LESON 02

Baiboly Mampan̈anten̈a Fiain̈ana Tsara

Atao Mira Sary

Maro olo erantany kivy, miasaloha, ndreky marary foeky azony problemo maro loatra. Asa anao mba efa navy tatranizen̈y? Mety mahatsiaro mijaly anao fotony marary, na naty havan̈a. Mety man̈ontany aby anao: ‘Raha mbala ho hisy ma hasambaran̈a zen̈y?’ Mahafapo valiny koran̈iny Baiboly.

1. Ino vaovao tsara koran̈iny Baiboly?

Baiboly man̈azava antony mahavy tany ty feno problemo. Misy vaovao tsara koa koran̈inizio ao. Tsy hitohy karaha io fo izio, avio izio efa tsy ela ho afaka. Raha zen̈y mety hahavy anao “hanan̈a hoavy tsara ndreky fan̈antinan̈a.” (Vakia Jeremia 29:11, 12.) Man̈amia korazy raha zen̈y, fotony ndray mbala iô problemo, atsika man̈anten̈a fa mbala ho sambatra fo atsika aminy amaray an̈y.

2. Han̈ano karakory fiain̈ana aminy amaray an̈y ho Baiboly?

Baiboly mivolan̈a fa “fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy.” (Vakia Apokalypsy 21:4.) Tsy ho hisy eky raha mampijaly, karaha ataony tsy fanan̈ana, raha tsy amy rariny, aretin̈y ndreky fahafatesan̈a. Baiboly mivolan̈a fa olo amy zen̈y ho velon̈o tsisy farany, amy Paradisa ambony tany eto.

3. Nan̈ino ma atokisan̈a raha koran̈iny Baiboly zen̈y?

Maro olo man̈anten̈a raha tsara, fa iro fo tsy matoky raha zen̈y ho hisy. Tsy karaha zen̈y Baiboly. Hatoky raha koran̈inizio anao izikoa ‘mandiniky tsara Soratra Masin̈y.’ (Asan’ny Apostoly 17:11) Izikoa mitohy fianaranao Baiboly, anao amy zay hahavita hanapakevitry hatoky raha koran̈inizio momba ny amaray.

ALEVA ONON̈O

Diniha fiain̈ana aminy amaray an̈y koran̈iny Baiboly. Zahava fa mahavy olo man̈anten̈a raha tsara Baiboly io.

Sary: Fiain̈ana misy jaly ndreky fiain̈ana tsara koran̈iny Baiboly aminy amaray. Mbala misy sary karaha io koa ambany iô.

4. Baiboly man̈ambara fa atsika ho afaka hiain̈y amy donia tsisy jaly aminy amaray an̈y

Zahava baka fiain̈ana koran̈iny Baiboly ty. Asa aia amindro io ten̈a tianao? Nan̈ino?

Vakia toko sy andininy isaka farany fehezanteny, avio diniha fan̈ontanian̈a aby ty:

Ino raha tsapanao, anao koa fa mamaky andininy io? Hitanao mahatsara lafamìnao ndreky kamaradinao ma mahay raha zen̈y?

Ataova karaha efa amy Paradisa anao:

TSISY EKY...	OLO JIABY...
tomoan̈iny alahelo, olo matoe, ndreky olo hofoaty.—Isaia 25:8.	hahita havany efa velon̈o ambony tany eto.—Jaona 5:28, 29.
olo harary ndreky han̈antsa.—Isaia 33:24; 35:5, 6.	ho salama vatan̈a ndreky ho tanora sady fatatra.—Joba 33:25.
raha tsy amy rariny.—Isaia 32:16, 17.	hanan̈a hanin̈y treka, tran̈o tsara, avio asa mahafapo.—Salamo 72:16; Isaia 65:21, 22.
jaly baka amy lagera.—Salamo 46:9.	hiadan̈a tsarabe.—Salamo 37:11.
olo hahatsiaro raha navoa izy taloha ndreky sovenira ratsy.—Isaia 65:17.	ho velon̈o tsisy farany sady tsy hijaly eky.—Salamo 37:29.

