Marin̈y ma Jesosy Teraka Fanjava Desambra Zen̈y?

AMY Baiboly tsisy fikoran̈ana momba daty nitirahany Jesosy. Fa ndray zen̈y, Jesosy tsy teraka fanjava Desambra. Ino antony?

Aleva onon̈o andra ta Betlehema tamy fotoan̈a nitirahany. Nanintsy mare ndreky nisy mahalen̈y tan̈y, tamy fanjava jiosy, Kisleva. Izio fananjo fanjava Novambra na Desambra amintsika aty. Fanjava Tebeta fan̈araka izio, Desambra na Zanvie. Io fanjava farany nanintsy tan̈y, isaka taon̈o. Nisy lanezy tamy zen̈y tan̈abony bongo. Atsika hizaha raha koran̈iny Baiboly momba zen̈y.

Ezra panoratra Baiboly nivolan̈a fa fanjava Kisleva io nalaza nanintsy ndreky nisy mahalen̈y. Nikoran̈iny fa olo jiaby vory ta Jerosalema tamy zen̈y ‘nangorohoro nazony mahalen̈y be’, ‘taminy andra faharoapolo tamy fanjava fahasivy [Kisleva].’ Ndray olo tamy zen̈y nivolan̈a karaha ty foeky: ‘Zahay tsy tafidoko antany aty fa asara andra io e.’ (Ezra 10:​9, 13; Jeremia 36:22) Zen̈y nahavy iro tsiman̈aja aby tamy zen̈y tsy nijanon̈o tan̈aty ala, koa fa fanjava Desambra, indraka eky fa alin̈y!

Izikoa Baiboly zahan̈a, nisy tsiman̈aja tan̈aty ala tan̈y, taminy alin̈y nitirahany Jesosy. Ndray Lioka panoratra Baiboly nivolan̈a fa ‘nidoko tan̈aty ala iro alin̈izin̈y, niambin̈y ondrikondrikindro narikitry Betlehema tan̈y.’ (Lioka 2:​8-12) Iro tsy mety tafidoko tan̈aty ala andra alin̈y amy fanjava Desambra, fotony nanintsy mare sady nisy mahalen̈y be tan̈y tamy zen̈y. Haintsika baka amy zen̈y fa tsy mety ho fanjava Desambra Jesosy teraka.a

Baiboly tsy dia mivolan̈a datinandra nitirahany Jesosy, fa andra nifatesany fo ten̈a koran̈iny. Mampatsiaro atsika raha nambarany Panjaka Solomona ty raha zen̈y: “Sitrany laza tsara toizay menaka man̈itry; sitrany andra ifatesan̈a toizay andra itirahan̈a.” (Mpitoriteny 7:⁠1) Zen̈y mahavy Baiboly tsy dia mikoran̈a nitirahany Jesosy, fa mikoran̈a raha maro momba fanompoan̈a nataony Jesosy ndreky ny nifatesany.