LAHATSORATRA FIANARAN̈A 8
HIRA 130 Andao Hifamela
Akôry Hahavy Anao ho Tia Mamela Heloko Karaha Jehovah?
‘Jehovah namela tanteraka helokonarô, ke mba man̈anaova karaha zen̈y koa anarô.’—KOL. 3:13.
HEVITRY HIDINIHIN̈Y
Lahatsoratra ty hikoran̈a raha mila hataontsika, baka atsika han̈ambela helokon’olo nan̈ano raha tsy tiantsika.
1-2. a) Lera karakôry mety ho sarotro mare amintsika hamela helokon’olo? b) Karakôry nan̈aboahan’i Denise fa izy namela heloko?
HITANAO sarotro ma man̈ambela heloko? Maro amintsika man̈eky zen̈y, intsaka eky olo io nan̈ano raha nampalahelo atsika mare. Fa misy raha mety hatao, baka ho resintsika fo helokontsika, ke hahavita hamela hadisovan̈an’olo atsika. Ohatra, diniha baka raha nahazo ranabavy Denise.a Izy nahavita namela heloko ankitin̈y. Tamin’ny 2017, izy ndreky fianakavian̈anany nandeha nitsidiky Foiben’ny Vavolombelon̈on’i Jehovah vaovao sady vo hibian̈a. Fa irô koa fa nody, nisy tomabily nikon̈o tomabilindrô, ke Denise tsy nahatsiaro ten̈a. Fa izikoa izy fa tampodian̈a, hainy fa zanany naratra be, aviô i Brian vadiny koa naty. Denise koa fa nieritreritry raha zen̈y, ho izy: “Kivy mare zaho ndreky nijaly jery.” Tafaran’izin̈y, hainy fa sôfera nikon̈o irô io olo salama sain̈y tsara aviô tsy namo. Ke nivavaka tamy Jehovah i Denise baka ho kalma fo.
2 Sôfera io nisambôrin’ny polisy, baka iô izy niakatra fitsaran̈a, fôtony nahafaty olo. Ten̈a mampigadra raha nataony io. Fa fitsaran̈a nivolan̈a fa miankin̈y amy raha volan̈in’i Denise fo raha hahazo lelahy io. Ho Denise: “Zaho nira olo nisy bay mbala tsy janga kanefa nidin̈ana sira be in̈y, fôtony zaho nila nikoran̈a fotoan̈a faran’ny sarotro tamy fiain̈ananaka.” Koa fa nafaka herin̈iandra vitsivitsy, Denise nimpody tamy fitsaran̈a tan̈y. Izy efa vôn̈ono hivolan̈a amy lelahy nan̈ano raha nampijaly mare fianakavian̈anany io. Akôry ho izy? Denise nangataka mpitsara io hamindra fô tamy lelahy io.b Koa fa tapitry volan̈an’i Denise, latsaka ranomason’ny mpitsara io. Ke ho izy: “Efa 25 taon̈o zay nan̈anovako asan’ny mpitsara ty, fa zaho mbala tsiary nahita olo navoa raha karaha ty, ke niangavy zaho hamindra fô tamin’olo nan̈ano raha tsy mety tamindrô. Sambako naharen̈y volan̈a feno fitiavan̈a ndreky famindram-pô karaha zen̈y.”
3. Ino nandrisiky Denise namela heloko?
3 Ino ma raha nan̈ampy Denise? Izy nimenimeny, akôry ataon’i Jehovah izikoa fa mamela heloko. (Mika 7:18) Izikoa atsika mankasitraka mare fomba nataon’i Jehovah namelan̈a helokontsika, zen̈y handrisiky atsika koa han̈iry hamela helokon’olo.
4. Ino raha tian’i Jehovah hataontsika? (Efesianina 4:32)
4 Tian’i Jehovah atsika hamela helokon’olo tsisy arakaraka, karaha nataony namela helokontsika koa. (Vakia Efesianina 4:32.) Izy man̈anten̈a atsika ho vôn̈ono hamela helokon’olo nan̈ano raha nampalahelo atsika. (Sal. 86:5; Lioka 17:4) Amy lahatsoratra ty, atsika handiniky raha telo han̈ampy atsika hahaiho tia mamela heloko fo.
