Chikalata Chandanda Chakwawula kwa Atesalonika
2 Achalongo achimjangu, jemanja mkumanyilila chenene kuti yatwatesile patwayiche kweleko nganiyigamba kwawula pachabe. 2 Jemanja mkumanyililasoni kuti pandanda twalasile mnope soni ŵandu ŵatutendele yindu yachipongwe ku Filipi. Nambo atamose yaliji myoyo, Mlungu ŵatukamuchisye kuŵa ŵakulimba mtima kuti tumsalile jemanja ngani syambone sya Mlungu atamose kuti papali ŵakusisya ŵajinji.* 3 Pakuŵa yiliyose yatukusamsalila mwakumchondelela ngatukusayisala ni nganisyo syaunami kapena syakusakala kapenasoni mwachinyengo. 4 M’wejitu Mlungu ŵatujitichisye ni kutuwona kuŵa ŵakuŵajilwa kulalichila ngani syambone, myoyo tukulalichila ngaŵa pakusaka kwasangalasya ŵandu nambo Mlungu, jwele jwakusawungunya mitima jetu.
5 Jemanja mkumanyilila kuti m’weji nganituŵechetaga mwakumnyenjelela pakusaka kumkopa, soni nganitutendaga yindu mwautambwali ni chakulinga chakusaka kupata yineyakwe. Mlungu ali mboni jetu. 6 Nambosoni nganitusakaga kuti ŵandu atuchimbichisyeje, chinga jemanja kapena ŵandu ŵane. Twatesile yeleyi atamose kuti yaliji yakomboleka kumsalila jemanja kuti mtukamuchisyeje ligongo tuli ŵandumetume ŵa Klistu. 7 Mmalomwakwe twaliji ŵakuwusimana mtima pasikati penu, mpela mwakusatendela jwamkongwe jwakonjesya pakwasamalila ŵanache ŵakwe. 8 Myoyo ligongo lyakuti tukusamnonyela mnope jemanja, twaliji ŵakusachilila kumpa ngani syambone sya Mlungu, atamosesoni umi wetu usyesyenewo, ligongo twamnonyele mnope.
9 Achalongo achimjangu, ngangukayichila kuti jemanja mkukumbuchila masengo getu gatwakamwile mwakulimbichila mnope soni kulipeleka kwetu. Patwalalichilaga ngani syambone sya Mlungu kwa jemanja, twalijisoni mkukamula masengo chilo ni musi ni chakulinga chakuti tukamlagasyaga jwalijose mwa jemanja mwakumŵenda kuti atukamuchisyeje. 10 Twaŵele ŵakulupichika, ŵakulungama soni ŵangali chakulemwa chilichose patwatendaga yindu ni jemanja ŵakulupilila achimjetu. Jemanja mli mboni pa yindu yeleyi, Mlungusoni ali mboni. 11 Jemanja mkumanyilila chenene kuti twaliji kumchondelela, kumlimbikasya soni kumdandawulila jwalijose mwa jemanja yakuti atendeje, mpela mwakusatendela mtati ni ŵanache ŵakwe. 12 Twatesile yeleyi ni chakulinga chakuti jemanja mpitilisye kwenda mwakuŵajilwa pameso pa Mlungu. Jwalakwe akumŵilanga kuti mjinjile mu Uchimwene wakwe soni kuti mpochele uchimbichimbi wakwe.
13 Ni ligongo lyakwe m’wejisoni ngatukuleka kumyamichila Mlungu ligongo jemanja pamwapochele maloŵe ga Mlungu gele mwagapikene kutyochela kwa m’weji, mwagapochele ngaŵaga mpela maloŵe ga ŵandu, nambo mpela mwagaŵelele kusyesyene kuti gali maloŵe ga Mlungu. Maloŵe gelega gakukamula masengo mwa jemanja ŵakulupilila achimjetu. 14 Jemanja achalongo achimjangu, mwatesile yakulandana ni yajatesile mipingo ja Mlungu ja ku Yudeya jajili jakamulana ni Klistu Yesu. Jemanja mwalasile mnope m’makono mwa ŵandu ŵakumangwenu peko mpela mwakulajilasoni jemanjajo m’makono mwa Ayuda. 15 Ayuda ŵeleŵa ni ŵaŵawulejesoni Ambuje Yesu soni ŵakulochesya nambosoni ni ŵaŵatulagasisye m’weji. Jemanjaji ngakutenda yakumsangalasya Mlungu, soni yakusatendaga yili yangakamuchisya kwa jwalijose, 16 ligongo jemanjaji akusatenda yakuti m’weji tulepeleje kwalalichila ŵandu ŵamitundu jine kuti nombenawo akulupuche. Pakutenda yeleyi, akusaŵa kuti akuyitupiya yakulemwa yawo. Nambo sambano chilango* cha Mlungu chagwilile jemanjaji.
17 Achalongo achimjangu, munyumamu ŵandu ŵatulekangenye ni jemanja kwa kandaŵi kamnono, atamose kuti mitima jetu nganijilekangana ni jemanja. Pandaŵiji, twatesile yiliyose yakomboleka kuti tuwoneganesoni ni jemanja pameso ni pameso ligongo twaliji ŵakusachilila mnope kumwona. 18 Paligongo lyeleli, twasakaga kwika kwa jemanja, elo, unejo Paulo, nalinjile kaŵili kose kuti mbiche kwa jemanja, ngaŵaga kampepe. Nambo Satana ŵatuwugalile litala. 19 Ana chembecheyo chetu soni chisangalalo chetu nambosoni mboto* jatuchisangalalila pameso pa Ambuje ŵetu Yesu pandaŵi ja kuŵapo* kwawo, jili chichi? Ana nganimŵa jemanja? 20 Yisyene, jemanja mli uchimbichimbi wetu soni chisangalalo chetu.