Man̈aia Ma Olo Koa Fa Maty?

1-3. Ino aby fan̈ontanian̈anolo momba fahafatesan̈a? Ino aby valiny amiany fivavahan̈a?

BAIBOLY mampan̈anten̈a atsika fa andra araiky an̈y “fahafatesan̈a tsy ho hisy eky.” (Apokalypsy 21:4) Tamy Toko faha-5 atsika nianatra fa mety ho velon̈o tsisy farany atsika, baka amy vidipan̈avotan̈a. Olo izioty ndraiky mbala mety maty fo. (Mpitoriteny 9:5) Ty amy zay misy fan̈ontanian̈a araiky maventy: Man̈ano karakory olo koa fa maty?

² Ilaintsika mare valiny fan̈ontanian̈a io, izikoa fa misy olo maty. Atsika mety hieritreritry karaha ty: ‘Nan̈aia ma izy zay? Mba mahita atsika ma izy an̈y? Mahefa mitahy atsika ma izy? Atsika ma mbala hahita izy?’

³ Samy hafa valiny amiany fivavahan̈a momba fan̈ontanian̈a aby io. Sasany mampianatra fa olo zen̈y koa tsara fan̈ahy, hengo andan̈itry an̈y, fa izy koa ratsy fan̈ahy, mandeha amy motrobe. Sasany koa mivolan̈a fa olo koa fa maty miova hian̈a ndreky mengo amindry havany aby efa naty taloha tan̈y. Misy ndraiky mivolan̈a fa olo koa fa maty zen̈y tsarain̈y, baka io hateraka ndraiky koa, na amian̈a vatan̈a vaovao, ke mety ho vatan̈anolo na vatan̈a biby.

4. Ino hevitry hitambarany fivavahan̈a maro momba fahafatesan̈a?

⁴ Karaha samy hafa raha ampianariny fivavahan̈a aby io, kanefa araiky fo hevitry hitambarandro: Olo koa fa maty, misy raha tsy mety maty aminany ao. Marin̈y ma zen̈y?

MAN̈AIA MA OLO KOA FA MATY?

5, 6. Man̈ano karakory olo koa fa maty?

⁵ Jehovah mahay tsarabe raha momba olo maty. Volan̈iny fa olo koa fa maty, efa tsisy fahin̈ana eky. Dikany maty zen̈y, tsy velon̈o. Ke olo koa fa maty, fonany ndreky jerinany efa tsy miasa eky.a Izy tsy mahita eky, tsy maharen̈y eky, ndreky tsy mahavita mieritreritry eky.

⁶ Panjaka Solomona nanoratra fa ‘olo maty tsisy raha hainy eky.’ Olo maty tsy mahay tia olo ndreky malain̈y olo zen̈y eky. ‘Amy Fasan̈a an̈y tsisy asa na eritreritry na fahaizan̈a na fisiany jery eky.’ (Vakia Mpitoriteny 9:5, 6, 10.) Amy Salamo 146:4 ao mivolan̈a amintsika fa olo koa fa maty, “eritreritrinany” koa maty.

RAHA NIVOLAN̈INY JESOSY MOMBA FAHAFATESAN̈A

7. Ino raha nivolan̈iny Jesosy momba olo maty?

⁷ Koa fa naty Lazarosy kamaradiny Jesosy, izy nivolan̈a tamy pianatranany: “Lazarosy kamaradintsika in̈y mandry mare.” Jesosy tsy nivolan̈a fa Lazarosy in̈y nandry ankitin̈y, fotony tafarany volan̈anany io, izy nivolan̈a ndraiky koa: “Naty Lazarosy.” (Jaona 11:11-14) Dikany koran̈any Jesosy in̈y, olo maty mira mandry fo. Izy tsy nivolan̈a fa Lazarosy in̈y loso tandan̈itry, na fanojy ry havany efa naty. Izy koa tsy nivolan̈a fa Lazarosy in̈y nijaly tamy motrobe, na niova olo na biby zen̈y. Lazarosy karaha olo nandry mare in̈y fo. Maro koa tany ahitan̈a volan̈a mira zen̈y amy Soratra Masin̈y. Koran̈iny ao fa Stefana koa fa nivonenolo, “izy nandry tamy fahafatesan̈a.” (Asan’ny Apostoly 7:60) Apostoly Paoly koa nanoratra fa nisy Kristianin̈y sasany “nandry tamy fahafatesan̈a.”—1 Korintianina 15:6.

8. Ino ahaizantsika fa fahafatesan̈a io tsy lahatra Zan̈ahary?

⁸ Izio ma efa lahatra Zan̈ahary hahafaty Adama ndreky Eva in̈y? San̈atria! Iro nataony Jehovah hankafy fiain̈ana tsisy farany ndreky tsy narary foeky. Jehovah koa fa niasa olo, iro nataony han̈iry ho velon̈o tsisy farany. (Mpitoriteny 3:11) Tsisy raimandreny ravoravo mahita zanany mahaimatoe ndreky mety maty. Mira zen̈y koa Jehovah. Malahelo izy mahita atsika mahaimatoe ndreky mety maty io. Koa atsika tiany Zan̈ahary ho velon̈o tsisy farany, nan̈ino fo olo mety maty?

