̈A

‘Man̈anaova volan̈a mankahery aminolo kivy, tohan̈a olo malemy, ndreky mifen̈a haharidraha aminolo jiaby.’ (1 Tesalonianina 5:14) ‘Karakaray iro kamboty ndreky viavy pitondraten̈a amy fahorian̈andro.’—Jakoba 1:27.

Baiboly tsy vitany man̈ambara toro lalan̈a aby io fo, fa ampiany koa atsika hahita fa ten̈a ilain̈y iro io, avio ambarany koa fomba han̈arehan̈a iro io amy fiain̈ana andavanandra. Izikoa maro olo man̈araka fampianaran̈a aby io, ho vitsy fo problemo. Mitondra hatsaran̈a amintsika ankitin̈y toro lalan̈a Baiboly sady tsy lany daty! Kanefa, ino hatsaran̈a ho azonao rango izioty izikoa anao man̈araka izio?

FAMPIANARAN̈ANY BAIBOLY IO MAHATSARA ANAO RANGO IZIOTY

Matio 11:19 mivolan̈a: “Fahendrenanolo araiky, raha ataony mankamarin̈y izy.” Tsy marin̈y? Izikoa olo araiky misy fahendrena, hita amy fiain̈ananany raha zen̈y. Ke anao mety hieritreritry: ‘Tsy tokotro hisy vokany amy fiain̈ananaka edy Baiboly, izikoa ten̈a mety arehan̈a ankitin̈y izio? Baiboly ma ten̈a man̈ampy zaho hiatriky problemo?’ Zahava ohatra ty:

Naro raha atao mare Sandyb. Izy afapo tamy fiain̈ananany. Kanefa tio fo, naty zanakanany viavy avio ravan̈a tokantran̈onany. Nanjary sahiran̈a arabola koa izy. Karaha ty hoizy: “Niova mare fiain̈ananaka: Zanako viavy ndreky vadiko samy fa tsy tio eky. Zaho nivadiky tsisy tany nipitrahan̈a. Zaho efa tsisy angovo ndreky efa tsisy ny naha izy zaho. Tsisy dikany foeky fiain̈ananaka.”

Nan̈eky Sandy fa marin̈y ankitin̈y raha volan̈iny Salamo 90:10 ty: “Fitopolo taon̈o andra iain̈anay, koa misy ten̈a matanjaka mahatakatra valopolo taon̈o, kanefa feno raha manahiran̈a ndreky fijalian̈a. Fa mielan̈a fo andra iain̈anay, zahay efa mitilin̈y edy.”

Baiboly ten̈a nan̈ampy Sandy. Miavaka mare raha nataonizio ninazy. Amy lahatsoratra telo fan̈araka ty, ho hitanao fa maro olo nahita fa torohevitry Baiboly ten̈a nan̈ampy iro hiatriky problemo. Tsapandro fa Baiboly io karaha tsangambato araiky avoakoran̈a tamy voanalohany in̈y. Maro boky nanjary lany andra fa Baiboly tsy karaha zen̈y foeky. Hafa foeky izio. Raha an̈atiny ao ma mahavy zen̈y? Ten̈a hevitry Zan̈ahary ma an̈aty ao fa tsy hevitrinolo?—1 Tesalonianina 2:13.

Mety tsapanao koa fa fiain̈anantsika fohiky sady feno fahasahiran̈ana ankitin̈y. Izikoa anao fa mila ho kivy azony problemo maro loatra, ino afaka mankahery ndreky manohan̈a anao? Aia misy torohevitry tsara?

Alo atsika handiniky fomba telo hahitantsika fa raha koran̈iny Baiboly io afaka harehan̈a amy fiain̈ana. Izio afaka mampianatra anao

1. hiary problemo izikoa mbala mety.

2. hamaha problemo lera izio fa miboaka.

3. hahavita hiatriky raha tsy afaka ovoanao.

Hikoran̈a momba zen̈y iro lahatsoratra telo fan̈araka.