Masalimo
Nyimbo ja Daudi.
138 Chinjachimbichisya wawojo ni mtima wangu wosope.
Pameso pa milungu jine,
Chinjijimba nyimbo syakwachimbichisya wawojo.*
2 Chinjatindiŵalila wawojo ndili ndolite ku nyumba jawo jeswela,
Soni chinjilichimbichisya lina lyawo
Ligongo lya chinonyelo chawo chakulupichika soni kudalilichika kwawo.
Pakuŵa wawojo atendekasisye yakuŵecheta yawo soni lina lyawo kuŵa yakupunda chine chilichose.*
3 Palisiku lyanaŵilasile wawojo, wawojo ŵanjanjile une.
Wawojo ŵandendekasisye kuti mbe jwakulimba mtima soni jwamachili.
4 Mamwenye gosope ga pachilambo chapasi gachachimbichisya wawojo, wawo Yehofa,
Pakuŵa jemanjajo chachiŵa ali apikene yilanga yaŵasasile wawojo.
5 Jemanjajo chachijimba nyimbo syakwamba matala ga Yehofa,
Pakuŵa uchimbichimbi wa Yehofa uli wekulungwa.
6 Atamose kuti Yehofa akusatama kwinani, jwalakwe akusiŵaganichisya ŵandu ŵakulinandiya.
Nambo mundu jwakulikwesya akusamtalichila.*
7 Atamose pangwenda pasikati pa yindu yakogoya, wawojo chachisunga une jwaumi.
Wawojo akusakamulichisya masengo mkono wawo wamachili ni kulimbana ni adani* ŵangu.
Mkono wawo wamlyo uchingulupusya.
8 Yehofa chachikwanilisya yindu yosope yene yakusaka kundendela une.
Wawo Yehofa, chinonyelo chawo chakulupichika chichitama mpaka kalakala.
Akagajasa masengo ga makono gawo.