Asa Tsaroanao?

Asa nivakianao tsarabe Tilikambo Fiambesan̈a tamy taon̈o ty? Izikoa zen̈y, zahava asa hainao valiny fan̈ontanian̈a aby ty:

Jakoba 5:11 mivolan̈a fa Jehovah “be fitiavan̈a” sady “mamindra fô.” Ino toky anan̈antsika baka amy zen̈y?

Von̈ono han̈ambela hadisovan̈antsika Jehovah, fotony izy mamindra fô. Man̈amia toky atsika Jakoba 5:11 fa izy ten̈a tia atsika sady von̈ono han̈ampy atsika. Tsara alaintsika tahaka izy.—w21.01, p. 21.

Nan̈ino Jehovah nan̈amia fahifan̈a olo sasany?

Fitiavan̈a nahavy izy nan̈ano zen̈y. Tiany hiray sain̈y ndreky ho sambatra fianakavian̈anany. Izikoa olo tsiaraikiaraiky amy fianakavian̈a samby man̈aja fahifan̈a, ho haindro fo azovy tômpiny fanapahankevitry farany, ndreky azovy tokony han̈atanteraka fanapahankevitry io.—w21.02, p. 3.

Nan̈ino ma Kristianin̈y mila mitandrin̈y izikoa fa mampiasa applications fandifasan̈a hafatra na mesazy?

Izikoa olo araiky mifidy hampiasa applications aby io, mila fidìny tsarabe azovy aby olo ikoran̈any ao. Kanefa sarotro raha zen̈y izikoa maro olo an̈atiny groupe de discussion io. (1 Tim. 5:13) An̈isany problemo amizio koa, maro olo man̈aparitaka vaovao tsy azo antoko, avio misy Kristianin̈y sasany mampiasa izio hitadiavan̈a vola amy piaramanompo.—w21.03, p. 31.

Nan̈ino ma Jesosy nambelany Zan̈ahary hijaly ndreky hofoaty?

Voanalohany, tsy maintsy nivonen̈a taminy hazofijalian̈a i Jesosy baka iro Jiosy aby io afaka taminy ozon̈o. (Gal. 3:10, 13) Faharoe, nampiofan̈iny Jehovah izy baka ho vitany tsara andraikitry miambin̈y izy amy maha Pisoron̈obe. Fahatelo, hita tamy fahafatesany Jesosy ndreky tsy fivadihan̈anany fa vitanolombelon̈o fo tsy hivadiky, ndray an̈atiny fitsapan̈a farany mare. (Joba 1:9-11)—w21.04, p. 16-17.

Ino raha mety hataonao izikoa sarotro takatra antran̈o olo itorianao?

Diniha lera karakory mety hatakaran̈a olo antran̈o. Mety hivoavoanao koa tany itorianao. Azonao atao koa man̈ovaova fomba fitorian̈anao. Ohatra, mitory amy taratasy.—w21.05, p. 15-16.

Ino ma raha tiany Paoly havian̈a taminizy nivolan̈a: ‘Baka tamy fan̈arehako lalàn̈a nahavy zaho naty, izikoa lalàn̈a zahavan̈a’? (Gal. 2:19)

Nabaribariny Lalàn̈a fa tsy lavorary olombelon̈o, avio izio nampifantoko jerindro Israelita aby io tamy Kristy. (Gal. 3:19, 24) Ary baka amy zen̈y nahavy Paoly nan̈eky fa Jesosy ankitin̈y Kristy. Ke zen̈y nahavy izy nivolan̈a fa ‘naty izy, izikoa lalàn̈a zahavan̈a’, fotony izy efa tsy fiheziny lalàn̈a eky.—w21.06, p. 31.

Nan̈ino ma Jehovah ny ten̈a modely amy fiaretan̈a?

Maro raha iaretany Jehovah: Voaloto an̈aran̈anany, maro olo manohitry zònany hitondra, nisy zanany sasany nanohitry izy, baka io Devoly tsy vôly mankaratsy izy ndreky panomponany. Tsy mora aminany mahita panomponany tsy mivadiky aby io maty, maro olo ratsy fan̈ahy mampijaly olo, mahairatsy fitondranten̈a fo olombelon̈o, avio robaka tontolo iain̈ana.—w21.07, p. 9-12.

Nan̈ino Josefa ten̈a ohatra amy fanan̈ana faharetan̈a?

Niaritry ny tsy rariny i Josefa fotony nampijaly izy mare iro zokiny aby io. Nitsarain̈a baka tamy raha tsy nataony, ndreky nigadra tsy aradrariny ta Ezipty tan̈atiny taon̈otaon̈o koa izy tafara tatỳ.—w21.08, p. 12.

Ino ma fan̈ozongozon̈ana an̈ohatra koran̈iny Hagay 2:6-9, 20-22 ao?

Tsy jirendro firenena aby io hafatra momba Fanjakan̈a io. Ndray izy man̈ano zen̈y, maro olo avoantsory amy fahamarin̈ana. Hihozongozon̈iny farany iro io tsy ho ela, lera iro hiravan̈iny Zan̈ahary.—w21.09, p. 15-19.

Nan̈ino ma atsika tsy tokony ho rivan̈a izikoa fa manompo?

Hitany Jehovah ezakantsika, salakady ten̈a ankasitrahiny. Ke atsika koa tsy kajo ndreky tsy kivy, hahazo fiainan̈a tsisy farany edy atsika.—w21.10, p. 25-26.

Akory han̈ampiany Levitikosy toko 19 atsika ‘ho masin̈y amy fitondranten̈antsika jiaby?’ (1 Pet. 1:15)

Mety baka tamy Levitikosy 19:2 nangalàn̈a andininy io. Amy Levitikosy toko 19 ao ahitan̈a fomba maro mety han̈arehantsika raha koran̈iny 1 Petera 1:15 io amy fiainan̈antsika andavanandra.—w21.12, p. 3-4.