Kpɔŋ Iɣala-kɔlɔ Maa-kɔri-ɓelai Dia A Gɛɛ Di Tɔɔ A Gbanaŋɔɔ Dɔ̃yai Mɛni Ma

1-2. (a) Le ɓe a Ɣala-kɔlɔ maa-kɔri-ɓela taŋa kpera dimaa tɛi? (b) Le ɓe kwa pai maa-kɔrii zɛŋ-lɛɛi ŋi su?

ILII E KƐ sɛlɛnii a gɛɛ ikɛ a Ziova Ŋɔsere-faa Kɛ-ɓelai ta? Tãi ta ikɛ yaoi a gɛɛ iɓaraŋ tii-kɛ-ɓela, ilaoi-ni kpaa ikaayɔɔi su-ɓela da pai tɔɔi ya. Kpaa maŋ tãi ta ikɛ gaai yɛɛ ife pai pɔrii Ziova ŋɔtɔŋ-ŋai mɛi kaai. A kɛ bere ɓe e kɛ la, gɛ ni I mɛnii kɔlɔŋ Ɣala-kɔlɔ maa-kɔri-ɓela taŋa da tɛɛi zui da mɛnii gɛi a gbanaŋɔɔ a gɛɛ di mɛni-kpɛtɛɛ kɛ a gɛɛ dikɛ a Ziova Ŋɔsere-faa Kɛ-ɓelai ta.

² Zisɛ e kɛ a gɔlɔŋɔɔ a gɛɛ mɛni-ŋa kɛɛ ŋi e kɛ pai nua taŋa kperai Ziova fɛlii. (Mf. 13:​20-22) Kɛɛ vii fe kpɛɛ ni kpɔŋ maa tɛɛi diai pɔ nyii-ŋai kɛ yaoi lɛɛi bolui. E kpɔŋ ŋɔpolu-ɓelai dia a gɛɛ di berei kaa da pɔri kpɔnii la nua kɛɛ-ŋai ŋi dia a gɛɛ (1) di mɛni-ŋai kɔlɔŋ nyii gɛi dife dimaa tɛi, (2) di berei kaa da pɔri ɓɔlɔi la diwɛli-kɛ-maai su Ziova mɛni mai, (3) di berei kaa da pɔri Ziova fɛliɛ pui la fulɔi dikɛ-ɣeniɛi sui, da (4) di berei da pɔri mɛni-kpanaŋ-ŋa yee mɛi ɣalei lai. Kwa pɔri Zisɛ ŋɔsɛŋ lɛ perei pɔɔkɔɔni leŋ kwa kɛ tii kɛi a Kɛ-ɣeniɛ Ŋaa-nɛ̃ɛ Kula Wɔlɔ-wɔlɔ Da Wɔlɔ-wɔlɔ! kɔlɔi a gɛɛ ku kpɔŋ Kuɣala-kɔlɔ maa-kɔri-ɓelai dia di tɔɔ a gbanaŋɔɔ dɔ̃yai mɛni ma?

KPƆŊ IƔALA-KƆLƆ MAA-KƆRI-NUUI MA E MƐNI-KPANAŊ-ŊAI KƆLƆŊ GBERAI MAA TƐI

3. Le ɓe gɛ a gbanaŋɔɔ a gɛɛ Nekedima e kɛ a Zisɛ ŋɔpolu-ɓelai ta?

³ Nekedima nyii kɛ a Zuu-ŋai laa-tuɛ-ɓelai tɔnɔi, e kɛ yaoi a gɛɛ e kɛ a Zisɛ ŋɔpolu-ɓelai ta. Zisɛ kɛɛ aa ŋɔɣala-woo-ɓo tii kɛ nɔ ɣaloŋ lɔɔlu mɛi da mɛni mai, Nekedima e kɛ a gɔlɔŋɔɔ a gɛɛ e kɛ a Masayai. (Zɔŋ 3:​1, 2) Kɛɛ Nekedima e gbɛtɛ gili-ŋa a gɛɛ e li Zisɛ pɔ loo pere su kpɛni fei e kɛ “yaoi Zuu-ŋai dia.” (Zɔŋ 7:13; 12:42) Tãi ta e kɛ yaoi a gɛɛ a kɛ a Zisɛ ŋɔpolu-ɓelai ta, da pai ŋɔtii kulai nyeei .a

