Tôkony ho Vôly Hitondra Tomabily ma Zaho?

EFA am-polony taon̈o anao nitondra tomabily. Ravoravo anao manan̈a tomabily ninao tômpiny ke mandeha amy zay tany tianao. Fa havanao ndreky kamaradinao miasaloha aminao ndreky mizaha raha mahatsara anao, ke mieritreritry irô fa anao efa tsy tôkony hitondra tomabily eky. Tsy mazava aminao foeky nan̈ino anao ataondrô zen̈y.

Asa mahazo riban-tran̈onao raha zen̈y? Izikoa ia, akôry hahaizanao fa anao mbala tôkony hanohy hitondra tomabily?

Amy tany sasany, izikoa misy olo mahazoazo taon̈o ke mbala tihitondra tomabily, izy mila mahazo taratasy baka amy dokotera, mankamarin̈y fa izy mbala afaka mitondra. Mila man̈araka lalàn̈a zen̈y koa Kristianin̈y mipetraka amy tany karaha zen̈y. (Rom. 13:1) Fa ndray aia tany misy anao, misy soso-kevitry ty hahaizanao asa mbala tôkony hitondra tomabily anao.

DINIHA FOMBA FITONDRASANAO TOMABILY

Misy fikambanan̈a araiky mikarakara olo matoe a Etazonỳ an̈y mivolan̈a fa irô tôkony hamaly fan̈ontanian̈a aby ty:

Tsy hitako tsara ma panneau de signalisation aviô masonaka ma tsy mahita tsara koa fa alin̈y?
Mbala vitako ma man̈otaka lohanaka mizaha rétroviseur ndreky angle mort?
Zaho ma mbala mavitriky, ke mahavita mamindra malaky vitinaka, baka amin’ny accélérateur mandia frein?
Mandeha mora loatra ma zaho ke man̈elingelin̈y fandihanan’ny tomabily sasany?
Efa natetiky tseky nan̈ano aksidan ma zaho, na nakiakiaka ma tomabilinaka fôtony zaho matetiky kon̈o raha?
Nisakanan’ny polisy ma zaho fôtony tsy nety fomba fitondrasako tomabily?
Zaho ma efa navy tafandry am-pitondrasan̈a tomabily?
Zaho ma mihina aody tsy mety amin’olo mitondra tomabily?
Efa misy havako na kamaradiko ma niasaloha tamy fomba fitondrasako tomabily?

Izikoa ia valin’ny araiky na aroe amindrô fan̈ontanian̈a aby io, dikan’izen̈y anao efa mila man̈ova. Ohatra, mety hahen̈inao fotoan̈a itondrasanao tomabily, intsaka eky izikoa fa alin̈y. Diniha matetitetiky fomba fitondrasanao tomabily. Anao koa mety man̈ontany havanao na kamaradinao hikoran̈a hevitrindrô momba fomba fitondrasanao tomabily. Anao koa mety mimpody mianatra ndraiky akôry atao mitondra tomabily ke tsy han̈isy aksidan. Fa izikoa ndraiky ia aby ankamarozan’ny valin’ny fan̈ontanian̈a aby io, tsaratsara aminao vôly mitondra tomabily.a

AREVA TOROLALAN̈AN’NY BAIBOLY

Atsika mety tsy tontohitry fa efa tsy pare fomba fitondrasantsika tomabily. Aviô mety ho meloko koa atsika izikoa fa volan̈in’olo fa tsy tôkony hitondra tomabily eky. Ke ino torolalan̈an’ny Baiboly han̈ampy anao handiniky tsarabe ndreky han̈ano fanapahan-kevitry tsara? Diniha raha aroe ty.

