Fan̈ontanian̈any Pamaky

Ombian̈a ma Jesosy nanjary Pisoron̈obe, baka io ombian̈a fifan̈ikian̈a vaovao nanomboko nanankery?

Tamy Jesosy natao batisa taminy taon̈o 29 izy nanjary Pisoron̈obe. Ino porofo mankamarin̈y zen̈y? Naboakany Jesosy taminizy natao batisa fa von̈ono izy han̈ano sitrapony Zan̈ahary. Koa atao amy volan̈a hafa, von̈ono izy han̈ano soron̈o ain̈inany. Ampiran̈iny aminy alitara sitrapony Zan̈ahary io. (Gal. 1:4; Heb. 10:5-10) Tamy Jesosy natao batisa, alitara an̈ohatra io komansy nisy. Zen̈y ahaizantsika fa tamy zen̈y efa nisy tempoly arapan̈ahy, fotony alitara io an̈isany tempoly arapan̈ahy. Tempoly arapan̈ahy io maventy be; izio lamin̈y natao hanompoan̈a Jehovah, miorin̈y amy soron̈o nataony Jesosy.—Mat. 3:16, 17; Heb. 5:4-6.

Amy tempoly zen̈y tsy maintsy misy pisoron̈obe. Ke azovy pisoron̈obe amy tempoly arapan̈ahy maventy io? Jesosy. Izy koa fa nisôriny Zan̈ahary “fan̈ahy masin̈y” sady namezany “angovo”, taminio izy nanjary pisoron̈obe. (Asa. 10:37, 38; Mar. 1:9-11) Talohanizy naty ndreky talohanizy nivilomin̈y raha zen̈y nandalo. Akory ahaizantsika zen̈y? Alô atsika handiniky tantarany Arona pisoron̈obe ndreky pisoron̈obe hafa nisoatra izy.

Koran̈iny Lalàn̈any Mosesy fa pisoron̈obe zaraiky fo nahazo niditry tamy faritry Farany Masin̈y tamy tran̈olay masin̈y ndreky tamy tempoly. Nisy ridô nampisaraka faritry Farany Masin̈y io tamy faritry Masin̈y. Taminy Andra Fandrakofan̈a Fahotan̈a fo pisoron̈obe nahazo niditry tao. (Heb. 9:1-3, 6, 7) Tsy nahazo lalan̈a niditry tamy faritry Farany Masin̈y io tao foeky Arona ndreky olo nisoatra izy, izikoa iro tsendriky voahosotra ho pisoron̈obe. Karaha zen̈y koa, Jesosy tsy nahazo nandalo ‘tamy ridô an̈ohatra’ io ke hengo andan̈itry an̈y, izy koa tsendriky navoahosotro ho pisoron̈obe. ‘Nofotronany’ ridô an̈ohatra io. (Heb. 10:20) Zen̈y nahavy Paoly nivolan̈a fa efa “pisoron̈obe” Jesosy, taminizy navy tamy ‘tran̈olay araiky maventy be ndreky lavorary mare sady tsy namboarin̈y tamy tan̈ana’, tsy aia zen̈y fa ‘andan̈itry an̈y lastio.’—Heb. 9:11, 24.

Ombian̈a fifan̈ikian̈a vaovao io nanomboko nanankery? Alohanizio hanankery, nisy raha telo tsy maintsy natao, Jesosy koa fa navy tandan̈itry tan̈y. Ino aby zen̈y?

Voanalohany, nandeha nan̈oloan̈a Jehovah antsendriky Jesosy. Faharoe, niangavy Jehovah izy baka Jehovah han̈eky soron̈o nataony in̈y. Fahatelo, nikeny Jehovah soron̈o nataony. Tsy nanankery foeky fifan̈ikian̈a vaovao io izikoa tsy vita raha telo aby io.

Tsy koran̈iny Baiboly ao ombian̈a marin̈y Jehovah nan̈eky soron̈o nataony Jesosy in̈y. Ke tsy haintsika ombian̈a marin̈y fifan̈ikian̈a vaovao io komansy nanankery. Ny raha haintsika fo, nengo tandan̈itry tan̈y Jesosy folo andra talohany Pantekoty. (Asa. 1:3) Tan̈atiny fotoan̈a fohiky io izy niangavy Jehovah han̈eky soron̈o nataony, ke nikeny Jehovah tsarabe izio. (Heb. 9:12) Hita tamy raha nandalo tamy Pantekoty io, fa efa nanankery fifan̈ikian̈a vaovao io. (Asa. 2:1-4, 32, 33) Zen̈y ahaizan̈a fa efa nanankery fifan̈ikian̈a vaovao io tamy zen̈y.

Izikoa fintin̈iny, komansy nanankery fifan̈ikian̈a vaovao io, Jehovah koa fa nan̈eky soron̈o nataony Jesosy ndreky nampiditry iro voahosotro aby io tan̈atiny fifan̈akian̈a vaovao io. Jesosy lastio Pisoron̈obe pan̈elan̈elan̈a fifan̈ikian̈a io.—Heb. 7:25; 8:1-3, 6; 9:13-15.