“Ka Saa Nuui Lɛ Nyii Ka Pai Kɛi Tii Kɛi Mii”

1. A gɛɛ ku lii-nɛ̃ɛ kpɔɔi sɔlɔ ɓo, le ɓe maa nɛ̃ɛi ku gɛ, nyaŋ le mɛni ma? (Azaya 48:​17, 18)

KUƔALA-TAA Naŋ e ku wɛlini a ŋanaa, nyaŋ a ŋwɛlii a gɛɛ ku kɛ-ɣeniɛ ŋaa-nɛ̃ɛ kula wɔlɔ-wɔlɔ da wɔlɔ-wɔlɔ. (Ik. 3:​12, 13) E ku kpɛtɛ a bere sii nyii kwa pɔri mɛni lɛlɛɛ takpɛni-ŋa kɛi. Kɛlɛ ve ku kpɛtɛ ni a bere sii nyii kwa pɔri kukpiŋ teniŋ tɔɔi. (Ik. 8:9; Zl. 10:23) A gɛɛ ku lii-nɛ̃ɛ kpɔɔi sɔlɔ ɓo, e gɔlɔŋ a gɛɛ maa nɛ̃ɛi ku sia a ŋɔlia-woo-ŋai kukɛ-ɣeniɛi su.—Azaya 48:​17, 18 lono.

2. Le ɓe Setɔŋ a ŋwɛlii ku laa lai, kɛlɛ le ɓe Ziova aa gɛi?

² Setɔŋ a ŋwɛlii ku laa la a gɛɛ nuu-kpune a pɔri kɛ-ɣeniɛ lɛlɛɛ kɛi Ziova ŋɔkɛ-mɛi-laai ŋɛi polu. (Zɛ. 3:​4, 5) A gɛɛ Ziova e Setɔŋ lɛ a lɛɛ-nuu, aa nɛɛ naa a gɛɛ nuu-kpune e gbiŋ teniŋ tɔɔ tãi kpua mɛni ma. Ŋeniɛi kɛ pere aa nɛ a zu ponoɔ a gɛɛ nuu-kpune fa pɔri gbiŋ teniŋ tɔɔi. Kɛlɛ, Ŋala-kɔlɔi laa fɛɛi a mɛni-kɔɔŋ-maa tamaa e pilaŋ nɛyaa da sinaa dia nyii-ŋai lii-nɛ̃ɛ kpɔɔi sɔlɔ ɓo Ziova fɛliɛ su. Zisɛ Korai e kɛ a nuai ti dɔnɔ. Zɛŋ-lɛɛi ŋi su, kwa pai lonoi e pilaŋ mɛni-ŋuŋ-ŋa dia nyii gɛ Zisɛ kɛ mɛni-kpɛtɛɛ kɛ a gɛɛ e Ziova fɛli. Gɛ ni, kwa pai mɛnii kaai nyii gɛ maa nɛ̃ɛi ku kuɣala-taa Naŋ Ziova fɛli mɛni mai. Naa polu ma, kwa pai lonoi e pilaŋ mɛni-ŋuŋ-ŋa dia nyii gɛ kukɛ mɛni-kpɛtɛɛ kɛ a gɛɛ ku Ziova fɛli.

MƐNII GƐ ZISƐ KƐ MƐNI-KPƐTƐƐ KƐ A GƐƐ E ZIOVA FƐLII

3. Le ɓe Setɔŋ e dɛɛ Zisɛ pɔ, nyaŋ mɛni-kpɛtɛɛ kɛɛ leŋ ɓe Zisɛ e gɛi?

³ Zisɛ kɛɛ nɔii mai, maa nɛ̃ɛi kɛ e mɛni-kpɛtɛɛ kɛ a pa nuui ma e kɛ pai vɛlii. Tãi kpua yee mu Zisɛ ŋɔbatai kɛɛ polu ma, Setɔŋ e mo ma a gɛɛ e kɛ pai ŋeniɛi su kaloŋ-laai kelee tɛɛi bɔ a kɛ nɔ a too gɔɔ mu e vɛli. Zisɛ e mo ma nyɛɛi: “Siɣe ŋgɔlɛ, Setɔŋ! Kpɛni fei, bɔ̃yɛɛi, ‘Inuu-namui Ɣala fɛli, I tii kɛ nɔ mi nyaa tɔnɔ.’” (Mf. 4:​8-10) Le mɛni ɓe Zisɛ e mɛni-kpɛtɛɛ ti kɛ lai? Kwaa lono e pilaŋ daŋa dia.

