Fitiavan̈a Han̈ampy Anao Handresy Tahotro

1. Ino aby matetiky raha mety hampavozo atsika?

MINIMINIA hely baka raha niain̈any Nestor ndreky María. Nan̈iry hanompo amy tany mbala mila pitory iro fivadiany.b Ke tsy maintsy nianatra nampihen̈y depansindro iro. Tsy nandeha ho azy raha zen̈y tamy voanalohany. Navozo baka iro tsao iro tsy ho sambatra izikoa mihen̈y vola azondro. Biniam ndraiky mipetraka amy tany tsy man̈aomba asa fitorian̈a. Efa hainy fa mety hiaritry fan̈injehan̈a izy, fotony izy an̈isany vahoakany Jehovah. Nampavozo izy raha zen̈y. Fa mbala nisy raha nampavozo izy mandilatra fan̈injehan̈a. Navozo izy han̈ano akory fihetsikiny lafamìnany lera iro mahay fa nan̈araka fivavahan̈a vaovao io izy. Valérie ndraiky avoany kansera, ke sahiran̈a mare izy nitady dokotera pandidy vôn̈ono han̈aja raha koran̈iny Baiboly momba lio. Normaly izikoa izy navozo tsao hofoaty.

2. Nan̈ino ma atsika mila mianatra mifehy tahotrontsika?

² Asa efa nisy raha mba nampavozo anao? Ankamaraozantsika karaha zen̈y. Izikoa tsy haintsika mifehy tahotrontsika, mety han̈ano fanapahankevitry ratsy edy atsika, ke ho robaka fifandraisan̈antsika amy Jehovah. Zen̈y tsarabe raha tadiaviny Satana. Ataony raha hampavozo atsika, beky atsika handika lalàn̈any Jehovah, an̈isanizen̈y didinany man̈iraka atsika hitory vaovao tsara. (Apok. 12:17) Marin̈y ndraiky fa Satana ten̈a ratsy fan̈ahy sady tsisy hinakinaka, avio izy koa matanjaka. Kanefa, atsika afaka miaro ain̈intsika. Akory han̈anaovantsika zen̈y?

3. Ino raha han̈ampy atsika handresy tahotrontsika?

³ Izikoa atsika resy lahatra fa Jehovah tia atsika, avio izy ankilantsika fo, atsika tsy ho resiny Satana. (Sal. 118:6) Ohatra iziô, niatriky raha sarotro panoratra Salamo faha-​118. Marobe fahavalonany, an̈isanizen̈y olo nanan̈a fahifan̈a (andininy 9, 10). Nisy fotoan̈a koa izy niasaloha mare (andininy 13). Tsy zen̈y fo. Nisazìny Jehovah koa izy (andininy 18). Kanefa panoratra salamo io mbala nahavita nihira karaha ty: “Zaho tsy havozo.” Nan̈ino izy tsy navozo? Fotony ndray izy nisazìny Jehovah, hainy fa Babany andan̈itry an̈y io ten̈a tia izy. Natoky izy fa na ino na ino raha sarotro mbala tsy maintsy iaretany, Zan̈aharinany be fitiavan̈a io vôn̈ono han̈ampy izy.​—Sal. 118:29.

4. Ino aby raha tsy havozoantsika, izikoa atsika matoky fa Zan̈ahary tia atsika?

⁴ Anao tômpinain̈y foeky mila resy lahatra fa Jehovah tia anao. Zen̈y han̈ampy anao handresy tahotro telo aby ty: 1) Mavozo tsao tsy hahavita hamelon̈o fianakavian̈anao, 2) mavozo olo, avio 3) mavozo tsao hofoaty. Vitandro rahalahy ndreky ranabavy nikoran̈intsika tamy fehintsoratra voanalohany tarỳ in̈y nandresy tahotrondro, fotony iro resy lahatra fa Zan̈ahary tia iro.