Tsaiky hely marary, avio izy janga injoniny mamany.

Matoelahy mandeha amy bekỳ, nanjary tsaikilelahy mahavoaposy borovety feno legimo.

5. Atokisan̈a raha koran̈iny Baiboly

Maro olo kivy ndreky meloko azony problemo mare loatra. Sasany mifen̈y mare man̈ano raha ialan̈a amy jaly io. Zahava fa raha koran̈iny Baiboly momba ny amaray io efa man̈ampy olo rango izioty. Alifasa VIDEO io, avio iaraha dinihin̈y fan̈ontanian̈a ambany io.

VIDEO: Tiako Hanjaka ny Rariny (4:07)

Sary: Sary amy video ‘Tiako Hanjaka ny Rariny.’ 1. Rafika mbala tanora ndreky olo karazan̈a araiky aminany, mitsongo koton. 2. Rafika ravoravo mare mahita olo samy amy kolerany kanefa mihavan̈a tsarabe, taminizy voanalohany nan̈aton̈o fivoriambe

Ino raha nampijaly jeriny Rafika?
Ndray tsy nafany raha tsy rariny in̈y, akory nan̈ampiany Baiboly izy?

Raha tsara mbala hoavy koran̈iny Baiboly io mahavy atsika tsy ho kivy fa ho ravoravo fo, ndray atsika misy problemo. Vakia Ohabolana 17:22 ndreky Romanina 12:12, avio iaraha dinihin̈y fan̈ontanian̈a aby ty:

Asa hitanao mahatsara fiain̈ananao rango izioty anao mahay fa mbala ho tsara fiain̈ana aminy amaray an̈y? Nan̈ino?

MISY OLO MIVOLAN̈A: “Raha volan̈iny Baiboly zen̈y tsy posibla.”

Nan̈ino anao mila mangala toky tsarabe amy raha zen̈y?

INO RAHA NIANARANAO TATO?

Baiboly mivolan̈a fa ho tsara fiain̈ana aminy amaray. Fahaizantsika zen̈y mampisy korazy atsika ndreky mankatsara fiain̈anantsika rango izioty.

Fan̈ontanian̈a Fameren̈ana

Nan̈ino ma olo mila mahay fikasan̈any Zan̈ahary?
Han̈ano karakory fiain̈ana aminy amaray ho Baiboly?
Nan̈ino ma fahaizanao fiain̈ana mbala ho tsara io man̈ampy anao rango izioty?

Daty nivitany leson ty:

Ataova Ty

Vakia iro andininy aby amy leson ty mikoran̈a fiain̈ana tsara aminy amaray, baka ho hainao tsarabe iro io.

Raha hafa:

Tanjon̈onao hafa koa

ZAHAVA

Diniha fa hahavita hiaritry problemo anao koa mahay fa mbala ho tsara fiain̈ana aminy amaray.

“Akory Hanan̈ana Fan̈antinan̈a?” (Mifohaza! 22 Avrily 2004)

Zahava fa mampisy korazy olo marary lava fahaizan̈a fa mbala ho tsara fiain̈ana aminy amaray.

“Baiboly ma mba Afaka Man̈ampy Olo Marary Lava?” (Lahatsoratra aminy Internet)

Anao koa fa mizaha hira ty, ataova karaha fa amy Paradisa koran̈iny Baiboly in̈y anao ndreky vadinao ndreky zanakanao.

Mba Ataova Antsain̈y (3:37)

Vakia tantarany lelahy araiky tan̈atiny fikambanan̈a nitaky fan̈ovoan̈a taloha, fa nanjary nan̈anten̈a fiain̈ana tsara koran̈iny Baiboly aminy amaray.

‘Efa Tsy An̈aty Jeriko Eky Han̈ova Donia Ty’ (Tilikambo Fiambesan̈a 1 Zie 2013)