‘Mangalà Onondraha Tsarabe, ke Miambesa Fo!’

1. Ino raha nivolan̈iny Jesosy tamy pianatranany momba fotoan̈a aviany farany, avio ino raha nampitandreminy iro?

ANDRA vitsivitsy talohany nifatesany Jesosy tamy zen̈y. Nisy pianatranany efatra nan̈ontany izy karaha ty: ‘Karakory hahaizan̈a ... efa marikitry farany donia ty?’ (Mat. 24:3) Iro pianatra aby io nety tihan̈ontany fomba ahaizandro lera handravan̈ana Jerosalema ndreky tempolinany. Fa tsy fandravan̈ana Jerosalema ndreky tempolinany fo nambarany Jesosy iro, fa momba “farany donia” iain̈antsika amy zioty koa. Ombian̈a farany hoizy? Jesosy nivolan̈a: ‘Tsisy mahay andra na lera zen̈y, na anjely andan̈itry an̈y, na Zanaka, izikoa tsy Baba fo.’ Baka tio pianatranany jiaby nampitandreminy karaha ty: ‘Miambesa fo.’​—Mar. 13:32-37.

2. Nan̈ino iro Kristianin̈y tamy taonjato voanalohany nila niambin̈y mare?

² Nila niambin̈y mare iro Kristianin̈y jiosy tamy taonjato voanalohany. Raha zen̈y niankin̈any fahin̈anandro! Nivolan̈iny Jesosy tamy pan̈aradia izy ino raha mila alaindro onon̈o baka hahaizandro fa efa marikitry fotoan̈a handravan̈ana Jerosalema ndreky tempolinany. Izy nivolan̈a: “Izikoa fa hitanaro fa misy maramila mitoby man̈odidin̈y Jerosalema, tsara hainaro fa efa marikitry ho ravan̈iny izy dikanizen̈y.” Ke tamy zen̈y, iro nila nan̈araka fampitandreman̈any Jesosy ke nila ‘nilefa tamy bongo.’ (Lioka 21:20, 21) Lan̈iany nan̈araka fampitandreman̈a io tsy naty koa fa nandravan̈a Jerosalema iro Romanin̈y aby io.

3. Ino raha hidinihintsika amy lahatsoratra ty?

³ Efa tsy ela hifaran̈a donia ratsy iain̈antsika amy zioty. Ke atsika mila mangala onondraha tsarabe ndreky mifen̈y miambin̈y fo. Amy lahatsoratra ty, atsika handiniky ino han̈ampy atsika hahay handanjalanja lera mandiniky raha mandalo amy donia ty, akory hitandremantsika ten̈a ndreky akory hampiasantsika amy fomba tsara fotoan̈a anan̈antsika.

MAHAIZA MANDANJALANJA KOA FA MANDINIKY RAHA MANDALO AMY DONIA TY

4. Nan̈ino tokony hahatirìky atsika mahay amy karakory raha nandalo tatoato man̈atanteraka faminanian̈a amy Baiboly?

⁴ Misy antony matomboko mahavy atsika tirìky amy raha mandalo amy donia ty, intsaka eky raha nandalo tatoato. Tiantsika ho hay amy karakory iro io man̈atanteraka faminanian̈a amy Baiboly. Efa nambarany Jesosy atsika, ohatra, ino aby raha hiboaka han̈ampian̈a atsika hahay fa efa marikitry farany doniany Satana. (Mat. 24:3-14) Apostoly Petera nandrisiky atsika hangala onon̈o fahatantirahany faminanian̈a, baka finoan̈antsika ho fatatra fo. (2 Pet. 1:19-21) Karaha ty fanombohany boky farany amy Baiboly ao: ‘Raha nabaribariny Jesosy Kristy, sady namezany Zan̈ahary izy, baka han̈aboahan̈a amy panomponany raha handalo tsy ho ela.’ (Apok. 1:1) Ke mahalian̈a atsika mare raha nandalo tatoato, avio tiantsika ho hay amy karakory raha aby io mety han̈atanteraka faminanian̈a amy Baiboly. Ke mety efa tsy din̈intsika aby hikoran̈a izio amy namantsika.