MAVOZO TSAO TSY HAHAVITA HAMELON̈O FIANAKAVIAN̈A

5. Ino aby raha mety hampiasaloha lohany fianakavian̈a? (Zahava sary amy fon̈ony gazety ty.)

⁵ Andraikitriny lohany fianakavian̈a mamelon̈o vady amanjanakanany. Ary raha zen̈y tsy kidikidy amindro. (1 Tim. 5:8) Maro lohany fianakavian̈a mavozo tsao ho very asa, amy fotoan̈any valan̈aretin̈y ty. Asa zen̈y koa raha tsapanao? Mavozo donko anao tsao tsy hahita hanin̈y hoaniny vady amanjanakanao na tsy hahita vola han̈ifan̈a fôndrontran̈o. Izikoa san̈atria anao very asa, mety havozo koa anao tsao tsy hahita asa hafa. Sa mitovy aminery Nestor ndreky María raha tsapanao? Anao tihampihen̈y asanao na hiova asa, kanefa miasaloha anao tsao tsy hahavelon̈o anaro tran̈o araiky vola hely azonao. Mety hampavozo sady hampiasaloha ankitin̈y raha aby zen̈y. Kanefa ny raha misy, Satana man̈araraotro tahotro aby zen̈y, ke maro olo nanjary vôly nanompo Jehovah.

6. Ino raha tiany Satana hampidirin̈y amy jerintsika?

⁶ Ataony Satana raha hahavy anao hieritreritry fa Jehovah tsy mijery anao sady tsy han̈ampy anao hamelon̈o fianakavian̈anao. Ke mety hieritreritry anao fa mila man̈ano zay vitanao anao amy zen̈y tsy ho very asa, ndray mety handrobaka fihavanan̈anao amy Jehovah eky raha zen̈y.

7. Ino toky namezany Jesosy atsika?

⁷ Tsisy olo mahay Baba mandilatra i Jesosy. Ke Jesosy man̈amia toky atsika fa ‘hainy Zan̈aharintsika raha ilaintsika, ndray atsika mbala tsendriky mangataka aminany.’ (Mat. 6:8) Hainy Jesosy fa Jehovah vôn̈ono han̈amia raha ilaintsika. An̈isany fianakavian̈any Jehovah atsika fotony atsika manompo izy. Ke mety matoky atsika fa, amy maha Lohany fianakavian̈a izy, Jehovah tsy maintsy han̈aja toro lalan̈a namezany amy 1 Timoty 5:8 ao.

8. a) Izikoa atsika mavozo tsao tsy hahavita han̈amia raha ilainy fianakavian̈antsika, ino raha han̈ampy atsika? (Matio 6:31-33) b) Koa sary io zahavan̈a, akory hangalantsika tahaka olo fivadiany nandrasa hanin̈y amy ranabavy araiky?

⁸ Izikoa atsika resy lahatra fa Jehovah tia atsika ndreky fianakavian̈antsika, ho moramora amintsika hatoky fa ho azontsika fo raha ilaintsika. (Vakia Matio 6:31-33.) Jehovah ten̈a be fitiavan̈a salakady tsy matity, ke izy vôn̈ono han̈amia raha ilaintsika. Jehovah koa fa niasa tany ty, tsy raha mahavelon̈o atsika fo namezany. Nifinoany raha maro tsara sady mamparavoravo atsika koa tany ty. (Gen. 2:9) Ke akory fo basy izikoa lay raha ten̈a ilain̈a fo azonao ndraikindraiky? Izikoa zen̈y, tsaraova ty: ‘Sitrany mihinan̈a hely, tozay mandry mery.’ Efa nan̈amia i Jehovah! (Mat. 6:11) Avio aza adin̈a fa tsisy kôntiny foeky raha afoentsika amy zioty, na vola zen̈y na fanan̈ana, izikoa ampiran̈iny amy raha hamezany Jehovah atsika rango iziô ndreky aminy hoavy. Nanjary nazava tamy Nestor ndreky María raha zen̈y.​—Isaia 65:21, 22.

9. Ino raha ianaranao baka amy Nestor ndreky María?

⁹ Nipetraka ta Kolombia i Nestor ndreky María. Iro nanan̈a tran̈o tsara ndreky asa tsara karama. Ho iro: “Efa tan̈atiny jerinay han̈atsotra fiain̈ana avio hampitombo fanompoan̈a, fa navozo zahay tsao tsy ho sambatra izikoa hely vola miditry aminay.” Ino raha nan̈ampy iro? Nidinihindro fomba maro be efa nan̈ampiany Jehovah iro, ke tontohitry iro fa Jehovah ten̈a tia iro. Natoky koa iro fa Jehovah tsy maintsy han̈amia raha ilaindro. Ke nialandro asa nazahoandro volabe in̈y, avio nalafondro tran̈ondro. Iro baka tiô nifindra tamy tany mbala nila pitory maro. Nanen̈iny ma iro nan̈ano zen̈y? Karaha ty ho Nestor: “Marin̈y ankitin̈y raha koran̈iny Matio 6:33. Nazonay fo raha nilainay. Iziô zahay vo ten̈a sambatra.”

