Ezaka Manokan̈a Hanombohan̈a Fampianaran̈a Baiboly amy Septambra

Amy Septambra io, atsika hifen̈y farany mare hanomboko fampianaran̈a Baiboly amy zay olo itoriantsika. Bokikely Mankafiza Fiain̈ana Tsisy Farany! hampiasaintsika amizio. Lan̈iany tihan̈ano pisava lalan̈a pan̈ampy ke tihanakatra 30 lera, afaka man̈ano. Karakory ma han̈anaovantsika ezaka manokan̈a io?

• Fitorian̈a: Ampiasà fon̈ony amy farany bokikely io itaritan̈a koran̈a, ke aboaha izy fomba fianaran̈a Baiboly. Aleva onon̈o azovy aby olo hitanao lian̈a, an̈atinizen̈y fiveren̈ana mitsidikinao aby io. Iro nata tsy nety nianatra Baiboly taloha, iro mety tihianatra fo fotony bokikely io vaovao, avio fomba fampianarantsika koa vaovao. Bokikely io tsy mety apetraka amy tran̈o tsisy olo. Atsika koa man̈ano fitorian̈a amy taratasy, bokikely io tsy mety ampiarasin̈y amy taratasy halefantsika aminolo, izikoa tsendriky haintsika izy na lian̈a na tsy lian̈a. Mety han̈ampy andra hafa han̈anaovan̈a fivorian̈a alohany fanompoan̈a koa Komitiny Fanompoan̈any Fiangonan̈a aminio.

• Fomba Hafa Koa: Izikoa fiangonan̈anaro man̈ano fampirantian̈a, asia bokikely Mankafiza Fiain̈ana Tsisy Farany! amizio. Volàn̈a amindro olo aby lian̈a amizio fa iro koa amian̈a bokikely io, iro mety hampianarin̈y Baiboly tsy man̈efa. Aboaha iro tsy ela, fomba fianaran̈a Baiboly, na amy man̈araka anaro vo man̈ano zen̈y. Piandraikitry fanompoan̈a koa mety hifidy pitory mahay, handeha hanomboko fampianaran̈a Baiboly amy tany fiasanolo. Anao koa mety manomboko fampianaran̈a Baiboly aminolo miaraka miasa aminao na olo itorianao tsy arapotoan̈a.

Jesosy nan̈iraka atsika ‘hampianatra’ olo. (Mt 28:19, 20) Irarian̈a ezaka manokan̈a ty han̈ampy atsika hahavita hampianatra olo amy bokikely Mankafiza Fiain̈ana Tsisy Farany!