4. Zisɛ e kpɔŋ leŋ Nekedima ma a gɛɛ e mɛnii kɔlɔŋ Ɣala e kɛ ŋwɛlii e gɛi?

⁴ Nekedima e kɛ a Dɔŋ-ŋai kɔlɔŋɔɔ nyii Ziova e dɛɛ Eezuɛ-ŋai pɔi, kɛlɛ maa nɛ̃ɛi kɛ e mɛni-ŋai Ziova e kɛ ŋwɛlii e gɛi ŋaa kaa ma. Zisɛ e kpɔŋ leŋ ma? Zisɛ e faa ma a gɛɛ e lono Nekedima pɔ berei maŋ e kɛ la a kpini tãi. Nyaŋ Zisɛ e mɛnii lɛ maa nɛ̃ɛi kɛ Nekedima e gɛ a gɛɛ e pɔri kɛi a Zisɛ ŋɔpolu-ɓelai ta. Nyaŋ mɛni-ŋai ŋi taŋa ɓa, e bolu tɔɔ ŋɔsɔnyɔŋ-ŋai dia, e batai kɛ, e laa-la pu Ɣala Noŋ Zisɛ kponoi.—Zɔŋ 3:​5, 14-21.

5. Kwa pɔri kpɔnii leŋ Kuɣala-kɔlɔ maa-kɔri-nuui ma a gɛɛ e mɛnii kɔlɔŋ gberai maa tɛi?

⁵ A kɛ kpiŋ Ŋala-kɔlɔ maa-kɔri-nuui e Ŋala-kɔlɔi kɔlɔŋ a nɛlɛɛ, tãi ta maa nɛ̃ɛi ku kpɔŋ ma a gɛɛ e mɛnii kɔlɔŋ gberai maa tɛɛi. Gɔɔŋ-maa ɓa ŋɔtii a pɔri kɛi ŋɔtãi damaa siɣei kpaa ŋɔkaayɔɔi su-ɓela dife ŋwɛlii e kɛ a Ziova Ŋɔsere-faa Kɛ-ɓelai ta. Mɛni ma yɛɛ Zisɛ, ye kpɔŋ maa tɛɛ Iɣala-kɔlɔ maa-kɔri-nuui pɔ. Ya pɔri dolii ipɛrɛi la kpaa ka nyaa ka li sia-sia kɛi a gɛɛ ka pɔri yɛpɛ pui gie ma. Ka mɛni-ŋa kɛɛ ŋi kɛ gie ma, tãi ta a pai pɔrii mɛni tamaa ɓoi ya e pilaŋ ŋɔkɛ-ɣeniɛi ma. Nyaŋ ya pai pɔrii mɛni-kpanaŋ-ŋai kaai a tɛɛi zui. Iɣala-kɔlɔ maa-kɔri-nuui fɔrɔ a gɛɛ e maa-faleŋ-ŋa kɛ a gɛɛ e Ziova nĩa-mɛni kɛ. Ve gɛ nɔ kpɛni fei a ŋwɛlii e ilii laa.

6. Ya pɔri kpɔnii leŋ Iɣala-kɔlɔ maa-kɔri-nuui ma a gɛɛ nii e kɛ a gbeleɛ, e sia a mɛnii a maa-kɔrii? (1 Kɔleŋtiɛŋ 16:13)

⁶ Iɣala-kɔlɔ maa-kɔri-nuui a kɛ a naa la a gɛɛ Ziova a pai kpɔnii ma a gɛɛ e ŋɔtɔŋ-ŋai mɛi kaa, nii a pai kɛi a gbeleɛ a gɛɛ e sia a mɛnii a maa-kɔrii. (1 Kɔleŋtiɛŋ 16:13 lono.) Kwa pɔri Ŋala-kɔlɔ ŋaa-lɛ tii ya gɛi kɔɔni kɔlɔ-lɛ-nuu ma. I kɛɛ kɔlɔ pɛrɛ mui, isɛŋ-lɛ-ɓelai nenɛ kpɔ ɓe ŋwɛli e kɛ yai? Tãi ta e kɛ a zɛŋ-lɛ-nuui nyii kpɔŋ ya a lii-kpele pere a gɛɛ I laa la a gɛɛ ya pɔri mɛnii kɛi ya maa-kɔrii. Bere sii tɔnɔi ti su, Ɣala-kɔlɔ ŋaa-lɛ-nuu lɛlɛɛ fa mɛnii lɛ nɔ nyii Ɣala a ŋwɛlii Ŋala-kɔlɔ maa-kɔri-nuui e gɛi, kɛɛ a pɔri ŋɔnɔ kpɔnii Ŋɔɣala-kɔlɔ maa-kɔri-nuui ma e kɛ a naa la a gɛɛ Ziova ŋɔkpɔŋ maai sarai, a pɔri maa-faleŋ-ŋa kɛi ŋɔkɛ-ɣeniɛi su. Ya pɔri nyiŋi kɛi leŋ?