4-5. Le ɓa mɛni-ŋuŋ-ŋai taŋa nyii gɛ Zisɛ kɛ mɛni-kpɛtɛɛ kɛ a gɛɛ e Ziova fɛlii?

⁴ Wɛli-kɛ-maa su kpanaŋɔɔ ɓa mɛni-ŋuŋ nyii gɛ Zisɛ kɛ mɛni-kpɛtɛɛ kɛ a gɛɛ e Ziova fɛli a nii kelee. (Zɔŋ 14:31) E tee nyiti ma, Zisɛ e Ziova fɛli kpɛni fei e kɛ a mɛni lɛlɛɛi maa nɛ̃ɛi e gɛi. (Zɔŋ 8:​28, 29; Mɛ. 4:11) E kɛ a gɔlɔŋɔɔ a gɛɛ Ziova kaa a sɛŋ kelee kpɛtɛ-nuu. E kɛ ŋɔnɔ a naa la a gɛɛ kwa pɔri kukili tɔɔi Ziova ma kpɛni fei nyee laa ɓoɔi. (Ŋu. 33:4; 36:9; Zĩ. 1:17) Ziova a tɔ̃ya ɓo Zisɛ ma a tãi kelee, nyaŋ nya ɓe sɛŋ kelee tɛɛ bɔ. (Zɔŋ 1:14) Kɛlɛ Setɔŋ kaa a dakpɛni. E pa a sɔnyɔŋ da saa nuu-kpune pɔ. Gaa a lɛɛ-nuu, nyaŋ gbaaŋɔɔi nɔ gbiŋ mɛni ma. (Zɔŋ 8:44) Mɛni-ŋai ŋi kelee kɔlɔŋɔɔ Zisɛ mi ɓe kpɔŋ ma a gɛɛ ve wɔlɔ Ziova woo pili.—Fe. 2:​5-8 NWT.

⁵ Mɛni-ŋuŋ nyii ŋɔnɔ gɛ Zisɛ kɛ mɛni-kpɛtɛɛ kɛ a gɛɛ e Ziova fɛlii ɓa, e ŋɛi kɛ mɛni lɛlɛɛ tamaai ma ŋɔmɛni-kpɛtɛɛ e kɛ pa pai lai. (Ib. 12:2) E kɛ a gɔlɔŋɔɔ a gɛɛ a lɛɛ a dɔɔi kpanaŋɔɔ, a pai Naŋ laa maa waai, e ŋɔnɔ pere laa ɓo a gɛɛ nuu-kpune e ŋuŋ-maa-ɓo sɔlɔ ɓo sɔnyɔŋ da saa yeei.

MƐNII MAA NƐ̃ƐI KU ZIOVA FƐLI MƐNI MAI

6-7. Le mɛni ɓe nua tamaa difa saa Ziova fɛli lai, nyaŋ le mɛni ɓe maa nɛ̃ɛi ku vɛli mɛni mai?

⁶ Nua tamaa difa saa Ziova fɛli kpɛni fei dife ŋɔtua-pere lɛlɛɛ-ŋai kɔlɔŋ da mɛni lɛlɛɛ-ŋai aa gɛ dimɛni mai. Dikaa nɔ yɛɛ diai zia-nuui Pɔɔ e ɣala-woo ɓo dia Atɛŋ taai sui. Dia maŋ dife kɛ ni a Ɣala kɔlɔŋɔɔ.—Dikɛ-mɛni-ŋai 17:​19, 20, 30, 34.

