-
Ino ma Fanjakan̈any Zan̈ahary Io?Mankafiza Fiain̈ana Tsisy Farany!—Fianaran̈a Baiboly
-
-
LESON 31
Ino ma Fanjakan̈any Zan̈ahary Io?
Fanjakan̈any Zan̈ahary raha ten̈a koran̈iny Baiboly. Jehovah hampiasa Fanjakan̈a io han̈atanteraka fikasan̈anany tamboanalohany tan̈y momba tany ty. Ino ma Fanjakan̈a io? Ino ahaizantsika fa efa manjaka izio? Ino raha efa vitanizio? Ino raha hataonizio aminy amaray an̈y? Hamaly fan̈ontanian̈a aby io leson araiky ty ndreky leson aroe fan̈araka izity.
1. Ino ma Fanjakan̈any Zan̈ahary io, avio azovy ma Panjakanizio?
Izio Fanjakan̈a natsangany Jehovah andan̈itry an̈y. Baka an̈y Jesosy Kristy Panjakanizio manjaka. (Matio 4:17; Jaona 18:36) Ho Baiboly momba Jesosy: ‘Izy hanjaka mandrakizay.’ (Lioka 1:32, 33) Hanjaka amy tany jiaby Jesosy.
2. Azovy hanjaka miaraka amy Jesosy?
Tsy Jesosy zaraiky fo manjaka. Misy olo baka amy ‘foko ndreky fivolan̈ana ndreky vahoaka ndreky firenena koa hiaraka hanjaka aminany amy tany ty.’ (Apokalypsy 5:9, 10) Firy ma olo hiaraka hanjaka amy Kristy? Rango naviany tambony tany teto firaka izioty, maro olo nanjary pan̈aradia izy. Fa kanefa, 144 000 fo olo handeha andan̈itry an̈y hanjaka hiaraka aminany. (Vakia Apokalypsy 14:1-4.) Sisanizay vahoaka hindesiny Fanjakan̈a io ambony tany eto.—Salamo 37:29.
3. Ino tsy mampitovy Fanjakan̈any Zan̈ahary ndreky fanjakan̈anolombelon̈o?
Fanjakan̈anolombelon̈o tihan̈ano ny tsara, fa iro fo tsy ampy angovo han̈anovan̈a raha jiaby tiandro. Misy koa olo mandimby iro tia ten̈a ndreky tsy mijery olo. Fa Jesosy Panjakany Fanjakan̈any Zan̈ahary io tsy hidimbiasanolo foeky, fotony ‘fanjakan̈a natsangany Zan̈ahary io tsy ho ravan̈a foeky.’ (Daniela 2:44) Jesosy hanjaka amy tany jiaby. Izy tsy han̈avakavaka olo. Izy tia olo, tsara fan̈ahy, man̈ano ny rariny. Izy hampianatra olo hifankatia, ho tsara fan̈ahy ndreky han̈ano ny rariny.—Vakia Isaia 11:9.
ALEVA ONON̈O
Diniha nan̈ino Fanjakan̈any Zan̈ahary tsaratsara tozay fanjakan̈anolombelon̈o.
4. Fanjakan̈a mahery hanjaka amy tany jiaby
Jesosy Kristy mahery mandilatra olo jiaby nanjaka letrizay. Vakia Matio 28:18, avio iaraha dinihin̈y fan̈ontanian̈a ty:
Nan̈ino Fanjakan̈any Zan̈ahary tsaratsarany fanjakan̈anolombelon̈o?
Panjaka olombelon̈o misolosolo, avio tsy antany jiaby iro manjaka. Karakory fo Fanjakan̈any Zan̈ahary? Vakia Daniela 7:14, avio iaraha dinihin̈y fan̈ontanian̈a aby ty:
Ino mahatsara Fanjakan̈any Zan̈ahary io “tsy ho ravan̈a”?
Ino mahatsara izio hanjaka amy tany jiaby?