MAVOZO OLO

10. Nan̈ino ma atsika tsy lany fan̈ahy izikoa maro olo mavozo olo?

¹⁰ Rango taminy Adama ndreky Eva nanota tamy Jehovah, maro olo tia mampijaly naman̈a. (Mpito. 8:9) Misy amindro io manjikiziky fotony iro manan̈a fahifan̈a. Sasany ndraiky mandrava olo na mamono olo. Misy koa tsaiky tia man̈adroadro na mampijaly tsaiky lekaoly araiky amindro. Sasany ndraiky mamopoko havandro. Ke tsy lany fan̈ahy atsika izikoa maro olo manjary mavozo olo. Akory an̈araraotany Satana favozoan̈a olo zen̈y hamangoan̈a atsika?

11-12. Akory ataony Satana mampiasa favozoan̈a olo?

¹¹ Ataony Satana raha hahavy atsika havozo olo, amy zen̈y atsika vôly mitory na tsy han̈ano raha an̈irahany Jehovah atsika eky. Ataony koa raha hahavy fanjakan̈a han̈enjiky atsika na tsy han̈aomba atsika han̈ano asa fitorian̈a. (Lioka 21:12; Apok. 2:10) Doniany Satana ty man̈aparitaka tsaho ndreky vandy hankaratsian̈a Vavolombelon̈o Jehovah. Maro olo mino vady aby zen̈y, ke iro man̈adroadro atsika na mampijaly atsika foeky. (Mat. 10:36) Tsy vaovao amintsika tetidratsiny Satana aby zen̈y, fotony efa zen̈y fo fataony tamy taonjato voanalohany.​—Asa. 5:27, 28, 40.

¹² Tsy fan̈injehan̈a baka amy fanjakan̈a fo mety ampiasainy Satana hampavozoan̈a atsika. Sasany mavozo lafamỳ; miasaloha iro han̈ano akory fihetsikiny lafamìndro, lera iro mahay fa iro nanjary Vavolombelon̈o Jehovah. Aleondro ampijalijalian̈a tozay volan̈iny lafamỳ. Tiandro baka lafamìndro, ke tiandro izikoa havandro mba mahay Jehovah ndreky tia izy. Malahelo mare iro izikoa havandro tsy man̈aja Jehovah Zan̈ahary marin̈y ndreky panomponany. Ndraikindraiky, sasany amindro io nanjary nan̈eky fahamarin̈ana kanefa iro taloha nanohitry. Akory ndraiky izikoa anao nariany havanao nohony raha vaovao inoanao io? Ino raha tokony hataonao?

13. Nan̈ino ma anao mila resy lahatra fa Zan̈ahary ten̈a tia anao, ndray anao nariany lafamìnao? (Salamo 27:10)

¹³ Ten̈a mankahery raha koran̈iny Salamo 27:10. (Vakia.) Izikoa anao tsy man̈adin̈a fa Jehovah ten̈a tia anao, tsisy raha havozoanao ndray iry havanao hiala anao. Matoky koa anao fa izy tsy maintsy hitahy anao, fotony anao miaritry. Jehovah han̈amia raha ilainao. Izy koa han̈ampy anao tsy hiasaloha loatra fa ho ravoravo fo, sady hahaiharikitry izy. Efa izy edy ny hahavita zen̈y amintsika fa tsy olo hafa! Zen̈y tsarabe raha tsapany Biniam, araiky navoakoran̈a taloha tarỳ in̈y.