⁷ Zia-nuui Pɔɔ e mo Atɛŋ-ɓela dia nyɛɛ, Ɣala ‘nyaa kpiŋ ɓe fulu-laa da sɛŋ tɛɛ nuu kelee pɔ.’ E ŋɔnɔ mo nyɛɛi: “Gbonoi ɓe kukaa naa, kukɛ sia-sia, kufulu-laai kɛ ɓo kuyeei.” Ɣala ɓa Zɛŋ Kelee Kpɛtɛ Ɣalai nyii “sii-ŋa kelee kula koo-ɓɔlɔŋ tɔnɔ su a gɛɛ dikɛ nɔii gwaa kelee.” Mɛni ma, nya nɔ ɓe maa nɛ̃ɛi ku vɛli.—Dikɛ-mɛni-ŋai 17:​25, 26, 28.

8. Le ɓe Ziova fe pai wɔlɔ gɛi? Ŋaa-lɛ.

⁸ Ziova ɓa Kukpɛtɛ Ɣalai da Ŋwala-wala kelee Ɣalai. Mɛni ma a kɛ ŋwɛlii, a pɔri kpalai kula a gɛɛ ku vɛli. Kɛlɛ, Ziova fe pai wɔlɔ nyiti kɛi. Aa nɛ kua a zu ponoɔ a gɛɛ gaa ɣele ma, nyaŋ e ku kelee ku wɛlini tɛitɛi. A ŋwɛlii a gɛɛ nua tamaa dikɛ a naoi-ni wɔlɔ-wɔlɔ da wɔlɔ-wɔlɔ. (1 Te. 2:​3, 4) Nyiŋi ɓe gɛ aa sɛŋ lɛ kua a gɛɛ ku pɔri lonoi nua pɔ e pilaŋ mɛni lɛlɛɛ-ŋai dia a pai gɛi nuu-kpune mɛni ma da berei a pai gɛi lai. (Mf. 10:​11-13; 28:​19, 20) Nyaŋ aa korai-toli-kpɔŋ tɛɛ kupɔ a gɛɛ ku pɔri vɛlii naa, ku kpɔŋ maa sɔlɔ ɓo korai-toli-kpɔŋ laa-tuɛ-ɓelai yeei a wɛli-kɛ-maa pere.—Dikɛ-mɛni-ŋai 20:28.

9. Ziova aa ŋɔwɛli-kɛ-maai lɛ leŋ nuu kelee ma?

⁹ Ziova a ŋɔwɛli-kɛ-maai lɛ nuu kelee ma yɛɛ diai kpiŋ dife ŋwɛlii di laa lai. Ikili-ŋa sia e pilaŋ nyiŋi ma: Nuu ŋɔbiliyɔŋ tamaa daa dikɛ-ɣeniɛi kɛ yɛɛ berei da ŋwɛlii di gɛ lai a koraŋ wala tamaa. Kɛlɛ, Ziova a nii sãa lɛlɛɛ tɛɛ dipɔ a gɛɛ di dikɛ-ɣeniɛi ŋaa-nɛ̃ɛ kula. (Mf. 5:​44, 45; Dikɛ-mɛni-ŋai 14:​16, 17) Aa nɛɛ naa a gɛɛ di pɔri laoi-laa lɛlɛɛ-ŋa kɛi, di nĩa-pɛlɛɛ maa sɔlɔ ɓo, di kpiŋ mɛni lɛlɛɛ sɔlɔ ɓo ditii kpanaŋ kɛɛ su. (Ŋu. 127:3; Ik. 2:24) Mɛni-ŋai ŋi kelee da nɛi a gɛɛ kuɣala-taa Naŋ e nuu kelee wɛlini. (Ɛs. 34:6) Kwaa naa lono e pilaŋ mɛni taŋa dia nyii gɛ kukɛ mɛni-kpɛtɛɛ kɛ a gɛɛ ku Ziova fɛli da berei a luwa laa la kuai.