5. Fanjakan̈anolombelon̈o tsy maintsy hisoloan̈a Fanjakan̈any Zan̈ahary
Nan̈ino ma fanjakan̈anolombelon̈o tsy maintsy hisoloan̈a Fanjakan̈any Zan̈ahary? Alifasa VIDEO io, avio iaraha dinihin̈y fan̈ontanian̈a ambany io.
Ino vokatrany fanjakan̈anolombelon̈o?
Vakia Mpitoriteny 8:9, avio iaraha dinihin̈y fan̈ontanian̈a aby ty:
Izikoa fanjakan̈anolo hisoloan̈a Fanjakan̈any Zan̈ahary, akory fahitanao izy? Nan̈ino?
6. Iro hanjaka amy Fanjakan̈any Zan̈ahary io mahay raha mahazo atsika
Jesosy Panjakantsika io efa navy olombelon̈o, ke izy “mahinakinaka atsika amy fahalimian̈antsika.” (Hebreo 4:15) Jehovah nifidy olo 144 000 hanjaka miaraka amy Jesosy. Iro io lelahy ndreky man̈angy tsy nivadiky tamy Jehovah. Iro io baka amy “foko ndreky fivolan̈ana ndreky vahoaka ndreky firenena.”—Apokalypsy 5:9.
Tianao Jesosy ndreky iro hiaraka hanjaka aminany mahay tsarabe raha mahazo atsika? Nan̈ino?
Jehovah nifidy lelahy ndreky man̈angy isankarazany hiaraka hanjaka amy Jesosy
7. Tsara mandilatra lalàn̈any fanjakan̈anolombelon̈o lalàn̈any Fanjakan̈any Zan̈ahary
Fanjakan̈anolombelon̈o man̈ano lalàn̈a maro hahatsara vahoaka ndreky hiaro iro. Fanjakan̈any Zan̈ahary koa manan̈a lalàn̈a tsy maintsy harehany vahoakanizio. Vakia 1 Korintianina 6:9-11, avio iaraha dinihin̈y fan̈ontanian̈a aby ty:
Fahitanao izy, han̈ano karakory fiain̈ana, izikoa olo jiaby man̈araka lalàn̈any Zan̈ahary momba fitondranten̈a?a
Fahitanao izy, amy rariny ma Jehovah koa mitaky vahoakanany han̈araka lalàn̈anany? Nan̈ino?
Aia aminy andininy io mivolan̈a fa olo tsy man̈araka lalàn̈a aby io mbala mety miova?—Zahava andininy 11.
Fanjakan̈anolombelon̈o man̈ano lalàn̈a hiarovan̈a ndreky hahatsara vahoakandro. Mbala tsaratsaranizen̈y niny Fanjakan̈any Zan̈ahary
IZIKOA MISY OLO MAN̈ONTANY ANAO: “Fanjakan̈any Zan̈ahary io ma tsy raha an̈aty fônolo?”
Akory hoanao?
INO RAHA NIANARANAO TATO?
Ten̈a fanjakan̈a ankitin̈y Fanjakan̈any Zan̈ahary io, ke baka andan̈itry an̈y izio hanjaka amy tany jiaby.
Fan̈ontanian̈a Fameren̈ana
Azovy aby hanjaka amy Fanjakan̈any Zan̈ahary?
Ino tsy mampiran̈a Fanjakan̈any Zan̈ahary amy fanjakan̈anolombelon̈o?
Ino aby raha tadiaviny Jehovah amy vahoakany Fanjakan̈a io?
ZAHAVA
Jesosy nampianatra aia misy Fanjakan̈a io. Zahava raha nampianariny io.
“Fanjakan̈any Zan̈ahary ma An̈aty Fonao Ao?” (Lahatsoratra aminy Internet)
Nan̈ino ma Vavolombelon̈o Jehovah mifidy tsy hivadiky amy Fanjakan̈any Zan̈ahary fa tsy amy fanjakan̈anolombelon̈o?