AZA ATAO SARY TSY HAY FIHETSEHAM-PÔNAO
5. Izikoa ohabolana 12:18 zahan̈a, mety hahatsapa karakôry atsika izikoa misy olo nampameloko atsika?
5 Mety mahatsiaro malahelo mare atsika nohon’ny raha nivolan̈in’olo na nataon’olo, intsaka eky olo io kamaradintsika mare na havantsika maletry. (Sal. 55:12-14) Misy aby atsika mety hahatsapa karaha voatomboko meso in̈y. (Vakia Ohabolana 12:18.) Fa atsika fo mety hifen̈y han̈ano sary han̈adin̈a fihetseham-pôntsika io. Fa izikoa zen̈y ataontsika, atsika mira olo voatomboko meso in̈y, fa ambelantsika amy bay iô fo meso io. Atsika tsy tôkony han̈anten̈a fa ho janga karaha io fo fôntsika malahelo, izikoa izio ataontsika sary tsy hay.
6. Mety han̈ano karakôry atsika, izikoa misy olo man̈ano raha tsy tiantsika?
6 Izikoa misy olo man̈ano raha mampameloko atsika, mety direkty ho meloko atsika. Sady na Baiboly mivolan̈a fa mety ho meloko atsika izikoa avoa raha karaha zen̈y. Fa kanefa Baiboly koa mampitandrin̈y fa helokontsika io tsy tôkony hambelantsika hifehy atsika. (Sal. 4:4; Efes. 4:26) Nan̈ino? Fôtony atsika koa indesim-pô, matetiky atsika tihan̈ano raha malaky. Kanefa aza adin̈a fa olo koa meloko man̈ano raha, mahalan̈a fo izy tafan̈ano ny tsara. (Jak. 1:20) Aleva onon̈o fa mety ho meloko atsika, izikoa misy olo man̈ano raha tsy tiantsika. Fa atsika ndraiky afaka mifidy, na atsika handresy helokontsika io, na han̈eky hifihezin’izio.
Mety ho meloko atsika, izikoa misy olo man̈ano raha tsy tiantsika, fa atsika ndraiky afaka mifidy, na atsika handresy helokontsika io, na han̈eky hifihezin’izio
7. Ino koa raha mety ho tsapantsika, izikoa nisy olo nan̈ano raha nampalahelo atsika?
7 Izikoa misy raha ratsy ataon’olo amintsika, mety misy fihetseham-pô hafa koa tsapantsika. Ohatra, misy ranabavy araiky, Ann an̈arany, nivolan̈a: “Tamy zaho mbala tsaiky, papako nisaraka tamy mamako, aviô man̈angy mpiasanay tao fo nataony vady. Ke zaho nahatsiaro karaha narian̈a in̈y. Baka iô, izikoa irô fa niteraka aroe mianadahy, hitako karaha natakalondrô zanakandrô io zaho. Nahatsiaro karaha tsy tian̈a foeky zaho.” Nisy ranabavy araiky koa, Georgette an̈arany, nivolan̈a karaha ty, vadiny koa fa nandiadia izy: “Nalahelo mare zaho, fôtony zahay efa kamarady rango zahay mbala hely. Baka iô zahay niaraka nan̈ano mpisava lalan̈a koa.” Karaha ty koa ho ranabavy araiky, Naomi an̈arany: “Tsy tan̈aty jeriko foeky vadiko han̈ano raha hamparary fônaka. Ke izikoa vadiko namosa taminaka fa izy nizaha sary vetaveta, zaho nahatsiaro voafitaka mare.”
8. a) Ino antony sasany mahavy atsika tôkony hamela heloko? b) Ino hatsaran̈a azontsika, izikoa atsika mamela heloko? (Zahava koa efajoro “Akôry Izikoa Nisy Olo Nampijaly Anao?”)