KPƆŊ IƔALA-KƆLƆ MAA-KƆRI-NUUI MA E ƁƆLƆ ŊƆWƐLI-KƐ-MAAI SU ZIOVA MƐNI MA

7. Zisɛ e kpɔŋ leŋ nua dia a gɛɛ di ɓɔlɔ diwɛli-kɛ-maai su Ziova mɛni ma?

⁷ Zisɛ e kɛ a gɔlɔŋɔɔ a gɛɛ ŋɔpolu-ɓelai diwɛli-kɛ-maai Ɣala mɛni ma e kɛ pai dilii kulai a gɛɛ di sia a mɛnii daa maa-kɔrii. A kaa sɛŋ lɛ dia nyii a pɔri kɛ kpɔnii dia a gɛɛ di diwɛli-kɛ-maai su kpanaŋ diɣala-taa Naŋ mɛni ma. Gɔɔŋ-maa ɓa, e nɛ a gɛɛ Ziova kaa nɔ yɛɛ naŋ-nuu nyii a sãa lɛlɛɛ tɛɛ ŋɔnĩa-pɛlɛɛi pɔi. (Mf. 7:​9-11) Tãi ta nuai kɛ diwoli tɔɔi Zisɛ mai taŋa dinaŋ-ni difa kaa wɛli-kɛ-maa kɛɛ ŋi lɛ dia. Ikili-ŋa sia e pilaŋ berei ma dilii e kɛ a nɛ̃ɛ la gɛɛ Zisɛ aa mɛni-pelei ɓo dia nyii kɛ a bilaŋɔɔ ŋwɛli-kɛ-maa naŋ ma nyii nyee see ŋɔwoo-pili loŋ mu gɛɛ aa pa polui. Nyiŋi e kpɔŋ dia di gaa a gɛɛ di wɛli kpɔɔi kaa Ziova ma.—Luu 15:​20-24.

8. Ya pɔri kpɔnii leŋ Iɣala-kɔlɔ maa-kɔri-nuui ma a gɛɛ e ŋɔwɛli-kɛ-maai su kpanaŋ Ziova mɛni ma?

⁸ Ya maŋ ya pɔri kpɔnii Iɣala-kɔlɔ maa-kɔri-nuui ma a gɛɛ e ŋɔwɛli-kɛ-maai su kpanaŋ Ziova mɛni ma a lonoɔ e pilaŋ Ɣala ŋɔtua-pere lɛlɛ-ŋai dia isɛŋ-lɛɛi su. Tãi kelee ka kɛ Ŋala-kɔlɔi maa-kɔrii, kpɔŋ Iɣala-kɔlɔ maa-kɔri-nuui ma e berei kaa mɛnii aa maa-kɔrii a Ziova ŋɔwɛli-kɛ-maai lɛ la kumɛni mai. Ya kɛ lonoi e pilaŋ maa-tee-sɛŋ ma, berei lɛ bilaŋɔi la mai. (Lo. 5:8; 1 Zɔŋ 4:10) Iɣala-kɔlɔ maa-kɔri-nuui a berei kaa ŋwɛli kpɔɔi kaa la Ziova mai, nyiŋi a pɔri kpɔnii ma a gɛɛ e ŋɔwɛli-kɛ-maai su kpanaŋ Ziova mɛni ma.—Ga. 2:​20, NWT.

9. Le ɓe kpɔŋ Michael ma a gɛɛ e ŋɔkɛ-ɣeniɛi maa faleŋ?

⁹ Michael nyii kula Indonesia lɔii sui, kaa-ɓela di dɔ̃yai lɛ ma gɛɛ ɓɔlɔi, kɛlɛ ve batai kɛ ni. Gɛɛ a koraŋ puu kao lɔɔlu mɛi saaɓai (18), e li lɔii-ŋuŋ takpɛni su a gɛɛ gɛ keleŋ sia tii kɛ. Naa polu ma, e too tua-laa su Indonesia lɔii su. Kɛɛ e bɔŋ da noŋ nɛnii lɛɛ polu, e ŋɔnɔ li lɔii-ŋuŋ takpɛni su tii kɛ mɛni ma. Tãi ti ma, bɔŋ da noŋ nɛnii di pɛlɛ Ŋala-kɔlɔi maa-kɔrii, dikɛ kpiŋ sia a mɛnii dikɛ maa-kɔrii. Michael nee kɛɛ aa saai, e pa polu bɔ-taai a gɛɛ e naŋ mɛi kaa. Nyaŋ e faa ma a gɛɛ e Ŋala-kɔlɔi maa-kɔri. Di kɛɛ lonoi e pilaŋ “Mɛni Tamaa Maa-kɔri” kpiniŋ ma nyii gaa Kɛ-ɣeniɛ Ŋaa-nɛ̃ɛ Kula Wɔlɔ-wɔlɔ Da Wɔlɔ-wɔlɔ! kɔlɔi ŋɔsɛŋ-lɛɛ buu feerɛ kao lɔɔlu mɛi feerɛ (27) sui, mɛni-ŋuŋ ta e Michael lii soŋ. Gɛɛ aa gili-ŋa sia e pilaŋ berei ma Ziova lii e too la polu gɛɛ aa Noŋ kaa mɔ̃lɛi, Michael e wɔlɔ. Nyaŋ gɛɛ aa gaa a gɛɛ ŋwɛli kpɔɔi kaa Ziova da Noŋ Zisɛ mai, nii e kɛ a nɛ̃ɛ. E maa-faleŋ-ŋa kɛ ŋɔkɛ-ɣeniɛi su, e batai kɛ.

