Mampasambatra Mivavaka Amy Zan̈ahary

1, 2. Ino ivolan̈ana fa vavaka io kado ten̈a miavaka? Nan̈ino atsika mila mahay raha ampianariny Baiboly momba zen̈y?

KOA habezan̈a lan̈itry edy zahan̈a, tsisy dikany tany ty. Amy Jehovah, olo jiaby ambony tany ty mira teteny rano. (Salamo 115:15; Isaia 40:15) Ndray zen̈y, karaha ty koran̈iny Salamo 145:18, 19: “Jehovah tsy lavitry zay olo mikaiky izy, olo mikaiky izy eraka ny marin̈y. Izy han̈amia zay raha irinolo mavozo izy. Iro koa fa mikaiky mila vonjy, izy mamonjy iro.” Maventy tombontsoa anan̈antsika zen̈y! Jehovah Pamoron̈o farany mahery io tia atsika han̈aton̈o izy, ndreky von̈ono hitandren̈y vavakantsika. Izio tombontsoa maventy sady kado ten̈a miavaka namiany Jehovah atsika tsiaraikiaraiky.

² Vavaka mifan̈araka amy Jehovah fo tandrin̈esany. Karakory han̈anovantsika zen̈y? Atsika hizaha raha koran̈iny Baiboly momba vavaka.

NAN̈INO MA ATSIKA MIVAVAKA AMY JEHOVAH?

3. Nan̈ino anao tokony hivavaka amy Jehovah?

³ Tiany Jehovah anao hivavaka na hikoran̈a aminany. Akory ahaizantsika zen̈y? Azafady vakia Filipianina 4:6,  7. Tsara kaikiny Jehovah zen̈y! Zan̈ahary Panjakany raha jiaby io ten̈a mijery anao, ke tiany anao hikoran̈a aminany raha jiaby an̈aty fonao, ndreky raha jiaby manahiran̈a anao.

4. Nan̈ino mankatsara fihavan̈ana amy Jehovah mikoran̈a aminany isanandra?

⁴ Vavaka io man̈ampy atsika hinaman̈a marikitry amy Jehovah. Izikoa misy olo kamarady, matetiky mikoran̈a hevitrindro, raha mampiasa loha iro, raha mamparavoravo na mampalahelo iro, hifankahazo tsarabe iro. Karaha zen̈y koa atsika, izikoa mivavaka amy Jehovah. Amy Baiboly ao an̈ambarany aminao hevitrinany ndreky raha mamparavoravo izy na mampalahelo izy, ndreky raha mbala hataony. Anao koa mivavaka aminany isanandra, anao mety man̈ambara izy raha an̈aty fonao lalin̈y an̈y. Anao koa man̈ano zen̈y, hanjary kamaradiny Jehovah.—Jakoba 4:8.

VAVAKA TANDRIN̈ESANY ZAN̈AHARY

5. Akory ahaizantsika fa misy vavaka tsy tandrin̈esany Jehovah?

⁵ Izio ma kila vavaka ataonolo tandrin̈esany Jehovah aby? Misy vavaka tsy tandrin̈esany Jehovah. Tamy faha paminan̈y Isaia, Jehovah nivolan̈a tamindro Israelita aby io: “Ndray man̈ano vavaka maro anaro, zaho tsy hitandren̈y, fotony tan̈anaro feno lionolo.” (Isaia 1:15) Mety han̈ano raha tsy fan̈araka amy Jehovah atsika koa tsy mitandrin̈y, ke izy tsy hitandren̈y vavakantsika.

6. Nan̈ino ma atsika mila mino Jehovah? Akory an̈aboahanao fa anao mino izy?

⁶ Mila mino Jehovah atsika, baka tandrin̈esany vavakantsika. (Marka 11:24) Apostoly Paoly nan̈azava karaha ty: “Izikoa tsy raha baka amy finoan̈a, tsisy raha mety atao eky hazahoan̈a sitraka amy Zan̈ahary, fotony zay olo man̈aton̈o izy tsy maintsy mino fa izy misy sady pamaly hatsaran̈a zay olo mitady izy mare.” (Hebreo 11:6) Efa tsara atsika koa mivolan̈a mino Zan̈ahary, fa mbala tsy mahampy fo. Atsika koa mila man̈araka volan̈a Jehovah isanandra, izikoa atsika mino izy.—Vakia Jakoba 2:26.

