Buku Jaŵili ja Ayimwene
4 Sambano jumo mwa achakongwe ŵa ŵanache ŵa ŵakulochesya ŵamdandawulile Elisa kuti, “Jwakutumichila jwawo jwele jwaliji ŵamkwangu ajasiche, soni wawojo akumanyilila chenene kuti jwakutumichila jwawojo ŵamjogopaga Yehofa ndaŵi syosope. Sambano jwangongole juyiche kukujigala ŵanache ŵangu wosope kuti akaŵe achikapolo ŵakwe.” 2 Pelepo Elisa ŵamwusisye jwalakwejo kuti, “Mkusaka namtendele chichi? Musalile mkwete chichi m’nyumba jenu?” Jwamkongwejo ŵajanjile kuti, “Une jwakutumichila jwawo nganingola kalikose m’nyumba jangu ngambile kola libotolo lya mawuta basi.” 3 Kaneko Elisa ŵamsalile jwamkongwejo kuti, “Mjawule mkajasime milulo* jangali chilichose kwa ŵandu wosope ŵimŵandikene nawo nyumba nambo mkaja kwasima jamnono. 4 Kaneko mkajinjile m’nyumba ni kuliwugalila mwelemo mmwejo ni ŵanache ŵenu, ni mkatajeje mawutago mumilulojo soni lulo lulilose lwalugumbele, mkaluŵicheje pambali.” 5 Myoyo jwamkongwejo jwanyakwiche.
Jwalakwe paŵaliwugalile m’nyumba yimpepe ni ŵanache ŵakwe ŵala, ŵanachewo ŵampelaga milulo jila jwalakwe ni jwatagaga mawutago m’milulo jila. 6 Milulo jila jili jigumbele, jwamkongwejo ŵasalile jumo mwa ŵanache ŵakwewo kuti, “Mumbele lulo lwine.” Mwanachejo ni jwajanjile kuti, “Pangalisoni lulo lwine.” Pelepo mawutago galesile kukopoka. 7 Myoyo jwamkongwejo jwayiche ni kumsalila mundu jwa Mlungu jwakuwonajo yayatendekweyo. Mundujo ni ŵamsalile jwamkongwejo kuti, “Mjawule mkasumisye mawutago ni mkalipile ngongole jenujo soni mbiya syakusigalasyo mkakamulichisye masengo mmwejo ni ŵanache ŵenu.”
8 Lisiku line Elisa jwapite ku Sunemu. Kweleko kwaliji kwana jwamkongwe jwine jwakuchimbichika. Jwamkongwejo jwamkanganichisye jwalakwe kuti alye yakulya kweleko. Mwamti ndaŵi syosope paŵapitaga mudelajo ŵajimaga panyumba ja jwamkongwejo kuti alye yakulya. 9 Myoyo jwamkongwejo jwasalile ŵamkwakwe kuti, “Ngumanyilila kuti mundu jwakusapita akuno ndaŵi syosopeju ali jwakutumichila jwapadela jwa Mlungu. 10 Ni kwende tumlinganyile kachipinda kamwana pamsakasa pa nyumbaji soni tumŵichile mwelemo bedi, tebulo, mpando, soni chakuŵikapo nyali. Ni chakulinga chakuti ndaŵi syosope payiche akuno atameje mwelemo.”
11 Lisiku line, Elisa jwayiche kweleko mwamti jwajinjile m’chipinda chila ni kuja kugona. 12 Kaneko jwalakwe ŵamsalile jwakutumichila jwakwe Gehasi kuti, “Mumŵilanje jwakongwe jwa ku Sunemujo.” Myoyo jwalakwe ŵamŵilasile jwamkongwejo mwamti jwayiche ni kwima pameso pakwe. 13 Kaneko jwalakwe ŵamsalile Gehasi kuti, “Mumsalile jwamkongwejo kuti, ‘Mmwejotu mlasile mnope pakututendela m’weji yosopeyi. Ana namtendele chichi? Ana yipali yamkusaka kuti ngamŵendele kwa mwenye kapena kwa mlongola jwa asilikali?’” Nambo jwamkongwejo jwajanjile kuti, “Une ngutama pasikati pa ŵandu ŵangu mwamti pangali chachikusawusya.” 14 Sambano Elisa ŵamwusisye Gehasi kuti, “Ana pelepa jwamkongweju ni tumtendele chichi?” Gehasijo ni jwajanjile kuti, “Jwamkongweju nganakola mwanache soni ŵamkwakwe ali ŵakalambale.” 15 Ndaŵi jijojo Elisa ŵamsalile Gehasijo kuti, “Mumŵilanje jwamkongwejo.” Myoyo jwalakwe ŵamŵilasile mwamti jwamkongwejo jwayiche ni kwima pamlango. 16 Kaneko Elisa ŵamsalile jwamkongwejo kuti, “Pandaŵi mpela jinojino chaka chamalaŵi chimchiŵa mli mpakete mwanache jwamwana.” Nambo jwamkongwejo ŵatite, “Iyayi ambuje ŵangu. Wawojotu ali mundu jwa Mlungu jwakuwona chonde akalambusya une jwakutumichila jwawo.”
