Tokony ho Karakory Fomba Fiheverany Kristianin̈y Resaka Toaka?

Tsy mitovy hevitrinolo momba toaka, erantany. Sasany tia migiagiaka, izikoa fa miaraka amy kamarady. Sasany ndraiky mifidy tsy higiaka toaka foeky. Misy koa olo tsy voly migiaka izikoa tsy mamo. Karakory fo raha koran̈iny Baiboly momba toaka?

1. Fady ma migiaka toaka?

Baiboly tsy mivolan̈a fady migiaka toaka. Na izy aby, koa fa mikoran̈a iro kadô namezany Zan̈ahary atsika, izio mivolan̈a fa “divain io mahavy fony zanakolombelon̈o ho ravoravo.” (Salamo 104:14, 15) Sasany amindro lelahy ndreky man̈angy tsy nivadiky koran̈iny Baiboly ao koa nigiaka.​—1 Timoty 5:23.

2. Ino torohevitriny Baiboly aminolo mifidy higiaka toaka?

Tsy tiany Jehovah olo migiaka toaka be ndreky olo mamolava. (Galatianina 5:21) Baiboly mivolan̈a: “Irarian̈a anao tsy ho an̈isanolo pigiaka divain dila loatra.” (Ohabolana 23:20) Ke izikoa atsika mifidy higiaka, na atsika zaraiky fo, atsika tsy tokony higiaka be, fotony atsika tsy hisain̈y tsara, tsy hahafehy raha volan̈intsika na ataontsika, na mety harary foeky. Izikoa atsika tsy mahay erany amy figiahantoaka, sitrany atsika tsy migiaka foeky.

3. Akory fomba han̈ajantsika fanapahankevitrinolo amy resaka toaka?

Anjarany tsiaraikiaraiky manapakevitry higiaka sa tsy higiaka toaka. Izikoa misy olo migiaka toaka aminy antonony, atsika tsy tokony hitsara izy. Avio izikoa misy olo manapakevitry fa tsy higiaka, atsika tsy tokony hiforse izy higiaka. (Romanina 14:10) Izikoa misy olo tsy mahadin̈y mahita olo migiaka, sitrany atsika tsy migiaka ankilanany. (Vakia Romanina 14:21.) ‘Tsy raha mahatsara atsika fo fa raha mahatsara namantsika koa’ zahavantsika.​—Vakia 1 Korintianina 10:23, 24.

ALEVA ONON̈O

4. Akory hataonao hanapakevitry higiaka sa tsy higiaka?

Akory hevitriny Jesosy momba figiahantoaka? Mba hahaizantsika zen̈y, diniha fahagagan̈a voanalohany nataony. Vakia Jaona 2:1-11, avio iaraha dinihin̈y fan̈ontanian̈a aby ty:

• Izikoa fahagagan̈a io zahan̈a, karakory fahitany Jesosy toaka ndreky olo migiaka izio?

• Jesosy tsy nanakana olo higiaka toaka, ke tokony ho karakory fahitany Kristianin̈y olo araiky mifidy higiaka toaka?

Kristianin̈y nata tsy fady toaka, zen̈y tsy midika fa tokony higiaka fo izy isaka mahita toaka. Vakia Ohabolana 22:3, avio diniha ino tsy mahatsara anao migiaka toaka izikoa:

• Anao hitondra tomobily na hampiasa lamasiny.

• Anao olo mavesatra.

• Anao fa nivolan̈iny dokotera fa fady toaka.

• Anao tsy mahafehy ten̈a amy toaka.

• Tsy imboany lalàn̈a olo migiaka toaka.

• Miaraka aminolo efa voly toaka, fotony izy efa nisy problemo tamizio taloha tan̈y.

Tokony han̈isy toaka ma anaro amy mariazinaro na amy fiarahan̈a ataonaro? Izikoa tianaro hay akory hangalan̈a desizion, alifasa VIDEO io.