NAN̈INO MA ATSIKA METY MATY?

9. Nan̈ino ma tokony ho vitany Adama ndreky Eva nan̈araka volan̈a Jehovah?

⁹ Tamy zaridain̈y Edena tan̈y Jehovah nivolan̈a taminy Adama: “Anao mety mihina zay laninao amy voany kakazo jiaby amy zaridain̈y ty. Voany kakazo araiky ahaizan̈a ny tsara ndreky ratsy fo aza ahanin̈y, fa hofoaty ankitin̈y anao aminandra ihinananao izy.” (Genesisy 2:9, 16, 17) Tsy sarotro nan̈araka volan̈a zen̈y, baka io koa Jehovah manan̈a fahifan̈a hivolan̈a aminy Adama ndreky Eva raha tsara ndreky ratsy. Iro koa nan̈araka volan̈a Jehovah io, hita baka tamy zen̈y fa iro ten̈a nan̈aja fahifan̈anany ndreky nankasitraka mare Jehovah tamy raha jiaby namiany iro.

10, 11. a) Karakory nataony Satana namitaka Adama ndreky Eva? b) Nan̈ino ma Adama ndreky Eva tsy voavela heloko eky?

¹⁰ Mampahinakinaka fa Adama ndreky Eva nifidy tsy han̈araka volan̈a Jehovah. Satana nivolan̈a taminy Eva: “Izio ma marin̈y ankitin̈y Zan̈ahary nivolan̈a taminaro fa anaro tsy mahazo mihina voany kakazo jiaby amy zaridain̈y ato?” Eva nivolan̈a: “Zahay mahazo mihina voany kakazo aby amy zaridain̈y ty. Fa momba voany kakazo an̈ivony zaridain̈y io fo, karaha ty nivolan̈iny Zan̈ahary: ‘Aza ahaninaro izio, baka io aza mikasiky izio anaro, tsao anaro maty.’ ”—Genesisy 3:1-3.

¹¹ Satana amy zay nivolan̈a: “Anaro tsy hofoaty zen̈y foeky. Hainy Zan̈ahary tsarabe fa aminandra hihinananaro izio, masonaro hibian̈a, anaro ho mira Zan̈ahary, hahay ny tsara ndreky ratsy.” (Genesisy 3:4-6) Eva tiany Satana hieritreritry fa izy zaraiky fo efa mahavita manapakevitry momba ny tsara ndreky ratsy. Navandy Satana koa fa nivolan̈a raha hahazo Eva, izy koa tsy man̈araka volan̈a Zan̈ahary. Nivolan̈iny fa Eva tsy hofoaty zen̈y foeky, ke Eva nihina voany kakazo in̈y, baka io namiany koa vadiny. Adama ndreky Eva nahay tsarabe fa Jehovah tsy nan̈omba iro hihina voany kakazo io. Fihinanandro izio nahitan̈a fa iro tsy nan̈araka volan̈a mazava ndreky tsotra nambarany Zan̈ahary iro. Hita tamy zen̈y koa fa iro tsy nan̈aja Jehovah, Babandro andan̈itry ten̈a tia iro io. Zen̈y nahavy iro tsy voavela heloko eky!

12. Nan̈ino Jehovah nalahelo, Adama ndreky Eva koa fa tsy nan̈araka volan̈anany?

¹² Adama ndreky Eva koa fa tsy nan̈aja Jehovah in̈y, nalahelo mare Jehovah! Izikoa anao mananjanaka lelahy ndreky man̈angy, baka io anao efa nandany angovo nitarimy iro, kanefa raha tsy tianao edy nataondro. Akory fahitanao zen̈y? Hangotsoko baka fonao e!

13. Jehovah nivolan̈a fa Adama “himpody fotaka ndraiky.” Ino ma raha tiany volan̈iny tamy zen̈y?

¹³ Adama ndreky Eva koa fa tsy nan̈araka volan̈a Zan̈ahary, iro tsy velon̈o tsisy farany eky. Jehovah nivolan̈a taminy Adama: “Anao fotaka, baka io hanjary fotaka koa.” (Vakia Genesisy 3:19.) Dikanizen̈y, Adama himpody fotaka ndraiky, ke hanjary karaha tsiary niasain̈y in̈y. (Genesisy 2:7) Adama koa fa nanota, izy naty, ke nivadiky tsy nisy foeky.