MƐNII GƐ KUKƐ MƐNI-KPƐTƐƐ KƐ A GƐƐ KU ZIOVA FƐLII

10. (a) Le ɓa mɛni-ŋuŋ kwa Ziova fɛli mɛni mai? (Maafiu 22:37) (b) Ziova aa lii-kpele lɛ leŋ ya? (Ŋule-wooi 103:​13, 14)

¹⁰ Yɛɛ Zisɛ, wɛli-kɛ-maa su kpanaŋɔɔ ɓa mɛni-ŋuŋ kwa Ziova fɛli mɛni mai. (Maafiu 22:37 lono.) Kwa mɛni maa-kɔri e pilaŋ Ziova ŋɔtua-pere lɛlɛɛ-ŋai dia, a gɛ ku laa a nyaa. Gɔɔŋ-maa ɓa, kwaa berei kaa Ziova lii kpeleɛ la kuyeei. Tãi Eezuɛ-ŋai di Ziova woo pili lai e mo dia nyɛɛi: “Ka kpera kasɔnyɔŋ tua-ŋai kɛi.” (Zl. 18:11) Ziova e gɔlɔŋ a gɛɛ kumaa fe waa ni. (Ŋule-wooi 103:​13, 14 lono.) Ya ikili-ŋa sia e pilaŋ Ziova ŋɔlii-kpelei da ŋɔtua-pere lɛlɛɛ takpɛni-ŋai dia, ife laa ni la nyiŋi a ilii kula a gɛɛ I vɛli wɔlɔ-wɔlɔ da wɔlɔ-wɔlɔ?

11. Mɛni-ŋuŋ takpɛni-ŋa kɛɛ leŋ ɓe kwa kuɣala-taa Naŋ fɛli mɛni mai?

¹¹ Kwa ŋɔnɔ Ziova fɛli kpɛni fei gaa a mɛni lɛlɛɛi kwa pɔri gɛi. (Mf. 4:10) E tee nyiti ma, ku gɔlɔŋ a gɛɛ kwa Ziova fɛli, a pa a mɛni lɛlɛɛ tamaa. Gɔɔŋ-maa ɓa kwa Ziova fɛli a kulii kelee, a naa maa waa, e Dɛɓelei lɛ a lɛɛ-nuu, e ŋɔnɔ Kunaŋ lii nɛ̃ɛ. Nyaŋ kwa mɛni-kpɛtɛɛ kɛ a gɛɛ ku Ziova fɛli lonii ma, kwa pɔri wɔlɔ-wɔlɔ fulu-laa sɔlɔ ɓoi!—Zɔŋ 17:3.

12-13. Le ɓe ku maa-kɔri Jane da Pam dimɛni-kɔɔŋ-maai su?

¹² Kwa kɛ a nuu-tɔɔ, wɛli-kɛ-maa su kpanaŋɔɔ a pɔri kɛi kuyeei Ziova mɛni ma. Nyaŋ ŋwɛli-kɛ-maai ŋi su a pai kɛi kpanani kwa kɛ pɔlɔi. Kwaa mɛnii kaa kɛ a sisɛ feerɛi ŋi. Jane e kɛ a koraŋ 11, Pama kɛ ɓo a koraŋ 10 gɛɛ daa pɛlɛ Ŋala-kɔlɔi maa-kɔrii a tãi maa-ŋuŋ. Berei maŋ dikaa-ɓela dife kɛ ni ŋwɛlii di Ŋala-kɔlɔi maa-kɔri lai, kɛlɛ di nɛɛ naa a gɛɛ Jane da Pam di Ŋala-kɔlɔi maa-kɔri a Ziova Ŋɔsere-faa Kɛ-ɓelai a kɛ nɔ da pai pilani dikaa-ɓela polu a gɛɛ di li diɣala-pɛrɛi mu a nɔɔ-kuui kpɛɛ-ŋa. Jane e mo nyɛɛi: “Mɛnii Ziova Ŋɔsere-faa Ḳɛ-ɓelai di nɛ ma Ŋala-kɔlɔi sui, e kpɔŋ ma a gɛɛ mve nyee pu sale nyɔmɔɔ seɣɛɛ da wulu-wulu kpɛɛ su gɔlɔ pɛrɛi la.”