7. a) Nan̈ino ma atsika tokony hanetry ten̈a ndreky han̈aja tsarabe, izikoa fa mivavaka amy Jehovah? b) Karakory ahitan̈a fa atsika tsotra, izikoa fa mivavaka?

⁷ Atsika tokony hanetry ten̈a ndreky han̈aja tsarabe, izikoa fa mivavaka amy Jehovah. Nan̈ino ma? Atsika koa fa hikoran̈a amy panjaka na prezidan, atsika mila man̈aja tsarabe. Tokony hajaintsika mandilatra zen̈y Jehovah, fotony izy Zan̈ahary Farany Mahery. (Genesisy 17:1; Salamo 138:6) Atsika koa tokony ho tsotra ndreky hikoran̈a raha baka amy fontsika amy Jehovah, fa tsy han̈ampodipody vavaka araiky fo.—Matio 6:7, 8.

8. Izikoa atsika mangataka raha amy Jehovah, ino koa raha mila ataontsika?

⁸ Farany, atsika koa fa mangataka raha amy Jehovah, mila man̈ano raha mifan̈araka amy zen̈y. Ohatra, izikoa mangataka amy Jehovah momba raha ilaintsika isanandra, atsika tsy mila kamo miasa, ke hitavandra Zan̈ahary han̈amia raha jiaby ilaintsika. Tsy mila mifidifidy asa atsika, fa mila miasa mare. (Matio 6:11; 2 Tesalonianina 3:10) Izikoa ndraiky atsika mangataka Jehovah han̈ampy atsika hiala amy raha ratsy mahazatra, atsika tsy maintsy mitandrin̈y amy raha jiaby mety hahavoantsory atsika himpody amizio. (Kolosianina 3:5) Atsika izioty ndraiky handiniky raha matetiky an̈ontanianolo momba vavaka.

RAHA MATETIKY AN̈ONTANIANOLO MOMBA VAVAKA

9. Azovy ma tokony hivavahantsika? Ino raha ianarantsika momba vavaka koran̈iny amy Jaona 14:6 ao?

⁹ Azovy ma tokony hivavahantsika? ‘Babantsika andan̈itry an̈y’, nivolan̈iny Jesosy tamy pianatranany aby io. (Matio 6:9) Karaha ty koa nivolan̈iny: “Zaho lalan̈a, fahamarin̈ana ndreky fiain̈ana. Tsisy olo mahavita man̈aton̈o Baba andan̈itry an̈y, izikoa tsy mandalo aminaka.” (Jaona 14:6) Dikanizen̈y, Jehovah zaraiky fo tokony hivavahantsika, fa atao aminy alalany Jesosy. Nan̈ino ma izio mila atao aminy alalany Jesosy? Atsika mila man̈aja toeran̈a manokan̈a namiany Jehovah Jesosy, zay Jehovah vo man̈eky vavakantsika. Efa nianarantsika fa Jesosy navy tambony tany teto namonjy atsika, baka atsika ho afaka amy fahotan̈a ndreky fahafatesan̈a. (Jaona 3:16; Romanina 5:12) Jehovah koa nan̈ano Jesosy nanjary Pisoron̈obe ndreky Pitsara.—Jaona 5:22; Hebreo 6:20.

10. Hazavà fa tsy mampan̈ino Jehovah atsika na mandohaliky na mitsangana koa fa mivavaka?

¹⁰ Izio ma atsika koa fa mivavaka, mila mandohaliky sa mila mitsangana? Jehovah tsy mivolan̈a zen̈y. Ampianariny Baiboly fa atsika koa fa mikoran̈a amy Jehovah, mila man̈aja tsarabe. (1 Tantara 17:16; Nehemia 8:6; Daniela 6:10; Marka 11:25) Fomba fikoran̈antsika amy Jehovah raha ten̈a maventy aminany, fa tsy atsika mandohaliky na mitsangana mivavaka aminany. Atsika mety mivavaka na aia na aia misy atsika, baka io ren̈iny fo atsika na mivolan̈a mora. Zay lera tiantsika hikoran̈ana aminany atsika mivavaka, na alin̈y na matsan̈a. Atsika koa fa mivavaka amy Jehovah, atsika matoky fa ren̈iny fo vavakantsika, nata efa misy olo hafa koa mikoran̈a aminany.—Nehemia 2:1-6.

