FIANARAN̈A 8

Man̈anova Fan̈oharan̈a Pare Tsarabe

Matio 13:34, 35

RAHA MILA ATAO: Mampiasa ohatra tsotra kanefa mahalian̈a olo. Han̈ampy iro angala onon̈o hevitry maventy tianao hampianarin̈y raha zen̈y.

Mitadiava ohatra tsotra. Man̈anova karaha Jesosy izikoa fa han̈azava hevitry sarotro, ke raha tsotra ndreky efa mahazatra olo koràn̈a amy fan̈oharan̈a ataonao. Aza mivolan̈a raha tsy ilain̈y, baka tsy ho sarotro loatra fan̈oharan̈a io. Aza mivolan̈a hevitry tsy ten̈a mifandray amizio koa, tsao tsy ho hainolo ino raha ten̈a ianarany baka amizio.

Mahaiza mandiniky. Koa anao tihampiasa ohatra lera mampianatra, azonao atao mangala onon̈o raha misy amy man̈odidin̈y anaro an̈y, na mizaha amy boky ndreky gazety naboakany fandaminan̈a, na mitandren̈y olo mahay mampianatra. Sorata amy karine na amy fitaovan̈a elektroniky fan̈oharan̈a hitanao.
Iritrireta ino raha mety aminany. Mahaiza mifidy ohatra mandrisiky olo han̈ano raha ndreky mety tsara aminolo mitandren̈y anao. Tandrema tsao man̈afahafa na man̈afintohin̈y olo ohatra hampiasainao.
Aza man̈ano fan̈oharan̈a tsy ilain̈y. Hevitry maventy fo an̈anovan̈a fan̈oharan̈a, fa tsy hevitry madinidiniky. Tsy fan̈oharan̈a io fo tokony ho azonolo onon̈o, fa fianaran̈a baka amizio koa.