¹³ Koraŋ kpulu-loŋ tɛɛ polu ma, nɛni-loo feerɛi ŋi di batai kɛ. Naa polu ma di pɛlɛ panĩa tii kɛi, dikɛ ŋɔnɔ dikaa-ɓela mɛi kaa nyii-ŋai kɛ naa a dipɔlɔɔi. Jane e berei lɛ ŋɔkili-ŋa-siai kaa la e pilaŋ mɛnii kelee ma Ziova aa gɛ dimɛni mai. E mo nyɛɛi: “Ŋaa gaa a gɛɛ ‘Ziova a naoi ni mɛi kaa a nɛlɛɛ a tãi kelee. Nyaŋ yɛɛ berei 2 Temete 2:19 e mo lai, Ziova e diai kɔlɔŋ dikaa a bɔɔi.’” Tɔ̃ya ma Ziova a diai da mɛni-kpɛtɛɛ kɛ a gɛɛ di vɛlii, mɛi kaa a tãi kelee!

14. Kwa pɔri nɛi leŋ kulono pere da kutua-pere su a gɛɛ kwa tɔɔi Ziova polu? (Ya pɔri ŋɔnɔ votoo-ŋai kaai.)

¹⁴ Kwa ŋwɛlii nuu kelee e dɔ̃yai kɔlɔŋ e pilaŋ Ziova ma. Kwaa mɛni-kɔɔŋ-maai ŋi kaa: Ikili-ŋa sia e pilaŋ ilaoi lɛlɛɛ ta ma nyii zɔŋ lɛlɛɛi, nyee-laa-ɓoɔɔ, gɛ nua su mɛni lɛɛ. Gɛ ni folo tɔnɔ, nuu ta e mo a gɛɛ ilaoi kaa a ŋwana-lɔɔ-nuu da fili-nuu. Le ɓe ya pai gɛi? Ya pai tɔɔi mɛni ma. Bere sii tɔnɔi ti su, nua da lɛɛ mɛni-ŋa ɓo e pilaŋ Ziova ma, kwa tɔɔ mɛni ma a dɔ̃yai ɓoɔɔ e pilaŋ ma. (Ŋu. 34:1; Az. 43:10) Kwa nɛ kulono pere da kutua-pere su a gɛɛ kwa ŋwɛlii ku Ziova nya dɔnɔ fɛli a kulii kelee.

15. Mɛni lɛlɛɛ-ŋa kɛɛ leŋ ɓe zia-nuui Pɔɔ e zɔlɔ ɓo gɛɛ aa mɛni maa faleŋɔɔ-ŋa kɛ ŋɔkɛ-ɣeniɛi su? (Felepiɛŋ 3:​7, 8)

¹⁵ Kwa faa ma a gɛɛ ku mɛni maa faleŋɔɔ-ŋa kɛ kukɛ-ɣeniɛi su a gɛɛ nɔ ku Ziova nĩa-mɛni kɛ kpaa ku tii tamaa kɛ mi. Gɔɔŋ-maa ɓa, zia-nuui Pɔɔ e ŋɔtii kɛtɛi lɛɛ Zuu ɣala-mɛnii su a gɛɛ nɔ e kɛ a korai-nuu, e Ziova fɛli. (Ga. 1:14) Nyiŋi e gɛ e kɛ-ɣeniɛ lɛlɛɛ ŋaa-nɛ̃ɛ kula Ziova fɛliɛ su. Nyaŋ e kpiŋ pere laa ɓo a gɛɛ e li ɣala-taa a gɛɛ da Korai-ni di tii kɛ gie ma. Nii fe wɔlɔ too ni polu ŋɔmɛni-kpɛtɛɛ ma a gɛɛ e Ziova fɛli, nyaŋ kua maŋ kulii fe pai wɔlɔ tooi polu a kɛ kwa mɛni-kpɛtɛɛ tɔnɔi ti kɛ.—Felepiɛŋ 3:​7, 8 lono.

