ZƐŊ-LƐƐI 37
Mɛnii Ŋala-kɔlɔi E Mo E Pilaŋ Kapa Da Tii Kɛɛ Ma
Ilii a taa wɔlɔ sɛlɛŋ e pilaŋ kapa kpaa tii kɛ mɛni ma? A kɛ a gbanaŋɔɔ a gɛɛ ku kukpiŋ mɛi kaa, ku ŋɔnɔ Ziova fɛli yɛɛ berei maa nɛ̃ɛi ku gɛ lai. Lia-woo lɛlɛɛ-ŋa kaa Ŋala-kɔlɔi su nyii a pɔri kpɔnii kua.
1. Le ɓe Ŋala-kɔlɔi e mo e pilaŋ tii kɛɛ ma?
Ɣala a ŋwɛlii a gɛɛ ku kutii ŋaa nɛ̃ɛ kula. Ŋala-kɔlɔi e mo nyɛɛi ‘mɛnii nɔ nuu a pɔri gɛi nya ɓa, e kɔ e zɛŋ sɔlɔ ɓo a tii kɛi mɛni mai e ŋaa nɛ̃ɛ kula.’ (Ikilisiati 3:22) Ziova a tii kɛ a gbanaŋɔɔ. Kwa bɔɔ kɔɔŋ a tii kɛɛ a gbanaŋɔɔ, kwa nii laa nyaŋ nyiŋi a pa a lii-nɛ̃ɛ kupɔ.
Tii kɛɛ kaa a mɛni lɛlɛɛ. Kɛɛ kufe wɔlɔ maa mɛni siɣe a gbanaŋɔɔ e tɛɛ la Ziova fɛliɛ ma. (Zɔŋ 6:27) Aa gono tee a gɛɛ kwa maa mɛni pu fulɔi, a pai zãai kelee maa kpaaŋ kaa kuai tɛɛi kupɔ.
2. Kili-ŋa-sia kɛɛ leŋ ɓe nɛlɛɛi e pilaŋ kapa mɛni ma?
Berei maŋ Ŋala-kɔlɔi e mo la a gɛɛ “sɛŋ-kao a nuu maa kɔ̃ɔ” lai, e ŋɔnɔ nɛ a gɛɛ kapa nɔ fei a pa a lii-nɛ̃ɛ nuu pɔ. (Ikilisiati 7:12) Mɛni ma, Ŋala-kɔlɔi a ku fɔrɔi a gɛɛ kufe kapa wɛli, kɛlɛ ‘kulii e laa zɛŋ kuyeei mɛni ma.’ (Ibulu 13:5 lono.) Kulii a kɛ a naa zãai kuyeei mɛni ma, kulii fe pai wɔlɔ tooi polu a gɛɛ sãa tamaa fe kuyeei. Kufe pai kɛi nɔ kpa sonii. (Tare-woo-ŋa 22:7) Nyaŋ kufe pai kuyee pui kpɛ̃ɛŋ kɔ mɛni su kpaa ku kɔ a gɛɛ ku tɔɔ-laa sɔlɔ ɓo a maa fela.
3. Kwa pɔri kɛi leŋ a kuyee laa ɓoɔɔ a kukapai?
Ziova kaa a yee laa ɓo Ɣala, nyaŋ kwa bɔɔ kɔɔŋ a kɛ ‘kuyee foaŋɔɔi kua sɛŋ kɔlɛɛ su.’ (1 Temete 6:18) Kwa pɔri tii kɛi a kukapai a yee-laa ɓo pere kwa kpɔŋ maa tɛɛ korai-toli-kpɔŋ pɔ da nua takpɛni-ŋa, yɛɛ kuɓaraŋ korai-ɓela titi nyii-ŋai ŋwɛlii a kpɔŋ maai. Zãai kwa dɛɛi tamaa pere fei Ziova a gaa, kɛɛ ŋɛi a kɛ mɛni-ŋuŋ ma kwa di tɛɛi mɛni mai. Kwa ɓɛlɛ-see kɛ e kula kulii su, nyiŋi a pai kulii nɛ̃ɛi e Ziova lii laa.—Dikɛ-mɛni-ŋai 20:35 lono.