11. Ino aby ma raha mety koran̈intsika amy Jehovah?

¹¹ Ino aby ma raha mety koran̈iny amy vavaka? Zay raha mifan̈araka amy Jehovah. Koran̈iny Baiboly: “Zay raha angatahintsika aminany, izikoa mifan̈araka amy sitraponany, izy mitandren̈y atsika.” (1 Jaona 5:14) Mety ma mikoran̈a raha momba atsika manokan̈a? Ia, mety. Mivavaka amy Jehovah io mira mikoran̈a amy kamaradintsika. Atsika mety mivolan̈a amy Jehovah zay raha an̈aty jerintsika ndreky an̈aty fontsika ao. (Salamo 62:8) Atsika mety mangataka fan̈ahy masin̈y aminany, han̈ampy atsika han̈ano ny marin̈y. (Lioka 11:13) Izikoa atsika fa hanapakevitry, mila mangataka fahendrena amy Jehovah. Fa izikoa ndraiky atsika misy raha manahiran̈a mare, mety mangataka angovo amy Jehovah, baka atsika mahavita miaritry. (Jakoba 1:5) Atsika mety mangataka Jehovah hamafa hadisovan̈antsika. (Efesianina 1:3, 7) Atsika koa tokony hivavaka ninolo hafa, an̈atinizen̈y fianakavian̈antsika ndreky iro rahalahy ndreky ranabavy amy fiangonan̈a.—Asan’ny Apostoly 12:5; Kolosianina 4:12.

12. Ino aby raha ten̈a maventy mila koran̈intsika amy vavaka?

¹² Ino aby raha ten̈a maventy mila koran̈intsika amy vavaka? Raha momba Jehovah ndreky sitraponany. Atsika tokony hisaotra izy amy raha jiaby nataony tamintsika. (1 Tantara 29:10-13) Ahaizantsika zen̈y raha nampianariny Jesosy iro pianatranany aby io, taminizy tambony tany teto. (Vakia Matio 6:9-13.) Izy nivolan̈a fa atsika antsendriky tokony hangataka, baka an̈arany Zan̈ahary io hankamasin̈iny. Fan̈araka zen̈y, atsika tokony hangataka Fanjakan̈any Zan̈ahary io ho avy, baka io hangataka sitraponany io ho vita amy tany jiaby. Izikoa fa vita zen̈y, atsika amy zay mikoran̈a raha jiaby momba atsika. Izikoa raha momba Jehovah ndreky sitraponany raha voanalohany koran̈intsika aminany, ho hita tsarabe fa zen̈y raha ten̈a maventy amintsika.

13. Tokony ho karakory halavasany vavakantsika?

¹³ Tokony ho karakory halavasany vavakantsika? Baiboly tsy mivolan̈a zen̈y. Atsika mety man̈ano vavaka lava na vavaka fohiky, arakaraka raha ilaintsika. Ohatra, atsika koa fa mivavaka alohany hihina, atsika man̈ano vavaka fohiky. Atsika ndraiky koa man̈ano fisaoran̈a Jehovah na mitantara raha mampiasa loha atsika, mety man̈ano vavaka lava. (1 Samoela 1:12, 15) Tsy mety izikoa hanaitry olo fo dikany han̈anovantsika vavaka lava, karaha iro olo aby tamy faha Jesosy in̈y. (Lioka 20:46, 47) Tsy manaitry Jehovah foeky vavaka karaha zen̈y. Vavaka baka an̈aty fontsika fo ten̈a tiany.

14. Isaka ino ma atsika tokony hivavaka? Ino ma raha ianarantsika amy zen̈y momba Jehovah?

¹⁴ Isaka ino ma atsika tokony hivavaka? Jehovah mikaiky atsika hivavaka aminany isanandra. Koran̈iny Baiboly ao: “Aza voly mivavaka, mahareta amy vavaka.” (Matio 26:41; Romanina 12:12; 1 Tesalonianina 5:17) Jehovah von̈ono fo hitandren̈y atsika. Atsika mety misaotra izy, fotony izy tia atsika ndreky tsy matity. Atsika koa mety mangataka taridalan̈a aminany, mangataka angovo, ndreky mangataka izy hankahery atsika. Izikoa raha ten̈a maventy amintsika vavaka amy Jehovah io, atsika mahita fotoan̈a hikoran̈ana aminany fo isanandra.