16. Le ɓe ku maa-kɔri Julia ŋɔmɛni-kɔɔŋ-maai su? (Ya pɔri ŋɔnɔ votoo-ŋai kaai.)

¹⁶ Kwa Ziova fɛliɛ kɛ a mɛni-ŋuŋ kukɛ-ɣeniɛi su, kukɛ-ɣeniɛi ŋuŋ a pai kɛi ma lonii ma da tinaa-tuɛ-pere. Kwaa sisɛ tɔnɔ ŋɔmɛni-kɔɔŋ-maai kaa nyii da kɛ ma Julia. Gɛɛ a nuu-tɔɔi, a kaa wule too ɣala-pɛrɛ-ŋa mu. Wule-too-nuu kɛtɛ tɔnɔ e gaa, e wule too pere lɛ ma. Tãi kpua yee mu, Julia e kɛ a wule-too-nuu kɛtɛ, gɛ wule too pele kpaya-kpaya-ŋa dia. Gɛɛ lii wule-too kɔlɔ-pɛrɛ kɛtɛ ta mui, maraŋ-nuu tɔnɔ nyii kɛ gɔlɔ-pɛrɛi mui, e pɛlɛ lonoi bɔ e pilaŋ Ɣala ma, e kpiŋ Ɣala laa Ziova lɛ ma. Tãi kpua yee mu, Julia e pɛlɛ Ŋala-kɔlɔi maa-kɔrii giei feerɛ a lɔɔ-kuu kelee. Naa polu ma, e mɛni-kpɛtɛɛ kɛ a gɛɛ e nyee kula ŋule-too tii su e naa pɛlɛ Ziova fɛlii. Mɛni-kpɛtɛɛ ŋi kɛi fe kɛ ni a mɛni loŋ. Julia e mo nyɛɛi: “Nua tamaa di mo ma a gɛɛ ve a tare mɛni a gɛɛ ŋa kpera wule tooi a gɛɛ nɔ ŋa Ziova fɛli. Kɛlɛ ŋa kɛ ŋwɛlii ŋa ŋakɛ-ɣeniɛi kelee kɛ Ziova fɛliɛ su.” Julia ŋɔkili-ŋa-siai kaa saa leŋ e pilaŋ mɛni-kpɛtɛɛ ma nyii gɛɛ aa naa gɛ a koraŋ 30 da bolui? E mo nyɛɛi: “Nii nɛ̃ɛi a gɛɛ ŋa mɛni-kpɛtɛɛ kɛ a gɛɛ ŋa Ziova fɛli, nyaŋ naai la a gɛɛ Ziova a pai zɛŋ kelee ŋwɛli kaa mai tɛɛi mbɔ tinaa-tuɛ-pere.”—Ŋu. 145:16.

KANAŊ ZIOVA FƐLII

17. Le ɓe gɔlɔŋɔɔ a gɛɛ kukaa ŋele-ŋai kpɛɛ-ŋa tãi su a gɛ a diai daa mɛni-kpɛtɛɛ kɛ a gɛɛ di Ziova fɛli da diai dife nii gɛ nii?

¹⁷ Kukaa naa ŋele-ŋai kpɛɛ-ŋa tãi su. Zia-nuui Pɔɔ e mo nyɛɛi: “‘Naa guro a gɛ ti,’ nuui nyii gaa pai, a pai pai a maa felaa, ve pai tãi siɣei.” (Ib. 10:37) Nyiŋi sukulai ɓa le? Zukulai ɓa, tãi tamaa fe ŋɔnɔ naa a gɛɛ nua di mɛni-kpɛtɛɛ kɛ a gɛɛ di Ziova fɛli. (1 Kl. 7:29) Nyaŋ a kɛ kwaa mɛni-kpɛtɛɛ kɛ a gɛɛ ku Ziova fɛli, ku gɔlɔŋ a gɛɛ berei maŋ kwa pai tɛɛi la sukɔɔŋ-ŋa sui, kɛɛ a pai kɛi nɔ ‘tãi kpua mɛni ma.’

