Man̈amia Voninahitry Zan̈ahary Fankalazan̈a Sakafo Harivany Tompo

KRISTIANIN̈Y jiaby namian̈a didy hankalaza Fahatsiarovan̈a nifatesany Kristy. “Sakafo Harivany Tompo” koa ikahian̈a izio. (1 Korintianina 11:20) Nan̈ino ma izio mila ankalazain̈y? Ombian̈a, baka io karakory ma tokony hankalazan̈a izio?

Taminy alin̈y Pasky jiosy taon̈o 33, Jesosy nan̈ano fankalazan̈a io voanalohany. Indraiky isaka taon̈o nan̈anovan̈a izio, tamy faha-⁠14 Nisana, fanjava jiosy. Akory nataondro Jiosy aby io nikonty daty io? Koa fa 21 Marsy (na 22 Marsy), mira halavasany andra ndreky alin̈y. Misy 12 lera mazava andra, 12 lera koa alin̈y. Andra voanalohany amy fanjava Nisana io diampan̈iky. Nankalazain̈y Pasky io 14 andra tafaranizen̈y, koa fa tsofotro andra.

Jesosy nankalaza Pasky niaraka taminy apostolinany aby io. Izy koa fa baka nandroaka Jodasy Iskariota, izy nanomboko Sakafo Harivany Tompo, solony Pasky jiosy. Izio tokony hankalazain̈y indraiky isaka taon̈o.

Karaha ty volan̈iny Filazantsarany Matio: “Iro mbala nihina fo, Jesosy nangala mofo. Izy koa fa baka nisaotra Zan̈ahary, nitapahiny mofo in̈y, ke namiany pianatranany aby io, sady hoizy: ‘Aleva, mihinana. Izy ty vatan̈anaka.’ Nangala kopy koa izy, ke izy koa fa baka nisaotra Zan̈ahary, namiany iro kopy in̈y, baka io izy nivolan̈a karaha ty: ‘Anaro jiaby migiaha aminany ty. Izy ty lionaka, “liony fifan̈ikian̈a” halatsaka hamian̈a olo maro, baka iro ho voafafa heloko.’ ”​—Matio 26:​26-28.

Misy olo mino fa mofo io nivoany Jesosy nivadiky nofotronany, baka io divay in̈y nivoany lionany. Taminizy nirasa mofo io, ain̈inany ndreky lionany mbala tsisy nan̈afahan̈a. Ke iro apostoly aby io ma nihina nofotronany ndreky nigiaka lionany ankitin̈y? Tsy marin̈y zen̈y, fotony lalàn̈any Zan̈ahary mivolan̈a fa tsy mahazo mihina lio, fotony olo koa mihina izio, mira mihina olo fo. (Genesisy 9:​3, 4; Levitikosy 17:10) Karaha ty nivolan̈iny Jesosy, amy Lioka 22:20: “Kopy ty fifan̈ikian̈a vaovao miorin̈y amy lionaka halatsaka ninaro.” Ke dikanizen̈y ma kopy io “fifan̈ikian̈a vaovao” io? Tsy marin̈y zen̈y, fotony fifan̈ikian̈a zen̈y tsy raha mety samborin̈y amy tan̈ana.

Dikanizen̈y, mofo ndreky divay io misy dikany hafa. Mofo in̈y man̈ambara vatan̈a Jesosy tsisy fahotan̈a. Lambiny mofo tamy Pasky in̈y fo nampiasainy Jesosy taminio. Izio tsy nasian̈a sira ndreky levira foeky. (Eksodosy 12:⁠8) Matetiky amy Baiboly, levira zen̈y ivolan̈ana fahotan̈a na raha ratsy ataonolo. Dikanizen̈y, mofo io man̈ambara vatan̈a Jesosy tsisy fahotan̈a nataony soron̈o.​—Matio 16:​11, 12; 1 Korintianina 5:​6, 7; 1 Petera 2:22; 1 Jaona 2:​1, 2.

Divay mena in̈y man̈ambara liony Jesosy. Baka amizio mahavy fifan̈ikian̈a vaovao io misy dikany. Jesosy nivolan̈a fa nandatsaka lionany izy, baka olo ho “voafafa heloko.” Baka amy zen̈y mahavy Zan̈ahary mahita iro io madio, ke iro manjary mety miditry amy fifan̈ikian̈a vaovao atao amy Jehovah io. (Hebreo 9:14; 10:​16, 17) Baka amy fifan̈ikian̈a io koa mahavy Kristianin̈y mafatoky misy 144 000 mahazo mandeha andan̈itry an̈y. Iro io hanjary panjaka ndreky pisoron̈o an̈y, ke hitahy olo jiaby ambony tany eto.​—Genesisy 22:18; ­Jeremia 31:​31-33; 1 Petera 2:⁠9; Apokalypsy 5:​9, 10; 14:⁠1-3.

Azovy ma tokony hihina mofo ndreky higiaka divainy Fahatsiarovan̈a io? Zay olo an̈atiny fifan̈ikian̈a vaovao, ke man̈anten̈a handeha andan̈itry an̈y. Fan̈ahy masin̈y Zan̈ahary io mahavy olo han̈eky marin̈y fa iro an̈isany voafidy handeha andan̈itry an̈y. (Romanina 8:16) Iro io koa nan̈anovany Jesosy fifan̈ikian̈a momba Fanjakan̈a io.​—Lioka 22:⁠29.

Karakory fo basy ataonolo man̈anten̈a hiain̈y tsisy farany ambony tany eto, amy fahatsiarovan̈a io? Iro man̈araka volan̈a Jesosy, ke mankalaza Sakafo Harivany Tompo io. Iro fo tsy mihina mofo ndreky divay, fa man̈aja fandaharan̈a jiaby atao an̈y. Indraiky isaka taon̈o Vavolombelon̈o Jehovah mankalaza Sakafo Harivany Tompo io, isaka 14 Nisana, masoandra koa fa tsofotro. Kristianin̈y jiaby mahay fa ten̈a ilain̈y mankalaza nifatesany Jesosy io, ndray tsy maro iro voafidy handeha andan̈itry an̈y. Izio mampatsiaro iro fa Jehovah ndreky Jesosy ten̈a tia iro.​—Jaona 3:⁠16.