Diniha raha koran̈iny Baiboly momba iro 144 000 nifidiny Jehovah hiaraka hanjaka amy Jesosy.
Ino nahavy man̈angy araiky tamy prizon tan̈y resy lahatra fa Fanjakan̈any Zan̈ahary fo hampisy ny rariny?
“Akory Nahaizako Antony Isiany Raha Tsy Rariny?” (Mifohaza! Novambra 2011)
a Sasany amindro lalàn̈a aby io hidinihin̈y amy Fizaran̈a 3.
-
-
Fanjakan̈any Zan̈ahary io Izioty Efa Mitondra!Mankafiza Fiain̈ana Tsisy Farany!—Fianaran̈a Baiboly
-
-
LESON 32
Fanjakan̈any Zan̈ahary io Izioty Efa Mitondra!
Efa nikomansy nanjaka tandan̈itry tan̈y Fanjakan̈any Zan̈ahary, tamy taon̈o 1914. Nikomansy tamy zen̈y koa farany andra anjakanolombelon̈o. Ino ahaizantsika zen̈y? Diniha faminanian̈a amy Baiboly ndreky raha mandalo erantany, avio toetrinolo, nanomboko taminy 1914 io.
1. Ino ma raha efa nambarany Baiboly?
Haintsika baka amy bokiny Daniela fa Fanjakan̈any Zan̈ahary io nanomboko nanjaka, tamy farany fotoan̈a koran̈iny “fepotoan̈a fito.” (Daniela 4:16, 17) Taon̈o maro tafaranizen̈y, Jesosy nivolan̈a izio “fotoan̈a voatondro nindro firenena hafa aby io.” Fa izy nivolan̈a fa izio tsendriky tapitry. (Lioka 21:24) Mbala ho hitantsika fa tapitry taminy 1914 fepotoan̈a fito io.
2. Ino aby raha nandalo erantany, avio karakory toetrinolo maro nanomboko taminy 1914?
Iro pianatrany Jesosy aby io nan̈ontany izy: “Karakory hahaizan̈a fan̈atrehanao ndreky farany rafitry donia ty?” (Matio 24:3) Jesosy nivolan̈a tamindro raha maro hiboaka, afara heliny izy mikomansy manjaka andan̈itry an̈y amy Fanjakan̈any Zan̈ahary. An̈atinizen̈y lagera, mosary, ndreky horohorontany. (Matio 24:7) Baiboly koa efa nan̈ambara fa hahairatsy toetrinolo aminy “andra farany”, ke fiain̈ana ho ‘sarotro tsy mora iain̈ana.’ (2 Timoty 3:1-5) Karaha zen̈y tsarabe raha misy ndreky toetrinolo, rango taminy 1914.
3. Nan̈ino ma nahairatsy fo fiain̈ana erantany, Fanjakan̈any Zan̈ahary koa fa komansy nitondra?
Tsy ela tafarany nazahoany Jesosy fanjakan̈a, izy niady tamy Satana ndreky iro demony aby io tandan̈itry tan̈y. Resy Satana. Baiboly mivolan̈a fa ‘Satana natsipy mare tamy tany, baka io anjelinany aby io koa natsipy niaraka taminany.’ (Apokalypsy 12:9, 10, 12) Meloko mare Satana, fotony hainy fa efa hely tavela, Jesosy handripaka izy. Ke Satana fo tompinandraikitry amy jaly jiaby erantany io. Zen̈y mahavy fiain̈ana erantany mahairatsy fo! Fanjakan̈any Zan̈ahary hamaha problemo jiaby io.
ALEVA ONON̈O
Diniha akory ahaizan̈a fa taminy 1914 Fanjakan̈any Zan̈ahary io komansy nitondra, avio tokony handrisiky atsika han̈ino raha zen̈y?
