Fan̈ontanian̈any Pamaky

Tamy Davida nanoratra volan̈a aby amy Salamo 61:8, izy nivolan̈a fa izy hidera an̈aran̈any Zan̈ahary “mandrakizay.” Zen̈y ma midika fa izy nieritreritry tsy hofoaty?

Ehe. Fa ndray zen̈y, marin̈y tsarabe raha nisoratiny Davida io.

Diniha baka raha nisoratiny aminy andininy io ndreky aminy andininy miramiran̈a aminio. Hoizy: “Zaho han̈ano hira hideran̈a an̈aranao mandrakizay, sady han̈efa isanandra iro voady nataoko.” ‘Midera anao amy fonaka jiaby zaho, Jehovah Zan̈aharinaka e! Han̈amia voninahitry an̈aranao zaho mandrakizay.’ ‘Zaho hidera an̈aranao mandrakizay mandrakizay.’​—Sal. 61:8; 86:12; 145:1, 2.

Tamy Davida nanoratra volan̈a aby io, izy tsy nieritreritry fa izy tsy hofoaty foeky. Hainy fa Jehovah efa nivolan̈a fa olombelon̈o tsy maintsy hofoaty fotony nanota. Davida nan̈eky tsara fa izy panota. (Gen. 3:3, 17-19; Sal. 51:4, 5) Hainy koa fa naty aby firaka taminolo nankasitrahiny Zan̈ahary, karaha ataony Abrahama, Isaka, avio Jakoba. Hainy Davida koa fa izy mbala hofoaty. (Sal. 37:25; 39:4) Volan̈a aby amy Salamo 61:8 io ahitan̈a fa Davida nan̈iry sady tapakevitry hidera Zan̈ahary, mandrakizay. Dikanizen̈y, taminy andra jiaby niain̈any.​—2 Sam. 7:12.

Ndraikindraiky Davida nitantara raha nandalo tamy fiain̈ananany. Ahitan̈a zen̈y ziô amy fampidiran̈a Salamo faha-​18, 51, avio faha-52. Amy Salamo faha-​23, Jehovah nampiran̈iny Davida amy piambin̈y ondrikondriky man̈amia taridalan̈a, mamelombelon̈o, avio miaro ondrikondrikinany. Piambin̈y ondrikondriky karaha zen̈y koa Davida. Zen̈y nahavy izy nan̈iry hanompo Zan̈ahary ‘aminy andra jiaby iain̈any.’​—Sal. 23:6.

Aza adin̈a koa fa Jehovah nan̈iraka Davida nanoratra raha jiaby nisoratiny, ke an̈isany zen̈y faminanian̈a ho tanteraka afara be atỳ. Nanoratra, ohatra, Davida amy Salamo faha-​110, fa ho avy fotoan̈a, Tomponany ‘hipetraka ankavanan̈any Zan̈ahary’ andan̈itry an̈y sady hahazo fahifan̈a be. Handeha han̈anaovan̈a ino? Hindesiny handresy fahavalony Zan̈ahary ndreky ‘hampiharan̈a didipitsaran̈a amindro firenena’ ambony tany eto. Mesia izy tiany koran̈iny io. Davida an̈isany razambeny Mesia. Izio hanjaka baka andan̈itry an̈y sady hanjary ‘pisoron̈o mandrakizay.’ (Sal. 110:1-6) Nivolan̈a Jesosy fa mikoran̈a momba izy sady mbala ho tanteraka aminy afara an̈y faminanian̈a amy Salamo faha-​110 io.​—Mat. 22:41-45.

Jehovah nan̈iraka Davida nanoratra raha nisy taminy andranany. Mbala ho tanteraka aminy amaray koa raha nisoratiny aby io, lera izy hatsangana amy maty ke ho afaka hidera Jehovah mandrakizay. Dikanizen̈y, Salamo 37:10, 11, 29 io mikoran̈a raha niain̈any Israelita, tamy fotoan̈a nanoratan̈a izio. Avio izio mbala ho tanteraka koa aminy hoavy, lera Zan̈ahary han̈atanteraka fikasan̈anany.​—Zahava fehintsoratra 8 amy lahatsoratra “Anao Hiaraka Aminaka amy Paradisa” amy gazety ty ato.

Ke Salamo 61:8 ndreky iro andininy miramiran̈a amy zen̈y man̈aboaka fa Davida nan̈iry hidera Jehovah firaka izy naty, taminy andrany Israely taloha tan̈y. Andininy aby io koa man̈aboaka raha handeha hataony Davida lera Jehovah himpody hamelon̈o izy.