Fananganantsain̈y, Fifidianan̈a, Fanompoan̈a Sivily

Fananganantsain̈y: Vavolombelon̈o Jehovah mino fa zay olo man̈ano fomba fan̈ajan̈a sain̈y, ndreky man̈ano hirampirenena, manompo sampy, fotony raha jiaby zen̈y fanompoan̈a firenena na fanompoan̈a olo pitondra fanjakan̈a. (Isaia 43:11; 1 Korintianina 10:14; 1 Jaona 5:21) Ohatra, Nebokadnezara panjakany Babylony koa fa niasa tsangambato be araiky, nisy hira natao han̈amezan̈a voninahitry izy ndreky han̈aboahan̈a fitiavan̈a tanindrazan̈a. Izikoa fa nalefa lamoziky, karazan̈a hirampirenena tamy zen̈y, nitireny olo jiaby hankohoko tamy sary io. Ndray zen̈y, nisy Hebreo telo lahy tsy nety nankohoko, nata iro efa tsaiky nivoneny Panjaka. An̈arandro io Sadraka, Mesaka ndreky Abednego.—Daniela, toko faha-3.

Carlton Hayes pahay tantara nivolan̈a fa ‘izikoa olo araiky tia tanindrazan̈a mare, mira mivavaka amizio, fotony sain̈y io raha voanalohany ampiasain̈y, baka io izio lamariky finoan̈andro aminany io.’ “Izikoa fa misy olo ma-nangantsain̈y, olo jiaby man̈adoso satroko. Misy koa olo man̈ano tononkalo momba firenena ndreky hirampirenena.” Nampitovisiny tamy fivavahan̈a izio, fotony misy “andra masin̈y, olo masin̈y ndreky tempoly. Andra masin̈indro fetimpirenena. Olo masin̈indro iro olo mahery fo, fa tempolindro ndraiky tany fan̈anovandro kabaro ndreky filaharan̈a. Manampahifan̈a araiky tamy tafiky brezilianin̈y nivolan̈a: ‘Sain̈y io ankamasin̈iny, ivavahan̈a, karaha atao mivavaka amy Tanindrazan̈a.’ Koran̈iny Rakipahaizan̈a Amerikanina fa “sain̈y io masin̈y mira lakroa fo.”

Vo tsy ela koa boky io nivolan̈a fa hirampirenena io an̈isany “fomba araiky an̈aboahan̈a fitiavan̈a tanindrazan̈a. Aminy hirampirenena io matetiky misy fangatahan̈a amy Zan̈ahary hitariky, hiaro olo pitondra ndreky vahoakanany.” Tsy diso Vavolombelon̈o Jehovah koa mivolan̈a fa mira fivavahan̈a fo fomba an̈aboahan̈a fitiavan̈a tanindrazan̈a, an̈atinizen̈y hirampirenena ndreky fananganantsain̈y. Misy boky tan̈y Etazonia mivolan̈a fa nisy tsaiky zanaka Vavolombelon̈o Jehovah tsy nety nanangantsain̈y ndreky tsy nety nivolan̈a fa iro tsy hivadiky amy tanindrazan̈a, ta lekolindro tan̈y. Nivolan̈iny koa boky io: ‘Nandalo fitsaran̈a maro iro, fa tamy farany nan̈eky fo Fitsaran̈a Tampony fa fomba jiaby fatao isanandra momba fananganantsain̈y io mbala an̈isany fivavahan̈a fo.’

Vavolombelon̈o Jehovah ndray tsy manangantsain̈y, iro ndraiky tsy mandrova olo han̈ano izio. Iro man̈eky fa sain̈y io ahaizan̈a firenena araiky. Ikendro koa fa “manampahifan̈a” iro fanjakan̈a natsangana aradalàn̈a aby io, ke iro io man̈ano asandro mira “panompony Zan̈ahary” fo. (Romanina 13:1-4) Zen̈y mahavy Vavolombelon̈o Jehovah man̈ano vavaka “nindro panjaka jiaby ndreky iro jiaby manan̈a toeran̈a an̈abo.” Dikany an̈anovan̈a zen̈y, “baka atsika hanan̈a fiain̈ana milamin̈y ndreky tsy ho voatabataba fo”, koa fa manompo Zan̈ahary.—1 Timoty 2:2.

