I Kpɛtɛɛ Naa A Gɛɛ I Batai Kɛ?

Yaa mɛni tamaa maa-kɔri e pilaŋ Ziova ma Iɣala-kɔlɔ maa-kɔriɛ sarai. Nyaŋ tãi ta, yaa mɛni maa faleŋɔɔ-ŋa kɛ a gɛɛ I sia a mɛnii I maa-kɔrii. Tãi ta mɛni ta kaa naa nyii I kperai a gɛɛ I ikpiŋ tɛɛ Ziova pɔ, I batai kɛ. Zɛŋ-lɛɛi ŋi su, kwa pai lonoi e pilaŋ mɛni-ŋa taŋa dia nyii a nuu kpera batai kɛi da berei iyee a pɔri tɛɛi la diai.

1. Le ɓe maa nɛ̃ɛi I gɔlɔŋ I lɛɛ pai batai kɛi?

I lɛɛ pai batai kɛi, maa nɛ̃ɛi I “dɔ̃yai maa-tarei kɔlɔŋ.” (1 Temete 2:4) Nyiŋi fe nɛi a gɛɛ maa nɛ̃ɛi I mare-kɛɛ-ŋai kelee sukulai kɔlɔŋ Ŋala-kɔlɔi su I lɛɛ pai batai kɛi. Korai-ɓela nyii-ŋai daa kpiŋ batai kɛ a tãi su koyai, dikaa nii Ŋala-kɔlɔi maa-kɔrii. (Kolasiɛŋ 1:​9, 10) Kɛlɛ maa nɛ̃ɛi I dɔ̃ya mɛni-ŋai Ŋala-kɔlɔi sui ŋaa kaa ma. Korai-toli-kpɔŋ laa-tuɛ-ɓelai da pai kpɔŋ maa tɛɛi ipɔ a gɛɛ I gaa a kɛ yaa mɛni tamaa maa-kɔri Ŋala-kɔlɔi su.

2. Le mɛni-ŋa ɓe maa nɛ̃ɛi I gɛ I lɛɛ pai batai kɛi?

I lɛɛ pai batai kɛi, maa nɛ̃ɛi I ‘ilii pene . . . I pa ŋɔnɔ polu Ɣala pɔ.’ (Dikɛ-mɛni-ŋai 3:​19 lono.) Nyiŋi sukulai ɓa ilii e too polu a ŋanaa isɔnyɔŋ-ŋai mɛni ma, I Ziova fɛli a gɛɛ e I su mɛni lɛɛ. Maa nɛ̃ɛi ŋɔnɔ I sia a bere sii nyii pai Ɣala lii laai, I kɔ a gbanaŋɔɔ a gɛɛ ife iyee pu tua-pere nyɔŋ su. E tee nyiti ma, maa nɛ̃ɛi ikɛ li goyaŋ-ŋai su, ikɛ ɣala-woo ɓo a korai-toli-kpɔŋ.

3. Le mɛni ɓe ife nɛɛ la naa a gɛɛ yao e I kpera batai kɛi?

Nua taŋa difa dikpiŋ tɛɛ Ziova pɔ kpɛni fei, da kɛ yaoi a gɛɛ dife pai pɔrii dikono-teei ŋaa-see kɛi Ziova yeei. Tɔ̃ya ma, tãi taŋa ya pai pɔara-mɛni-maa-ŋa kɛi yɛɛ berei nɔ Ɣala fɛli-ɓela taŋa di wɔlɔ gɛ lai. Ziova e gɔlɔŋ a gɛɛ kumaa fe waa ni. (Ŋule-wooi 103:​13, 14 lono.) Nii a laa kwa kɔ a pere sii kelee a gɛɛ ku nĩa-mɛni kɛ! A pai kpɔŋ maa tɛɛi ipɔ. E tee nyiti ma, Ziova aa mo kua a gɛɛ sɛŋ ta “fe pai pɔrii ku kulai Ɣala ŋɔwɛli kɛ-maai ma.”​—Lomaŋ 8:​38, 39 lono.