KPƆŊ IƔALA-KƆLƆ MAA-KƆRI-NUUI MA A GƐƐ E ZIOVA FƐLIƐ PU FULƆI ŊƆKƐ-ƔENIƐI SU

10. Zisɛ e kpɔŋ leŋ ŋɔpolu-ɓelai dia a gɛɛ di Ziova fɛliɛ pu fulɔi dikɛ-ɣeniɛi su? (Luu 5:​5-11) (Ya pɔri ŋɔnɔ votooi kaai.)

¹⁰ Nuai Zisɛ e ɣala-woo ɓo diai taŋa di gɔlɔŋ a maa felaa a gɛɛ e kɛ a Masayai. Kɛɛ maa nɛ̃ɛi kɛ e nii kpɔŋ dia di gɔlɔŋ a gɛɛ maa nɛ̃ɛi di ŋala-woo-ɓo tii kɛ a lii-kpele pere a gɛɛ di pɔri Ziova fɛlii. Pitɛ da Aŋdulu dikɛ a Zisɛ polu-ɓela e lɛɛ pai di tolii a gɛɛ dikɛ a ŋɔsia-ɓelai ta. (Mf. 4:​18, 19) Difeerɛŋɔɔ e pɛlɛ la Zĩi da Zɔŋ ma dikɛ a nyɛ̃ɛ kpɛ-ɓela, nyaŋ dikɛ kapa tamaa sɔlɔ ɓoi dipɔnii su. (Maki 1:​16-20) Kɛɛ Pitɛ da Aŋdulu di dipolu tɔɔ dinyɛ̃ɛ kpɛ tii ma a gɛɛ nɔ di pilaŋ Zisɛ polu. Gɛɛ daa mɛni-kpɛtɛɛi ŋi kɛi, dikɛ nii dikaayɔɔi mɛi kaai. Le ɓe dilii kula a gɛɛ di ŋala-woo-ɓo tii maa mɛni pu fulɔi dikɛ-ɣeniɛi sui? Zisɛ e ŋɛi-kɛ-maa ta kɛ nyii nɛ dia a gɛɛ Ziova a pɔri dimɛi kaai a nɛɛ maŋ le e kɛ. Nyiŋi e kpɔŋ dia a gɛɛ di laa la a gɛɛ Ziova e kɛ pai zãai maa kpaaŋ e kɛ diai tɛɛi dipɔ a kɛ da maa mɛni pu fulɔi dikɛ-ɣeniɛi su.—Luu 5:​5-11 lono.

11. Kwa pɔri tii kɛi leŋ a kukpɔɔi mɛni-kɔɔŋ-maai a gɛɛ ku Kuɣala-kɔlɔ maa-kɔri-ɓelai dilaa-lai su kpanaŋ?

¹¹ Kufa pɔri ŋɛi-kɛ-maa-ŋa kɛi yɛɛ berei Zisɛ e gɛ lai. Kɛlɛ kwa pɔri mɛni-kɔɔŋ-maa-ŋa lɛi nyii bilaŋɔi berei ma Ziova a kpɔŋ maa tɛɛ la diai pɔ da maa mɛni pu fulɔi dikɛ-ɣeniɛi sui. Gɔɔŋ-maa ɓa berei Ziova e kpɔŋ la ya gɛɛ yaa pɛlɛ pai goyaŋ-ŋai su a ninai kaa nii ikili-ŋa? Tãi ta I lono itii mɛi-nuui pɔ, I mo ma a gɛɛ ya pai kɛi kperai tii kɛi a sumoɔ a volo-ŋai ya li la goyaŋ sui. Lono Iɣala-kɔlɔ maa-kɔri-nuui pɔ e pilaŋ berei ma Ziova e kpɔŋ la ya a gɛɛ I maa mɛni pu fulɔi ikɛ-ɣeniɛi su da berei nyiŋi e ilaa-lai su kpanaŋ lai.