8 Atsika tsy mahavita mifehy raha volan̈in’olo na raha ataon’olo amintsika, fa atsika fo mahavita mifehy raha ataontsika. Ke matetiky ny raha ten̈a tsara atao, efa mamela heloko edy. Nan̈ino? Fôtony atsika tia Jehovah, aviô atsika tiany izikoa mamela heloko. Sady atsika koa meloko fo fa tsy mamela heloko, mety tsy ho tafieritreritry tsara, ke ho tafan̈ano raha hanin̈enantsika. Mety tsy ho tsara koa fahasalaman̈antsika. (Ohab. 14:17, 29, 30) Diniha baka raha nahazo ranabavintsika araiky, Christine an̈arany. Ho izy: “Zaho koa fa meloko, mahalan̈a fo zaho mitokiky. Aviô zaho tsy mitandrin̈y amin’ny hanin̈y hohaniko. Lôso tsy ampy tôromaso koa zaho, aviô mahaisarotro aminaka fo mifehy fihetseham-pônaka, ke lôso mora mahinihiny amy vadiko ndreky amin’olo hafa zaho.”
9. Nan̈ino atsika tsy tôkony hitana heloko am-pô?
9 Olo nan̈ano raha nampameloko atsika ndray tsy miala tsin̈y amintsika, atsika mbala mety man̈ano raha mampakirikiry helokontsika fo. Amy fomba akôry? Karaha ty nivolan̈in’i Georgette, araiky nikoran̈intsika taloha tiô in̈y: “Elaela ndraiky vo nafaka helokonaka tamy vadiko taloha in̈y. Fa zaho ndraiky koa fa nan̈ambela helokonany, ren̈iko nilamin̈y mare sain̈inaka.” Izikoa atsika tsy mitana heloko am-pô, raha zen̈y miaro fôntsika baka tsy ho meloko lava. Man̈ano ny tsara amin’ny ain̈intsika koa atsika, fôtony afaka manohy mankafy fiain̈anantsika ndraiky koa. (Ohab. 11:17) Fa izikoa anao iziôty tsendriky vôn̈ono hamela heloko, ino raha tôkony hataonao?
AKÔRY ATAO MIFEHY FIHETSEHAM-PÔ?
10. Nan̈ino mila fotoan̈a vo afaka helokontsika? (Zahava koa sary.)
10 Ino raha han̈ampy atsika han̈adoso helokontsika io? An̈isan’ny fomba araiky an̈anaovan̈a zen̈y, man̈ambela fotoan̈a handeha. Izio karaha olo araiky naratra mare in̈y. Tsy miaraka izy mahazo aody efa janga edy, fa mbala mila miambin̈y elaela. Karaha zen̈y koa, mila fotoan̈a atsika, vo ten̈a hahavita hamela helokon’olo amy fô jiaby.—Mpito. 3:3; 1 Pet. 1:22.
Karaha ataon’ny bay mila karakarain̈a tsara ndreky mila fotoan̈a vo mahivan̈a in̈y, karaha zen̈y koa izikoa nisy raha namparary fôntsika (Zahava fehintsoratra 10)
11. Akôry ataon’ny vavaka io han̈ampy anao ho tia mamela heloko?
11 Mivavaha. Angataha Jehovah han̈ampy anao ho tia mamela heloko.c Ann, araiky nikoran̈intsika tiô in̈y nan̈azava fa vavaka nan̈ampy izy hamela heloko. Ho izy: “Zaho niangavy Jehovah hamela helokonay tsiaraikiaraiky tao, tamy raha nivolan̈inay ndreky tamy raha tsy mety nataonay. Zaho baka tiô nanoratra taratasy tamy papako ndreky mamaheliko io. Ke nivolan̈iko tao fa zaho mamela helokondrô.” Ann nivolan̈a fa tsy nora taminany ndraiky nan̈ano zen̈y, fa ho izy: “Zaho man̈anten̈a fa baka amy fifen̈ako nangala tahaka familan-kelokon’i Jehovah in̈y, hahavy papako ndreky vadiny io han̈iry hianatra raha momba Jehovah.”
