Ngani Syambone Syaŵalembile Mateyu

9 Yesu paŵakwesile liboti, ŵajombochele lisi line ni kwika ku msinda wakumangwakwe. 2 Kweleko ŵandu ŵane ŵayiche kwa jwalakwe ni mundu jwakulwala ulwele wakuwa yiŵalo ali amgoneche pamachila.* Yesu paŵachiweni chikulupi chawo, ŵamsalile mundu jwakulwala ulwele wakuwa yiŵalo jula kuti, “Mkadandawula mwanangu! Yakulemwa yenu yikululuchidwe.” 3 Nambo alembi ŵane ŵatandite kuŵecheta m’mitima jawo kuti, “Mundu jweleju akunyosya Mlungu.” 4 Yesu pakumanyilila nganisyo syawo, jwatite, “Ligongo chichi jemanja mkuganisya yindu yakusakala m’mitima jenu? 5 Ana kusala kuti, ‘Yakulemwa yenu yikululuchidwe,’ kapena kusala kuti, ‘Mjimuche mjawuleje,’ yangasawusya ni yapi? 6 Nambo kuti jemanja mmanyilile kuti Mwanache jwa mundu akwete machili pachilambo chapasi gakululuchila yakulemwa . . .” Kaneko jwalakwe ŵamsalile mundu jwakulwala ulwele wakuwa yiŵalo jula kuti, “Mjimuche, mjigale machila genuga, ni mjawuleje kumangwenu.” 7 Myoyo mundujo jwajimwiche ni kwawulaga kumangwakwe. 8 Ŵanduwo paŵayiweni yeleyi, ŵatesile woga mnope, ni ŵatandite kumyamichila Mlungu, jwakusapeleka machili gelega kwa ŵandu.

9 Paŵatyosile kweleko, Yesu ŵam’weni mundu jwine lina lyakwe Mateyu ali atemi mu ofesi jakomesya msongo, ni ŵamsalile kuti, “Myiche, mŵe jwakulijiganya jwangu.” Ndaŵi jijojo ŵanyakwiche ni kutanda kumkuya. 10 Kaneko Yesu paŵapite kukulya ku nyumba ja Mateyu, kwayiche ŵakomesya msongo ŵajinji soni ŵandu ŵajinji ŵakutenda yakulemwa, ni ŵatandite kulya yimpepe ni Yesu soni ŵakulijiganya ŵakwe. 11 Nambo Afalisi paŵayiweni yeleyi, ŵawusisye ŵakulijiganya ŵakwewo kuti, “Ligongo chichi mwalimu jwenu akusalya yimpepe ni ŵakomesya msongo soni ŵandu ŵakutenda yakulemwa?” 12 Yesu paŵapikene yeleyi ŵatite, “Ŵandu ŵambonembonepe ŵangasosekwa dokotala, nambo ŵakulwala. 13 Sambano, mjawule mkalijiganye kugopolela kwa maloŵe gakuti, ‘Ngusasaka kuti mwalosyeje ŵane chanasa, ngaŵaga kuti mumbeje mbopesi.’ Pakuŵa une nganimbika kukwaŵilanga ŵandu ŵakulungama, nambo ŵakulemwa.”

14 Kaneko ŵakulijiganya ŵa Yohane ŵayiche kwa jwalakwe ni kumwusya kuti, “Ligongo chichi m’weji ni Afalisi tukusalijima kulya nambo ŵakulijiganya ŵenu ŵangalijima kulya?” 15 Pelepo Yesu ŵajanjile kuti, “Achimjakwe ŵa mlombela ŵangasosekwa kuwoneka ŵachanasa naga mlombelajo ali ni jemanjajo, ngaŵa myoyo? Nambo gachiyika masiku gakuti mlombelajo amtyosye pasikati pawo, pandaŵi jelejo ni pachachilijima kulya. 16 Pangali mundu jwakusatotelela chigamba cha nguwo janyuwani pa chakuwala chakala, ligongo nguwo janyuwanijo mpaka jiwute chakuwala chakalacho mwamti mpaka chipapuche mnope. 17 Nambosoni ŵandu ŵangaŵika finyo jwasambano m’misaku jalipende jakala. Naga akutenda yeleyi, misaku jalipendejo jikusawulika mwamti finyojo jukusajasika soni misakujo jikusajonasika. Nambo ŵandu akusaŵika finyo jwasambano m’misaku jalipende jasambano, mwamti yosopeyo yikusasunjika.”