12. (a) Le mɛni ɓe maa nɛ̃ɛi ku li la a bɔlɔ da sisɛ takpɛni-ŋa Kuɣala-kɔlɔ maa-kɔri-ɓelai pɔi? (b) Le takpɛni ɓe ya pɔri tii kɛi la a gɛɛ I kpɔŋ Iɣala-kɔlɔ maa-kɔri-nuui ma e Ziova fɛliɛ pu fulɔi ŋɔkɛ-ɣeniɛi su? Gɔɔŋ-maa lɛ.

¹² Iɣala-kɔlɔ maa-kɔri-nuui a pɔri ŋɔnɔ mɛni lɛlɛɛ-ŋa maa-kɔrii korai-ɓela takpɛni-ŋa yeei a pa berei ma di dikɛ-ɣeniɛi maa faleŋ la a gɛɛ di Ziova maa mɛni pu fulɔi dikɛ-ɣeniɛi sui. Mɛni ma, bɔlɔ da sisɛ takpɛni-ŋa nyii-ŋai dimɛni kɛ pere kaa a dakpɛnii, mare kɛ a gɛɛ di too kapɔ ka kɛ Ŋala-kɔlɔi maa-kɔrii. Di mare kɛ a gɛɛ di lono e pilaŋ berei ma di pa la dɔ̃yai sui da mɛnii di gɛ a gɛɛ di Ziova fɛliɛ pu fulɔi dikɛ-ɣeniɛi sui. E tee nyiti ma, ya pɔri ŋɔnɔ tãi siɣei a gɛɛ ka Iɣala-kɔlɔ maa-kɔri-nuui ka vilo-ŋai su kaa nyii gaa “Mɛni Tamaa Maa-kɔri” kpaa “Mɛni Takpɛni-ŋa Maa-kɔri” kpiniŋ mu Kɛ-ɣeniɛ Ŋaa-nɛ̃ɛ Kula Wɔlɔ-wɔlɔ Da Wɔlɔ-wɔlɔ! kɔlɔi sui. Gɔɔŋ-maa ɓa ka kɛ lonoi e pilaŋ zɛŋ-lɛɛi buu saaɓa kao lɔɔlu mɛi feerɛi (37) ma, ya pɔri lonoi e pilaŋ Ŋala-kɔlɔi ŋɔtɔ̃ya-ŋuŋ-ŋai dia nyii gaa viloi Ziova A Pai Zãai Maa Kpaaŋ Kaa Kuai Tɛɛi su.

KPƆŊ IƔALA-KƆLƆ MAA-KƆRI-NUUI MA A GƐƐ NYEE E TƐƐ MƐNI-KPANAŊ-ŊA DIA

13. Zisɛ e kpɔŋ leŋ ŋɔpolu-ɓelai dia a gɛɛ dikɛ a di kpɛtɛɛ kpɔara-laa mɛni ma?

¹³ Zisɛ e mo ŋɔpolu-ɓelai dia a tãi tamaa a gɛɛ dikɛ pai tɛɛi kpɔara-laa su nua takpɛni-ŋa yeei yɛɛ dikaayɔɔi su-ɓela. (Mf. 5:11; 10:​22, 36) Zisɛ e lɛɛ pai saai, e mo ŋɔpolu-ɓelai dia a gɛɛ dikɛ pai kpiŋ di taŋa paai dilaa-lai mɛni ma. (Mf. 24:9; Zɔŋ 15:20; 16:2) E di lia-woo-ɓo a gɛɛ di diɣala-woo-ɓo tii kɛ a tare pere. Gɔɔŋ-maa ɓa, e di lia-woo-ɓo a gɛɛ dife laa-saa kɛ a nuu kelee ta nyii kɛ a dɔɔ dilaa-lai mai, di dikpiŋ mɛi kaa a pa dilono pere da ditua-pere ma.

14. Kwa pɔri kpɔnii leŋ Ɣala-kɔlɔ maa-kɔri-nuu ta ma a gɛɛ e gbiŋ kpɛtɛ kpɔara-laa mɛni ma? (2 Temete 3:12)

¹⁴ Yɛɛ Zisɛ kwa pɔri moi Kuɣala-kɔlɔ maa-kɔri-nuui ma a gɛɛ maraŋ tii-kɛ-ɓela taŋa, naoi-ni kpaa ŋɔkaayɔɔi su-ɓela da pɔri tɔɔi ma kpɛni fei gaa Ŋala-kɔlɔi maa-kɔrii. (2 Temete 3:12 lono.) Da pɔri ɣɛlɛ-maa kulai gbonoi kpɛni fei gaa kɔi a gɛɛ e sia a Ŋala-kɔlɔi ŋɔsɛŋ-lɛɛ-ŋai ŋɔkɛ-ɣeniɛi su. Nua takpɛni-ŋa yɛɛ ŋɔkaayɔɔi su-ɓela taŋa da pɔri mɛni nyɔmɔɔ-ŋa ɓoi e pilaŋ mɛnii ma a maa-kɔrii Ŋala-kɔlɔi sui. Kwa lono Kuɣala-kɔlɔ maa-kɔri-ɓelai pɔ e pilaŋ kpɔara-laa ma naa-tuɛ, da pai kɛi a di kpɛtɛɛ mɛni-ŋai ŋi mɛni ma.