5. Ino raha tsy tokony hataontsika, avio ino tokony hataontsika? (Zahava koa sary.)

⁵ Kanefa izikoa atsika fa mikoran̈a amy namantsika momba faminanian̈a amy Baiboly, atsika tsy tokony haminavina raha mety hiboaka. Nan̈ino? Fotony tsy tiantsika hivolan̈a raha mety hahavy fiangonan̈a tsy hiray sain̈y. Akory, ohatra, izikoa atsika maharen̈y iro pitondra amy donia ty mikoran̈a fomba hampijanonan̈a ady araiky baka hisiany fiadan̈ana ndreky filaminan̈a? Mety ma izikoa atsika maminavina ke hivolan̈a fa raha volan̈iny vaovao zen̈y man̈atanteraka faminanian̈a amy 1 Tesalonianina 5:3? Ehe. Tsara aminany, atsika mizaha fan̈azavan̈a farany. Izikoa fan̈azavan̈a koran̈intsika miorin̈y amy raha naboakany fandaminan̈any Jehovah, atsika han̈ampy fiangonan̈a hiray sain̈y ndreky “ho mira hevitry.”​—1 Kor. 1:10; 4:6.

6. Ino raha ianarantsika baka amy 2 Petera 3:11-13?

⁶ Vakia 2 Petera 3:11-13. Apostoly Petera man̈ampy atsika hieritreritry antony mahavy atsika tokony handiniky faminanian̈any Baiboly. Izy nandrisiky atsika ‘tsy han̈adoso an̈aty jerintsika faviany andrany Jehovah.’ Nan̈ino? Tsy nohony atsika tihahay “andra ndreky lera” aviany Aramagedona, fa nohony atsika tihampiasa tsara fotoan̈antsika baka atsika hanan̈a ‘fitondranten̈a masin̈y ndreky hahafoe ten̈a amy Zan̈ahary.’ (Mat. 24:36; Lioka 12:40) Dikanizen̈y, tiantsika hifen̈y fo ho tsara fitondranten̈a. Avio raha jiaby ataontsika amy fanompoan̈a Jehovah, tiantsika hatao nohony fitiavan̈a izy. Ke baka hahavitantsika zen̈y, atsika mila mitandrin̈y.

KARAKORY MA MITANDRINTEN̈A ZEN̈Y?

7. Akory an̈aboahantsika fa atsika mitandrinten̈a? (Lioka 21:34)

⁷ Jesosy nan̈iraka pianatranany hitandrin̈y, ke handiniky tsarabe raha mandalo amy donia ty. Fa tsy zen̈y fo, nivolan̈a koa izy fa iro mila mitandrinten̈a. Mazava tsarabe fomba nivolan̈any zen̈y amy Lioka 21:34. (Vakia.) Aleva onon̈o raha nivolan̈iny Jesosy ty: ‘Mitandrema.’ Ke akory ahaizan̈a fa mitandrinten̈a olo araiky? Mitandrin̈y izy izikoa man̈iman̈y fo amy raha jiaby mety handrobaka fifandraisan̈anany amy Jehovah, sady mifen̈y miary zen̈y. Izikoa izy man̈ano zen̈y, izy tsy hiala amy fitiavany Zan̈ahary.​—Ohab. 22:3; Joda 20, 21.

8. Ino raha nirahiny apostoly Paoly nataony Kristianin̈y?

⁸ Apostoly Paoly nan̈iraka Kristianin̈y hitandrinten̈a. Karaha ty, ohatra, hoizy tamindro Kristianin̈y ta Efesosy: “Ke tandrema tsara fo zay raha ataonaro, amy zen̈y anaro ho hita fa misy jery fa tsy adala.” (Efes. 5:15, 16) Satana tsy voly man̈ano raha handrobatan̈a fifandraisantsika amy Jehovah. Ke baka atsika tsy avoany Satana, Baiboly mandrisiky atsika karaha ty: ‘Ataova fo raha hahaizan̈a sitrapony Jehovah.’​—Efes. 5:17.

