FIANARAN̈A 4

Mahaiza Mampiditry Andininy

Matio 22:41-45

RAHA MILA ATAO: Mampioman̈a sain̈inolo aby mitandren̈y anao alohany hamakian̈a andininy araiky.

Iritrireta, ino mahavy anao mamaky andininy io. Isaka anao hamaky andininy, man̈anova fampidiran̈a hely baka ho hitanolo mitandren̈y anao hevitry maventy aminy andininy vakinao io.

Aleva onon̈o volan̈a man̈odidin̈y andininy io. Izikoa anao ampiditry andininy araiky ndreky hivolan̈a azovy olo mivolan̈a io na azovy olo nanoratra boky io, ataova azo antoko tsarabe fa marin̈y raha volan̈inao.
Ataova manankery fo hevitry Baiboly. Izikoa fa mikoran̈a aminolo mino Zan̈ahary, ataova mazava tsarabe fa “Volan̈a Zan̈ahary” amy Baiboly ao, ke aboakantsika amy zen̈y fa hevitry Zan̈ahary ampianarintsika io.
Ataova raha hahavy olo tsy an̈adin̈a andininy io. Man̈apitraha fan̈ontanian̈a fa andininy io mamaly izy, na mivolàn̈a problemo araiky fa andininy io mamaha izy, na mampiasà tantara araiky baka amy Baiboly ao man̈azava toro lalan̈a araiky.

Iritrireta ino raha efa hainolo mitandren̈y anao momba koran̈a io ndreky andininy io. Mampiasà volan̈a andavanandra ndreky mazava, baka io ampia iro mitandren̈y anao aby io baka hahazo onon̈o tsarabe raha koran̈inao.