15. Nan̈ino ma atsika tokony han̈ano “ameny” amy farany vavaka?

¹⁵ Nan̈ino ma atsika tokony han̈ano “ameny” amy farany vavaka? Dikany “ameny” zen̈y, “ten̈a marin̈y ankitin̈y zen̈y” na “ho tanteraka raha zen̈y.” Izio an̈isany raha ivolan̈ana fa zay raha volan̈intsika amy vavaka io efa ten̈a baka an̈aty fontsika. (Salamo 41:13) Ampianariny Baiboly fa atsika mila man̈ano “ameny”, amy farany vavaka iarahan̈a aminolo maro. Zen̈y mivolan̈a fa atsika man̈eky raha jiaby nivolan̈iny tamy vavaka in̈y. Atsika mety mivolan̈a mora na mare, koa fa man̈ano “ameny.”—1 Tantara 16:36; 1 Korintianina 14:16.

KARAKORY MA ATAONY JEHOVAH MAMALY VAVAKA?

16. Hazavà fa Jehovah ten̈a mamaly vavaka.

¹⁶ Jehovah io ma ten̈a mamaly vavaka? Ia, izy mamaly vavaka. Baiboly mivolan̈a fa izy “Pitandren̈y vavaka.” (Salamo 65:2) Jehovah maharen̈y vavakanolo antapitrisany, ke maro raha ataony hamalian̈a vavaka io.

17. Karakory ataony Jehovah mampiasa anjelinany ndreky olonany, koa fa mamaly vavakantsika?

¹⁷ Jehovah mampiasa anjelinany ndreky olonany, koa fa mamaly vavakantsika. (Hebreo 1:13, 14) Ohatra, maro olo nivavaka baka hisy olo han̈ampy iro hahay raha koran̈iny Baiboly, ke tsy elanizin̈y, nisy Vavolombelon̈o Jehovah ankitin̈y navy nikoran̈a tamindro. Baiboly mivolan̈a fa anjely aby io koa mba mitory “vaovao tsara” erantany. (Vakia Apokalypsy 14:6.) Maro amintsika koa efa navy nivavaka momba raha manahiran̈a izy ndreky raha ilainy, ke nisy rahalahy na ranabavy kristianin̈y navy nan̈ampy.—Ohabolana 12:25; Jakoba 2:16.

18. Akory ataony Jehovah mampiasa fan̈ahy masin̈inany ndreky Baiboly hamalian̈a vavakantsika?

¹⁸ Mampiasa fan̈ahy masin̈y koa Jehovah hamalian̈a vavakantsika. Atsika koa fa mivavaka momba raha manahiran̈a atsika, izy mety hampiasa fan̈ahy masin̈inany han̈amia atsika taridalan̈a ndreky angovo. (2 Korintianina 4:7) Mampiasa Baiboly koa Jehovah hamalian̈a vavakantsika, baka atsika hahay hanapakevitry. Atsika koa mamaky Baiboly, mety misy raha koran̈inizio han̈ampy atsika. Jehovah koa mety handrisiky olo amy fivorian̈a an̈y han̈ano valinteny mifan̈araka amy raha ilaintsika, na koa antipan̈ahy amy fiangonan̈a han̈ambara atsika hevitry baka amy Baiboly.—Galatianina 6:1.

19. Nan̈ino ma Jehovah mety karaha tsy mamaly vavakantsika?

¹⁹ Ndraikindraiky atsika mety han̈ontany karaha ty: ‘Nan̈ino ma vavakanaka tsy mety valiany Jehovah?’ Aleva onon̈o fa izy mahay ombian̈a ndreky karakory amaliany vavakantsika. Hainy raha ilaintsika. Mila mivavaka fo atsika ahitany fa ten̈a ilaintsika raha koran̈intsika io, baka io koa atsika ten̈a mino izy. (Lioka 11:5-10) Ndraikindraiky koa tsy ampoizintsika fomba amaliany Jehovah vavakantsika. Ohatra, atsika mety mivavaka mare momba raha manahiran̈a atsika. Izy mety tsy han̈adoso izin̈y, fa mety man̈amia angovo hahavitantsika miaritry.—Vakia Filipianina 4:13.

20. Nan̈ino ma atsika tokony hikoran̈a matetiky amy Jehovah?

²⁰ Ten̈a mahagaga tombontsoa amiany Jehovah atsika mivavaka aminany! Matoky atsika fa izy ten̈a mitandren̈y atsika. (Salamo 145:18) Mazotoa mikoran̈a amy Jehovah, fa anao koa man̈ano zen̈y, anaro hanjary pinaman̈a tsarabe.