17 Nambope jwamkongwejo jwakwete msigo mwamti jwaŵeleche mwanache jwamlume pandaŵi mpela jijojo mu chaka chakuyichisya mwakamulana ni yaŵaŵechete Elisa yila. 18 Mwanachejo paŵakusile, lisiku line ŵakuyiye babagwe ŵaŵaliji kumigunda yimpepe ni ŵandu ŵaŵatyosyaga mbeju. 19 Ali kumigundako, mwanachejo ŵatandite kulila ni kwasalilaga babagwewo kuti, “Mamane! Mamanejo mtwe wangu.” Babagwewo ni ŵamsalile jwamasengo jwawo kuti, “Mwanyakule aŵa, mkapeleche kwa mama ŵawo.” 20 Myoyo jwalakwe ŵamnyakwile mwanachejo ni kuja kukumpeleka kwa mamagwe, mwamti mwanachejo jwatemi pangongolo sya mamagwe mpaka musi, kaneko jwawile. 21 Kaneko jwamkongwejo ŵamnyakwile mwanachejo ni kuja kukumgoneka pabedi ja mundu jwa Mlungu jwakuwona jula. Panyuma pakwe jwalakwe ŵakopweche ni kuwugala litanga. 22 Sambano jwamkongwejo ŵaŵilasile ŵamkwakwe ŵala ni kwasalila kuti, “Andumichisye jwamasengo jumpepe soni bulu jumo kuti njawule mwachitemachitema kwa mundu jwa Mlungu jwakuwona jula kaneko chingawuje.” 23 Nambo jwalakwe ŵamwusisye kuti, “Ligongo chichi mkwawula lelo kuja kukumlola mundu jwa Mlungu jwakuwonajo? Lelotu nganiliŵa lisiku lyakuwoneka kwa mwesi soni nganiliŵa lisiku lya Sabata.” Nambo jwamkongwejo jwajanjile kuti, “Akadandawula yosope yili chenene.” 24 Myoyo jwamkongwejo jwaŵisile chakutamila pa bulujo ni ŵamsalile jwamasengo jwakwejo kuti, “Mjanguyeje mkajendaga panandipanandi ligongo lya une akaŵe naga namsalile.”
25 Myoyo jwamkongwejo ŵapite kwa mundu jwa Mlungu jwakuwona jula ku Litumbi lya Kalimeli. Mundu jwa Mlungu jwakuwonajo paŵagambile kumwona jwalakwe ali mkwika chapakutalichila, ŵamsalile Gehasi juŵaliji jwakutumichila jwakwe kuti, “Mlole! Jwamkongwe jwa ku Sunemu julatu ajo, akwika akuno. 26 Chonde mwutuche mkasimane ni jwalakwe soni mkawusye kuti, ‘Ana yosope yili chenene? Ŵamkwenu ali wuli? Nambo mwanache jwenu ali chenene?’” Pelepo jwamkongwejo ni jwajanjile kuti, “Yosope yili chenene.” 27 Jwamkongwejo paŵayiche petumbipo, pajwaliji mundu jwa Mlungu jwakuwonajo, ndaŵi jijojo jwalakwe jwakamwile sajo sya mundujo. Pelepo Gehasi jwayiche chiŵandika ni pajwaliji jwamkongwejo kuti amtute nambo mundu jwa Mlungu jwakuwonajo ŵamsalile jwalakwe kuti, “Mumleche jwalakweju akulagasika mnope mumtima, nambo ngangumanyilila ligongo lyakwe pakuŵa Yehofa nganasalila.” 28 Kaneko jwamkongwejo ni jwaŵechete kuti, “Ana une naŵendile wawojo ambuje ŵangu kuti ambe mwanache? Ana nganimbecheta kuti, ‘Akandendekasya kukulupilila yindu yaunami’?”
29 Ndaŵi jijojo Elisa ŵamsalile Gehasi kuti, “Mtaŵilile yakuwala yenu m’chiwunu mwenu soni mjigale ndodo janguji ni mjawule. Naga mkusimana ni mundu jwalijose mkasimumkomasya soni naga mundu jwine akumkomasya mkasimumjanga. Mnyakuche ni mkaŵiche ndodoji pangope ja mkanyamatako.” 30 Pelepo mamagwe mkanyamatako ŵatite, “Nditu ngulumbila pameso pa Yehofa Mlungu jwaumi soni pameso pa wawojo, une nganaleka wawojo.” Myoyo Elisa jwanyakwiche ni kulongana yimpepe ni jwamkongwejo. 31 Sambano Gehasi jwalongolele ni kuja kuŵika ndodo jila pangope ja kamnyamata kala. Nambo kamnyamataka nganikatenda yiliyose yakulosya kuti kajimwiche. Pelepo Gehasi jwawujile kwa Elisa ni kumsalila kuti, “Kamnyamata kalatu nganikajimuka.”