MƐNI TAMAA MAA-KƆRI

4. Kɔ I Ziova kɔlɔŋ a nɛlɛɛ

Mɛni-ŋa kɛɛ leŋ ɓe maa nɛ̃ɛi I gɔlɔŋ e pilaŋ Ziova ma I lɛɛ pai batai kɛi? Maa nɛ̃ɛi I Ziova kɔlɔŋ a nɛlɛɛ, I ŋwɛli, I nĩa-mɛni kɛ. VILOI su kaa a gɛɛ I berei kaa Ɣala-kɔlɔ maa-kɔri-ɓela taŋa daa gɛ la ŋeniɛi gwaa kelee. Gɛ ni ka lono e pilaŋ mare-kɛɛ ŋi ma.

VILOI: Mɛni-ŋai Ya Pɔri Gɛi A Gɛɛ I Batai Kɛi (3:​56)

• Viloi su, le ɓe kpɔŋ maa tɛɛ nua taŋa pɔ a gɛɛ di dikpiŋ kpɛtɛ batai mɛni ma?

Lomaŋ 12:2 lono, gɛ ni ka lono e pilaŋ mare-kɛɛ-ŋai ŋi dia:

• Ikili-ŋa puɔɔi a pa mɛnii ma ya maa-kɔrii Ŋala-kɔlɔi su kpaa I laai la a gɛɛ Ziova Ŋɔsere-faa Kɛ-ɓelai da dɔ̃yai lɛi?

• A kɛ bere ɓe gaa la, le ɓe ya pɔri gɛi e pilaŋ ma?

5. Mɛni-ŋai da pɔri I kperai batai kɛi yee mɛi ɣale

Kwa mɛni-kpɛtɛɛ kɛ a gɛɛ ku kukpiŋ tɛɛ Ziova pɔ ku batai kɛ, ku kelee kwa tɛɛ mɛni-kpanaŋ-ŋa su. A gɛɛ I gɔɔŋ-maa kaa, VILOI su kaa, gɛ ni ka lono e pilaŋ mare-kɛɛ-ŋai ŋi dia.

VILOI: Iwɛli-kɛ-maai Ziova Mɛni Ma A Gɛ Iyee E Tɛɛ Mɛni-kpanaŋ-ŋa Dia (5:​22)

• Viloi su, mɛni-kpanaŋ-ŋa kɛɛ leŋ ɓe maa nɛ̃ɛi kɛ Narangerel yee e tɛɛ dia a gɛɛ e Ziova fɛli?

• Ŋɔwɛli-kɛ-maai Ziova mɛni ma, e kpɔŋ leŋ ma a gɛɛ nyee e tɛɛ ŋɔmɛni-kpanaŋ-ŋai dia?

Tare-woo-ŋa 29:​25 da 2 Temete 1:7 lono, gɛ ni ka lono e pilaŋ mare-kɛɛ ŋi ma:

• Le ɓe a pɔri gɛi a gɛɛ kulii e kɛ a gbeleɛ, kuyee e tɛɛ mɛni-kpanaŋ-ŋa dia?

6. Laa la a gɛɛ Ziova a pai kpɔŋ maa tɛɛi ipɔ

Ziova a pai kpɔnii ya a gɛɛ I nĩa-mɛni kɛ. VILOI su kaa, gɛ ni ka lono e pilaŋ mare-kɛɛ-ŋai ŋi dia.

VILOI: Ziova A Pai Kpɔnii Ya (2:​50)

• Viloi su, le ɓe Ŋala-kɔlɔ maa-kɔri-nuui kpera batai kɛi?

• Le ɓe e maa-kɔri nyii ŋɔlaa-lai su kpanaŋ Ziova kponoi?

Azaya 41:​10, 13 (NWT) lono, gɛ ni ka lono e pilaŋ mare-kɛɛ ŋi ma:

• Ya pɔri laai leŋ la a gɛɛ ya pai gono-teei I gɛ I kɛɛ ikpiŋ tɛɛi Ziova pɔi ŋaa-see kɛi?

