Ngani Syambone Syaŵalembile Maliko
4 Yesu jwatanditesoni kwajiganya ŵandu mungulugulu nyasa, mwamti kwayiche ŵandu ŵajinji. Myoyo jwalakwe jwakwesile mwiboti ni kutama pasi. Libotilyo lyajimi pakutalichila panandi ni mungulugulu nyasa, nambo ŵandu wosopewo ŵajimi mungulugulu nyasajo. 2 Pelepo jwalakwe jwatandite kwajiganya ŵanduwo yindu yejinji pakamulichisya masengo yiwanichisyo. Paŵaliji mkwajiganya, ŵatite, 3 “Apikane. Mundu jwine jwakumisa mbeju jwapite kukumisa mbeju. 4 Paŵaliji mkumisa, sine syagwilile mumbali mwa msewu, mwamti yijuni yayiche ni kulya mbejusyo. 5 Mbeju sine syagwilile palwala, soni mwachitemachitema syatandite kumela ligongo paliji pana litaka lyamnono. 6 Nambo lyuŵa palyakwesile, syatiniche ni kuwa ligongo michiga jakwe nganijijinjila pasi. 7 Mbeju sine syagwilile pamiŵa, soni miŵasyo syakusile ni kulepelekasya mbejusyo kukula mwamti nganisisogola. 8 Nambo mbeju sine syagwilile pa litaka lyachajila, syamesile ni kukula kaneko syatandite kusogola. Sine syasogwele songolo 30, sine 60 soni sine 100.” 9 Kaneko jwajonjechesye kuti, “Jwalijose jwakwete mawiwi apikane.”
10 Sambano Yesu paŵaliji jika, ŵandumetume ŵakwe 12 ŵala pampepe ni ŵandu ŵane ŵaŵaliji nawo ŵatandite kumwusya jwalakwe yakwamba yiwanichisyo yila. 11 Jwalakwe ŵasalile jemanjajo kuti, “Mlungu ampele jemanja upile wakupikanichisya yakusisika yakwamba Uchimwene wa Mlungu, nambo kwa ŵane yindu yosope yikusagamba kuŵa mu yiwanichisyo. 12 Yeleyi yili myoyo ni chakulinga chakuti, atamose kuti akulola nambo ngasamanyilila, soni atamose kuti akupikana nambo ngasapikanichisya kugopolela kwakwe. Soni ligongo lya yeleyi, ngasagalawuka mtima kuti akululuchidwe.” 13 Ŵasalilesoni kuti, “Naga jemanja ngamkupikanichisya chiwanichisyo chelechi, nambi mpaka mpikanichisye wuli yiwanichisyo yine?
14 “Jwakumisa mbeju jula ali mundu jwakusalalichila maloŵe ga Mlungu.* 15 Mbeju syasyagwilile mumbali mwa msewu sila sili ŵandu ŵele pagapikene maloŵe, Satana akusayika ni kugatyosya maloŵe gagapandidwe mwa jemanjajo. 16 Mbeju syasyagwilile palwala sila sili ŵandu ŵele pagapikene maloŵe, akusagapochela mwakusangalala, 17 nambo ligongo lyakuti maloŵego nganigatamilichika mwa jemanjajo, gakusatama ndaŵi jamnono. Sambano pasimene ni yakusawusya kapena pakulagasidwa ligongo lya maloŵego, akusajasa chikulupi. 18 Mbeju syasyagwilile pamiŵa sila sili ŵandu ŵakusapikana maloŵe, 19 nambo yakudandawulisya ya mu ndaŵi* ajino soni chinyengo cha chipanje nambosoni kukumbila mnope yindu, yikusajinjila mumtima ni kulepelekasya maloŵego kukula, soni gangasogola. 20 Nambo mbeju syasyagwilile pa litaka lyachajila sila sili ŵandu ŵakusagapikana maloŵe ni kugapochela chenene, soni akusasogola mbeju, ŵane 30, ŵane 60, soni ŵane 100.”