9. Karakory ahaizantsika raha tiany Jehovah ataontsika?

⁹ Baiboly tsy man̈amia listiny raha jiaby mety handrobaka fifandraisantsika amy Jehovah. Ke maro amy fanapahankevitry ataontsika tsy koran̈iny Baiboly mivantan̈a. Akory basy hahavitan̈a han̈ano fanapahankevitry tsara? Atsika mila mahay mandiniky, na mangala onon̈o tsara “sitrapony Jehovah.” Han̈ampy atsika amy zen̈y fianaran̈a ndreky fisaintsain̈ana Volan̈a Zan̈ahary tsy tapaka. Ke ndray tsisy lalàn̈a mivolan̈a ino raha mila ataontsika, hahaiho ‘hendry’ fo atsika arakaraka hahaizantsika sitrapony Jehovah ndreky hifen̈antsika hanan̈a “sain̈iny Kristy.” (1 Kor. 2:14-16) Misy karazan̈a fandriky sasany mora hita, fa sasany ndraiky ankolaka.

10. Ino aby sasany amy fandriky mila iarivantsika?

¹⁰ Ty fandriky sasany mila iarivantsika: Fisoman̈a fonolo, figiantoaka dila loatra, tendankanin̈y, fahazaran̈a man̈ano volan̈a mamparary fô, fizahan̈a fangalan̈a diandian̈a misy adiady, sary vetaveta, ndreky raha hafa miramira amy zen̈y. (Sal. 101:3) Devoly fahavalontsika io tsy voly mitady fomba handrobatan̈a fifandraisantsika amy Jehovah. (1 Pet. 5:8) Ke izikoa atsika matorotoro, vitany mampiditry toetsain̈y ratsy an̈aty sain̈intsika ndreky fontsika ao. An̈isanizen̈y mafana fô naman̈a, tsy man̈ano ny marin̈y, manan̈a fan̈irian̈a tsy mety afapo, malain̈y olo, man̈ambony ten̈a, avio mitana heloko ampo. (Gal. 5:19-21) Amy voanalohany, mety tsy maresaka mare fihetsehampo aby io amintsika ao. Kanefa raha ny marin̈y, toetry ratsy aby io miran̈a raha maniry misy poazon. Ke izikoa tsy hadosontsika malaky vahatranany, izio hitombo mare an̈atintsika ao, ke hampiditry problemo amintsika.​—Jak. 1:14, 15.

11. Ino fandriky ankolaka araiky mila iarivantsika, avio nan̈ino?

¹¹ An̈isany fandriky ankolaka iziô naman̈a ratsy. Ty misy ohatra: Tsy Vavolombelon̈o Jehovah olo miaraka miasa aminao. Tianao han̈ano raha hahavy izy hieritreritry raha tsara momba Vavolombelon̈o Jehovah, ke anao mifen̈y ho tsara fan̈ahy ndreky man̈ampy izy. Mety niaraka nihina koa anaro ndraikindraiky. Fa baka tio raha zen̈y nanjary nahainatetiky. Misy fotoan̈a izy nan̈ano koran̈a tsy paripare, fa tamy voanalohany, nataonao sary tsy ren̈y. Fa baka tio izio loso zatra sofin̈inao, ke efa tsy nampan̈ino anao eky koran̈a karaha zen̈y. Tandraraiky, anao nikahiany hiaraka higiagiaka taminany, lera anaro rava niasa. Anao nan̈eky. Ke izikoa fa nandeha fotoan̈a, anao efa nanjary nanan̈a toetsain̈y miran̈a amy ninany. Tsy azoazonao onon̈o aby fa efa hely tavela anao han̈araka raha ataony koa. Marin̈y ndraiky fa atsika mila tsara fan̈ahy sady man̈aja olo jiaby, fa ndray zen̈y, misy raha tsy mila adin̈antsika. Ino izio? Mety hifindra amintsika toetsain̈inolo iarasantsika matetiky. (1 Kor. 15:33) Ke izikoa atsika mitandrinten̈a, karaha nivolan̈iny Jesosy in̈y, atsika tsy hifandray be aminolo tsy man̈araka fitsipiky Jehovah. (2 Kor. 6:15) Ho hitantsika ino fandriky mety havoa atsika, avio ho haintsika fomba iarivan̈a izio.