Mahaiza manetry ten̈a. (Ohab. 11:2) Atsika koa fa mahaimatoe, atsika mahay tsy mahita, tsy maharen̈y, tsy miasa tsara hozatra, aviô efa tsy mavitriky tsara eky. Ohatra, maro olo efa tsy man̈ano spaoro sasany fôtony haindrô fa iro efa mahaimatoe, ke ho mora maratra. Mira zen̈y fo mitondra tomabily io. Ke olo araiky manetry ten̈a vôly mitondra tomabily ho fiarovan̈a ain̈inany. (Ohab. 22:3) Baka iô izikoa misy olo mikoran̈a aminany raha mampiasaloha izy momba izio, izy koa vôn̈ono hitandren̈y.—Ampiràn̈a amy 2 Samoela 21:15-17.

Mitandrema tsao hamono olo. (Deot. 22:8) Olo araiky koa tsy mitandrin̈y mitondra tomabily, izy mety handratra na hamono olo foeky. Mety hamono ten̈a ndreky hamono olo koa olo araiky, izikoa izy efa tsy mahay tsarabe mitondra tomabily. Ke izikoa izy tafan̈ano aksidan, izy tômpin’andraikitry amy fifatesan’olo.

Izikoa sarotro aminao hanapa-kevitry ho vôly hitondra tomabily, aza mieritreritry fa anao efa tsisy raha ilàn̈a anao eky. Jehovah tia anao, aviô izy ravoravo izikoa anao tontohitry amy raha efa tsy vitanao, manetry ten̈a, ndreky mandiniky fahin̈anan’olo. Izy mampan̈anten̈a fa han̈ampy ndreky hankahery anao. (Isaia 46:4) Anao tsy hariany foeky. Ke angataha izy han̈ampy anao hanan̈a fahendrena ndreky hampiasa torolalan̈an’ny Baiboly han̈ampy anao hanapa-kevitry mbala hitondra tomabily sa tôkony efa ho vôly.

Akôry Hataon’olo Hafa Han̈ampy?

Fianakavian̈an’olo matoe io ten̈a tsara mikoran̈a amin’ny havandrô matoe io momba fitondrasany tomabily. Na koa anao mety kamaradin’olo io ke naharen̈y raha koran̈in’olo momba fitondrasany tomabily. Tandrin̈esa tsara volan̈andrô. Anao, ohatra, mety mangataka hiaraka aminany lera izy mitondra tomabily, hizaha fitondrasany izio. Koa ilain̈a, koràn̈a aminany ino problemonany. Anao koa mivolan̈a izy, mipitraha amy plasinany. Ke mahaiza tsara fan̈ahy, kanefa mivolàn̈a ny marin̈y. Aza miasaloha amy taon̈onany, fa fomba fitondrasany tomabily fo ten̈a koran̈a. Aza mivolan̈a aminany “Anao efa tsy mahay mitondra tomabily” fa mivolàn̈a aminany “miasaloha mare zaho aminao, izikoa fa mahita anao mitondra tomabily.” Ampatsiarova izy fitiavany irô torolalan̈an’ny Baiboly avoakoran̈a tamy lahatsoratra ty.

Atsika jiaby tôkony hahay handiniky karakôry raha mety tsapan’olo matoe aby io, irô koa fa mila vôly mitondra tomabily. Izy mety hieritreritry fa izy efa tsy mahaleo ten̈a eky, ke tsy ho libra eky. Akôry mety han̈ampianao irô? Mifen̈a ho tsara fan̈ahy ndreky tia man̈ampy. (Ohab. 17:17) Anao mila mivolan̈a hitondra izy amy tomabily, fa aza miambin̈y izy hivolan̈a aminao, amy zen̈y izy tsy hivolan̈a fa mampijaly olo. Anao, ohatra, mety man̈ano programo hitondra izy amy tany fandihanany, karaha ataony amy fivorian̈a, fanompoan̈a, mivanga raha, na mandeha dokotera. Ataova hitany fa mamparavoravo anao man̈ano zen̈y ndreky mandany fotoan̈a aminany.—Rom. 1:11, 12.

a Izikoa mila fan̈ampin’ny fan̈azavan̈a, zahava lahatsoratra “Voaro Amin’ny Aksidan’ny Tomabily ma Anao?” amy Mifohaza! (fransay), 22 Aoty 2002.