14. Ino ma raha ianaranao baka amy Biniam?

¹⁴ Nanjary Vavolombelon̈o Jehovah fo i Biniam, ndray efa hainy fa mety han̈enjiky izy mare fanjakan̈a. Tsapany fa ten̈a tia izy i Jehovah, ke vitany fo nandresy favozoan̈a olo. Karaha ty ho Biniam: “Ten̈a sarotro taminaka niaritry fan̈injehan̈a, tsy arakany niritriretako izy foeky. Fa ny raha ten̈a navozoako, lafamìnaka. Papako baka tsy manompo Jehovah, ke navozo zaho tsao fanapahankevitrinaka hanjary Vavolombelon̈o Jehovah io hampalahelo izy. Navozo koa zaho tsao iry havako tsy han̈isy fôtiny zaho eky.” Ndray zen̈y, resy lahatra i Biniam fa Jehovah hikarakara lan̈iany olo tia izy. Ho izy: “Nalaiko onon̈o fomba nan̈ampiany Jehovah olo hafa sahiran̈a arabola, olo navakavahanolo, na olo nampijaliny vahoaka rômotro. Haiko fa Jehovah tsy han̈ary zaho, izikoa zaho tsy mivadiky aminany. Matetiky zaho navoasambotro sady nampijalian̈a. Fa ny raha hitako, Jehovah man̈ampy atsika fo izikoa atsika tsy mivadiky aminany.” Jehovah tsy raha misy fo tamy Biniam fa nanjary Baba ankitin̈y, avio iro piaramanompo aminany aby io nanjary mira havany.

MAVOZO TSAO HOFOATY

15. Nan̈ino ma rariny atsika izikoa mavozo tsao hofoaty?

¹⁵ Koran̈iny Baiboly fa fahafatesan̈a io fahavalo. (1 Kor. 15:25, 26) Mety hiasaloha mare atsika izikoa fa mieritreritry momba fahafatesan̈a, intsaka eky izikoa atsika na havantsika marary mare. Ino antony? Fotony Jehovah koa fa niasa atsika, efa nataony tan̈atintsika tao fan̈irian̈a ho velon̈o mandrakizay. (Mpito. 3:11) Amy lafiny araiky, tsisy maharatsy atsika mavozo maty, fotony han̈ampy atsika hiaro ain̈intsika raha zen̈y. Manjary mandiniky tsara atsika alohany hanapakevitry. Ohatra momba hanin̈y hoanintsika, na spaoro tiantsika hatao. Baka amy tahotro koa mahavy atsika han̈aton̈o dokotera na hihinan̈a aody izikoa ilain̈a zen̈y, avio hitandrin̈y amy raha mety handratra na hamono atsika.

16. Normaly izikoa atsika mavozo maty. Fa akory mety han̈araraotany Satana raha zen̈y?

¹⁶ Hainy Satana tsarabe fa atsika tiho velon̈o. Ke nivolan̈a izy fa atsika zen̈y vôn̈ono hahafoe raha jiaby, firaka amy fifandraisan̈antsika amy Jehovah, izikoa zen̈y hampaela velon̈o atsika. (Joba 2:4, 5) Kanefa tsy marin̈y zen̈y. Ndray zen̈y, hainy Satana atsika mavozo hofoaty, ke araraotiny raha zen̈y baka atsika hiala Jehovah. Satana lastiô ‘manan̈a angôvo hahavy fahafatesan̈a.’ (Heb. 2:14, 15) Ndraikindraiky, Satana mety hampiasa olo ambany fahifan̈anany himenasy hamono atsika vahoakany Jehovah, izikoa atsika tsy miala finoan̈antsika. Misy fotoan̈a koa atsika tsy salama, ke ataony Satana raha hahavy atsika hilefitry amy raha inoantsika. Izy mety hampiasa dokotera na havan̈a tsy manompo Jehovah hiforse atsika hampidiran̈a lio. Kanefa haintsika tsarabe fa mandika lalàn̈any Zan̈ahary atsika izikoa man̈ano zen̈y. Na koa misy olo hafa mety handresy lahatra atsika han̈araka fitahan̈a mifanohitry amy toro lalan̈a amy Soratra Masin̈y.

