Ŋ̀óo-siɣe-ŋai Vãa Ŋái—Da Kpɔŋ maa Tɛɛ Léŋ Kúpɔ?
1. É tee kúkɔlɔ-ŋai bɔ̃yɛi dîa, lé ɓe ŋɔ́nɔ a pɔri kpɔŋ maa tɛɛi kúpɔ?
1 Nûa támaa da jw.org fãai ŋãa-nɛɛ kula kɔlɔ lónoɔ su dí kɛ dɔ̃yâi ŋá-káa ma a nɛ́lɛɛ. (Ikilisiati 12:10) Kɛ́lɛ, ya íwoli-tɔɔi ŋ̀óo-siɣe-ŋai vãa ŋái dîa? Nyíŋi a gɛ kú kúwoli-tɔɔ mɛni támaa ma kúfãai ŋá. Ŋ̀óo-siɣe-ŋai da pɔri kpɔŋ maa tɛɛi léŋ kúpɔ?
2. Ŋ̀óo-siɣe-ŋai da pɔri kpɔŋ maa tɛɛi léŋ kúpɔ kwa kúkaayɔɔ̂i?
2 Gáa Kúkpîŋ da Kúkáayɔɔ Su-ɓela Mɛni Ma: Kwa pɔri kúwoli-tɔɔ̂i Ŋâla-kɔlɔi, makaziŋ-ŋai, da kúkɔlɔ kpua-kpua-ŋai lóno-wóo-ŋai dîa tãi kwa kɛ liî la kwaa ta ma, sia ma kpaa máŋ kwa kɛ tíi kɛ́i. Nyíŋi a pɔri kpɔŋ maa tɛɛi kúpɔ à gɛ́ɛ kú tíi kɛ a kútãi a nɛ́lɛɛ. (Ifisiɛŋ 5:15, 16) Kwa ŋɔ́nɔ pɔri kúwoli-tɔɔ̂i dîa a kúkaayɔɔ̂i ɣâla-kɔlɔ maa-kɔ́ri tãi. Kwa gɔlɔi lá ɓo ɓɛ́i kwa ŋwɛ̂lii, gɛ̀ ní, kú kúwoli-tɔ́ɔ nóno-wóo ma vãai ŋa. Kwa kɛ kúwoli tɔɔ̂i gɔlɔ lóno-wóo-ŋai ŋí dîa a tãi kwa kɛ́ kúkpîŋ kɔlɔ maa-kɔ̂rii lai, a pâi kpɔŋ maa tɛɛi kúpɔ kú kúkɔlɔ lóno-perei maa-tɛ́ kpaa kwa kɛ sîi-woo takpɛ́ni maa-kɔ̂rii, à gɛ́ɛ kú m̀aa-kɔ́ri a nɛ́lɛɛ.
3. Gbɛ̂ɛ-ni ɓe pɔ̂rii mɛni maa-kɔ̂rii ŋ̀óo-siɣe-ŋai vãai ŋai sârai?
3 Gáa Ŋâla-woo-ɓo Tíi Mɛni ma: Nûa támaa da mò à gɛ́ɛ díkpaaŋɔi, tãi fé díyêei à gɛ́ɛ dí kúkɔlɔ-ŋai lóno kɛ́lɛ, tãi ta, da pɔri díwoli-tɔɔ̂i ŋ̀óo-siɣe-ŋai dîa. Kpaa máŋ kwa sîi-woo takpɛ́ni ɓo-ɓela káa kúɣâla-woo-ɓo tíi su nyii-ŋai da Gâloŋ-laai maa tuŋ mɛni “díkpîŋ sîi-wooi” su, a dílii soŋ. (Dikɛ-mɛni-ŋai 2:6-8) Kwaa-ŋa tani ma, gáa a mɛni kpanáŋ à gɛ́ɛ nûa dí díwoli-tɔɔ díkîe-ni dîa. Gɔɔŋ-maa ɓa, China Lɔii gwaa ta ma, nûa da dílɔii su mɛni-pɔlɔ-ŋa ɓo dílônii dîa a mɛni-pele, nyaŋ m̀ɛni-ŋai ŋí a lɛɛ díkili ŋa é lɛɛ la zu dí mo dílônii dîa. Ǹúu-tɛ́i lɔii dámaa su-ɓela da mɛni maa-kɔ́ri mɛni-pele ɓoɔ sârai.
4. Lé marê-kɛɛ-ŋa ɓe kwa pɔri gɛ́i a kúkpîŋ é pîlaŋ kpɔŋ maa tɛɛ mɛni ma nûa pɔ́ kúɣâla-woo-ɓo kwaai ma?
4 Íɣâla-woo-ɓo kwaa-ŋai ma, I laai la a pâi kɛ́i a mɛni lɛ́lɛɛ à gɛ́ɛ bɛ́rɛ-la-ɓelai dí díwoli-tɔ́ɔ ŋ̀óo-siɣe-ŋai dîa díkpîŋ sîi-wooi su? I laai la núu ta a pɔri mɛni maa-kɔ̂rii ŋ̀óo-siɣe-ŋai vãai ŋai su? I laai la kwa pɔri gɔlɔ-ŋai ta lóno wóo dãanlôo kɛ́i kú dɛɛ bɔ é pɛlɛ m̀aa kɔlɔi tí ma? Kwa kɔlɔ, kɔlɔ-kpua, makaziŋ, kpaa kɔlɔ-kpua-loŋ ta tɛɛ núu ta pɔ́ vãai ŋa, kwa pɔri nónoi yɛ̂ɛ berei gɔlɔ-ŋai kwa dɛɛ nûa pɔ́i, kwa dílóno la. Ŋ̀óo-siɣe-ŋai ŋí da kpɔŋ maa tɛɛ kúpɔ kúkpîŋ kɔlɔ maa-kɔ́ri mɛni ma da dɔ̃yâi lɛ́ mɛni ma nûa dîa.—1 Kɔleŋtiɛŋ 3:6.