15. Le ɓe a pɔri kpɔnii Ɣala-kɔlɔ maa-kɔri-nuu ta ma a gɛɛ e tɔɔ a gbanaŋɔɔ ŋɔkaayɔɔi su-ɓela da tɔɔ ma?

¹⁵ A kɛ Iɣala-kɔlɔ maa-kɔri-nuui ŋɔkaayɔɔi su-ɓela da tɔɔi ma, vɔrɔ a gɛɛ e gili-ŋa sia e pilaŋ mɛnii ma gɛ ŋɔkaayɔɔi su-ɓela lii fe nɛ̃ɛ ni la a gɛɛ gaa Ŋala-kɔlɔi maa-kɔrii. Tãi ta gaa ŋɔkaayɔɔi su-ɓela kili-ŋa a gɛɛ mɛnii Ziova Ŋɔsere-faa Kɛ-ɓelai da nɛi fe a tɔ̃ya. Kpaa da pɔri kɛi gaai yɛɛ Ziova Ŋɔsere-faa Kɛ-ɓelai dikaa a nua sɔŋ nyɔmɔɔ-ŋa. Zisɛ ŋɔkaayɔɔi su-ɓela taŋa lii fe kɛ ni kpiŋ a nɛ̃ɛ e pilaŋ mɛnii ma e kɛ gɛi. (Maki 3:21; Zɔŋ 7:5) Kpɔŋ Iɣala-kɔlɔ maa-kɔri-nuui ma a gɛɛ e nii kpele, e lono a ɓaa-kɛ-maa pere nua takpɛni-ŋa pɔ yɛɛ ŋɔkaayɔɔi su-ɓela.

16. Kwa pɔri kpɔnii leŋ Ɣala-kɔlɔ maa-kɔri-nuu ta ma a gɛɛ e pɔri lonoi e pilaŋ ŋɔlaa-lai ma a ɓaa-kɛ-maa pere?

¹⁶ A kɛ kpiŋ Ŋala-kɔlɔ maa-kɔri-nuui ŋɔkaayɔɔi su-nuu ta a ŋwɛlii e mɛni tamaa maa-kɔri e pilaŋ Ŋala-kɔlɔi ma, a pai kɛi a nɛlɛɛ a kɛ Ŋala-kɔlɔ maa-kɔri-nuui a wala mɛni-ŋuŋ tamaa lɛ ma a tãi tɔnɔi. A nyiŋi kɛ, ŋɔkaayɔɔi su-nuui fe pai ŋɔnɔ ŋwɛlii e lono bɔ e pilaŋ Ŋala-kɔlɔi ma. Mɛni ma, Iɣala-kɔlɔ maa-kɔri-nuui fɔrɔ a gɛɛ e lono e pilaŋ ŋɔlaa-lai ma a pere sii nyii pai gɛi ŋɔkaayɔɔi su-ɓela dikɛ ŋwɛli di mɛni tamaa maa-kɔri e pilaŋ Ŋala-kɔlɔi ma a tãi takpɛni. (Ko. 4:6) Tãi ta a pɔri ŋɔkaayɔɔi su-ɓela teniŋ tɔɔi jw.org fãai ŋa. Bere sii ŋi su, nuui a pɔri mɛni tamaa maa-kɔrii e pilaŋ Ziova Ŋɔsere-faa Kɛ-ɓelai dia a tãi da berei a ŋwɛlii lai.

17. Ya pɔri kpɔnii leŋ Iɣala-kɔlɔ maa-kɔri-nuui ma a gɛɛ e pɔri nua dimare-kɛɛ-ŋai sukulai e pilaŋ Ziova Ŋɔsere-faa Kɛ-ɓelai dia? (Ya pɔri ŋɔnɔ votooi kaai.)

