LESON 23

Tanjon̈o Mamparavoravo Batisa!

Atao Mira Sary

Jesosy nampianatra fa Kristianin̈y jiaby mila atao batisa. (Vakia Matio 28:19, 20.) Ino marin̈y ma batisa io? Ino raha tokony hataonolo araiky baka ho tatrany tanjon̈o io?

1. Karakory ma fan̈anovan̈a batisa?

“Batisa” io baka amy volan̈a griky, dikanizio “man̈ajibiky” an̈aty rano. Jesosy koa fa natao batisa, izy najibiky tamy Ten̈aranony Jordana, baka io izy ‘naboaka baka tao.’ (Marka 1:9, 10) Karaha zen̈y koa Kristianin̈y marin̈y izioty koa fa atao batisa. Tsy maintsy ajibiky an̈aty rano ain̈inany jiaby.

2. Man̈ambara ino olo araiky izikoa fa atao batisa?

Olo araiky koa atao batisa, zen̈y man̈ambara fa izy efa nanokanten̈a tamy Jehovah Zan̈ahary. Karakory ma manokanten̈a zen̈y? Izio vavaka manokana ataonolo amy Jehovah, han̈ambarany fa izy von̈ono hanompo Jehovah mandrakizay. Izy mampan̈anten̈a hanompo Jehovah zaraiky fo ndreky han̈ano sitrapony Jehovah alohany raha jiaby amy fiain̈ananany. Izy koa nifidy han̈araka fampianarany Jesosy ndreky ohatranany, ke ‘han̈araka Jesosy ndreky tsy han̈eky ain̈inany.’ (Matio 16:24) Fanokan̈anten̈anany ndreky batisa io han̈ampy izy hanjary kamaradiny Jehovah ndreky hifandray tsara aminolo manompo Jehovah.

3. Ino raha tokony hataonolo araiky alohanizy hatao batisa?

Mila mianatra raha momba Jehovah ndreky mampitombo finoan̈a izy antsendriky anao, alohany anao hatao batisa. (Vakia Hebreo 11:6.) Izikoa mitombo fahaizanao Jehovah ndreky finoan̈anao, hitombo koa fitiavanao izy. Raha zen̈y koa hahavy anao han̈iry hitory ndreky hiain̈y mifan̈araka amy fitsipikinany. (2 Timoty 4:2; 1 Jaona 5:3) Anao koa fa mandeha ‘mendriky Jehovah baka hamparavoravo izy tsarabe’, anao mety hanapakevitry hanokanten̈a amy Zan̈ahary ndreky han̈ano batisa.—Kolosianina 1:9, 10.a

ALEVA ONON̈O

Zahava ino raha ianarantsika baka amy batisany Jesosy, avio akory hiomanan̈a amy dingana maventy io.

4. Ino ma raha ianarantsika baka amy batisany Jesosy?

Vakia Matio 3:13-17 ahitanao raha maro momba batisany Jesosy. Avio iaraha dinihin̈y fan̈ontanian̈a aby ty:

Mbala zazamena ma Jesosy taminizy natao batisa in̈y?
Batisany Jesosy ma batisa fafy rano? Karakory fo nan̈anovan̈a batisa izy?

Jesosy koa fa vita batisa, nisy asa maventy nampan̈anoviny Zan̈ahary izy. Vakia Lioka 3:21-23 ndreky Jaona 6:38, avio iaraha dinihin̈y fan̈ontanian̈a ty:

Jesosy koa fa vita batisa, ino asa nataony voalohantoeran̈a tamy fiain̈ananany?

5. Batisa io tanjon̈o mamparavoravo

Fanokan̈anten̈a ndreky batisa io mety hampavozo amy voanalohany. Fa anao koa mifen̈y man̈ano fandrosoan̈a fo, anao hanjary ho von̈ono fo han̈ano fanapahankevitry maventy io. Izikoa tianao hita olo nan̈ano karaha zen̈y, alifasa VIDEO io.

VIDEO: Ankafatara Fihavan̈anao amy Jehovah (1:11)

Vakia Jaona 17:3 ndreky Jakoba 1:5, avio iaraha dinihin̈y fan̈ontanian̈a ty:

Ino raha mety han̈ampy olo araiky ho von̈ono amy batisa?