14. Nan̈ino ma olo maty?

¹⁴ Adama ndreky Eva koa nan̈araka volan̈a Zan̈ahary, iro hotrizay mbala velon̈o fo. Iro koa fa tsy nan̈araka volan̈anany, iro nanota, ke naty ankitin̈y. Fahotan̈a io mira aretin̈y mahafaty nilovaintsika tamy raimandrenintsika voanalohany tan̈y. Rango atsika vo teraka efa panota edy, ke zen̈y mahavy atsika mety maty. (Romanina 5:12) Tsy zen̈y fikasan̈any Zan̈ahary. Tsy tiany foeky atsika hofoaty, fotony amy Baiboly mivolan̈a fa fahafatesan̈a io “fahavalo.”—1 Korintianina 15:26.

NY MARIN̈Y IO MANKAFAKA ATSIKA

15. Mankafaka atsika aminino ma ny marin̈y momba olo maty?

¹⁵ Ny marin̈y momba olo maty io mankafaka atsika aminy hevitry diso maro. Baiboly mampianatra fa olo maty tsy marary ndreky tsy malahelo zen̈y eky. Atsika koa tsy tokony hikoran̈a amindro eky, fotony iro tsy mahavita mivolan̈a. Atsika tsy mahavita mitahy iro. Iro koa tsy mahavita mitahy atsika. Atsika tsy tokony havozo iro, fotony iro tsy mahavita mampijaly olo. Ndray zen̈y, mbala maro fivavahan̈a mivolan̈a fa olo maty mbala velon̈o antany hafa an̈y, ke atsika mbala mahavita mikarakara raha ilaindro, izikoa man̈amia vola pitariky fivavahan̈a na olo volan̈indro fa masin̈y. Atsika tsy voafitakandro amy vandindro zen̈y, fotony efa mahay ny marin̈y momba olo maty.

16. Ino vandy ampianariny fivavahan̈a maro momba olo maty?

¹⁶ Satana mampiasa fivavahan̈a diso havandesan̈a amintsika, baka atsika hieritreritry fa olo maty zen̈y tsy ten̈a maty ankitin̈y. Ohatra, misy fivavahan̈a mampianatra fa olo koa maty, vatan̈a fo maty, fa fan̈ahy tsy maty. Asa fivavahan̈anaro mba mampianatra zen̈y? Sa iro mampianatra raha koran̈iny Baiboly momba olo maty? Satana mavandy, baka olo tsy hanompo Jehovah.

17. Nan̈ino ma fankaratsian̈a Jehovah fampianaran̈a momba motrobe zen̈y?

¹⁷ Mampahinihiny foeky raha ampianariny fivavahan̈a maro. Ohatra, misy fivavahan̈a mampianatra fa olo ratsy fan̈ahy koa maty, mandeha amy motrobe mandrakizay. Vandy zen̈y sady tsy man̈isy hajany Jehovah. Izy tsy mety hampijaly olo karaha zen̈y! (Vakia 1 Jaona 4:8.) Akory fahitanao babany tsaiky man̈anatra zanany, ke man̈oro tan̈any tsaiky io amy motro? Olo ratsy fan̈ahy fo mahavita raha karaha zen̈y! Tiany Satana koa atsika hieritreritry fa Jehovah io Zan̈ahary ten̈a ratsy fan̈ahy!

18. Nan̈ino ma atsika tsy tokony havozo olo maty?

¹⁸ Misy fivavahan̈a mivolan̈a fa olo koa fa maty manjary lolo, ke mila hajain̈y mare zen̈y, fotony iro io mety hitahy atsika zen̈y, na hampijaly atsika. Maro olo mino raha karaha zen̈y. Iro mavozo olo maty, ke tsy mivavaka amy Jehovah fa manompo olo maty. Aza adin̈a fa olo maty tsisy raha vitany eky, ke atsika tsy mila mavozo iro. Jehovah niasa atsika io ten̈a Zan̈ahary, ke izy zaraiky fo tokony hivavahantsika.—Apokalypsy 4:11.

19. Ino mahatsara atsika mahay ny marin̈y momba olo maty?

¹⁹ Atsika koa mahay ny marin̈y momba olo maty, atsika tsy ho voafitaka vandiny fivavahan̈a aby io. Ny marin̈y haintsika zen̈y mahavy atsika man̈eky raha maro tsara efa nivolan̈iny Jehovah momba fiain̈anantsika ndreky ny amaraintsika.

20. Ino ma raha hianarantsika amy toko fan̈araka ty?

²⁰ Taloha be tan̈y, nisy panompony Zan̈ahary araiky, Joba an̈arany, nan̈ontany karaha ty: “Izikoa lelahy matanjaka maty, mbala ho velon̈o fo va?” (Joba 14:14) Olo maty ma mbala ho velon̈o ankitin̈y? Ten̈a mampaendraka raha koran̈iny Zan̈ahary momba zen̈y amy Baiboly ao. Amy toko fan̈araka ty atsika hianatra zen̈y.