AMPIASÀ AMY FOMBA TSARA FOTOAN̈ANAO

12. Ino asa mila ataony pan̈aradia Jesosy parapaviany farany donia ty?

¹² Tiany Jesosy izikoa pan̈aradia izy tsy hipetrapetraka fo miambin̈y faviany farany donia ty. Ke iro namezany asa. Iro nirahiny hitory vaovao tsara “a Jerosalema ndreky a Jodia jiaby ndreky Samaria ndreky amy tany farany lavitry an̈y.” (Asa. 1:6-8) Asa be kony ay! Mampiasa tsara fotoan̈andro iro izikoa man̈ano erakany vitandro man̈atanteraka asa nan̈irahan̈a iro.

13. Nan̈ino atsika mila mampiasa fotoan̈antsika amy fomba tsara? (Kolosianina 4:5)

¹³ Vakia Kolosianina 4:5. Hahavita hitandrinten̈a atsika izikoa mandiniky tsara fomba ampiasantsika fotoan̈antsika. Mety ho tatrany ‘raha tsy ampoizin̈y’ aby baka atsika jiaby. (Mpito. 9:11) Atsika, ohatra, mety hofoaty tampoko.

14-15. Akory fomba ten̈a tsara ampiasantsika fotoan̈antsika? (Hebreo 6:11, 12) (Zahava koa sary.)

¹⁴ Mampiasa tsara fotoan̈antsika atsika izikoa man̈ano sitrapony Jehovah ndreky mankafatatra fifandraisantsika aminany. (Jaona 14:21) Atsika mila ‘miorin̈y tsarabe ndreky tsy voahozongozon̈o, baka io be atao fo aminy asany Tompo.’ (1 Kor. 15:58) Ke ndray maty atsika, na avy farany donia ty, atsika tsy hanen̈iny foeky.​—Mat. 24:13; Rom. 14:8.

¹⁵ Firaka amy zioty, Jesosy mbala mitariky asa fitorian̈a momba Fanjakan̈any Zan̈ahary ataony pan̈aradia izy, man̈erantany. Jesosy efa nan̈ano anjaranany. Iro fivorian̈a avio boky ndreky gazetintsika aby io ampiasainy hampiofanan̈a atsika hahay hitory. Amezany atsika koa fitaovan̈a jiaby ilaintsika han̈anaovan̈a asa io. (Mat. 28:18-20) Akory an̈aboahantsika fa atsika man̈ano anjarantsika? Atsika mazoto mare mitory ndreky mampianatra, avio miambin̈y fo fotoan̈a hamaran̈any Jehovah donia ty. Izikoa atsika man̈araka torohevitry aminy Hebreo 6:11, 12, atsika tsy hiala amy fan̈antinan̈antsika ‘firaka amy farany.’​—Vakia.

16. Tapakevitry han̈ino atsika?

¹⁶ Jehovah efa nanondro andra ndreky lera hamaran̈any doniany Satana ty. Amy fotoan̈a zen̈y, hitantirahiny fampan̈antinan̈a jiaby nambarany amy Volan̈anany ao. Fa ndraikindraiky mety hitantsika ela avy farany io. Kanefa andrany Jehovah “tsy ho tara zen̈y!” (Hab. 2:3) Ke irarian̈a atsika ho tapakevitry ‘han̈anten̈a Jehovah’ fo, ke ho ‘von̈ono hiambin̈y Zan̈ahary araiky pan̈avotro’ atsika io.​—Mika 7:7.