12. Nan̈ino atsika mila matoky Jehovah fa tsy fihetseham-pôntsika? (Ohabolana 3:5, 6)
12 Matokisa Jehovah, fa aza matoky fihetseham-pônao. (Vakia Ohabolana 3:5, 6.) Hain’i Jehovah fo raha ten̈a mahatsara atsika. (Isaia 55:8, 9) Izy tsy han̈iraka atsika han̈ano raha handrobaka atsika foeky. Ke matoa izy man̈iraka atsika hamela heloko, hainy fa efa zen̈y edy ny mahatsara atsika. (Sal. 40:4; Isaia 48:17, 18) Fa izikoa ndraiky atsika matoky fihetseham-pôntsika tômpiny fo, atsika tsy mety hahavita hamela heloko zen̈y foeky. (Ohab. 14:12; Jer. 17:9) Naomi, araiky nikoran̈intsika taloha tarỳ in̈y nivolan̈a: “Tamy voanalohany zaho nieritreritry fa tsy diso zaho nata tsy namela heloko vadiko nizaha sary vetaveta in̈y. Navozo zaho tsao izy himpody han̈ano zen̈y koa, na ho adin̈any alahelonaka baka tamizin̈y. Haiko ndraiky fa Jehovah mahay raha mahazo zaho io. Fa zaho koa fa nandiniky, tontohitry zaho fa nata Jehovah mahay raha jiaby tsapako an̈atin’ny fônaka ao, tsy raha jiaby tsapako io ikeny aby. Hainy karakôry raha tsapako, ndreky fotoan̈a ilaiko baka mahafaka helokonaka io. Fa tiany koa zaho ho tia mamela heloko.”d
MIFEN̈A HANAN̈A TOE-PÔ NDREKY TOE-TSAIN̈Y TSARA
13. Izikoa Romanina 12:18-21 zahan̈a, ino raha mila ataontsika?
13 Izikoa atsika fa man̈ambela olo nan̈ano raha mampalahelo atsika, atsika mety hanapa-kevitry tsy hikoran̈a raha nandalo in̈y eky. Fa mbala misy raha hafa koa tiantsika hatao. Izikoa olo nan̈ano raha nampameloko atsika io rahalahy na ranabavintsika, tanjon̈ontsika hihavan̈a aminany. (Mat. 5:23, 24) Atsika tsy ho meloko lava aminany, fa tiantsika hamindra fô ndreky hamela helokonany. (Vakia Romanina 12:18-21; 1 Pet. 3:9) Ino raha han̈ampy atsika hahavita han̈ano zen̈y?
14. Ino raha tôkony hifen̈antsika, aviô nan̈ino?
14 Atsika mila mifen̈y mangala tahaka Jehovah, ke mifidy hizaha toetry tsaran’olo nan̈ano raha nampalahelo atsika. (2 Tan. 16:9; Sal. 130:3) Izikoa atsika mandiniky toetry tsaran’olo, zen̈y raha ho hitantsika. Fa izikoa atsika mandiniky toetry ratsinany, ho hitantsika koa toetry ratsinany. Fa ho moramora amintsika hamela heloko, izikoa toetry tsaran’olo raha dinihintsika. Ohatra, misy rahalahy araiky, Jarrod an̈arany, nivolan̈a: “Hitako moramora mamela helokon’ny rahalahy araiky, izikoa zaho mandiniky irô toetry maro tsara itiavako izy, tozay mandiniky hadisovan̈a vitany.”