7. Iyee-see-mui su kpanaŋ Ziova ŋɔwɛli-kɛ-maai mɛni ma

Ya ikili-ŋa sia a damaa e pilaŋ berei ma I wɛli kaa la Ziova mai, ya pai ŋwɛlii I zɛɣɛi fe a damaa, I vɛli wɔlɔ-wɔlɔ da wɔlɔ-wɔlɔ. Ŋule-wooi 40:5 lono, gɛ ni ka lono e pilaŋ mare-kɛɛ ŋi ma:

• Ziova ŋɔluwa-ŋai nenɛ kpɔ ɓe ilii nɛ̃ɛi mɛni mai?

Ɣala ŋɔlono-kɛ-nuui Zɛlemaya e kɛ a Ziova wɛliɛ, ŋoo wɛli kɛ ɓo ŋɔnɔ ma, nyaŋ nii e kɛ a nɛ̃ɛ a gɛɛ Ziova laa e kɛ ma. E mo nyɛɛi: “Nya ɓe iwooi e gɛ nii e nɛ̃ɛ, kpɛni fei ŋgaa a ipɔɔ, O Ŋwala-wala kelee Yawɛɛ.” (Zɛlemaya 15:​16) Mare-kɛɛ-ŋai ŋi sukula:

• Le mɛni ɓe gaa la a mɛni lɛlɛɛ a gɛɛ ikɛ a Ziova Ŋɔsere-faa Kɛ-ɓelai dɔnɔ?

• Ya ŋwɛlii I batai kɛ a gɛɛ ikɛ a Ziova Ŋɔsere-faa Kɛ-ɓelai dɔnɔ?

• Mɛni ta kaa naa nyii I kperai nyiti kɛi?

• I laai la le ɓe maa nɛ̃ɛi I gɛ a gɛɛ I batai kɛ?

MƐNI-ŊUŊ-ŊAI YAA MAA-KƆRII

Ziova a pai kpɔnii ya a gɛɛ iyee e tɛɛ mɛni-ŋai dia nyii a pɔri I kperai batai kɛi.

Gili-too-ŋa mare-kɛɛ-ŋai

• Le ɓe maa nɛ̃ɛi I maa-kɔri Ŋala-kɔlɔi su I lɛɛ pai batai kɛi?

• Mɛni maa faleŋ-ŋa kɛɛ leŋ ɓe maa nɛ̃ɛi I gɛ I lɛɛ pai batai kɛi?

• Le mɛni ɓe maa fe nɛ̃ɛi ni la I nɛɛ la naa a gɛɛ yao e I kpera batai kɛi?

MƐNI TAKPƐNI-ŊA MAA-KƆRI

Mɛnii kaa maa nɛ̃ɛi imɛni-kpɛtɛɛ a gɛɛ I batai kɛi e kɛ a bilaŋɔɔ ma.

“I Kpɛtɛɛ Naa A Gɛɛ I Batai Kɛ?” (Nyeŋkeŋ, Vuu-laɣii 2020)

Berei kaa ya pɔri mɛni-kpanaŋ taŋa yee mɛi ɣalei la nyii a pɔri I kperai batai kɛi.

“Le Ɓe Ŋgberai Batai Kɛ Mɛni Ma?” (Nyeŋkeŋ, Vuu-laɣii 2019)

Berei kaa naloŋ tɔnɔ yee e tɛɛ la mɛni-kpanaŋ taŋa dia a gɛɛ nɔ e batai kɛ.

‘Le Ɓe I Kperai Batai Kɛi?’ (1:10)

Ataa fe kɛ ni ŋwɛlii a gɛɛ e batai kɛ a tãi maa-ŋuŋ. Kɛlɛ mɛnii kaa nyii nii kula a gɛɛ e mɛni-kpɛtɛɛ lɛlɛɛ ŋi kɛi.

Maa Nɛ̃ɛi Di Mɛni Lɛlɛɛ-ŋai Ŋi Kɛ Mi? (7:21)