¹⁷ Ya pɔri tii kɛi a zɛŋ-lɛɛ kpului “Frequently Asked Questions” nyii gaa jw.org fãai ŋa a gɛɛ I kpɔŋ Iɣala-kɔlɔ maa-kɔri-nuui ma a gɛɛ e berei kaa a pɔri mare-kɛɛ-ŋai ŋɔkaayɔɔi su-ɓela kpaa maraŋ tii-kɛ-ɓela da pɔri gɛi sukulai la. (2 Te. 2:​24, 25) Ya pɔri ŋɔnɔ tii kɛi a “Nua Taŋa Da Mo Diyɛɛ” kpiniŋ nyii gaa zɛŋ-lɛɛ kelee kpɛɛ-ŋa Kɛ-ɣeniɛ Ŋaa-nɛ̃ɛ Kula Wɔlɔ-wɔlɔ Da Wɔlɔ-wɔlɔ! kɔlɔi sui. Iɣala-kɔlɔ maa-kɔri-nuui fɔrɔ a gɛɛ e mɛni maa-kɔri e pilaŋ berei ma a pɔri ŋɔlaa-lai sukulai la nua diai. A kɛ pere kaa naa, ya pɔri kpɔnii ma a gɛɛ e pɔri ŋɔlaa-lai sukulai a pere sii lɛlɛɛ. Mɛni maa-kɔriɛ kɛɛ ŋi a pai kpɔnii ma a gɛɛ e tɔɔ a lii-kpele pere ŋɔlaa-lai mɛni ma.

18. Ya pɔri Iɣala-kɔlɔ maa-kɔri-nuui fɔrɔi leŋ a gɛɛ e lono e pilaŋ ŋɔlaa-lai ma ŋala-woo-ɓo tii su? (Maafiu 10:27)

¹⁸ Zisɛ e mo ŋɔpolu-ɓelai dia a gɛɛ di duŋ lɛlɛɛ ɓo nua dia. (Maafiu 10:27 lono.) Ɣala-kɔlɔ maa-kɔri-nuu a pɛlɛ ɣala-woo ɓoi a korai-toli-kpɔŋ, a pai Ziova ŋɔkpɔŋ maai kaai, nyaŋ nyiŋi a pai kpɔnii ma a gɛɛ e gili tɔɔ Ziova ma. Ya pɔri kpɔnii leŋ Iɣala-kɔlɔ maa-kɔri-nuui ma a gɛɛ e mɛni-kpɛtɛɛi ŋi kɛ? A kɛ da ɣala-woo-ɓo tii kɛtɛ ta maa lolo too korai-toli-kpɔŋ su, Iɣala-kɔlɔ maa-kɔri-nuui fɔrɔ a gɛɛ e gili-ŋa sia e pilaŋ mɛnii ma a pɔri gɛi a gɛɛ e kɛ a ŋala-woo-ɓo-nuui ta. Mo ma a gɛɛ ɣala-woo ɓoi fa kɛ a gbanaŋɔɔ a ɣala-woo-ɓo tii kɛtɛ tãi. Mɛni-kpɛtɛɛ takpɛnii a pɔri ŋɔnɔ gɛi ɓa a gɛɛ e pɛlɛ lono tɛɛi nɔɔkuu sama koyaŋ su. Nyiŋi kɛɛ a pai kpɔnii ma a gɛɛ e pɔri ŋɔlaa-lai sukulai a lii-kpele pere.

NƐ IƔALA-KƆLƆ MAA-KƆRI-NUUI MA A GƐƐ I LAAI A NYAA

19. Zisɛ e nɛ leŋ a gɛɛ e kɛ a naa a ŋɔpolu-ɓelai, nyaŋ kwa pɔri bɔɔkɔɔni leŋ?

¹⁹ Zisɛ e lɛɛ pai saai, e mo ŋɔpolu-ɓelai dia a gɛɛ da pai ŋɔnɔ kɛi dikie ma a folo ta. Dife Zisɛ woo ŋa kaa ni ma a gɛɛ e kɛ lonoi e pilaŋ di liɛ ma ɣala-taa. Berei maŋ Zisɛ polu-ɓela dife mɛnii kelee ŋa kaa ni la mai, kɛɛ e kɛ a naa la a gɛɛ ŋɔpolu-ɓelai da ŋwɛlii di Ziova lii laa. (Zɔŋ 14:​1-5, 8) E kɛ a gɔlɔŋɔɔ a gɛɛ maa nɛ̃ɛi tãi e tɛɛ a gɛɛ ŋɔpolu-ɓelai di mɛni taŋa ŋa kaa ma, yɛɛ di liɛ ɣala-taa. (Zɔŋ 16:12) Kua maŋ kwa pɔri laai la a gɛɛ Kuɣala-kɔlɔ maa-kɔri-ɓelai da ŋwɛlii di Ziova lii laa.