MƐNI TAMAA MAA-KƆRI
Mɛni lɛlɛɛ-ŋai kaa ya pai zɔlɔ ɓoi kili-ŋa-sia lɛlɛɛ a kɛ iyeei tii mɛni ma da iyeei sãa.
4. Ziova laa maa tɛ a berei ya tii kɛ lai
Maa nɛ̃ɛi kulaoi-laai a Ziova e kpɔŋ maa tɛɛ kupɔ a pa kukili-ŋa-siai ma e pilaŋ tii kɛɛ ma. VILOI su kaa, gɛ ni ka lono e pilaŋ mare-kɛɛ-ŋai ŋi dia.
Viloi su, le ɓe ilii kula e pilaŋ Jason ŋɔkili-ŋa-siai da dua-pere ma ŋɔtii kɛɛ su?
Le ɓe e gɛ a gɛɛ ve tii maa mɛni pu fulɔi ŋɔkɛ-ɣeniɛi su?
Kolasiɛŋ 3:23, 24 (NWT) lono, gɛ ni ka lono e pilaŋ mare-kɛɛ ŋi ma:
Le mɛni ɓe kutua-pere e pilaŋ tii ma kaa la a mɛni-kpanaŋ?
Tii mɛni kaa a mɛni-kpanaŋ. Kɛɛ kufe wɔlɔ maa mɛni pu fulɔi kukɛ-ɣeniɛi su e tɛɛ la Ziova fɛliɛ ma
5. Kulii a kɛ a naa zãai kuyeei mɛni ma, a pa a mɛni lɛlɛɛ-ŋa kupɔ
Nua tamaa da kɔ a gɛɛ di kapa tamaa sɔlɔ ɓo. Kɛlɛ Ŋala-kɔlɔi e lia-woo takpɛni-ŋa tɛɛ kupɔ. 1 Temete 6:6-8 lono, gɛ ni ka lono e pilaŋ mare-kɛɛ ŋi ma:
Le ɓe Ŋala-kɔlɔi a ku fɔrɔi a gɛɛ ku gɛ?
Kulii a pɔri kɛi nii a nɛ̃ɛ a nɛɛ maŋ sãa tamaa fe kɛ kuyeei. VILOI su kaa, gɛ ni ka lono e pilaŋ mare-kɛɛ ŋi ma.
Le ɓe pa a lii-nɛ̃ɛ gaayɔɔ-ŋai ŋi pɔ berei maŋ sãa tamaa fe kɛ ni la diyeei?
Kɛlɛ le ɓe pai kɛi a kɛ kapa kaa kuyeei, kukɛ nii damaa wɛli? Zisɛ e mɛni-kɔɔŋ-maa ta lɛ nyii nɛ a gɛɛ nyiŋi fe lɛlɛ ni. Luu 12:15-21 lono, gɛ ni ka lono e pilaŋ mare-kɛɛ ŋi ma:
Le ɓe yaa maa-kɔri Zisɛ ŋɔmɛni-kɔɔŋ-maai su?—Ŋoo-kpua 15 kaa.
Tare-woo-ŋa 10:22 (NWT) da 1 Temete 6:10 lono a gɛɛ I mɛni takpɛni-ŋai kaa da moi. Gɛ ni ka lono e pilaŋ mare-kɛɛ-ŋai ŋi dia:
I laai la le ɓe mɛni kpanaŋɔɔi e tɛɛ sɛŋ kelee mai? Laoi-laa kɛɛ a Ziova kpaa kapa tamaa kɛɛ kuyeei? Le mɛni ma?
Mɛni-kpɔlu-ŋa kɛɛ leŋ ɓe a kula kapa tamaa kɔriɛ su?