4. Konty miorin̈y amy Baiboly man̈aboaka 1914
Zan̈ahary nampan̈inofy Panjaka Nebokadnezara. Izy panjakany Babylony taloha tan̈y. Misy dikany amy raha mbala ho avy nofy io. Amy Baiboly ao ahitantsika nofy io ndreky fan̈azavany Daniela izio. Ke mazava tsarabe fa nofy io mikoran̈a momba fanjakan̈any Nebokadnezara ndreky Fanjakan̈any Zan̈ahary koa.—Vakia Daniela 4:17.a
Vakia Daniela 4:20-26, avio ampiasà tablo io anao koa fa mamaly fan̈ontanian̈a aby ty:
A) Nahita ino Nebokadnezara taminizy nan̈inofy io?—Zahava andininy 20 ndreky 21.
B) Hatao karakory kakazo io?—Zahava andininy 23.
D) Ino raha hiboaka amy farany “fepotoan̈a fito” io?—Zahava andininy 26.
Ino Ifandraisany Kakazo Tamy Nofy io amy Fanjakan̈any Zan̈ahary?
FAMINANIAN̈A (Daniela 4:20-36)
Fanjakan̈a
A) Vodiny kakazo maventy
Natsahatra antsendriky fanjakan̈a
B) ‘Nitapahan̈a kakazo io,’ avio nambela firaka tapitry “fepotoan̈a fito”
Nampody ndraiky fanjakan̈a
D) “Hampody aminao ndraiky koa fanjakan̈anao”
Tamy faminanian̈a io tanteraka voanalohany...
E) Azovy ma kakazo io?—Zahava andininy 22.
F) Ombian̈a fanjakan̈anany natsahatra antsendriky?—Vakia Daniela 4:29-33.
G) Nan̈ano karakory Nebokadnezara koa fa tapitry “fepotoan̈a fito”?—Vakia Daniela 4:34-36.
TANTERAKA VOANALOHANY
Fanjakan̈a
E) Nebokadnezara, Panjakany Babylony
Natsahatra antsendriky fanjakan̈a
F) Tafarany 606 Talohany Kristy, Nebokadnezara nanjary very jery ke tsy nahavita nanjaka tan̈atiny fito taon̈o
Nampody ndraiky fanjakan̈a
G) Janga Nebokadnezara ke nimpody nanjaka ndraiky koa
Amy fahatantirahany faharoe amy faminanian̈a io...
H) Azovy kakazo tiany koran̈iny io?—Vakia 1 Tantara 29:23.
I) Ombian̈a iro nitsahatra nanjaka? Nan̈ino atsika mivolan̈a fa mbala nitsahatra fanjakan̈a io tamy Jesosy tambony tany teto?—Vakia Lioka 21:24.
J) Taminy ombian̈a ndreky taia fanjakan̈a io komansy nanjaka ndraiky koa?
FAHATANTIRAHANY FAHAROE
Fanjakan̈a
H) Iro panjaka israelita misolo ten̈a Fanjakan̈any Zan̈ahary
Natsahatra antsendriky fanjakan̈a
I) Jerosalema niravan̈iny, tsisy taranakany israelita eky nanjaka tan̈atiny 2520 taon̈o
Nampody ndraiky fanjakan̈a
J) Jesosy Panjakany Fanjakan̈any Zan̈ahary komansy nanjaka tandan̈itry tan̈y
Firy taon̈o ma fepotoan̈a fito io?
Raha koran̈iny tapany sasany amy Baiboly ao man̈ampy atsika hahay dikany tapany hafa ao koa. Ohatra, bokiny Apokalypsy mivolan̈a fa fepotoan̈a telo andra sy tapany zen̈y, 1260 andra. (Apokalypsy 12:6, 14) Ampitombosin̈y aroe amy zay fepotoan̈a telo sy tapany io, safe man̈amia 2520 andra. Fa ndraikindraiky, Baiboly koa fa mivolan̈a andra araiky, dikanizen̈y taon̈o araiky raha tiany hambara. (Ezekiela 4:6) Karaha zen̈y fepotoan̈a fito koran̈iny bokiny Daniela io. Izio 2520 taon̈o.
