Ino ma Vaovao Tsara Mikasiky Fivavahan̈a?

1. Fivavahan̈a jiaby io ma marin̈y aby?

Fivavahan̈a jiaby samy misy olo tsara toetry. Hitany Zan̈ahary olo karaha zen̈y, ke karakarainy. Raha mampalahelo fo, fivavahan̈a indesinolo man̈ano ny ratsy. (2 Korintianina 4:3, 4; 11:13-15) Maro gazety ahitantsika fa misy fivavahan̈a samy fivavahan̈a mifamono, olo pivavaka mandeha miady, olo pitariky fivavahan̈a man̈olan̈a tsaiky. Mampalahelo fa manjary mandoto fivavahan̈a marin̈y raha karaha zen̈y!—Vakia Matio 24:3-5, 11, 12.

Fivavahan̈a marin̈y man̈amia voninahitry Zan̈ahary. Fivavahan̈a diso tsy man̈ano raha tiany Zan̈ahary. Iro mampianatra raha tsy marin̈y mikasiky Zan̈ahary ndreky mikasiky olo maty. Tiany Jehovah olo jiaby hahay ny marin̈y mikasiky izy.—Vakia Ezekiela 18:4; 1 Timoty 2:3-5.

2. Hataony Zan̈ahary karakory fivavahan̈a diso jiaby?

Zan̈ahary tsy mety fitahin̈y. Hitany raha ratsy jiaby ataony fivavahan̈a aby io. Iro mivolan̈a tia izy, kanefa iro mbala man̈araka jeriny Satana fo. (Jakoba 4:4) Tafarany Safodrano, ta Babylony tan̈y nanombohany fivavahan̈a diso io. Aminandra izioty, “Babylony Be” ivolan̈any Baiboly fivavahan̈a diso jiaby ambony tany ty. Tsy ho ela Zan̈ahary handravan̈a fivavahan̈a diso jiaby mamitaka olo io.—Vakia Apokalypsy 17:1, 2, 5, 16, 17; 18:8.

Mbala misy vaovao tsara hafa koa. Jehovah tsy man̈adin̈a olo tsara toetry mbala tsy tafiala amy fivavahan̈a diso amy tany jiaby. Olo karaha zen̈y mbala hampianarin̈y ny marin̈y.—Vakia Mika 4:2, 5.

3. Ino ma raha tokony hataonolo tia Zan̈ahary?

Jehovah mikarakara olo tia raha marin̈y ndreky tia man̈ano ny tsara. Izy man̈iraka iro hiala amy fivavahan̈a diso. Izikoa tianao hamparavoravo Zan̈ahary, anao mila miala amy fivavahan̈a diso.—Vakia Apokalypsy 18:4.

Tamy faha apostoly aby io, ravoravo olo tia ny marin̈y, koa fa nan̈ambaran̈a vaovao tsara. Iro nampianarin̈y han̈ano raha tiany Zan̈ahary, raha mampasambatra amy fiainan̈a, ndreky raha tsara hataony Zan̈ahary. Tsara arehan̈a raha nataondro io, fotony iro ten̈a tia Jehovah ndreky nan̈ano sitraponany.—Vakia 1 Tesalonianina 1:8, 9; 2:13.

Jehovah von̈ono handray olo jiaby miala amy fivavahan̈a diso. Anao koa man̈eky taominy Jehovah, hahazo havan̈a vaovao maro ndreky hahazo fiain̈ana tsisy farany.—Vakia Marka 10:29, 30; 2 Korintianina 6:17, 18.

4. Karakory ma hataony Jehovah hampihavan̈a olo jiaby?

Fivavahan̈a diso ho ravan̈a io vaovao tsara, fotony iro an̈isany mampijaly olo ambony tany eto. Iro tsy vitany mamitaka olo fo fa mampisaratsaraka olo koa. Fivavahan̈a diso io koa fa ravan̈a, olo jiaby tavela eto mifankatia, fotony samy manompo Jehovah.—Vakia Apokalypsy 18:20, 21; 21:3, 4.