FIANARAN̈A 2

Karaha Mikoran̈a Andavanandra

2 Korintianina 2:17

RAHA MILA ATAO: Mivolàn̈a karaha koran̈a andavanandra, fa izy fo atao ampan̈ajan̈a koa fa man̈azava fotokevitrinao ndreky aminolo mitandren̈y anao.

AKORY HAN̈ANOVAN̈A IZIO?

Mivavaha baka io man̈omàn̈a tsarabe. Mivavaha baka hifantoko aminy hafatra hambaranao, fa tsy aminy ain̈inao. Alaiva onon̈o tsara hevitry maventy jiaby mila hazavainao. Ataova amy fomba fivolan̈anao izy fan̈azavan̈anao, fa tsy raha misoratra amy drafitry ao fo ampodinao.

Anao koa mieritreritry hamaky andininteny, na boky na gazety, ataova azo antoko fa hainolo mitandren̈y anao izio. Koa ndraiky anao hamaky raha nivolan̈inolo, ataova karaha izy mivolan̈a in̈y fa aza atao tafahoatra fo.
Mivolàn̈a baka amy fô. Diniha nan̈ino olo aby mitandren̈y anao io mila fan̈azavan̈a io. Aza adin̈a iro io, fotony arakaraka fitsanganan̈anao, fihetsikinao, ndreky soranao, hahaizandro fa anao tsara fan̈ahy ndreky tia iro baka iô mafatoky raha volan̈inao.

Kanefa tandrema tsao tsy man̈aja olo. Aleva onon̈o fo fa baka amy Zan̈ahary raha koran̈inao io, ke ataova mety tsarabe volan̈a aboakanao. Mifen̈a han̈araka fitsipipitenenana.
Zahava olo aby mitandren̈y anao. Zahava amy masondro iro, koa tsy man̈ino zen̈y. Anao koa man̈ano kabaro, zahava amy masondro tsiraikiaraiky iro olo aby mizahanao io, toizay mizaha iro amy fitambarany fo.