32 Elisa paŵajinjile m’nyumbamo ŵakasimene kamnyamata kewe kala ali akagoneche pabedi ja Elisajo. 33 Jwalakwe paŵajinjile m’nyumbamo jwawugele litanga mwamti ŵaliji ŵaŵilipe m’nyumbamo. Kaneko Elisa jwatandite kupopela kwa Yehofa. 34 Kaneko jwalakwe jwapite pajwaliji mwanachejo ni ŵatesile mpela akumgonela, mwamti pakamwa pakwe pagundene ni pakamwa pa mwanachejo, meso gakwe galolegene ni meso ga mwanachejo soni magasa gakwe ŵagaŵisile pamagasa ga mwanachejo. Jwalakwe jwatemi myoyo kwakandaŵi mwamti chilu cha mwanachejo chatandite kutukutila. 35 Panyuma pakwe jwalakwe jwatandite kwenda m’nyumbamo aku nakuku. Kaneko jwawujile pabedi pala ni kujasoni kumgonela mwanache jula. Pelepo mwanachejo jwayechemwile kakwana ka 7, panyuma pakwe jwawugwile meso gakwe. 36 Kaneko Elisa ŵamŵilasile Gehasi ni kumsalila kuti, “Mumŵilanje jwamkongwe jwa ku Sunemujo.” Kaneko jwalakwe ŵamŵilasile jwamkongwejo mwamti jwayiche. Elisa ni jwatite, “Mwanache jwenu aju mumnyakule.” 37 Pelepo jwamkongwejo jwayiche ni kutindiŵala pa sajo sya Elisa soni ŵajineme mpaka ngope jakwe pasi. Panyuma pakwe jwamkongwejo ŵamjigele mwanache jwakwejo ni kukopoka.
38 Elisa paŵawujile ku Giligala, m’chilambomo mwaliji mwana sala. Kaneko ŵanache ŵa ŵakulochesya ŵatemi pasogolo pa Elisajo. Elisa ni ŵamsalile jwakutumichila jwakwe kuti, “Mtamiche mpika wekulungwawo pamoto kuti mteleche yakulya yakuti alye ŵanache ŵa ŵakulochesyaŵa.” 39 Myoyo jumo mwa jemanjaji ŵapite kwitinji kukukaŵa liponda. Jwalakwe ali kweleko ŵakasimene kachitela ka mbonda syakwitinji mwamti ŵakaŵile mbonda syagumbala pa chakuwala chakwe. Jwalakwe ali awujile ni mbondasyo ŵasikatenye ni kusiŵika mumpika mula nambo nganayimanyililaga kuti yili yichichi. 40 Panyuma pakwe ŵajigele yakulyayo ni kwapa ŵanache ŵa ŵakulochesyawo kuti alye. Nambo paŵagambile kulya yakulyayo, jemanjajo ŵatandite kugumila kuti, “Wawo mundu jwa Mlungu jwakuwona, mumpikamutu mwana poyisoni.” Mwamti jemanjajo nganalyasoni yakulyayo. 41 Elisa ni ŵatite, “Ayiche nawo utandi panandi” Kaneko jwalakwe jwatasile utandiwo mu mpikawo, ni jwatite, “Ŵape ŵanduwo alye.” Pelepo yasimanikwe kuti mu mpikamo mwangalisoni poyisoni.
42 Sambano mundu jwine jwakutyochela ku Baala-salisa jwayiche ni mitanda 20 ja mkate* ja balele ni ŵampele mundu jwa Mlungu jwakuwonajo. Mitandaji ŵajipanganyisye kutyochela ku yisogosi yandanda kukomala. Ŵampelesoni msaku wa mbeju syaŵagambile kutyosya kwene kumigunda. Kaneko Elisa jwaŵechete kuti, “Ŵape ŵandu yakulyayi kuti alye.” 43 Nambo jwakutumichila jwakwejo jwawusisye kuti, “Ana mpaka yikomboleche wuli kwapa yakulya yeleyi ŵandu ŵakwana 100?” Pelepo Elisa ni ŵajanjile kuti, “Mwape ŵanduwo yakulyayo kuti alye. Pakuŵa Yehofa aŵechete kuti, ‘Jemanjajo chalye mpaka yine chiyisigale.’” 44 Myoyo jwalakwe ŵapele yakulyayo ŵanduwo mwamti ŵalile mpaka yine kusigala, mwakamulana ni maloŵe ga Yehofa gala.