21 Jwalakwe ŵasalilesoni jemanjajo kuti, “Ŵandu ŵangajigala nyali ni kujiwunichila ni lukalala* kapena kujiŵika kusi kwa bedi*, akusatenda myoyo mpela? Ana ngaŵa akusajijigala ni kujiŵika pa chakuŵikapo nyali? 22 Myoyo pangali chindu chakusisika chele ngasichiwonechela kwa ŵandu, soni pangali chindu chewunichile chenene chele ngasichiwonechela pakulanguka. 23 Jwalijose jwakwete mawiwi apikane.”
24 Jwalakwe jwapitilisye kuti, “Myiganichisye chenene yindu yamkupikanayi. Mlingo wamkwalinjila nawo ŵane, chachimlinjilasoni uwowo, mwamti chachimjonjechesya yejinji. 25 Pakuŵa jwalijose jwakwete yindu, chachipochela yejinji, nambo jwalijose jwanganakola, chachimsumula atamose yindu yamnono yakuganisya kuti akwete.”
26 Yesu ŵaŵechetesoni kuti, “Uchimwene wa Mlungu uli mpela mundu jwakusamisa mbeju petaka. 27 Mundujo chilo akusagona soni kundaŵi akusajimuka, mwamti mbejusyo sikusamela ni kukula nambo mwayikusatendechela yeleyi, jwalakwejo jwangamanyilila. 28 Pajika, mbejusyo sikusamela petaka mwapanandipanandi kaneko kukula soni pambesi pakwe sikusasogola. 29 Nambo mbejusyo pasikomele, jwalakwe akusasikata ni chikwakwa ligongo ndaŵi jakwe jagowola jikwanile.”
30 Jwalakwe jwapitilisyesoni kuti, “Ana Uchimwene wa Mlungu mpaka tuwulandanye ni chichi, kapena ana mpaka tuwulondesye ni chiwanichisyo chamtuli? 31 Uli mpela kambeju* kamwana mnope kele pandaŵi ja kupanda kakusaŵa kamwana mnope pa mbeju syosope sya pachilambo chapasi. 32 Nambo pakapandidwe, kakusakula ni kuŵa chitela chekulungwa mnope kupunda mbeju syosope sya kumatimbe, soni chikusatenda nyambi syekulungwa, mwamti yijuni yamwinani yikusapata malo gakutama mu m’bulili mwakwe.”
33 Jwalakwe jwaŵechete ni jemanjajo pakamulichisya masengo yiwanichisyo mpela yeleyi, mwakamulana ni yele ŵanduwo akakombwele kuyipikanichisya. 34 Yisyene, pangali chilichose chaŵaŵechete ni jemanjajo mwangakamulichisya masengo yiwanichisyo. Nambo pali kwajika ni ŵakulijiganya ŵakwe, ŵagopolelaga yindu yosopeyo.
35 Palisiku lilili kuli kuswele, jwalakwe ŵasalile ŵakulijiganya ŵakwe kuti, “Kwende tujombochele lisi line lya nyasa.” 36 Myoyo ŵakulijiganya ŵakwewo ŵajisalile gulu ja ŵandu jajaliji pelepo kuti jijawuleje kaneko ŵamjigele Yesu mwiboti. Paulendowo paliji panasoni maboti gane. 37 Sambano panyasapo patandite chimbungo chakogoya soni patendaga matumbela mpaka mesi gatandite kwinjila mwibotimo, mwamti libotilyo lyasigele panandi kutiŵila. 38 Nambo Yesu ŵaliji ali kunyuma kwa liboti, ali agonile ni kusamila pilo. Myoyo jemanjajo ŵamjimwisye ni kumsalila kuti, “Mwalimu, ana ngakuyiwona kuti chituwe?” 39 Pelepo ŵajimwiche ni kujilekasya mbungojo soni kujisalila nyasajo kuti, “Mtame bata!” Kaneko mbungojo jalesile mwamti kwatesile bata. 40 Sambano jwalakwe ŵasalile jemanjajo kuti, “Ligongo chichi mkutenda woga chamti myiyi? Ana nganimkolape chikulupi?” 41 Nambo jemanjaji woga wakamwile mnope, mwamti ŵaliji mkuŵechetana kuti, “Ana mundu jweleju ali ŵani kusyesyene? Atamose mbungo ni nyasa eti yikumpikanila.”