20. Sisɛ tɔnɔ nyii kula Malawi lɔii sui, e nɛ leŋ a gɛɛ e kɛ a naa a Ŋɔɣala-kɔlɔ maa-kɔri-nuui?

²⁰ Laa la a gɛɛ Iɣala-kɔlɔ maa-kɔri-nuui a ŋwɛlii e mɛni lɛlɛɛ kɛ. Kwaa sisɛ tɔnɔ nyii da kɛ ma Chifundo, nyii kula Malawi lɔii sui ŋɔmɛni-kɔɔŋ-maai kaa. Sisɛi ŋi e pɛlɛ Ŋala-kɔlɔi ŋaa lɛi Catholic nɛni ta ma Kɛ-ɣeniɛ Ŋaa-nɛ̃ɛ Kula Wɔlɔ-wɔlɔ Da Wɔlɔ-wɔlɔ! kɔlɔi su, nyaŋ nɛnii laa ɓe kɛ a Alinafe. Di kɛɛ daa kpɛɛ zɛŋ-lɛɛi buu kao naaŋ (14) mai, Chifundo e Ŋɔɣala-kɔlɔ maa-kɔri-nuui mare kɛ e pilaŋ ŋɔkili-ŋa-siai ma a pa ɣala pɔɔkɔɔŋ fɛliɛ ma. Alinafe lii e ŋwana, e mo nyɛɛi: “Ŋamɛni-kpɛtɛɛ ka ti!” Naa polu ma Chifundo e pɛlɛ gili-ŋa siai a kɛ Alinafe a pai Ŋala-kɔlɔ maa-kɔriɛ kperai. Kɛɛ e kanaŋ Ŋala-kɔlɔi ŋa lɛi Alinafe ma a lii-kpele pere, nyaŋ e kɛ a naa la a gɛɛ tãi a tɛɛ, a pai gɔlɔni a gɛɛ ɣala pɔɔkɔɔŋ fɛliɛ fe lɛlɛ ni. Ɣaloŋ kpulu tɛɛ, Chifundo e nɛnii mare kɛ a mare-kɛɛ ŋi nyii gaa zɛŋ-lɛɛ buu saaɓa kao naaŋ (34) sui: “Mɛnii yaa maa-kɔri Ŋala-kɔlɔi su e pilaŋ dɔ̃ya Ɣalai Ziova ma aa kpɔŋ maa tɛɛ leŋ ipɔ?” Chifundo e mɛnii ɓo nyii Alinafe e moi. E mo nyɛɛi: “E lono e pilaŋ mɛni-ŋuŋ lɛlɛɛ tamaa ma, nyaŋ e mo a gɛɛ Ziova Ŋɔsere-faa Kɛ-ɓelai difa diyee pu mɛni kelee ta su nyii ve Ŋala-kɔlɔi sui.” Tãi taŋa tɛɛ polu ma, Alinafe e kpera ɣala pɔɔkɔɔŋ fɛliɛ ma, nyaŋ e batai kɛ naa polu ma.

21. Kwa pɔri kpɔnii leŋ Kuɣala-kɔlɔ maa-kɔri-nuui ma a gɛɛ e mɛni-kpɛtɛɛ kɛ a gɛɛ e Ziova fɛli?

²¹ Berei maŋ Ziova ɓe a gɛ la a gɛɛ Kuɣala-kɔlɔ maa-kɔri-nuui e “ɓɔlɔi,” kɛɛ kwa pɔri kpɔŋ maa tɛɛi Kuɣala-kɔlɔ maa-kɔri-nuui pɔ a gɛɛ e maa tɛ. (1 Kl. 3:7) Kufa mɛnii nyii Ɣala a ŋwɛlii a gɛɛ Kuɣala-kɔlɔ maa-kɔri-nuui e gɛi lɛ nɔ ma, kɛɛ kwa kpɔŋ maa tɛɛ bɔ a gɛɛ wɛli-kɛ-maa su kpanaŋɔɔ e kɛ nyeei Ziova mɛni ma. Kwa ŋɔnɔ vɔrɔ a gɛɛ e ŋɔwɛli-kɛ-maai lɛ Ziova mɛni ma a maa mɛni puɔɔ fulɔi ŋɔkɛ-ɣeniɛi su. Kwa ŋɔnɔ sɛŋ lɛ ma e pilaŋ berei ma a pɔri gili tɔɔi la Ziova ma a kɛ tɛɛi mɛni-kpanaŋ-ŋa su. Kwa nɛ Kuɣala-kɔlɔ maa-kɔri-nuui ma a gɛɛ ku laai la a gɛɛ a pai Ziova lii laai, nyiŋi a gbonoi kpanaŋ a gɛɛ nyaa maŋ a pɔri mɛni-kpɛtɛɛ kɛi a gɛɛ e Ziova fɛli.