18. Le ɓe Zisɛ da Ziova da ŋwɛlii ku gɛi?

¹⁸ Zisɛ fe ŋɔpolu-ɓelai fɔrɔ ni nɔ a gɛɛ dikɛ a bolu-ɓela, kɛlɛ e ŋɔnɔ di fɔrɔ a gɛɛ dikɛ bolu a tãi kelee. (Mf. 16:24) Mɛni ma a kɛ kwaa gɛ dɔ̃yai su a koraŋ tamaa, kwa ŋwɛlii ku kɔ a gbanaŋɔɔ a gɛɛ ku kanaŋ Ziova fɛlii. Berei maŋ nyiŋi kɛi a pɔri kɛi a gbanaŋɔɔ lai, kɛlɛ kwa pai luwa tamaa ŋaa-nɛ̃ɛ kulai lonii ma!—Ŋu. 35:27.

19. Le ɓe ku maa-kɔri Gene ŋɔmɛni-kɔɔŋ-maai su?

¹⁹ Nua taŋa da gaa yɛɛ ya kɛ Ziova fɛlii, gɛ ni ife pai ikɛ-ɣeniɛi ŋaa-nɛ̃ɛ kulai. A kɛ ikaa a nuu-tɔɔ, bere ɓe ikili-ŋa-siai kaa la? Nuu-tɔɔ tɔnɔ nyii da kɛ ma Gene e mo nyɛɛi: “E kɛ ŋgili-ŋa a gɛɛ mve ŋakɛ-ɣeniɛi ŋaa-nɛ̃ɛ kulai kpɛni fei ŋgaa a Ziova Ŋɔsere-faa Kɛ-ɓelai ta. Ŋa kɛ gaai yɛɛ maraŋ-ŋa dikɛ dikɛ-ɣeniɛi ŋaa-nɛ̃ɛ kulai a di liɛ pele-ŋa ma, wɛli soŋɔɔ da diyee puɔɔ mɛni nyɔmɔɔ-ŋa su. Kɛlɛ ŋa kɛ nɔ ŋatãi kelee siɣei goyaŋ-ŋai da ŋala-woo-ɓo tii su.” Le ɓe gili-ŋa-siai ŋi e gɛ a Gene? E mo nyɛɛi: “Ŋa pɛlɛ ŋakɛ-ɣeniɛi kɛi a pele sii feerɛ, nyaŋ e kɛ yɛɛ ŋa kɛ ŋakɛ-ɣeniɛi ŋaa-nɛ̃ɛ kulai. Kɛɛ nyiti fe pa ni a lii-nɛ̃ɛ kpɔɔi mbɔ. Ŋa pɛlɛ ŋgili-ŋa siai e pilaŋ mɛni lɛlɛɛ-ŋai dia ya zɔlɔ ɓo ya sia a Ŋala-kɔlɔi ŋɔlia-woo-ŋai. Mɛni ma ŋa mɛni-kpɛtɛɛ kɛ a gɛɛ ŋa Ziova fɛli a nii kelee. E siɣe tãi ti ma, gaa yɛɛ Ziova aa mvɛli-woo kelee su too tɛitɛi.”

20. Le ɓe maa nɛ̃ɛi kukɛ a ku kpɛtɛɛ a gɛɛ ku gɛ?

²⁰ Wule-woo pɔ̃yɛ-nuu tɔnɔ e mo nyɛɛi: “Luwa kaa nuui ma I ziɣe zu I nɛɣɛ a yai, a gɛɛ e kɛ ipɛrɛi mui.” (Ŋu. 65:4) Mɛni ma kwaa kɛ a ku kpɛtɛɛ a gɛɛ ku kanaŋ Ziova fɛlii yɛɛ Zasua nyii mo nyɛɛi: “Mɛni a kpera ma, kwa ŋa nuai, kwa pai tii kɛi Yawɛɛ mi.”—Za. 24:15.