18 Paŵaliji mkwasalila yindu yeleyi, jwakulamulila jwine jwayiche ni kumtindiŵalila, ni jwatite, “Pakwikana apano, mwanangu jwamkongwe komboleka kuti awile, nambo kwende kuti akamsajiche makono kuti aŵe ni umi.”

19 Yesu pampepe ni ŵakulijiganya ŵakwe ŵanyakwiche ni kumkuya jwalakwejo. 20 Kaneko jwamkongwe jwine juŵaliji mkulwala ulwele wakwasa myasi kwa yaka 12 jwayiche panyuma pa Yesu ni kukamula ulusi wa mumbesi* mwa mkanjo wakwe, 21 pakuŵa jwaliji mkuŵecheta mumtima mwakwe kuti, “Pachingambe kukamulape mkanjo wakwewo, chimbe chenene.” 22 Yesu paŵagalawiche ni kumwona jwamkongwejo, ŵatite, “Mkatenda woga mwanangu! Chikulupi chenu chimposisye.”* Ndaŵi jijojo jwamkongwejo jwaŵele chenene.

23 Sambano, paŵajinjile m’nyumba ja jwakulamulila jula ni kwawona ŵandu ali mkwimba yitolilo mwachanasa soni ŵandu ŵajinji ali mkulila, 24 Yesu jwatite, “Akopoche kaje amuno, ligongo msikanaju nganawa nambo akugona.” Pelepo jemanjajo ŵatandite kumseka mwachipongwe. 25 Ŵanduwo paŵagambile kukopoka, jwalakwe ŵajinjile kuŵaliji msikanajo, ni ŵamkamwile mkono, kaneko msikanajo jwajimwiche. 26 Ngani jeleji jawandile mu chigawo* chosopecho.

27 Yesu paŵatyokaga kweleko, achalume ŵaŵili ŵangalola ŵamkuyisye ali mkugumila kuti, “Atutendele chanasa, wawo Mwanache jwa Daudi.” 28 Sambano Yesu paŵajinjile m’nyumba jine, achalume ŵangalola ŵala ŵayiche kwa jwalakwe, ni jwawusisye kuti, “Ana mkwete chikulupi chakuti mpaka namposye?”* Jemanjajo ŵajanjile kuti, “Elo Ambuje.” 29 Kaneko jwalakwejo ŵakwayiye m’meso mwa jemanjajo, ni jwatite, “Yitendekwe mwakamulana ni chikulupi chenu.” 30 Papopo ŵatandite kulola. Nambosoni Yesu ŵasalile mwamachili kuti, “Mlolechesye kuti jwalijose akamanyilila yeleyi.” 31 Nambo paŵagambile kukopoka, jemanjajo ŵawandisye ya jwalakwejo mu chigawo chosope.

32 Achalumewo paŵatyokaga, ŵandu ŵayiche kwa jwalakwe ni mundu jwangaŵecheta juŵakwete chiŵanda. 33 Yesu paŵachikopwesye chiŵandacho, mundu jwangaŵecheta jula jwatandite kuŵecheta. Myoyo ŵanduwo ŵasimonjile mnope mwamti ŵatite, “Yindu mpela yeleyi nganiyiwonechejepo mu Yisalayeli chitandilile.” 34 Nambo Afalisi ŵaŵechetaga kuti, “Mundu jweleju akusakoposya yiŵanda ni machili ga jwakulamulila jwa yiŵanda.”

35 Sambano Yesu jwatandite ulendo wakwenda m’misinda ni m’misi josope, ni kwajiganyaga ŵandu m’masunagoge mwawo ni kwalalichilaga ngani syambone sya Uchimwene, soni kwaposya ŵandu yilwele ya mtundu uliwose soni yakusawusya yosope ya m’chilu. 36 Paŵaweni ŵandu ŵajinji, ŵatendele chanasa mnope, ligongo ŵanduwo ŵaliji ŵagwaguchegwaguche soni ŵakwasika mpela ngondolo syangali m’busa.* 37 Kaneko ŵasalile ŵakulijiganya ŵakwe kuti, “Yisyene, yagowola yili yejinji, nambo ŵamasengo ali ŵamnono. 38 Myoyo, mumŵende Msyene masengo gakugowola kuti atumisye ŵandu ŵajinji kumasengo gakwe gakugowola.”