5. Niova fiain̈ana erantany komansy taminy 1914
Jesosy efa nan̈ambara tsialohaloha han̈ano karakory fiain̈ana, afara heliny izy manjary Panjaka. Vakia Lioka 21:9-11, avio iaraha dinihin̈y fan̈ontanian̈a ty:
Ino amy raha jiaby koran̈iny io efa hitanao na ren̈inao izioty?
Apostoly Paoly mikoran̈a toetrinolo aminy andra farany hanjakanolo. Vakia 2 Timoty 3:1-5, avio iaraha dinihin̈y fan̈ontanian̈a ty:
Ino amindro toetry aby io ten̈a hitanao aminolo izioty?
6. Tokony handrisiky atsika han̈ano raha fahaizan̈a fa efa manjaka Fanjakan̈any Zan̈ahary
Vakia Matio 24:3, 14, avio iaraha dinihin̈y fan̈ontanian̈a aby ty:
Ino asa maventy atao izioty, ke ahaizan̈a fa efa manjaka Fanjakan̈any Zan̈ahary io?
Akory mety handraisanao anjara aminy asa io?
Efa mitondra Fanjakan̈any Zan̈ahary io izioty, ke ten̈a efa hely tavela, izio hanjaka amy tany jiaby. Vakia Hebreo 10:24, 25, avio iaraha dinihin̈y fan̈ontanian̈a ty:
‘Hitantsika fa ten̈a efa marikitry andra io’, ke ino raha tokony hataontsika tsiaraikiaraiky?
Izikoa misy raha hainao mety han̈ampy olo na hamonjy fahin̈anandro, ino raha tokony hataonao?
IZIKOA MISY OLO MAN̈ONTANY ANAO: “Nan̈ino ma Vavolombelon̈o Jehovah mivolan̈a fa ten̈a miavaka taon̈o 1914 io?”
Akory ho anao?
INO RAHA NIANARANAO TATO?
Faminanian̈any Baiboly, tantara, ndreky raha misy erantany man̈aporofo fa efa manjaka Fanjakan̈any Zan̈ahary izioty. Aboakantsika fa mino zen̈y atsika, lera atsika mitory momba izio ndreky atsika man̈aton̈o fivoriany fiangonan̈a.
Fan̈ontanian̈a Fameren̈ana
Nisy nino tamy farany fepotoan̈a fito nikoran̈iny bokiny Daniela tsialohaloha?
Nan̈ino anao ten̈a resy lahatra fa komansy nanjaka Fanjakan̈any Zan̈ahary taminy 1914?
Akory han̈aboahanao fa anao mino fa efa mitondra Fanjakan̈any Zan̈ahary io izioty?
ZAHAVA
Zahava raha koran̈indro panoratra tantara ndreky olo hafa koa momba fivoany fiain̈ana komansy taminy 1914.
“Komansy Ombian̈a Ten̈a Niova Fitondranten̈anolo?” (Mifohaza! Avrily 2007)
Vakia tantarany lelahy araiky ahitan̈a fa nisy vokany tamy fiain̈ananany faminanian̈a koran̈iny Matio 24:14.
“Tsisy Raha Tiako Nandilatra Baseball!” (Tilikambo Fiambesan̈a No. 3 2017)
Akory hahaizantsika fa faminanian̈a amy Daniela toko 4 io tanteraka amy Fanjakan̈any Zan̈ahary?
Akory ahaizan̈a fa tapitry taminy 1914 “fepotoan̈a fito” koran̈iny Daniela toko 4?
a Vakia lahatsoratra aroe farany amy “Zahava” amy leson ty ato.
-
-
Ino ma Raha Handeha Hataony Fanjakan̈any Zan̈ahary?Mankafiza Fiain̈ana Tsisy Farany!—Fianaran̈a Baiboly
-
-
LESON 33
Ino ma Raha Handeha Hataony Fanjakan̈any Zan̈ahary?