Fifidianan̈a: Kristianin̈y tsy mandrova olo hifidy, fa iro man̈eky zay olo voafidiny vahoaka. Iro koa tsy man̈ano politiky. (Matio 22:21; 1 Petera 3:16) Ke akory ataony Kristianin̈y izikoa lalàn̈a mivolan̈a fa olo jiaby tsy maintsy mifidy, na koa halanolo izy izikoa tsy mandeha mifidy? Izy mila mangala onon̈o raha nataondro Hebreo telo lahy in̈y. Iro nandeha tamy lemaka Dora tan̈y fo. Karaha zen̈y koa, izy mety mandeha amy birony fifidianan̈a an̈y fo, izikoa mety aminy eritreritrinany. Izy fo tsy mila milan̈y amindro olo fidin̈y io. Misy toro lalan̈a tsiota ty tsy mila adin̈any:

1. Lan̈iany olo man̈aradia Jesosy tsy tokony ho “an̈isany donia ty.”—Jaona 15:19.

2. Kristianin̈y zen̈y misolo ten̈a Kristy ndreky Fanjakan̈anany.—Jaona 18:36; 2 Korintianina 5:20.

3. Mira fo raha inoany Kristianin̈y jiaby, baka io iro jiaby man̈ano karaha nataony Jesosy. Iro ten̈a mifankatia.—1 Korintianina 1:10; Kolosianina 3:14.

4. Tomponandraikitry anao aminolo fidinao.—Diniha 1 Samoela 8:5, 10-18 ndreky 1 Timoty 5:22.

5. Nira nanohitry Jehovah fo iro Israelita aby io, izikoa fa nangataka panjaka taminany.—1 Samoela 8:7.

6. Kristianin̈y zen̈y mikoran̈a raha momba Fanjakan̈any Zan̈ahary, firaka aminolo efa man̈ana antoko politikinany. Dikanizen̈y, tokony hifan̈araka amy raha koran̈intsika fo raha ataontsika.—Matio 24:14; 28:19, 20; Hebreo 10:35.

Fanompoan̈a sivily: Amy tany sasany, lan̈iany olo tsy man̈eky han̈ano maramila, irahiny Fanjakan̈a man̈ano asa fanompoan̈a sivily. Izikoa atsika mila manapakevitry momba raha karaha zen̈y, atsika tokony hivavaka. Mety hatao koa mangataka hevitry amy Kristianin̈y matotro. Izikoa fa vitantsika raha jiaby zen̈y, anjarantsika amy zay manapakevitry.—Ohabolana 2:1-5; Filipianina 4:5.

Baiboly man̈iraka atsika “han̈eky ndreky han̈araka volan̈a fanjakan̈a ndreky manampahifan̈a pitondra, ho von̈ono han̈ano asa tsara jiaby ndreky hahay handanjalanja.” (Titosy 3:1, 2) Mila alentsika onon̈o fo raha koran̈iny Baiboly zen̈y. Ty koa raha tsara dinihintsika: ‘Tsao fanompoan̈a irahin̈y ataoko ty mbala misy ifandraisany amy raha momba donia ty ndreky amy fivavahan̈a diso e?’ (Mika 4:3, 5; 2 Korintianina 6:16, 17) ‘Izikoa zaho han̈ano izio, tsy ho sarotro aminaka ndraiky han̈ano andraikitrinaka amy maha Kristianin̈y zaho, tsao tsy ho vitako e?’ (Matio 28:19, 20; Efesianina 6:4; Hebreo 10:24, 25) ‘Tsao mba havitako man̈ano pisava lalan̈a fo raha zen̈y e?’—Hebreo 6:11, 12.

Misy Kristianin̈y mety han̈ano fanompoan̈a sivily, baka izy tsy migadra. Izikoa eritreritrinany tsy man̈enjiky izy, tsisy olo tokony hivolan̈a izy. (Romanina 14:10) Izikoa ndraiky misy tsy mety han̈ano, tsisy olo koa tokony hitsara izy amy zen̈y.—1 Korintianina 10:29; 2 Korintianina 1:24.