6. Ziova a pai zãai maa kpaaŋ kaa kuai tɛɛi kupɔ
Tii kpaa kapa tamaa a wala kɛ kuyeei, nyiŋi a kulaa-lai Ziova kponoi su kɔɔŋ. VILOI su kaa, a gɛɛ I berei kaa kwa pɔri tɔɔi la a gbanaŋɔɔ zukɔɔŋ-ŋai ŋi su, gɛ ni ka lono e pilaŋ mare-kɛɛ-ŋai ŋi dia.
Viloi su, mɛni-kpɔlu-ŋa kɛɛ leŋ ɓe bɔlɔi e tɛɛ zui?
Le ɓe e gɛ a gɛɛ e tɔɔ a gbanaŋɔɔ mɛni-kpɔlu-ŋai ti su?
Maafiu 6:25-34 lono, gɛ ni ka lono e pilaŋ mare-kɛɛ ŋi ma:
Le ɓe Ziova aa gono tee a gɛɛ a pai gɛi diai da maa mɛni pu fulɔi mɛni ma?
NUA TAŊA DA MO DIYƐƐI: “Maa nɛ̃ɛi ŋa tii kɛ a gbanaŋɔɔ a gɛɛ ŋa ŋakaayɔɔi mɛi kaa. Mɛni ma mva pɔri lii goyaŋ-ŋai kelee su a lɔɔ-kuu kelee.”
Ɣala-kɔlɔ-kpua kɛɛ leŋ ɓe nɛ ya a gɛɛ Ziova maa mɛni puɔɔ fulɔi ikɛ-ɣeniɛi su kaa a mɛni-kpɛtɛɛ lɛlɛɛ?
MƐNI-ŊUŊ-ŊAI YAA MAA-KƆRII
Tii kɛɛ da kapa sɔlɔ ɓoɔɔ kaa a mɛni lɛlɛɛ, kɛlɛ kufe wɔlɔ nɛɛ naa a gɛɛ mɛni-ŋai ŋi di kuŋɛi kula Ziova fɛliɛ ma.
Gili-too-ŋa mare-kɛɛ-ŋai
Le ɓe pai kpɔnii ya a gɛɛ kili-ŋa-sia lɛlɛɛ e kɛ iyeei e pilaŋ tii mɛni ma?
Mɛni lɛlɛɛ kɛɛ leŋ ɓe ya zɔlɔ ɓo ilii a kɛ a naa zãai iyeei mɛni ma?
Ya pɔri nɛi leŋ a gɛɛ I laai a Ziova ŋɔkono-teei a gɛɛ a pai vɛli-ɓela mɛi kaai?
MƐNI TAKPƐNI-ŊA MAA-KƆRI
Gaa a kɛ Ŋala-kɔlɔi e mo a gɛɛ kapa kaa a sɛŋ nyɔmɔɔ.
I Laai La “Sɛŋ-kao . . . Kaa A Sɔnyɔŋ Sii Kelee Same?” (Zɛŋ-lɛɛi ŋi kaa jw.org fãai ŋa)
Berei kaa kwa pɔri tii kɛi la a kukapai a gɛɛ ku Ɣala lii laa.
“Le Ɓe Ŋala-kɔlɔi E Mo E Pilaŋ Ɓɛlɛ-see Kɛɛ Ma?” (Zɛŋ-lɛɛi ŋi kaa jw.org fãai ŋa)
I laai la kpɛ̃ɛŋ-kɔɔ kaa nɔ a pele kɛɛ?
“Mɛnii Ŋala-kɔlɔi E Mo E Pilaŋ Kpɛ̃ɛŋ-kɔɔ Mai” (Kɛ-a-iŋɛi!, Vuu-laɣii 2015)
Mɛnii kaa gɛ naloŋ tɔnɔ kɛ nyee kula kpɛ̃ɛŋ-kɔɔ da ŋuma-mɛni su.
“Ŋa Kɛ A Gbagba-fulɔi Wɛliɛ Nyii Da Gɛ A Sooi” (Nyeŋkeŋ, Bɔrɔŋ-kpalai 1, 2011)