Dílaa-lai Pɔ́ɔ Kɔɔ̂ŋ
1. Gɔlɔi nɛnɛ ɓe kwa pâi pɛlɛi maa-kɔ̂rii Kôrai-toli-kpɔŋ Ɣâla-kɔlɔ Maa-kɔ́riɛ su Ŋweei 19 lɔ́ɔ-kuui su?
1 Ŋweei 19 lɔ́ɔ-kuui su, 2015, kwa pâi pɛlɛi gɔlɔi Imitate Their Faith (Dílaa-lai Pɔ́ɔ Kɔɔ̂ŋ) maa-kɔ̂rii Kôrai-toli-kpɔŋ Ɣâla-kɔlɔ Maa-kɔ́riɛ su. Gɔlɔi ŋí a lonoi é pîlaŋ sinâa da nɛyâa 14 dîa nyii laa-la è kɛ díyêei. Gɔlɔi ŋí pɔ̃yɛ pere a gɛ kú ǹûai tí káa kúkili ŋa pere kwa kɛ mɛni maa-kɔ̂rii é pîlaŋ dîa. A ŋɔ́nɔ kpɔŋ maa tɛɛ kúpɔ kú dí káa a nûa nyii wɔ́lɔ kɛ ɣele ma a tɔ̃yâ, nyaŋ dí tɛɛ mɛni kpɔlu-ŋa su tãi dikɛ Ziova fɛlii lai. Mɛni-kɔɔŋ-maa-ŋa káa ŋɔ́nɔ gɔlɔ ŋí su nyii a kpɔŋ maa tɛɛ kúpɔ sâa kúkɛ-ɣeniɛi su.—Ibulu 6:12.
2. M̀ɛni-ŋai Imitate Their Faith kɔlɔi sui dani lɛ́.
2 Mɛni-ŋai Gɔlɔi ŋí sui: Kóraŋ-ŋa da fotôo-ŋa díkaa gɔlɔ ŋí su nyii a kpɔŋ maa tɛɛ kúpɔ kú tãi da ɓɛ́i ǹûai tí dikɛ la ɣele mai kɔ́lɔŋ. É tee nyíŋi ma, mɛni ta káa gɔlɔi ŋí ŋuŋ-ŋai su tɛ́itɛi nyii da kɛ́ mai, “Íkili ŋa Sia É Pîlaŋ Ma . . . ,” nyii pâi kpɔŋ maa tɛɛi kúpɔ kú kúkili ŋa sia é pîlaŋ m̀ɛni-ŋai ma kwa maa-kɔ̂rii kú dûa kɛ. Mɛni-kɔɔŋ-maa lɛ́lɛɛ-ŋa da fotôo-ŋa díkaa ŋɔ́nɔ gɔlɔ ŋí su nyii-ŋai da kpɔŋ maa tɛɛ kúpɔ kú berei káa kwa pɔri siai la a m̀ɛni ŋí.
3. Lé ɓé kwa pɔri gɛi à gɛ́ɛ gɔlɔi ŋí maa-kɔ́riɛ é kpɔŋ maa tɛɛ kúpɔ?
3 Gɔlɔ Ŋí A Pɔri Kpɔŋ maa Tɛɛi Léŋ Ípɔ? Ǹúu Pɔlɔ-ŋai Kôrai-toli-kpɔŋ Ŋéniɛi Gwaa Kélee Laa-tuɛi dí kúfɔrɔ woo-ŋa pɔ̃yɛ nyii gáa gɔlɔi ŋí kɔ́ɔ pîlanii. Dí mò díyɛɛi: “Gɔlɔi ŋí maa-kɔ́ri a íkili-ŋa-siai da ítáre kélee. Kɔ́ I íkpîŋ kɛ yɛ̂ɛ ǹûai gɔlɔi ŋí a lonoi é pîlaŋ diai, I m̀ɛni-ŋai káa dí gáai. Íkili ŋa sia I bîlaŋ berei ma dí tûa la tãi dikɛ tɛɛi la mɛni-kpɔlu sui da berei iî tûa la è kɛi a yá.” Tɔ̃yâ ma, à gɛ́ɛ kú kúkili ŋa sia m̀ɛni-ŋa tí dîa vé a sɛŋ à gɛ́ɛ kú m̀ɛni-ŋuŋ lɛ́ nyii gɛ dikɛ kɛi, kɛ́lɛ, maa nɛ̂̃ɛi kú mɛni-ŋai tí ŋà káa ma a ǹɛ́lɛɛ gɛ̀ ní, kú diai maloŋ káa dí kɛ a diai. À gɛ́ɛ kú nyíŋi kɛ fɛ́ɛ kú tãi siɣe kú kúkili ŋa sia a nɛ́lɛɛ. (Niɛmaya 8:8) À kɛ̀ m̀ɛni-ŋuŋ maa nɛ̂̃ɛi è lɛɛ nûa kili ŋai kɔ́ɔ é pîlaŋ gɔlɔ-ŋuŋ sámai, gɛ̀ ní, gɔlɔ-ŋá-lɛ́-nuui a pâi mîni tɔnɔ siɣei é lono é pîlaŋ m̀ɛni-ŋai dîa kú maa-kɔ̂rii nɔ́ɔ-kuu pɔlɔi su. À kɛ̀ zɛŋ dakɛ ma “Íkili ŋa Sia É Pîlaŋ Ma . . . ,” fé gɔlɔi m̀ɛi kwa maa-kɔ̂rii su, gɛ̀ ní, gɔlɔ-ŋá-lɛ́-nuui a pɔri kili-too-ŋa marê-kɛɛ tɔnɔ kpaa feerɛ kɛi.
4. Lé mɛni ɓé maa nɛ̂̃ɛi kú gɔlɔi Imitate Their Faith maa-kɔ́ri la?
4 Kúkaa ŋéniɛi su nyii kɔ́i a ɣele kélee à gɛ́ɛ é kúlaa-lai su saai. Gɔlɔi ŋí da m̀ɛni-ŋai The Watchtower sui nyii m̀ɛni-ŋai gɔlɔi ŋí sui pîlaŋɔ mai káa a sɛŋ nyii kula Ziova yêei à gɛ́ɛ é kúlaa-lai su kpanáŋ. (Zĩi 1:17) Kwa kɛ lii Kôrai-toli-kpɔŋ Ɣâla-kɔlɔi Maa-kɔ́riɛ su a tãi kélee kú kɛ m̀arê-kɛɛ-ŋai ta sukula, gɔlɔi ŋí a pâi kpɔŋ maa tɛɛi kúpɔ.