VIDEO: Tokony Han̈isy Toaka ma Zaho? (2:41)

Vakia Romanina 13:13 ndreky 1 Korintianina 10:31, 32. Isaka baka mamaky andininy anaro, iaraha dinihin̈y fan̈ontanian̈a ty:

• Nan̈ino fan̈arahan̈a toro lalan̈a io han̈ampy anao hangala fanapahankevitry mamparavoravo Jehovah?

5. Diniha sandra karakory erany antonony aminao

Anao koa fa hanapakevitry higiaka toaka, iritrireta ty: Marin̈y fa Jehovah tsy misakana atsika higiaka toaka, kanefa izy mivolan̈a fa ratsy izikoa migiaka be loatra. Fotony nan̈ino? Vakia Hosea 4:11, 18, avio iaraha dinihin̈y fan̈ontanian̈a ty:

• Ino raha mety handalo izikoa migiaka toaka be loatra olo araiky?

Ino raha han̈ampy atsika tsy higiaka toaka be loatra? Atsika mila mahay mandanjalanja na mila mahay erany toaka higiahintsika. Vakia Ohabolana 11:2, avio iaraha dinihin̈y fan̈ontanian̈a ty:

• Nan̈ino ten̈a tsara man̈isy eran̈a toaka higiahinao?

6. Akory hivolezan̈a amy toaka?

VIDEO: “Tsy Tiako Foeky Fiain̈ananaka Taloha” (6:32)

• Tamy video tio in̈y, karakory nataony Dmitry izy koa fa namo?

• Izy koa ma fa niala toaka, direkty fa nafaka edy?

• Akory nataony baka izy voly toaka?

Vakia 1 Korintianina 6:10, 11, avio iaraha dinihin̈y fan̈ontanian̈a aby ty:

• Ino ma ten̈a maharatsy olo mamolava?

• Ino ahaizantsika fa olo navy namolava taloha mbala afaka miova?

Vakia Matio 5:30, avio iaraha dinihin̈y fan̈ontanian̈a ty:

• Jesosy iô tsy mivolan̈a fa tan̈ana mila tapahan̈a, fa dikanizio, mila tapakevitry olo araiky izikoa fa han̈ano raha mamparavoravo Jehovah. Ke karakory tokony hataonao, izikoa anao izioty tihiala amy toaka?a

Vakia 1 Korintianina 15:33, avio iaraha dinihin̈y fan̈ontanian̈a ty:

• Izikoa kamaradinao mamolava, mety han̈ano karakory koa anao?

INO RAHA NIANARANAO TATO?

Nan̈anovany Jehovah toaka io hamparavoravo atsika, fa izy tsy man̈omba atsika migiaka be ndreky mamo.

Fan̈ontanian̈a Fameren̈ana

• Ino raha volan̈iny Baiboly momba toaka?

• Ino aby maharatsy migiaka be loatra?

• Izikoa misy olo higiaka na tsy higiaka, akory han̈ajantsika fanapahankevitrinany?

ZAHAVA

Akory ataony tanora aby io han̈ano safidy tsara izikoa amy resaka toaka?

Mitandritandrema Fo amy Toaka! (2:31)

Zahava akory tokony hataonao, baka anao tsy ho azony problemony figiahan̈a.

“Mahaiza Mandanjalanja amy Figiahan̈a Toaka” (Tilikambo Fiambesan̈a 1 Zanvie 2010)

Mety amy Kristianin̈y ma mifampikon̈o vera koa fa higiaka?

“Fan̈ontanian̈any Pamaky” (Tilikambo Fiambesan̈a 15 Fevrie 2007)

Zahava amy tantarany lelahy araiky ty akory nataony niala tamy fahazaran̈a migiaka be, titranany “Zaho Taloha Karaha fa Damozana In̈y.”

“Man̈ova Olo Baiboly” (Tilikambo Fiambesan̈a 1 May 2012)