17. Izikoa Romanina 8:37-39 io zahavan̈a, nan̈ino ma atsika tsy tokony havozo tsao hofoaty?

¹⁷ Tsisy amintsika iziô tihofoaty. Izikoa san̈atria maty atsika, haintsika fa tsy han̈ova fitiavany Jehovah atsika raha zen̈y. (Vakia Romanina 8:37-39.) Jehovah tsy mety han̈adin̈a kamaradiny efa maty. Aminany, iro io karaha mbala velon̈o. (Lioka 20:37, 38) Efa tsy din̈iny Jehovah fotoan̈a hamilaomany iro io ndraiky. (Joba 14:15) Lafo ankitin̈y vangany fan̈avotan̈a atsika, kanefa nifainy Jehovah fo raha zen̈y beky atsika “hahazo fiain̈ana tsisy farany.” (Jaona 3:16) Haintsika fa Jehovah ten̈a tia atsika sady mikarakara atsika. Ke izikoa anao marary na hampitahôrinolo hivonen̈a, aza miala Jehovah. Ambilà Jehovah hankahery anao, avio mangataha angôvo ndreky fahendrena baka aminany. Zen̈y raha nataony Valérie ndreky vadiny.​—Sal. 41:3.

18. Ino raha ianaranao baka amy tantarany Valérie?

¹⁸ Valérie koa fa 35 taon̈o, hita fa avoany kansera tsy fohita sady ten̈a ratsy izy. Fa ino raha nan̈ampy izy tsy havozo hofoaty? Fitiavany Jehovah izy. Karaha ty ho izy: “Izikoa fa hainay fa voany kansera zaho, nivadiky ambony ambany fiain̈ananay. Nila natao ôperasion zaho baka ho velon̈o, ary izio tsy zanazanaka ôperasion fa ten̈a maventy. Maro dokotera nandihananay, fa iro tsy nan̈eky handidy zaho izikoa zaho tsy hampidiran̈a lio. Navozo mare zaho. Kanefa haiko lalàn̈any Zan̈ahary ke zaho tsy nan̈eky hampidiran̈a lio foeky. Rango niain̈ako zay, be vitany Jehovah taminaka. Ke mba anjarako ndraiky iziô man̈aboaka aminany fa izy tiako. Isaka dokotera mitaha zaho man̈ambara vaovao ratsy aminaka, mahaitapakevitry fo zaho han̈ano raha mamparavoravo Jehovah ke tsy ambelako handresy foeky i Satana. Nididian̈a fo zaho in̈y fa tsy nampidiran̈a lio. Marin̈y fa mbala tsy janga zaho, kanefa namezany Jehovah zahay fo raha nilainay. Ohatra iziô, talohany narin̈esako momba aretin̈inaka, nisy lahatsoratra zay nianaran̈a tamy fivorian̈a farany herin̈iandra. Titranany: “Ahoana no Ahafahana Miatrika Olana?”c Ten̈a nankahery zahay izio. Matetiky zahay roeny vadiko mimpody mamaky izio ndraiky. Lahatsoratra karaha io ndreky fandihananay mitory ndreky mivory tsy tapaka ten̈a nan̈ampy zahay ho kalma ndreky hahay handanjalanja fo, avio hahay hanapakevitry.”

HO VITANAO FO HANDRESY TAHOTRONAO

19. Ino raha handalo tsy ho ela?

¹⁹ Miatriky raha sarotro panompony Jehovah erantany, kanefa vitandro fo niatriky zen̈y ndreky nanohitry Devoly, fotony Jehovah nan̈ampy iro. (1 Pet. 5:8, 9) Anao koa hahavita zen̈y. Tsy ho ela, Jehovah han̈iraka Jesosy ndreky iro olo hiaraka manjaka aminany aby io “handravan̈a asany Devoly.” (1 Jaona 3:8) Afaranizen̈y, ‘tsisy raha havozoany’ vahoakany Jehovah eky, avio “tsisy raha hampavozo iro.” (Isaia 54:14; Mika 4:4) Fa parpavianizen̈y, atsika mila miezaka mare handresy tahotrontsika aby io.

20. Ino aby raha han̈ampy atsika handresy tahotrontsika?

²⁰ Mila mankafatatra fatokisantsika Jehovah atsika. Mila resy lahatra atsika fa Jehovah ten̈a tia panomponany sady miaro iro. Ho vitantsika han̈ano zen̈y izikoa atsika misaintsain̈y fomba nan̈ampiany Jehovah panomponany taloha tan̈y, avio mikoran̈a zen̈y aminolo. Mila alaintsika onon̈o koa fomba nan̈ampiany Jehovah atsika manokan̈a, taminy atsika nandalo raha sarotro. Ho vitantsika fo handresy tahotrontsika, fotony Jehovah man̈ampy atsika.​—Sal. 34:4.