A. Man̈angy araiky mivavaka manokanten̈a amy Zan̈ahary.

B. Mbala man̈angy in̈y fo atao batisa an̈aty rano ke loso Vavolombelon̈o Jehovah.

Atsika koa fa manokanten̈a amy Jehovah, atsika mivolan̈a aminany fa von̈ono hanompo izy mandrakizay
Batisantsika io man̈aboaka aminolo fa atsika efa nanokanten̈a tamy Zan̈ahary

6. Olo araiky koa vita batisa, izy manjary an̈isany fianakavian̈any Jehovah

Olo araiky koa vita batisa, manjary an̈isany fianakavian̈a miray sain̈y, erantany. Mitovy fo raha inoanay ndreky fitsipiky arahinay, nata zahay samy amy tany faviany ndreky tsy mitovy kolontsain̈y. Vakia Salamo 25:14 ndreky 1 Petera 2:17, avio iaraha dinihin̈y fan̈ontanian̈a ty:

Nan̈ino batisa io misy vokany amy fifandraisanolo araiky amy Jehovah ndreky aminolo hafa manompo Jehovah?

Sary: Ranabavy araiky vita batisa ravoravo mieritreritry fifandraisan̈anany tsara miaraka amy fiangonan̈a. 1. Ranabavy araiky man̈ambara raha an̈aty fonany amy ranabavy araiky. 2. Izy mitantan̈a ranabavy efa matoe. 3. Izy miaraka mihina aminolo samy amy taon̈onany. 4. Izy miaraka amy ranabavy araiky mitory amy lelahy araiky. 5. Izy man̈ano selfy miaraka amy ranabavy aroe samy amy tany faviany.

MISY OLO MIVOLAN̈A: “Zaho mbala tsendriky von̈ono hatao batisa.”

Izikoa zen̈y raha tsapanao, asa mbala tokony hataonao tanjon̈o fo batisa io?

INO RAHA NIANARANAO TATO?

Jesosy nampianatra fa Kristianin̈y mila hatao batisa. Fa alohany olo araiky hatao batisa, izy mila mankafatatra finoany Jehovah, miain̈y mifan̈araka amy fitsipikinany, avio manokanten̈a aminany.

Fan̈ontanian̈a Fameren̈ana

Karakory ma fan̈anovan̈a batisa, avio nan̈ino ma izio raha ten̈a maventy?
Ino ifandraisany fanokan̈anten̈a ndreky batisa?
Ino aby raha mila hataonolo araiky, zay izy vo mety hatao batisa?

Daty nivitany leson ty:

Ataova Ty

Zahava listy amy farany Fizaran̈a 4, “Efa Mety Mitory Miaraka amy Fiangonan̈a ma Zaho?” avio “Zaho ma Efa Mety Hatao Batisa?” hahitanao ino raha mbala mila ifen̈anao.

Raha hafa:

Tanjon̈onao hafa koa

ZAHAVA

Zahava ato ino marin̈y ma batisa io.

“Ino ma Batisa Zen̈y?” (Lahatsoratra aminy Internet)

Zahava ndraiky koa ino aby raha ataonolo araiky alohany izy hatao batisa.

“Fitiavan̈a Jehovah Mahavy Olo Araiky Tihan̈ano Batisa” (Tilikambo Fiambesan̈a Marsy 2020)

Vakia ato fa fanapahankevitriny lelahy araiky nan̈ano batisa io tsy raha sendra nandalo fo fa mandilatra zen̈y.

“Tiandro Zaho Tompiny Mahatsapa fa Nahita ny Marin̈y”(Tilikambo Fiambesan̈a 1 Fevrie 2013)

Zahava koa fa batisa io tanjon̈o ten̈a mamparavoravo, baka io akory hioman̈anao amizio.

“Tokony Hatao Batisa ma Zaho?” (Fan̈ontanian̈any Tanora—Valiny Pare Tsarabe, Boky Faha-2, toko 37)

a Nata olo araiky efa natao batisa tamy fivavahan̈a hafa, izy mbala mila atao batisa fo. Fotony nan̈ino? Fotony fivavahan̈a nisy izy taloha tsy nampianatra ny marin̈y baka amy Baiboly.—Zahava Asan’ny Apostoly 19:1-5 ndreky Leson 13.