Efa manjaka Fanjakan̈any Zan̈ahary. Maventy raha hivoanizio ambony tany eto tsy ho ela. Atsika handiniky sasany amy raha maro tsara handeha hataonizio.
1. Akory hataony Fanjakan̈any Zan̈ahary io hampisy fiadanan̈a ndreky ny rariny ambony tany eto?
Jesosy, Panjakany Fanjakan̈any Zan̈ahary io handripaka olo ratsy fan̈ahy ndreky fanjakan̈anolombelon̈o jiaby, aminy ady Aramagedona. (Apokalypsy 16:14, 16) Amy fotoan̈a zen̈y, ho tanteraka ankitin̈y faminanian̈any Baiboly ty: “Teteky io, tsisy olo ratsy fan̈ahy eky.” (Salamo 37:10) Hataony Jesosy azo antoko fa hanjaka fiadan̈ana ndreky ny rariny ambony tany eto amy zen̈y.—Vakia Isaia 11:4.
2. Han̈ano karakory fiain̈ana izikoa tanteraka ambony tany eto sitrapony Zan̈ahary?
Lera Fanjakan̈any Zan̈ahary mitondra, “olo marin̈y handova tany ty, ke hipetraka iô tsisy farany.” (Salamo 37:29) Iritrireta hely baka! Olo marin̈y, tia Jehovah ndreky mifankatia fo hipetraka ambony tany eto! Olo tsy harary, baka io hiain̈y tsisy farany.
3. Ino raha hataony Fanjakan̈any Zan̈ahary, koa fa ripaka olo ratsy fan̈ahy jiaby?
Koa fa ripaka olo ratsy fan̈ahy, Jesosy hanjaka an̈atiny 1 000 taon̈o. Amy zen̈y izy ndreky iro 144 000 hiaraka manjaka aminany io, han̈ampy olombelon̈o ambony tany eto hanjary lavorary. Koa fa tapitry arivo taon̈o io, tany jiaby ho paradisa tsara, feno olo sambatra nahazo hatsaran̈a fotony nan̈araka lalàn̈any Jehovah. Afaranizen̈y, hampodiny Jesosy amy Jehovah Babany fitondrasan̈a. Amy zen̈y, ‘hankamasin̈iny an̈arany’ Jehovah, mandilatrany taloha. (Matio 6:9, 10) Ho hita tsarabe amy zen̈y fa Jehovah ten̈a mahay mitondra ndreky mikarakara olonany. Jehovah handripaka Satana, iro demony aby io, ndreky olo jiaby hifidy tsy han̈eky fitondrasan̈anany. (Apokalypsy 20:7-10) Tsy hisy farany fiain̈ana lavorary hindesiny Fanjakan̈any Zan̈ahary amy zen̈y.
ALEVA ONON̈O
Diniha nan̈ino atsika matoky fa Zan̈ahary hampiasa Fanjakan̈anany han̈atanteraka fampan̈antinan̈any Baiboly momba ny amaray.
4. Fanjakan̈any Zan̈ahary han̈adoso fanjakan̈anolombelon̈o
“Olo nanjaka mare taminolo ke nampiditry jaly tamindro.” (Mpitoriteny 8:9) Jehovah hampiasa Fanjakan̈anany io han̈adosoan̈a raha tsy rariny zen̈y.
Vakia Daniela 2:44 ndreky 2 Tesalonianina 1:6-8, avio iaraha dinihin̈y fan̈ontanian̈a aby ty:
Hataony Jehovah ndreky Jesosy karakory fanjakan̈anolombelon̈o jiaby ndreky olo panohan̈a iro?
Izikoa raha nianaranao momba Jehovah ndreky Jesosy zahan̈a, nan̈ino anao matoky fa iro han̈ano ny rariny?
