FOMBA FIAIN̈ANA KRISTIANIN̈Y

Raha Vaovao amy Fivorian̈a Andavanandra

Hisy raha vaovao manomboko amy Zanvie 2018. Ho hisy fan̈azavan̈a, baka io sary ndreky video baka amy Baiboly fianaran̈a Fandikan-tenin’ny Tontolo Vaovao (nwtsty) baka aminy Internet, amy fivorian̈a andavanandra, ndray mbala tsendriky misy amy teny malagasy ndreky amy volan̈anao Baiboly io. Atokisan̈a fa hankatsara fan̈oman̈anao fivorian̈a fan̈azavan̈a aby io. Irarian̈a zen̈y han̈ampy anao hahay ho marikitry tsarabe Jehovah, Babantsika be fitiavan̈a io!

FAN̈AZAVAN̈A

Izy ty man̈amia fan̈azavan̈a maro mikasiky fomba fiain̈ana, tany, baka io volan̈a koran̈iny andininy maro amy Baiboly.

Matio 12:20

Lamesy manetroko: Jiro tanimanga madiniky nifonoan̈a menaka oliva nampiasainolo taloha. Vita tamy rongony lamesiny jiro tamy zen̈y. Lamesy io amy zay nitsentsitry menaka io, ke zen̈y nampirehitry motro io. Manetroko be lamesiny jiro io fotony efa hofoaty motro io. Zen̈y raha tiany havian̈a amy volan̈a griky “lamesy manetroko” io. Nan̈ambara Isaia 42:3 fa hahinakinaka olo Jesosy koa fa avy ambony tany eto. Tsy hambelany hofoaty foeky fan̈antinan̈a hely anan̈anolo manetry ten̈a ndreky ampijalin̈y aby io.

Matio 26:13

Ankitin̈y: Baka amy volan̈a hebreo ‘amen volan̈a griky amen io. Dikanizio “anò ho tanteraka zen̈y” na “anò ho zen̈y ankitin̈y.” Jesosy matetiky nampiasa volan̈a io izikoa izy fa hivolan̈a raha misy, na fampan̈antinan̈a, na faminanian̈a. Namafisiny tamy zen̈y fa ten̈a marin̈y ndreky azo atokisan̈a volan̈anany. Jesosy zaraiky fo zen̈y nampiasa “ankitin̈y”, na ameny io tamy fomba karaha zen̈y amy boky masin̈y. Hita amy Filazantsarany Jaona ao fa nadika “marin̈y ankitin̈y” volan̈a Jesosy io izikoa fa nimpody indroe (amen amen).—Jn 1:51.

SARY NDREKY VIDEO

Sary, kisarisary, video tsisy feony, baka io video man̈azava tsipiriandraha maro amy Baiboly.

Betifaga, Bongo Oliva, Baka io Jerosalema

Hita amy video fohiky io lalan̈a mandeha a Jerosalema baka antin̈iana, manomboko amy tanàna araiky et-Tor (mety Betifaga koran̈iny Baiboly izio) firaka amy tendrony araiky an̈abo amy Bongo Oliva. Antin̈ianany Betifaga misy Betania io, aminy ilany antin̈ianany Bongo Oliva. Jesosy ndreky pianatranany matetiky nandry ta Betania tao, iro koa fa ta Jerosalema. Tanànany el-ʽAzariyeh (El ʽEizariya) zioty amy tany io. An̈aran̈a arabo zen̈y, dikanizio “Tany Nisy Lazarosy.” Azo antoko fa nidoko tamindry Maria ndreky Marta ndreky Lazarosy tao Jesosy. (Mt 21:17; Mr 11:11; Lk 21:37; Jn 11:1) Mety nan̈araka lalan̈a mitovy aminy araiky hita amy video io Jesosy izikoa fa niala tamindro tao handeha a Jerosalema. Nitenginy boriky namakivaky Bongo Oliva Jesosy, tamy 9 Nisana taon̈o 33. Mety baka ta Betifaga tao izy tamy zen̈y, baka io nan̈araka lalan̈a nandeha ta Jerosalema.

Lalan̈a baka Betania mandeha a Betifaga
Betifaga
Bongo Oliva
Lohasahany Kidrona
Bongo nisy tempoly

Kolo amy Taolan̈a Vodimbity

Sariny taolan̈a vodimbity araiky voapepiky kolo 11, 5 santimetara izio. Tamy 1968 nahitan̈a taolan̈a io, tamy fasan̈a tavaratrantin̈ianany Jerosalema tan̈y. Efa rango taminandrany Romanin̈y izio. Hita baka amy zen̈y fa olo taloha tan̈y mety ho nampiasa kolo hamipihan̈a olo amy kakazo hamonoan̈a izy. Mety karaha io kolo nampiasainy maramila romanin̈y namonoan̈a Jesosy. Tan̈aty vahatra vato nahitan̈a taolan̈a io. Taolampaty efa maiky tsisy nofotro eky nataonolo tan̈atiny vahatra karaha zen̈y taminandra taloha tan̈y. Hita amy zen̈y fa mety ho nalevin̈y fo olo araiky izikoa izy fa baka nivonen̈y tamy pôtô.—Mt 27:35.