15. Nan̈ino ma ten̈a man̈ampy fivolan̈anao amin’olo fa anao efa namela helokonany?
15 Ten̈a raha maventy koa hivolan̈antsika amin’olo nan̈ano raha nampalahelo atsika io, fa atsika efa namela izy. Nan̈ino? Aleva onon̈o baka raha nivolan̈in’i Naomi, araiky nikoran̈intsika taloha tarỳ in̈y. Ho izy: “Vadiko nan̈ontany zaho: ‘Anao ma efa tsy meloko aminaka eky?’ Zaho koa fa nan̈abian̈a vavanaka hivolan̈a fa ‘zaho efa tsy meloko aminao,’ zaho tsy tafivolan̈a. Tontohitry zaho fa tsy ten̈a baka tamy fônaka zaho namela izy io. Koa fa nandeha fotoan̈a, vitako fo nivolan̈a taminany: ‘Zaho mamela anao.’ Niran̈aran̈a ranomason’ny vadiko. Tsy nampoiziko foeky fa zahay roe baka tiô samy nahatsiaro nahivankivan̈a. Ke rango tamy zen̈y, nanomboko natoky izy ndraiky koa zaho. Ke nanjary kamarady mare ndraiky koa zahay.”
16. Ino raha nianaranao momba familan-keloko?
16 Tian’i Jehovah atsika ho tia mamela heloko. (Kol. 3:13) Fa ndray zen̈y, mety tsy mora amintsika mamela helokon’olo zen̈y. Fa ho vitantsika han̈ano zen̈y, izikoa tsy ataontsika sary tsy hay fihetseham-pôntsika io, aviô mifen̈y atsika mifehy izio. Atsika baka iô aminjay mifen̈y han̈ana toe-pô ndreky toe-tsain̈y tsara.—Zahava efajoro “Raha Telo Han̈ampy Atsika Hamela Heloko.”
DINIHA HATSARAN̈A AZON’OLO TIA MAMELA HELOKO
17. Izikoa atsika tia mamela heloko, ino aby hatsaran̈a ho azontsika?
17 Maro antony tôkony hahavy atsika ho tia mamela heloko. Diniha baka sasany amy zen̈y. Voanalohany, atsika mangala tahaka Jehovah ndreky mamparavoravo Babantsika mamindra fô io. (Lioka 6:36) Faharoe, zen̈y koa an̈aboahantsika fa atsika ten̈a mankasitraka Jehovah mamela helokontsika. (Mat. 6:12) Aviô fahatelo, mahaitsara fahasalaman̈antsika, aviô atsika ho tsara fihavan̈ana amin’olo.
18-19. Ino mety ho vokany, izikoa atsika tia mamela heloko?
18 Izikoa atsika tia mamela helokon’olo, mety ho hisy hatsaran̈a tsy ampoizintsika mare koa. Aleva onon̈o baka raha nandalo tamy Denise, araiky nivolan̈intsika taloha tarỳ in̈y. Tamy fotoan̈an’izin̈y baka, sôfera nikon̈o irô io efa tapa-kevitry handeha hamono ten̈a, izikoa fa vita fitsaran̈a izy. Fa lany fan̈ahy mare izy, Denise koa fa namela helokonany, ke izy nanomboko nianatra Baiboly tamy Vavolombelon̈on’i Jehovah.
19 Mety ho raha faran’ny sarotro amintsika man̈ambela helokon’olo. Kanefa mety ho maro koa hatsaran̈a ho azontsika, izikoa atsika tia mamela heloko. (Mat. 5:7) Irarian̈a atsika jiaby han̈ano eraka angôvontsika hangala tahaka Jehovah, ke hamela heloko fo.
HIRA 125 “Sambatra ny Mamindra Fo”
a Nivoan̈a an̈aran̈a sasany.
b Amy raha karaha io, anjaran’ny Kristianin̈y tsiaraikiaraiky manapa-kevitry amy raha tiany hatao.
c Zahava amy jw.org videon’ny hira “Andao Hifamela”, “Hamela Heloko amy Fô”, ndreky “Aza Arian̈a Fihavan̈ana.”
d Fizahavan̈a sary vetaveta io nata fahotan̈a ndreky mankarary fô, izio tsy antony iken’ny Soratra Masin̈y ahafahan’ny vady tsy manan-tsin̈y hisara-badian̈a.