5. Jesosy io Panjaka ten̈a tsara
Jesosy Panjakany Fanjakan̈any Zan̈ahary io han̈ano raha maro han̈ampian̈a vahoakany Fanjakan̈a io. Alifasa VIDEO io hahitanao fa efa naboakany Jesosy tamy raha nataony fa izy sady man̈iry han̈ampy olo, avio izy koa namiany Zan̈ahary angovo han̈ano zen̈y.
Tamy Jesosy tambony tany teto, efa nan̈ano raha izy hahitan̈a raha mbala hataony Fanjakan̈any Zan̈ahary. Ino aminy hatsaran̈a koran̈iny ambany io ten̈a tianao ho hita? Vakia iro toko sy andininy mifan̈araka amindro hatsaran̈a aby io.
TAMY JESOSY TAMBONY TANY TETO, IZY...
BAKA ANDAN̈ITRY AN̈Y JESOSY...
nahafehy andra ratsy.—Marka 4:36-41.
hampilamin̈y tontolo iain̈ana.—Isaia 35:1, 2.
nan̈ano fahagagan̈a nan̈amia hanin̈y nahavoky olo andrivony.—Matio 14:17-21.
han̈adoso mosary erantany.—Salamo 72:16.
nampahivan̈a olo narary maro.—Lioka 18:35-43.
han̈ano raha hahasalama olo jiaby.—Isaia 33:24.
namelon̈o olo naty.—Lioka 8:49-55.
han̈adoso raha jiaby mahavy fahafatesan̈a.—Apokalypsy 21:3, 4.
6. Hitondra hatsaran̈a maro Fanjakan̈any Zan̈ahary aminy amaray
Ho tanteraka tsarabe eky fikasan̈any Zan̈ahary aminolombelon̈o tamboanalohany tan̈y in̈y. Hiain̈y tsisy farany amy tany paradisa olo amy zen̈y. Alifasa VIDEO io hahitan̈a akory hataony Jehovah hampiasa Jesosy Zanany io han̈atanteraka fikasan̈anany.
Vakia Salamo 145:16, avio iaraha dinihin̈y fan̈ontanian̈a ty:
Akory fahitanao Jehovah ‘han̈amia fahafahampo raha iriny raha jiaby manampahin̈ana’ zen̈y?
MISY OLO MIVOLAN̈A: “Atsika olombelon̈o jiaby koa man̈ano jery araiky, ho vitantsika fo hamaha problemo mahazo atsika io.”
Ino aby problemo ho afakany Fanjakan̈any Zan̈ahary fa tsy afakany fanjakan̈anolombelon̈o?
INO RAHA NIANARANAO TATO?
Fanjakan̈any Zan̈ahary han̈atanteraka fikasan̈any Zan̈ahary. Hivoanizio Paradisa tany jiaby, ke ho feno olo manompo Jehovah mandrakizay.
Fan̈ontanian̈a Fameren̈ana
Akory hataony Fanjakan̈any Zan̈ahary hankamasin̈y an̈aran̈any Jehovah?
Nan̈ino atsika matoky fa Fanjakan̈any Zan̈ahary io han̈atanteraka fampan̈antinan̈any Baiboly?
Amy raha tsara jiaby hataony Fanjakan̈any Zan̈ahary io, ino ten̈a tianao ho hita?
ZAHAVA
Zahava ino ma Aramagedona zen̈y.
“Ino ma Ady Aramagedona Zen̈y?” (Lahatsoratra aminy Internet)
Diniha ino aby raha handalo lera “fahorian̈a be” nikoran̈in’i Jesosy in̈y avy.—Matio 24:21.
“Inona no Atao hoe Fahoriana Lehibe?” (Lahatsoratra amin’ny Internet)
Zahava akory ataony fianakavian̈a araiky misaintsain̈y iro mira efa amy Paradisa.
Zahava tantarany lelahy nanohitry fanjakan̈a taloha ty, titranany ‘Naro Fan̈ontanian̈a Nampijaly Jerinaka.’ Avio zahava akory nataony nahita vahaolan̈a nitadiaviny.
-